Ku Suka Eka Swakudya Swa Paseka Ku Ya Eku Ponisiweni

“Nḍi ta tlakusa nḍeko wa šilamulelo, kutani nḍi ta khongela v̌ito ra Yehova.”—PSALMA 116:13.

1. Hi rihi risimu leri tsakisaka hi minkarhi hinkwayo leri nga ha khumbaka vumundzuku bya wena?

XANA a wu ta ri tsakela ku fikela kwihi risimu leri vulavulaka hi ku kuma ka wena vumundzuku byo leha, lebyi tsakisaka? Entiyisweni risimu ro tano i murhandziwa wa nkarhi hinkwawo. Hambi swi ri tano, u le ka xiyimo xo antswa swinene ku tlula vo tala ku twisisa ni ku tiphina hi risimu leri ra nkoka. Vayuda va ri vitana Hallel (Ku Dzunisa). Ri vumbiwe hi Tipisalema 113 ku ya ka 118, ri hi khutaza ku yimbelela “Haleluya,” kumbe “Dzunisani Jah.”

2. Xana risimu leri ri tirhisiwa njhani naswona ri yelana ni Swakudya swa Paseka hi ndlela yihi?

² Vayuda va yimbelela Hallel enkhubyeni wa vona wa Paseka, ku yimbelela loku ku nga ka nkarhi lowu Xikwembu a xi ri na tempele ha wona laha swiharhi a swi tlhaveriwa kona. Namuntlha, ri yimbeleriwa emakaya ya Vayuda hi nkarhi wa nkhuvo ni swakudya swa Paseka leswi vuriwaka Seder. Kambe a hi vangani lava ri yimbelelaka eka Swakudya swa vona swa Paseka lava kumaka nkoka wa xiviri wa Psalma 116:13: “Nḍi ta tlakusa nḍeko wa xilamulelo, kutani nḍi ta khongela v̌ito ra Yehova.” Kambe, ha yini ku pona ku yelanisiwa ni Paseka naswona xana swi nga endleka leswaku ku pona ka wena ka katseka?

Paseka—Nkhuvo Wa Ku Ponisiwa

3. Hi wahi masungulo ya Swakudya swa Paseka?

³ Tsundzuka leswaku Vaisrayele a va ri mahlonga aEgipta ehansi ka Faro wa tihanyi. Eku heteleleni, Yehova u tirhise Muxe leswaku a yisa vanhu va Yena eku ntshunxekeni. Endzhaku ka loko Xikwembu xi tise makhombo ya kaye aEgipta, Muxe u tivise ra vukhume. Yehova a a ta dlaya mativula eka ndyangu wun’wana ni wun’wana wa Vaegipta. (Eksoda 11:1-10) Kambe, Vaisrayele a va ta hlayisiwa. Njhani? A va fanele va dlaya nyimpfu, va tota ngati ya yona emarimbeni ya timbati ta vona ivi va tshama endzeni va dya nyama ya xinyimpfana, xinkwa xo pfumala comela ni matsavu lama bavaka. Hi nkarhi wa Swakudya sweswo swa Paseka, Xikwembu a xi ta “hunḍa” xi nga ma dlayi mativula ya vona.—Eksoda 12:1-13.

4, 5. Xana Paseka yi ponise vo tala hi ndlela yihi? (Psalma 106:7-10)

⁴ Loko a hlamula khombo leri ra vukhume, Faro u te eka Muxe: “Sukani tikweni ra mina, ṅwina ni v̌ana v̌a Israel, mi ya tirela Yehova.” (Eksoda 12:29-32) Endzhaku ka loko Vaheveru ni “la’v̌o tala v̌a matiko” lava nga ni ntwela-vusiwana va fambile, Faro u cince miehleketo ya yena ivi a va sala hi le ndzhaku. Kutani Xikwembu xi va pfuna hi singita leswaku va baleka hi ku tsemakanya Lwandle lero Tshwuka, laha Faro ni vuthu rakwe leri hlongorisaka va feleke kona.—Eksoda 12:38; 14:5-28; Psalma 78:51-53; 136:13-15.

⁵ Muxe u byele Israyele eLwandle lero Tshwuka a ku: “Mi nga tšhav̌i; yimani mi ta v̌ona hi laha Yehova a nga ta mi lamulela ha kona namuntlha.” Endzhakunyana va yimbelerile: “Yehova i matimba ya mina, ni risimu ra mina; hi yena Mukuṭuri wa mina. Hi šona Šikwembu ša nga; nḍi ta ši twarisa.” (Eksoda 14:13; 15:2) Ina, ku kutsuriwa ka Israyele eka khombo ra vukhume ni le Lwandle lero Tshwuka a ku ri ku ponisiwa. Swi fanerile loko mupisalema a hlamusela Yehova tanihi Xikwembu lexi “ponisaka la misav̌eni.”—Psalma 68:6, 20; 74:12-14; 78:12, 13, 22.

6, 7. Ha yini Paseka yi sunguriwile, naswona ha yini sweswi yi hlayisiwa hi tindlela leti hambaneke ni Paseka yo sungula?

⁶ Vaheveru a va fanele va hlayisa Paseka tanihi xitsundzuxo xa ku ponisiwa. Xikwembu xi te: “E siku lero ši ta v̌a šiṭunḍuxo ša ṅwina; mi ta ri hlawula wu va e nkhuv̌o wa Yehova e tinšakeni ta tinšaka.” (Eksoda 12:14) Eka swakudya swin’wana ni swin’wana swa Paseka kumbe Seder, tatana a a fanele a tsundzuxa ndyangu wa yena hi ku ponisiwa koloko. Yehova u lerisile: “Loko v̌ana v̌a ṅwina v̌a mi v̌utisa, v̌a ku: Mi ṭunḍuka yini hi maendlela lawa šana? Mi ta ku ka v̌ona: I ganḍelo ra Paska ya Yehova l’a nga hunḍa e tindlwini ta v̌ana v̌a Israel [a] Egipta, loko a ba Egipta, a hlayisa tindlu ta hina.”—Eksoda 12:25-27.

⁷ Leswi Vayuda va ha hlayisaka Swakudya swa Paseka ni namuntlha, swi tiyisa ntiyiso wa mhaka yoleyo. Hambi swi ri tano, mikhuva yin’wana ya vona ya hambana ni leswi Xikwembu xi swi leriseke. The Origins of the Seder yi ri: “Bibele yi katsa tinhlamuselo leti anameke ta Paseka ni Nkhuvo wa Xinkwa xo Pfumala Comela; hambi swi ri tano, tinhlamuselo leti a ti twanani ni mahlayiselo ya sweswi ya holideyi leyi. Hi laha ku hlawulekeke, mahlayiselo ya le Bibeleni ya kombetela eka gandzelo ra paseka, leri eka tibuku ta le ndzhaku ka Bibele ri nga ha tekiwiki ri ri ra nkoka.” Xivangelo lexikulu hi leswaku Vayuda va hava tempele yo endlela magandzelo ya swiharhi eka yona.

8. Hi xihi xivangelo xo hlawuleka lexi hi nga na xona xo kambisisa Paseka?

⁸ Vakriste va nga dyondza minkhuvo hinkwayo leyi Xikwembu xi yi nyikeke Vaisrayele va khale hi laha ku vuyerisaka,a kambe sweswi ku ni swivumbeko swin’wana swa Paseka leswi faneleke hi nyingiso wa hina lowukulu. Yesu, Muyuda, u hlayise Paseka. Eka xiendlakalo xo hetelela lexi a endleke sweswo u andlale nkhuvo wun’we wa le henhla wa Vakriste—Xilalelo xa Hosi, xitsundzuxa rifu ra Yesu. Kutani nkhuvo lowu wa Vukriste wu yelanisiwa ni Paseka.

Wu Tlula Xinyimpfana Xa Paseka

9, 10. Xana xinyimpfana xa Paseka a xi ri gandzelo ro hlawuleka kumbe leri xiyekaka hi ndlela yihi?

⁹ Vaheveru 10:1 yi hi byela leswaku ‘Nawu a wu ri ndzhuti wa swilo leswinene leswi nga ta ta.’ Cyclopædia of Biblical, Theological, and Ecclesiastical Literature, hi M’Clintock na Strong yi ri: “A ku na ndzhuti wun’wana wa swilo leswi nga ta ta lowu nga enawini lowu nga ringanaka ni nkhuvo wa Paseka.” Hi ndlela yo karhi xinyimpfana xa Paseka a xi ri na wona nkoka lowu anameke ku tlula nkhuvo lowu tsundzukaka ndlela leyi Xikwembu xi poniseke mativula ni Vaheveru hinkwavo leswaku va huma aEgipta.

¹⁰ Xinyimpfana xexo a xi hlawulekile eka timhaka to hlayanyana. Hi xikombiso, magandzelo yo tala ya swihari ya Nawu wa Muxe a ma endliwa hi munhu un’we mayelana ni swidyoho kumbe milandzu ya yena naswona swirho swa swiharhi a swi hisiwa ealtarini. (Levitika 4:22-35) Nyama yin’wana ya gandzelo ra paseka a yi nyikiwa vaprista lava langutelaka kumbe vaprista van’wana. (Levitika 7:11-38) Hambi swi ri tano, hi paschal kumbe Paseka, xinyimpfana a xi nga tirhisiwi ealtarini naswona a xi nyikeriwa hi ntlawa wa vanhu, hi ntolovelo ku va ku ri ndyangu, lava a ku ri vona va dyaka.—Eksoda 12:4, 8-11.

11. A ri ri rihi langutelo ra Yehova ra xinyimpfana xa Paseka, naswona a xi kombetela eka yini? (Tinhlayo 9:13)

¹¹ Yehova u teke xinyimpfana xa Paseka xi ri xa nkoka lerova a xi vitana “maganḍelo ya mina.” (Eksoda 23:18; 34:25) Vadyondzi va vule leswaku “gandzelo ra paseka a ri ri gandzelo ra Yehova ro antswa swinene.” Handle ko kanakana xinyipfana lexi a xi kombetela kumbe ku fanekisela gandzelo ra Yesu. Hi vula sweswo hikuva muapostola Pawulo u vitane Yesu “xinyimpfana xa hina xa Paseka [loyi a tlhaviweke].” (1 Vakorinto 5:7) Yesu u vitaniwe tanihi “Xinyimpfana xa Xikwembu” ni “Xinyimpfana lexi tshamaka xi dlayiwa.”—Yohane 1:29; Nhlavutelo 5:12; Mintirho 8:32.

Ngati Leyi Ponisaka Vutomi

12. Xana ngati ya xinyimpfana a yi ri na xiphemu xihi eka Paseka yo sungula?

¹² Le Egipta ngati ya xinyimpfana a yi ri ya nkoka ku kuma ku pona. Loko Yehova a dlaye mativula, U hundze tiyindlu leti a ku ri na ngati emarimbeni ya timbati ta tona. Ku tlula kwalaho, hikwalaho ka leswi Vaheveru a va nga rileli rifu ra mativula ya vona, a va ri eka xiyimo xo macha va tsemakanya Lwandle lero Tshwuka va ya entshunxekweni.

13, 14. Xana ngati ya Yesu yi ponisa vutomi ni ku va ya nkoka eku kumeni ka ku pona hi ndlela yihi? (Vaefesa 1:13)

¹³ Ni namuntlha ngati ya ha katseka ku kuma vutomi—ngati ya Yesu leyi halatiweke. Loko ‘nkhuvo wa paseka ya Vayuda wu ri kusuhi’ hi 32 C.E., Yesu u byele vayingiseri vo tala a ku: “Loyi a dyaka nyama ya nga ni ku nwa ngati ya nga, ú ni vutomi lebyi nga heriki, kutani mina ndzi ta n’wi pfuxa hi siku ra makumu. Hikuva nyama ya nga i swakudya swa xiviri, ni ngati ya nga i swakunwa swa xiviri.” (Yohane 6:4, 54, 55) Vayingiseri va yena hinkwavo va Vayuda a va ta tsundzuka Paseka leyi tshinelaka ni leswaku ngati ya xinyimpfana yi tirhisiwile aEgipta.

¹⁴ Yesu hi nkarhi wolowo a nga hlamuseli swifanekiselo leswi tirhisiwaka eka Xilalelo xa Hosi. Nkhuvo wolowo lowuntshwa wa Vakriste a wu simekiwanga ku kondza ku va endzhaku ka lembe, kutani hambi ku ri vaapostola lava va tweke Yesu hi 32 C.E. a va nga tivi nchumu ha wona. Nakambe, Yesu a a kombisa leswaku ngati ya yena a yi ri ya nkoka ku kuma ku pona loku nga heriki. Pawulo u hlamuserile: “Hikuva, hi ku fa ka Kriste, ha kutsuriwa, hi rivaleriwa swidyoho swa hina. Tintswalo ta Xikwembu i tikulu ngopfu.” (Vaefesa 1:7) Hi nga hanya hi laha ku nga heriki exisekelweni xa ngati ya Yesu ntsena.

Ku Pona Ka Njhani Naswona Kwihi?

15. Eka Vaheveru le Egipta i ku pona ni malunghelo wahi leswi kotekeke naswona i yini leswi nga kotekangiki? (1 Vakorinto 10:1-5)

¹⁵ Le Egipta wa khale a ku katseka ku pona loku hikiweke ntsena. A nga kona la humeke aEgipta loyi a a langutele ku nyikiwa vutomi lebyi nga heriki endzhaku ka Riendzo. I ntiyiso, Xikwembu xi hlawule Valevhi leswaku va va vaprista va tiko naswona van’wana va rixaka ra Yuda va ve tihosi ta nkarhinyana, kambe hinkwavo ka vona a va ta fa. (Mintirho 2:29; Vaheveru 7:11, 23, 27) Hambi loko “la’v̌o tala v̌a matiko” lava na vona va humeke aEgipta va nga vanga na wona malunghelo wolawo, vona kun’we ni Vaheveru a va tshemba ku fika eTikweni leri Tshembisiweke ivi va tiphina hi vutomi byo antswa va gandzela Xikwembu. Nakambe, malandza ya Yehova ya le mahlweni ka Vukriste a ma ri na xisekelo xo tshemba leswaku hi ku famba ka nkarhi a va ta swi kota ku tsakela vutomi lebyi nga heriki emisaveni, laha Xikwembu a xi kunguhate leswaku vanhu va hanya kona. Leswi a swi ta fambisana ni xitshembiso xa Yesu eka Yohane 6:54.

16. Xana malandza ya Xikwembu ya khale a ma ta va ni ntshembo wa ku pona ka muxaka muni?

¹⁶ Xikwembu xi tirhise malandza ya xona man’wana leswaku ma tsala marito lama nyanyulaka mayelana ni misava leyi vumberiweke ku akiwa ni mayelana ni lava lulameke lava hanyaka eka yona hi laha ku nga heriki. (Psalma 37:9-11; Swivuriso 2:21, 22; Esaya 45:18) Kambe, xana vagandzeri va ntiyiso a va ta ku kumisa ku yini ku pona ko tano loko va file? Loko Xikwembu xi va tlherisela evuton’wini emisaveni. Hi xikombiso, Yobo u phofule ntshembo wa leswaku a a ta tsundzukiwa ivi a tlheriseriwa evuton’wini. (Yobo 14:13-15; Daniel 12:13) Handle ko kanakana, ndlela yin’wana yo kuma ku pona i ku kuma vutomi lebyi nga heriki emisaveni.—Matewu 11:11.

17. Xana Bibele yi kombisa leswaku van’wana va nga kuma ku pona kwihi loku hambaneke?

¹⁷ Bibele nakambe yi vulavula hi ku ponela evuton’wini bya le tilweni, laha Yesu Kriste a yeke kona endzhaku ka ku pfuxiwa ka yena. “Yena loyi a yeke etilweni, kutani sweswi ú le vokweni ra xinene ra Xikwembu, tintsumi ni vafumi ni leswa matimba swi ri ehansi ka yena.” (1 Petro 3:18, 22; Vaefesa 1:20-22; Vaheveru 9:24) Kambe Yesu a hi munhu a ri yexe la tekeriweke etilweni. Xikwembu xi kunguhate leswaku xi ta tlhela xi teka nhlayo yintsongo ya van’wana emisaveni. Yesu u byele vaapostola a ku: “Tindhawu ti tele endlwini ya Tata wa mina; loko a swi nga ri tano, a ndzi ta va ndzi mi byerile; kutani ndzi ya mi lunghisela kona. Loko ndzi yile ku ya mi lunghisela kona, ndzi ta vuya, kutani ndzi ta mi teka mi ta ka mina, leswaku laha ndzi nga kona, mi va kona na n’wina.”—Yohane 14:2, 3.

18. Sweswi hi na swivangelo swihi swo kambisisa ku ponela evuton’wini bya le tilweni?

¹⁸ Ku ponela evuton’wini bya le tilweni ku ya hlangana na Yesu hi lokunene swinene ku tlula ku pona loku hikiweke loku a ku katseka eka Paseka yo sungula. (2 Timotiya 2:10) A ku ri emadyambyini ya Seder, kumbe swakudya swa Paseka, leyi tiyeke yo hetelela, laha Yesu a sunguleke nkhuvo lowuntshwa wa valandzeri vakwe, lowu a wu kombetela eka ku ponela evuton’wini bya le tilweni. U byele vaapostola a ku: “Endlani leswi hi ku ndzi anakanya.” (Luka 22:19) Hi nga si kambisisa ndlela leyi Vakriste va faneleke ku hlayisa nkhuvo lowu ha yona, a hi kambisiseni mhaka ya leswaku hi fanele hi endla tano rini.

“Nkarhi Lowu Vekiweke”

19. Ha yini swi twala ku yelanisa Paseka ni Xilalelo xa Hosi?

¹⁹ Yesu u te: “Ndzi naverile ngopfu ku dya Paseka leyi na n’wina, ndzi nga si twisiwa ku vaviseka.” (Luka 22:15) Kutani endzhaku ka sweswo u andlale Xilalelo xa Hosi, lexi valandzeri vakwe a va ta xi hlayisa tanihi xitsundzuxo xa rifu rakwe. (Luka 22:19, 20) Paseka a yi khomiwa kan’we hi lembe. Hikwalaho, swa twala leswaku Xilalelo xa Hosi xi endliwa kan’we hi lembe. Rini? Hi ku fanela, hi ximun’wana xa nkarhi wa Paseka. Sweswo a swi ta vula loko Nisan 14 (khalendara ya Xiyuda) yi fika, ematshan’weni yo namarhela Ravuntlhanu minkarhi hinkwayo hi mhaka ya leswi rero a ri ri siku ra vhiki leri Yesu a feke ha rona.

20. Hikwalaho ka yini Timbhoni ta Yehova ti tsakela Nisan 14?

²⁰ Kutani Nisan 14 ri ta va ri ri siku leri Pawulo a anakanya ha rona loko a tsarile a ku: “Minkarhi hinkwayo loko mi dya xinkwa lexi, ni loko mi nwela exinwelweni lexi, mi vula rifu ra Hosi yi kondza yi ta.” (1 Vakorinto 11:26) Eka malembe xidzana mambirhi lama landzeleke, Vakriste vo tala lava namarheleke Nisan 14, va tiviwa tanihi Vaquartodeciman, leri humaka eka Xilatini leri vulaka ku “ti-14.” M’Clintock na Strong va vika: “Tikereke ta le Asia Minor a ti tlangela rifu ra Hosi hi siku leri fambisanaka ni ti-14 ta n’hweti ya Nisan, laha hi siku ra kona, hi ku ya hi mianakanyo ya Kereke hinkwayo ya khale, ku vambiwa ku humelele ha rona.” Namuntlha, Timbhoni ta Yehova ti hlayisa Xilalelo xa Hosi lembe na lembe hi siku leri fambisanaka na Nisan 14. Kambe, van’wana va swi xiyile leswaku leswi swi nga ha va swi hambana ni siku leri Vayuda a va endla Paseka ya vona ha rona. Ha yini?

21. Xana xinyimpfana xa Paseka a xi fanele xi tlhaviwa rini kambe i yini leswi Vayuda va swi endlaka namuntlha?

²¹ Siku ra Vaheveru a ri sukela eku peleni ka dyambu (kwalomu ka awara ya tsevu) ku ya eka ku pela ka dyambu loku landzelaka. Xikwembu xi lerise leswaku xinyimpfana xa Paseka xi dlayiwa hi Nisan 14 ‘exikarhi ka madyambu lawa mambirhi.’ (Eksoda 12:6) Xana sweswo a swi ta va rini? Vayuda va manguva lawa va namarhela eka langutelo ra matsalwa ya varhabi ra leswaku xinyimpfana xi fanele xi tlhaviwa ekusuhi ni ku hela ka Nisan 14, exikarhi ka nkarhi lowu dyambu ri sungulaka ku rhenga (kwalomu ka awara ya nharhu) ni ku pela ka dyambu ka xiviri. Hikwalaho, va va ni Swakudya swa vona swa Paseka endzaku ka ku pela ka dyambu, loko Nisan 15 yi sungurile.—Marka 1:32.

22. Hi xihi xivangelo lexi endlaka leswaku siku ra Xitsundzuxo ri hambana ni siku leri Vayuda va endlaka Paseka ya vona ha rona? (Marka 14:17; Yohane 13:30)

²² Hambi swi ri tano, hi ni xivangelo lexinene xo twisisa mhaka leyi hi ndlela leyi hambaneke. Deuteronoma 16:6 yi byele Vaisrayele kahle leswaku va “tlhav̌a [gandzelo ra paseka] ni madyambu loko dyambu ri pela.” (Ku hundzuluxela ka Xiyuda ka Tanakh) Leswi swi kombisa leswaku ‘exikarhi ka madyambu lawa mambirhi’ a ku kombeteriwa eka nkarhi lowu wa ha voningelakanyana, ku sukela eku peleni ka dyambu (loku sungulaka hi Nisan 14) ku ya eka munyama wa xiviri. Vayuda va khale va Makaraiteb a va swi twisisa hi ndlela leyi, hi laha Vasamariyac va swi twisisaka ha kona ku ta fika namuntlha. Ku amukela ka hina leswaku xinyimpfana xa Paseka a xi nyikeriwa ni ku dyiwa “hi nkari lo’wu v̌ekiweke” hi Nisan 14, hayi hi Nisan 15 i xivangelo xin’wana xa mhaka leyi ha yona siku ra hina ra Xitsundzuxo minkarhi yin’wana ri hambanaka ni siku ra Xiyuda.—Tinhlayo 9:2-5.

23. Ha yini tin’hweti ti engeteriwa eka khalendara ya Xiheveru naswona leswi swi endlisiwa ku yini hi Vayuda va manguva lawa?

²³ Xivangelo xin’wana lexi endlaka siku ra hina ri hambana ni ra Vayuda hi leswi va tirhisaka khalendara leyi kunguhatiweke khale, leyi fambiselo ra yona a ri nga simekiwanga ku kondza ku va lembe xidzana ra vumune C.E. Hi ku tirhisa yona, va nga veka masiku ya Nisan 1 kumbe ya minkhuvo ka ha sale makume ya malembe kumbe malembe xidzana yo tala. Ku tlula kwalaho, khalendara ya khale ya n’weti a yi lava leswaku ku engeteriwa n’hweti ya vu-13 nkarhi na nkarhi leswaku khalendara yi ta fambisana ni tinguva. Khalendara ya sweswi ya Xiyuda yi nghenisa n’hweti leyi eka tindhawu leti vekiweke; eka ndzhendzeleko wa malembe ya 19, yi nghenisiwa eka lembe ra vu-3, 6, 8, 11, 14, 17 ni ra vu-19.

24, 25. (a) Enkarhini wa Yesu, xana tin’hweti a ti endliwa hi ndlela yihi naswona xilaveko xa tin’hweti leti engetelekeke a xi vonisiwa ku yini? (b) Xana Timbhoni ta Yehova ti ri vekisa ku yini siku ra Xilalelo xa Hosi?

²⁴ Hambi swi ri tano, Emil Schürer u vula leswaku “ni le nkarhini wa Yesu [Vayuda] a va nga ri na yona khalendara leyi simekiweke, kambe ehenhla ka xisekelo xa nkambisiso wa ntokoto lowu tengeke, a yi sungula n’hweti yin’wana ni yin’wana leyintshwa hi ku humelela ka n’weti lowuntshwa naswona hi ku fanana exisekelweni xa nkambisiso lowu” yi engetele n’hweti hi laha yi lavekaka ha kona. “Loko . . . ku xiyiwe leswaku eku heleni ka lembe Paseka a yi ta wela emahlweni ka nkarhi wa ku tsemakanya ka dyambu a-equator hi ximun’wana [kwalomu ka March 21], n’hweti a yi nghenisiwa emahlweni ka Nisan.” (The History of the Jewish People in the Age of Jesus Christ, Vholumo 1) Xisweswo n’hweti leyi engetelekeke a yi nghena kahle, a yi ngo nghenisiwa ntsena.

²⁵ Huvo leyi Fumaka ya Timbhoni ta Yehova yi simeka siku ra Xilalelo xa Hosi hi ku tirhisa endlelo ra khale. Nisan 1 yi voniwa hi loko n’weti lowuntshwa ekusuhi ni ku tsemakanya ka dyambu a-equator ka ximun’wana wu nga voniwa swinene eku peleni ka dyambu eYerusalema. Ku hlayela masiku ya 14 ku sukela eka siku rero swi ku tisa eka Nisan 14, leri hi ntolovelo ri fambisanaka ni n’weti lowu taleke. (Vona Xihondzo xo Rindza xa Xinghezi xa June 15, 1977, matluka 383-4.) Exisekelweni xa endlelo leri ra le Bibeleni, Timbhoni ta Yehova emisaveni hinkwayo ti tsundzuxiwile leswaku nkhuvo wa Xitsundzuxo wa lembe leri wu ta va endzhaku ka ku pela ka dyambu hi April 10.

26. Hi swihi swivumbeko swin’wana leswi engetelekeke swa Xilalelo xa Hosi leswi lavaka nyingiso wa hina?

²⁶ Siku leri ri fambisana na Nisan 14 leri ha rona Yesu a khomeke Paseka yo hetelela leyi tiyeke. Hambi swi ri tano, ku tlangela Xitsundzuxo ku tisa ku pona ku tlula leswi Swakudya swa Paseka swa Vayuda a swi tsundzuxa swona. Hinkwerhu ka hina hi fanele hi twisisa leswi humelelaka hi nkarhi wa Xilalelo xa Hosi, leswi xi vulaka swona ni ndlela leyi ku pona ka hina ku katsekaka ha yona.

[Tinhlamuselo ta le hansi]

Xana A Wu Ta Hlamurisa Ku Yini?

◻ Ha yini Paseka hi ku fanela yi yelanisiwa ni ku pona?

◻ Xana gandzelo ra Yesu ri nga hetisisa leswi tlulaka leswi swi endliweke hi xinyimpfana xa Paseka hi ndlela yihi?

◻ Hi kwihi ku pona loku kotekaka ha Yesu?

◻ Xana Timbhoni ta Yehova ti wu vekisa ku yini nkarhi lowu faneleke wa Xilalelo xa Hosi?