Tshinela Eka Xikwembu
“A Tsakisa Yehovha”
“A NDZI titwa ndzi nga ha faneleki.” Marito lawa ma vuriwe hi wanuna loyi a a tshike ku hanya hi milawu ya Xikwembu leyi a dyondzisiweke yona a ha ri ntsongo. Loko a cinca mahanyelo yakwe, a a ehleketa leswaku Xikwembu a xi nge n’wi rivaleli. Kambe mudyohi loyi, la hundzukeke u kume ntshembo eka rungula leri nga eBibeleni ra Manase leri nga eka 2 Tikronika 33:1-17. Loko na wena u tshame u titwa hi ndlela leyi fanaka hikwalaho ka swidyoho leswi u tshameke u swi endla, xikombiso xa Manase xi nga ku chavelela.
Manase u kuriseriwe endyangwini lowu chavaka Xikwembu. Tata wakwe Hezekiya, a a ri un’wana wa tihosi leti a ti xiximeka swinene eYuda. Manase u velekiwe endzhaku ka malembe manharhu loko Xikwembu xi ta va xi engetele masiku ya tata wakwe hi singita. (2 Tihosi 20:1-11) A swi kanakanisi leswaku Hezekiya a a teka n’wana wakwe tanihi nyiko leyi humaka eka Xikwembu naswona u n’wi dyondzise ku rhandza vugandzeri bya ntiyiso. Kambe a hi minkarhi hinkwayo vana lava vatswari va vona va chavaka Xikwembu va landzelaka xikombiso xa vona. Manase na yena a nga xi landzelanga.
Manase a a ri na malembe ya 12 loko tata wakwe a fa. Khombo ra kona, “u endle swo biha ematihlweni ya Yehovha.” (Tindzimana 1, 2) Xana swi nga ha endleka leswaku a a kuceteriwa hi vatsundzuxi lava a va nga ri na mhaka ni vugandzeri bya ntiyiso? Bibele a yi boxi. Yi hi byela leswaku Manase u simeke vugandzeri bya swifaniso swa hava naswona u endle swo biha hi mpimo lowukulu. U endlele swikwembu swa hava tialitari, a endla switlhavelo hi vana vakwe va majaha, a tirhisana ni mimoya a tlhela a veka xifaniso lexi vatliweke etempeleni ya Yehovha ya le Yerusalema. Leswi a a ome nhloko, u ale ku yingisa switsundzuxo leswi Yehovha la endleke leswaku a velekiwa a n’wi nyikeke swona hi ku phindha-phindha.—Tindzimana 3-10.
Eku heteleleni, Yehovha u endle leswaku Manase a bohiwa hi tinsimbi kutani a yisiwa eBabilona. Loko a ri evuhlongeni, u ve ni nkarhi wo anakanyisisa hi tindlela takwe. Xana swi nga ha endleka leswaku u swi xiyile leswaku swifaniso swakwe leswi nga hanyiki a swi swi kotanga ku n’wi pfuna? Xana u tsundzuke leswi tata wakwe la chavaka Xikwembu a n’wi dyondziseke swona loko a ha ri ntsongo? Ku nga khathariseki xivangelo xa kona, Manase u hundzukile. Rungula ra kona ri ri: “A tsakisa Yehovha Xikwembu xakwe, a hambeta a titsongahata ngopfu . . . A hambeta a N’wi khongela.” (Tindzimana 12, 13) Kambe, xana wanuna yoloye la endleke swidyoho swo tano a a ta rivaleriwa hi Xikwembu?
Yehovha u khumbiwe hi ku hundzuka ka Manase loku humaka embilwini. U xi twile xikombelo xakwe xo kombiwa tintswalo hiloko “a n’wi vuyisela eYerusalema evuhosini byakwe.” (Ndzimana 13) Ku kombisa leswaku u hundzukile, Manase u suse vugandzeri bya swifaniso swa hava naswona u khutaze vanhu vakwe leswaku va “tirhela Yehovha.”—Tindzimana 15-17.
Loko u titwa u nga faneleki ku rivaleriwa hi Xikwembu hikwalaho ka swidyoho swa nkarhi lowu hundzeke, xikombiso xa Manase xi nga ku khutaza. Rungula leri i xiphemu xa rito ra Xikwembu leri huhuteriweke. (Varhoma 15:4) Swi le rivaleni leswaku Yehovha u lava leswaku hi swi tiva leswaku u “lunghekele ku rivalela.” (Pisalema 86:5) Lexi nga xa nkoka eka Yehovha a hi xidyoho, kambe i ku hundzuka ka mudyohi swi suka embilwini. Mudyohi la khongelaka swi suka embilwini, a tshika tindlela takwe to biha kutani a tiyimisela ku endla leswi nga swinene, a nga “tsakisa Yehovha” hilaha Manase a endleke hakona.—Esaya 1:18; 55:6, 7.
Tindzimana Ta Bibele Leti U Nga Ti Hlayaka Hi January: