Marungula Lama Hlamuriwaka
1 Marungula lama hlamuriwaka hi lawa ma yi kombisaka kahle ndlela leyi mhaka yi khumbaka n’wini wa muti ha yona, ku nga nchumu lowu a wu lavaka kumbe lowu a nga wu tirhisaka. Ebulwini ra wena hinkwaro, pfuna n’wini wa muti a xiya leswaku, “Leswi swa ndzi katsa.” Loko hi lunghiselela rungula hi fanele hi tivutisa: ‘I timhaka tihi leti ti va khumbaka ngopfu vanhu va le nsin’wini ya ka hina? Hi swihi swilaveko swa vona? Ndzi nga ri nyikela njhani rungula ku kombisa leswaku Yehova u tiva swilaveko swa vona?’ Laha hansi ku xaxametiwe swilo swi nga ri swingani leswi nga swa nkoka swinene evanhwini namuntlha. Xana u nga tirhisa swin’wana swa swona kumbe xin’wana lexi fanaka na swona eka rungula ra wena? Tlhela u xiya ndlela leyi tinhla leti humaka ebukwini leyi nge Ku Chaputa Ka Nhlavutelo ti nga nghenisiwaka ha yona.
2 Ku Karhateka Hi Ku Pfumaleka Ka Ntsako: “Hi vulavurisana ni vanhu lava karhatekaka swinene hi ntikelo wa vutomi endhawini ya hina. Hambi loko vanhu va ri ni swilaveko swa nyama, vo tala a va tsakisiwi hi vutomi bya vona. Xana u ehleketa leswaku swa koteka ku va ni vutomi lebyi tsakisaka hakunene? [Yimela nhlamulo.] Xin’wana xa swilotlelo swo kuma ntsako xi kumeka eBibeleni eka Nhlavutelo 1:3. [Hlaya.] Ku twisisa leswi Nhlavutelo yi swi vulaka hi vumundzuku swi nga ku tisela ntsako. Xiya vuprofeta byin’wana bya yona.” Hlaya Nhlavutelo 21:3, 4 kutani u kombetela eka xifaniso lexi nga eka tluka 302 ra buku leyi nge Ku Chaputa Ka Nhlavutelo.
3 Ku Karhateka Hi Vumundzuku: “Hi tikarhatela ku avelana ni vaakelani va hina hi langutelo lerinene ra vumundzuku. Xana hi yona ndlela leyi u ringetaka ku languta vutomi ha yona? [Yimela nhlamulo.] Hi ku ya hi Bibele, hi ni xivangelo xo va ni langutelo lerinene loko hi endla leswi yi swi vulaka eka Nhlavutelo 1:3.”
4 Ku Karhateka Hi Ku Hlayisa Rihanyo Lerinene: “Vo tala va vaakelani va hina va lava ku hlayisa rihanyo lerinene. Hambi swi ri tano, ku nga khatariseki minsivelo leyi hi yi tirhisaka ha ha karhatiwa hi mavabyi. Xana u nga swi tsakela ku hanya emisaveni leyi un’wana ni un’wana a nga ta va ni rihanyo leri hetisekeke ni matimba lama lavekaka? Hambi loko leswi swi vonaka swi nga tshembisi, buku ya Bibele ya Nhlavutelo yi vulavula hi nkarhi wolowo naswona yi hi byela leswaku wu le kusuhi.” Hlaya Nhlavutelo 21:3, 4. Kutani u nga ha kombisa xifaniso lexi nga eka matluka 308-9 ya buku leyi nge Ku Chaputa Ka Nhlavutelo, u kombisa ndlela leyi vanhu va nga ta kuma malunghiselelo ya vutomi ha yona, enkarhini wa ku Fuma ka Kriste ka Gidi ra Malembe.
5 Ku Karhateka Hi Nthyakiso Ni Mbango: “Loko hi vulavurisana ni vaakelani va hina, hi kume leswaku vo tala va karhateka hi ku thyakisiwa ka moya, mati ni swakudya swa hina. Xana u anakanya leswaku tihulumendhe ti ta swi kota ku herisa swilo leswi? [Yimela nhlamulo.] Swa khutaza ku xiya leswi Bibele yi vulaka leswaku swi ta endlekela lava onhaka misava.” Hlaya Nhlavutelo 11:18b. Boxa leswaku handle ko susiwa ka lava onhaka misava, i xikongomelo xa Xikwembu leswaku lava titsongahataka va endla misava yi va paradeyisi, hi laha swi kombisiwaka ha kona eka Psalma 37:10, 11 kumbe Esaya 65:21, 22.
6 Eka Lava Rhandzaka Vukhongeri: “Hi vutisa vaakelani va hina xivutiso lexi: Xana u anakanya leswaku buku ya Nhlavutelo a yi endleriwe leswaku yi twisisiwa, kumbe a yi fanele yi tshama yi ri xihundla nkarhi hinkwawo? [Yimela nhlamulo.] Vo tala va pfumelelana na wena. Xiya leswi Bibele hi yoxe yi swi vulaka eka Nhlavutelo 1:3.”
7 Tanihi leswi u tikarhatelaka ku fikelela mbilu ya vayingiseri va wena, vanhu lava nga ni ndlala ya ntiyiso ni ku lulama va ta ku amukela.—Mat. 5:3, 6.