Swivutiso Swa Vahlayi

◼ Xana van’wana va Vakriste lava totiweke va ta pona ‘nhlomulo lowukulu’ leswaku va ta hanya emisaveni emafambiselweni lamantshwa emahlweni ko va va tekeriwa ku ya etilweni?

Bibele a yi swi vuli hi ku kongoma.

I khale Vakriste va tsakela ku tiva malunghelo lawa Xikwembu xi nga ha va nyikaka wona. (Mintirho 1:6) Sweswo a swi ri ntiyiso ngopfu-ngopfu enkarhini wa hina hi mpfhuka Mfumo wu simekiwile. (Matewu 24:3, 24, 34) Hikwalaho ka leswi makumu ya mafambiselo lawa yo biha ma nga tata enkarhini wa vona, Vakriste va lave ku tiva loko van’wana va lava totiweke hi moya va nga pona “ku lwa ka siku l’erikulu ra Šikwembu” na ku pfa va pfuneta emisaveni va nga si amukela hakelo ya vona ya le tilweni. (Nhlav. 16:14, BX) Bibele a yi vuli leswaku leswi swi ta humelela, kambe swikombiso na vuprofeta byin’wana swi tekiwile swi kombisa leswaku swi nga ha humelela. Ematshan’wini yo tiyisa, hi nga rindzela ku vona ndlela leyi Xikwembu xi nga ta endla swilo ha yona.

Swiendlakalo swin’wana swa Bibele endzhaku swi ve ni ku yelana evanhwini va Xikwembu. Hi xikombiso ha swi tiva leswaku Yonasi a a ri endzeni ka nhlampfi leyikulu ku ringana masiku manharhu na vusiku byinharhu. Vanhu van’wana va nga teka sweswo hi ku olova xi ri xikombiso xa nkutsulo wa Xikwembu, kambe Yesu u vule leswaku a ku ri xikombiso xa vuprofeta xa ndlela leyi a nga ta va esirheni ku ringana nkarhi lowu fanaka a nga si pfuxiwa ekufeni. (Yonasi 1:17; Matewu 12:40) Ina, ntokoto wa Yonasi a wu ri xikombiso xa vuprofeta. Hi laha ku twisisekaka, malandza ya Xikwembu ya langute vuprofeta na timhaka to karhi ta Bibele ku vona leswaku kumbexana leswi swi nga ha kombisa ndlela leyi Yehova a nga ha ta tirhisana na vona ha yona.

Tanihi xikombiso lexi nghenisaka vuprofeta bya Bibele, Xihondzo xo Rindza xa Xinghezi xa December 15, 1928, xi kanele hi Mikea 5:2-15. Buku ya Mikea yi vulavule hi ku hlaseriwa ka Vasamariya hi Asiriya ni ku vuya ka Vayuda evuhlongeni eBabilona. (Mikea 1:1, 5-7; 4:10) Nakambe yi kombetele eka swiendlakalo swa le ndzhaku tanihi ku velekiwa ka Mesiya eBetlehema. (Mikea 5:2) Mikiya u profete leswaku endzhaku ka ku ponisiwa ka vona “[e]ka Vaasur,” “la’va saleke va ka Yakob” va ta kotisa “mbera le’yi humaka e ka Yehova” na “šinghalana e šikari ka ntlhambi wa tinyimpfu.” (Mikea 5:6-8) Xihondzo xo Rindza xi hlamuserile: “Lexi xi nga langutiwa tanihi xikombiso xa leswaku van’wana va masalela va ta va laha misaveni hambi endzhaku ka loko Armagedoni yi lwiwile kutani hi nkarhi lowo va ta va na ntirho lowu engetelekeke wo wu endla evitweni ra Hosi ku tisa ku dzuneka eka yona.” Xiya ririmi leri fanelekaka, leri twisisekaka leri tirhisiweke ku tivisa ku koteka loku: “Lexi xi nga ha langutiwa tanihi xikombiso.”

Ku vuriwa yini hi swiendlakalo swa Bibele leswi nga ha yelanaka na ku pona ko tano emisaveni? Xikombiso xin’wana lexi nyikiweke i xa Nowa na ndyangu wa yena. Nowa u tekiwe tanihi la fanekiselaka Yesu eka minkarhi leya makumu. (Genesa 6:8-10; Matewu 24:37) Tanihi laha Nowa a fambiseke nsati wa yena na vana va yena vanharhu na vingi eminkarhini ya ku hela ka mafambiselo wolawo ya khale, Kriste u ta nyikela vurhangeri eka masalela ya ntlawa wa yena wa mutekiwa ni lava va vaka vana va “Tatana l’a nga riki na ku hela,” Yesu. Nsati wa Nowa u pone ndhambi kutani a pfuneta eku pfuxetiweni ka vugandzeri bya ntiyiso emisaveni leyi basisiweke. Ku yelana ku nga ha va ku ponela emisaveni leyintshwa ka masalela ya ntlawa wa mutekiwa.—Esaya 9:6, 7; 2 Vakorinto 11:2; Nhlavutelo 21:2, 9.a

Nakambe timhaka tin’wana ta Bibele ti langutiwe tanihi leti ringanyetaka leswaku van’wana va vatotiwa va nga ha ponela emisaveni leyintshwa. Hi xikombiso, Yeremiya u pone ku lovisiwa ka Yerusalema; “munhu” la nga ni nkotloto wa mutsari u sele leswaku a ta vona ntirho wa ku lovisa a nga si tlhelela endzhaku ku ya nyika xiviko.—Ezekiel 9:4,8, 11.

Tinhlamuselo mayelana na ku koteka ka leswaku van’wana va vatotiwa va nga ha ponela emisaveni leyintshwa ti endliwa hi swikongomelo leswinene na hi ku landzelela swiendlakalo leswi nga eBibeleni ku ringeta ku twisisa vuprofeta kumbe swikombiso leswi swi nga ha vaka ni swiendlakalo leswi yelanaka na swona endzhaku. Loko swo endlaka leswaku ku nga vi na la saleke wa vatotiwa emisaveni, a ku nge vi na xivangelo xa ku nga eneriseki. Ana se hi swi pfumerile leswaku timhaka ta Bibele ti twisiseka ku antswa hi ku famba ka nkarhi. Hi xikombiso, Xihondzo xo Rindza xa January 1, 1982, xi hlamusele Mikea 5:6-9 nakambe kutani xi hlamusele leswaku “masalela ya Vaisrayele va moya a ya nga fanelanga ku yima ku ya fikela endzhaku ka . . . [Harmagedoni] leswaku va va tanihi ‘mberha’ leyi phyuphyisaka evanhwini.” Nhlamuselo leyi yi tlhele yi nyika ku koteka ka leswaku masalela ya nga ha pona nyimpi leyikulu ya Xikwembu ivi ‘ya ya mahlweni tanihi ‘mberha’ lowu phyuphyisaka eka “ntshungu lowukulu” wa “tinyimpfu tin’wana.’” Kambe, hi nga swi vona, leswaku ku hundza ka nkarhi na ku engeteleka ka rivoningo ra moya swi nga anamisa ni ku cinca ku twisisa ka hina vuprofeta kumbe mintlangu ya Bibele.—Swivuriso 4:18.

Ha swi tiva leswaku Bibele yi hlanganisa ‘ku ta ka N’wana wa munhu’ na ‘ku hlengeletiwa ka vahlawuriwa ematlhelweni ya mune ya misava.” (Matewu 24:29-31) Nakambe, enkarhini wa ‘ku vuya ka Hosi’ ematimbeni ya Mfumo, vatotiwa lava va etleleke eku feni va pfuxiwa ku ya hanya ematilweni. (1 Vatesalonika 4:15, 16) Lava va funghiweke va kwalaho leswaku va va swirho swa nsati wa Xinyimpfana. Xana swi humelela rini sweswo?

Ebukwini ya Nhlavutelo, xikan’we endzhaku ka loko Yohane a hlamusele hi ta Xikwembu loko xi herisa muoswi wa vukhongeri, Babilona Lonkulu, u hlamusela, “nkhuvo wa vukati bya Xinyimpfana.” “Wansati” wa thyaka, wo homboloka wa herisiwa, nakona hi vona “mutekiwa, nsati wa Xinyimpfana” ‘a ambale swa ntsembyani wa risima, wo vangama ni wa nkoka, leswi swi vula mintirho yo lulama ya vahlawuriwa va Xikwembu.’ (Nhlavutelo 18:10; 19:2, 7, 8; 21:9) Ku lovisiwa ka Babilona Lonkulu i xiphemu xa nhlomulo lowukulu. (Matewu 24:21; Nhlavutelo 7:14) Kutani ku nga ha anakanyiwa leswaku van’wana va lava va ntlawa wa mutekiwa va ta pona enhlomulweni lowukulu tanihi hi vumbhoni bya nsirhelelo na ku amukeriwa hi Xikwembu. (Sofonia 2:3 ringanisa Matewu 24:22.) Kutani loko va hlayisiwa emisaveni, va ta tshama kwala ku kondza Xikwembu xi hlawula ku va teka va ya etilweni.

Hambi swi ri tano, nhlamuselo leyi nga le ka Nhlavutelo a yi vekiwanga hi ntlhandlamano. Naswona a hi swona leswaku masalela lamantsongo ya vatotiwa ya fanela ku va kona ku yisa misava leyintshwa emahlweni, hi mhaka ya leswi va dyondziseke timiliyoni ta Vakriste vo tshembeka lava nga ta hanya hi laha ku nga heriki emisaveni. Hi ndlela yoleyo, Xikwembu xi nga teka vatotiwa va xona ku ya ematilweni xikan’we endzhaku ka ku herisiwa ka Babilona Lonkulu, xi veka masungulo ya “nkhuvo wa vukati bya Xinyimpfana” leswaku wu endleka. Kutani vakwetsimi hinkwavo va ta avelana na Kriste ku ‘risa matiko hi nhonga ya nsimbi’ eka masalela ya nhlomulo lowukulu. (Nhlavutelo 2:26, 27; 19:11-21) Loko sweswo ku ri ndlela leyi Xikwembu xi endlaka swilo ha yona, hinkwavo lava va 144 000 va ta va na Yesu leswaku va ‘fuma tanihi tihosi xikan’we na Kriste malembe ya Gidi hinkwawo.’—Nhlavutelo 20:4.

Kunene swi sasekile leswi vanhu va Xikwembu va tsakelaka swinene ku tiva ndlela leyi xi nga ta kongomisa na ku hakela malandza ya xona ha yona. (Ringanisa 1 Petro 1:12.) Leswi swi kombisa ntshembo wa vona wa leswaku ku rhandza ka xona ku ta endliwa. Hambi leswi hi nga taka hi nga kandziyisi naswona hi nga fanelangiki ku kandziyisa leswi nga ta humelela, hi nga languta emahlweni eka leswi swi nga ta humelela hi ku tsakela lokukulu.

[Nhlamuselo ya le hansi]