Makhombo Ma Ta Hela Ku Nga Ri Khale
YESU u vule leswaku ku ta va ni ku tsekatseka ka misava, tinyimpi, mintungu ni mavabyi leswi nga ta komba leswaku se hi hanya ‘emakumu ya mafambiselo ya swilo.’ (Matewu 24:3, 7, 8; Luka 21:7, 10, 11) Makhombo lawa a ma vangiwi hi Xikwembu kumbe hi Yesu.
Kambe Xikwembu xi ta tisa leswi nga ta landzela endzhaku ka swikombiso leswi, ku nga Mfumo wa xona wa le tilweni lowu mufumi wa wona ku nga Yesu Kreste, ni ku herisiwa ka hinkwavo lava alaka vulawuri bya Yehovha. (Daniyele 2:44; 7:13, 14) Endzhaku ka sweswo misava ya hina yi ta va ndhawu yo rhula swinene, laha hi nga ta ka hi nga ha ti chavi timhangu ta ntumbuluko. Xitshembiso lexi landzelaka xa Xikwembu xi ta hetiseka hi ku helela: “Vanhu va mina va ta tshama endhawini yo rhula ni le ka vutshamo lebyi tshembiwaka hi ku helela ni le tindhawini to wisela leti nga kavanyetiwiki.”—Esaya 32:18.
Yingisa Xikwembu Ivi U Kuma Vutomi!
Hilaha swi hlamuseriweke hakona eka xihloko lexi hundzeke ku yingisa switsundzuxo swi nga ponisa vutomi bya hina. Nawu lowu wa tirha ni le ka swilemukiso leswi humaka eka Xikwembu leswi tsariweke eBibeleni. Xikwembu xa tshembisa: “Loyi a ndzi yingisaka, u ta tshama a sirhelelekile naswona a nge kavanyetiwi hi ku chava khombo.”—Swivuriso 1:33.
Timbhoni ta Yehovha ti lwela ku yingisa Xikwembu hi ku hlaya Rito ra xona leri huhuteriweke nkarhi ni nkarhi ni ku tirhisa leswi ri swi dyondzisaka evuton’wini bya tona. Na wena u rhambiwa ku endla tano. Ina, hinkwavo lava yingisaka Yehovha a va na xivangelo xo chava vumundzuku ni khombo leri nga ta wela lavo homboloka. Ku ri na sweswo va yimele ku va ni vutomi lebyi nga heriki emisaveni leyi nga Paradeyisi laha va nga ta “kuma ntsako lowu heleleke eku rhuleni lokukulu.”—Pisalema 37:10, 11.
[Bokisi eka tluka 8]
NCHAVELELO EKA LAVA RILAKA
Xana ku ni varhandziwa va wena lava feke hikwalaho ka khombo ra ntumbuluko kumbe timhangu tin’wana? Kwalomu ka malembe ya 2 000 lama hundzeke, munghana wa Yesu, Lazaro u file. Loko Yesu a twa hi ta nkosi lowu, u suke a ya eBetaniya laha Lazaro a a tshama kona, kutani a fika a n’wi pfuxa “evurhongweni” bya rifu.—Yohane 11:1-44.
Yesu u pfuxe Lazaro ku nga ri ntsena hileswi a a n’wi rhandza ni ndyangu wakwe kambe leswaku a ta tiyisa xitshembiso xa yena xa leswaku “hinkwavo lava nga eka masirha-bako ya xitsundzuxo” va ta pfuxiwa hi nkarhi wa ku Fuma kakwe. (Yohane 5:28, 29) Ina, eParadeyisini leyi taka, Yesu u ta herisa vubihi hinkwabyo lebyi sunguleke hi ku xandzuka le Edeni.a—1 Yohane 3:8.
[Nhlamuselo ya le hansi]
a Leswaku u kuma switsundzuxo swa Matsalwa mayelana ni ndlela leyi u nga ku tiyiselaka hakona ku feriwa hi munhu loyi u n’wi rhandzaka ni rungula leri engetelekeke mayelana ni ku pfuxiwa ka vafi, hi kombela u hlaya broxara leyi nge Loko U Feriwa Hi Loyi U N’wi Rhandzaka, leyi kandziyisiweke hi Timbhoni ta Yehovha.
[Bokisi/Xifaniso eka tluka 9]
KU TSEKATSEKA KA MISAVA KU HUNDZULE VUTOMI BYA MINA
Hi 1971, a ndzi ri ntswedyana naswona a ndzi lava ku va xilombe xa vuyimbeleri bya opera. Ndzi suke laha ndzi nga tswaleriwa kona le Winnipeg, eManitoba, le Canada hi 1957, leswaku ndzi ta tshama ekusuhi ni le Hollywood, eCalifornia, le U.S.A., hi ntshembo wa leswaku ndzi ta va xilombe xa vuyimbeleri bya opera.
Mana wa mina i Mbhoni ya Yehovha naswona u ndzi endzele ko tala hi ximumu a suka le Canada. Loko a ndzi endzerile a a bula na mina hi Bibele, hikuva a a tshemba leswaku yi ni switsundzuxo leswinene mayelana ni ntsako ni vutomi bya ndyangu. A ndzi n’wi rhandza Manana naswona a ndzi n’wi yingisa hi xichavo. Kambe nkarhi na nkarhi loko a tlhelela ekaya a ndzi cukumeta tibuku leti a a ndzi nyika tona, hikuva a ndzi tshemba leswaku vutomi bya mina a byi famba kahle.
Kutani siku rin’wana hi Ravumbirhi ni mixo hi February 1971, ndzi pfuxiwe hi ku tsekatseka ka misava loku pimiweke ku va 6,6 eka xikalo xa Richter. Huwa ya kona a yi pfala ni tindleve naswona ku tsekatseka ka kona a ku chavisa. A ndzi chuhile swinene, hiloko ndzi tsutsumela ekamareni ra n’wana wa mina naswona a ndzi tsakile ku n’wi kuma a ha hlayisekile. Loko ku tsekatseka ku hela, a ku tele swipetlu swa mabodlhela ehansi ni swilo leswi a ndzi swi hlayise endzeni ka tikhabodo, naswona mati lama a ma ri exidan’wanini xo hlambela a ma tele ejarateni. Hambileswi ndyangu wa mina a wu hlayisekile, vurhongo a bya ha khomanga.
Manana a a tshame a bula na mina hi swikombiso swa ‘masiku yo hetelela’ xin’wana xa swona ku nga “ku tsekatseka lokukulu ka misava.” (2 Timotiya 3:1; Luka 21:7-11) Loko a endza nakambe hi ximumu xa lembe rero a nga ha tanga na tona tibuku ta Bibele. Leswi a a bule na mina hi Bibele malembe ya kaye ku nga ri na nhlanga leyi balekaka ngati, u vhele a ehleketa leswaku a ndzi swi tsakeli. Kasi, se ndzi cincile! Loko a fika ndzi n’wi tlhome hi swivutiso swo tala. Ndhuma ni ku yimbelela a swi nga ha ri swa nkoka eka mina.
Vhiki rolero ndzi ye eminhlanganweni ya Vukreste na Manana eHolweni ya Mfumo, naswona ku sukela kwalaho a ndza ha langutanga endzhaku. U endle malunghiselelo ya leswaku ndzi dyondzeriwa Bibele ekaya. Ndzi khuvuriwe hi 1973, naswona namuntlha ndzi heta tiawara ta kwalomu ka 70 hi n’hweti ndzi ri karhi ndzi chumayela mahungu lamanene ya Mfumo wa Xikwembu. (Matewu 24:14) Hakunene, ku tsekatseka ka misava ku tiyise ripfumelo ra mina eka Xikwembu.—Mhaka leyi yi runguriwe hi Colleen Esparza.