Langutelo Ra Bibele
Xana Ku Olova Swi Vula Ku Tsana?
“Hlonga ra Hosi a ri fanelanga ri lwa, kambe ri fanele ri olova eka hinkwavo.”—2 TIMOTIYA 2:24.
NHLONGE ya hina yi sungula ku va ni switwi hi nga si velekiwa ni ku velekiwa. Loko hi velekiwa, hi navela ku khumbiwa hi mana wa hina. Ku sukela evutsongwaneni, mboyamelo wa hina wa ku hleka, wa ku va ni mintlhaveko ni ku navela ka hina ku va ni vuswikoti byo vulavula, swi kondleteriwa hi rirhandzu leri hi ri kumaka eka vatswari.
Hambiswiritano, Bibele yi vule leswaku emasikwini ya makumu vanhu va ta va “lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko.” Timfanelo leti kombisaka ku olova to kota musa ni ntwela-vusiwana a ti ta pfumaleka ngopfu, tanihi leswi vanhu va nga ta va “lava tirhandzaka,” ni “lava nga ni tihanyi, lava nga rhandziki vunene.”—2 Timotiya 3:1-3.
Namuntlha vanhu vo tala a va na ntwela-vusiwana. Va ehleketa leswaku loko munhu a olova, u tsanile. Xana swi tano?
Lava Nga Ni Ntwela-vusiwana Kambe Va Ri Ni Matimba
Yehovha Xikwembu u hlamuseriwa tanihi “nhenha ya nyimpi.” (Eksoda 15:3) Hi yena Xihlovo lexikulu xa matimba hinkwawo. (Pisalema 62:11; Varhoma 1:20) Kambe matimba ya Yehovha a ma n’wi sivelanga ku va ni “xinakulobye lexikulu swinene ni tintswalo” loko a hakela wanuna wo tshembeka la vuriwaka Yobo. (Yakobo 5:11) Loko a tirhisana ni Vaisrayele, Yehovha u kombise leswaku u va rhandza ngopfu hi ku fanisa ndlela leyi a titwaka ha yona ni ya wansati la an’wisaka la nga ni ntwela-vusiwana eka “n’wana wa khwiri rakwe.”—Esaya 49:15.
Hilaha ku fanaka, Yesu u hlanganise matimba ni ku olova. U va sole hi matimba varhangeri va vukhongeri lava nga ni vukanganyisi va le sikwini rakwe. (Matewu 23:1-33) Hi nkhinkhi u tlhele a hlongola vacincisi va mali etempeleni lava a va ri ni makwanga. (Matewu 21:12, 13) Xana ku venga ka Yesu vukanganyisi ni makwanga swi n’wi endle leswaku a nga vi na mhaka ni vanhu? Doo! Yesu a a tiviwa tanihi munhu la nga ni ntwela-vusiwana. Phela, a swi fanerile leswaku a tifanisa ni mbhaha lowu ‘hlengeletaka ntlawa wa swiciwana ehansi ka timpapa ta wona.’—Luka 13:34.
Matimba Ya Le Ndzeni Kumbe Ya Le Handle
Vakreste va ntiyiso va khutaziwa ku tekelela Kreste hi ku ambala “vumunhu lebyintshwa lebyi tumbuluxiweke hi ku ya hi ku rhandza ka Xikwembu.” (Vaefesa 4:20-24) Hi byeriwa leswaku hi “[hluvula] vumunhu bya khale ni mikhuva ya byona,” ku fana ni nkokotso lowu susaka xikhamba xa khale leswaku wu kota ku kula. (Vakolosa 3:9) Kambe, ku hambana ni nkokotso lowu tlhelaka wu tsindziyela hi ku famba ka nkarhi loko se wu suse xikhamba lexa khale, hina hi lerisiwa leswaku hi ambala, hi nga xi hluvuli “xinakulobye lexikulu xa tintswalo, musa, . . . ni ku va ni mbilu yo leha.” (Vakolosa 3:12) Hikwalaho, yin’wana ya timfanelo letikulu leti hi faneleke hi va na tona, i ku olova.
Ku va ni mfanelo yo tano ya musa a hi xikombiso xa ku tsana. Ematshan’weni ya sweswo, swi lava leswaku hi va “ni matimba eka munhu loyi [hi] nga yena endzeni hi matimba ya moya wa [Yehovha].” (Vaefesa 3:16) Hi xikombiso, wanuna la vuriwaka Lee u ri: “Tolweni a ndzi ri munhu wa tihanyi, xifamona. A ndzi chavisa loko u ndzi langutile, tanihi leswi a ndzi havaxele swin’wetsin’wetsi emirini. A ndzi tiyimisele ku va ni mali yo tala naswona a ndzi rhandza ku rhuketela ni madzolonga leswaku ndzi fikelela tipakani ta mina. A ndzi nga ri na ntwela-vusiwana.” Nilokoswiritano, Lee u sungule ku dyondza Bibele ni mutirhi-kulobye naswona u sungule ku tiva ni ku rhandza Yehovha Xikwembu. U hluvule vumunhu byakwe bya khale a dyondza ku tikhoma. Sweswi u kombisa rirhandzu rakwe eka van’wana hi ku tirhisa nkarhi wakwe hi ku tirhandzela a dyondzisa van’wana Bibele.
Muapostola Pawulo u tshame a va “murhukani” loyi a a tirhisa madzolonga leswaku a fikelela tipakani takwe. (1 Timotiya 1:13; Mintirho 9:1, 2) Kambe, loko Pawulo a xiye timfanelo ta musa ni rirhandzu leti Yehovha Xikwembu na Yesu Kreste va n’wi kombiseke tona, u lwele ku ti tekelela. (1 Vakorinto 11:1) Hambileswi Pawulo a yimeke a tiyile, a lwela misinya ya milawu ya Vukreste, u dyondze ku tirhisana ni van’wana hi tintswalo. Phela, Pawulo a a kombisa vamakwavo rirhandzu hi ku ntshunxeka.—Mintirho 20:31, 36-38; Filemoni 12.
Ku Va Ni Matimba Yo Kombisa Musa
Hilaha ntokoto wa Lee na muapostola Pawulo wu kombisaka hakona, ku dyondza ku tirhisana hi musa ni van’wana a swi vuli swona leswaku u fanele u va ni vumunhu lebyi tsaneke. Entiyisweni, a swi tano nikatsongo. Swi lava matimba ya xiviri ya ku hundzula ndlela leyi munhu a anakanyaka ha yona swin’we ni swiendlo swakwe ni ku lwa ni mboyamelo wa nyama leswaku hi nga “tlheriseli swo biha hi swo biha.”—Varhoma 12:2, 17.
Na hina hi nga dyondza ku va ni tintswalo hi ku dyondza Rito ra Xikwembu nkarhi ni nkarhi ni ku anakanyisisa hi rirhandzu ni tintswalo leti Yehovha Xikwembu ni N’wana wakwe Yesu Kreste, ana se va hi kombiseke tona. Hi ku endla tano, hi ta pfumelela matimba ya Rito ra Xikwembu ma olovisa timbilu ta hina. (2 Tikronika 34:26, 27; Vaheveru 4:12) Ku nga khathariseki leswaku hi kule njhani ekaya kumbe hi langutane ni xiyimo xa njhani ekaya, hi nga dyondza ku “olova eka hinkwavo.”—2 Timotiya 2:24.
Loko u tsakela ku kuma rungula leri engetelekeke kumbe u lava leswaku un’wana a ku endzela ekaya a ta dyondza na wena Bibele mahala, hi kombela u tsala, u rhumela vito ni adirese leyi kombisaka nomboro ya yindlu ya ka n’wina eka, Timbhoni ta Yehovha, Private Bag X2067, Krugersdorp, 1740, South Africa, kumbe eka adirese leyi faneleke eka leti longoloxiweke eka tluka 5.
[Xifaniso lexi nga eka tluka 31]
Tatana lonene u ni musa eka vana vakwe