I Yini Lexi Ndzi Nga Xi Vulaka Leswaku Ndzi Pfuxa Ku Tsakela Loku Engetelekeke?
1 Xiyenge-nkulu xa xikongomelo xa hina eku chumayeleni ka mahungu lamanene i ku endla vadyondzisiwa, hayi ku siya tibuku ntsena. Hikwalaho, loko ku tsakela ku kumiwile, hi fanele hi hlakulela ni ku khathalela timbewu leti byariweke, hi endla xiphemu xa hina xo endla xisekelo lexinene, laha Yehova a nga pfunaka munhu leswaku a kula emoyeni. (1 Vakor. 3:6) U nga ku yini loko u landzelerisisa timhaka to sungula leti kombisiweke laha henhla? Hi leswi swiringanyeto swin’wana swa swiyimo swo hambana-hambana leswi u nga ha langutanaka na swona.
2 Ku Hlakulela Ku Tsakela Loku Kumiweke: “Loko hi vulavurisananyana enkarhini lowu hundzeke, a wu khomeke ngopfu, kambe u tinyike nkarhi wo phofula ndlela leyi u khumbekaka ha yona hi vumundzuku. Loko u ta tsundzuka, hi hlaye eBibeleni eka Nhlavutelo 1:3 leswaku ‘nkarhi lowu vekiweke wu tshinele.’ Sweswo swi byi khumba swinene vumundzuku bya hina hinkwerhu. Xiya leswi buku leyi yi swi vulaka hi tsalwa leri. [Hlaya ku sukela eka ndzimana 11 eka tluka 17 ebukwini leyi nge Ku Chaputa Ka Nhlavutelo.] Buku leyi yi kambisisa vuprofeta hinkwabyo lebyi nga ebukwini ya Bibele ya Nhlavutelo ni ku kombisa leswaku hi nga pfunekisa ku yini hina hi hexe. Xana u nga swi tsakela ku dyondza leswi engetelekeke?”
3 Ku Tirhisa Buku Leyi Nge Ku Chaputa Ka Nhlavutelo Leswaku U Sungula Dyondzo Ya Bibele: “Swa tsakisa ku tlhela ndzi ku vona. Ku ni yinhla yin’wana leyi ndzi lavaka ku ku avela yona leyi kumekaka ebukwini leyi ndzi ku siyeleke yona, naswona ya khutaza swinene. Bibele yi vulavula hi ‘buku ya vutomi’ mayelana ni lava nga ta hanya hi laha ku nga heriki. Xana u nga swi tsakela ku tiva leswaku i mavito wahi lama nga ebukwini yoleyo?” Pfula tluka 298 ra buku leyi nge Ku Chaputa Ka Nhlavutelo. Hlaya ndzimana 11, kutani u vutisa swivutiso leswi nga eka ndzimana yoleyo. Endzhaku ko kambisisa tindzimana to hlayanyana, vula leswaku u ta vuya leswaku mi ta yisa bulo emahlweni.
4 Ku Tirhisa Buku Yin’wana Leswaku U Sungula Dyondzo Ya Bibele: “Ndzi tsakela ku ku kuma u ri kona ekaya namuntlha, nkarhi lowu hundzeke loko hi vulavurisana, hi hlaye swin’we xitshembiso xa Bibele lexi nga eka Nhlavutelo 1:3. [Tlhela u yi hlaya.] Xiya leswaku ntsako lowu ku vulavuriwaka ha wona a wu titeli ntsena. Ku laveka swilo swimbirhi: Hi fanele hi hlaya leswi Bibele yi swi vulaka kutani hi hlayisa kumbe hi tirhisa, leswi tsariweke. Broxara leyi yi nge ‘Vonani, Ndzi Endla Swilo Hinkwaswo Swi Va Leswintshwa!’ yi ta endla leswaku u tiphina ngopfu hi ku hlaya buku leyi ndzi ku siyeleke yona hikuva yi hlamusela swilaveko swa Xikwembu hi ndlela yo olova. Eka tluka 30 ku ni nxaxamelo wa swivutiso swa 12 leswi vanhu vo tala va swi vutisaka. Hi swihi leswi u rhandzaka leswaku swi hlamuriwa?” Endzhaku ka loko n’wini wa muti a hlamurile, u nga ha pfula broxara endhawini leyi xivutiso xi hlamuriwaka eka yona kutani u sungula dyondzo ya Bibele.
5 Tirhisa Swifaniso Leswaku U Pfuxa Ku Tsakela: Buku leyi nge Ku Chaputa Ka Nhlavutelo yi ni swifaniso swo tala leswi sasekeke. U nga swi kombisa leswaku u pfuxa ku tsakela. Hi xikombiso, loko hi endla riendzo ro vuyela hi nga pfula eka tluka 7. Hi kombisa xifaniso xa Yohane a ri exihlaleni xa Patmosi. Nhlavutelo 1:3 yi kandziyisa leswaku nhlavutelo ya Yohane a yi ri rungula leri tsakisaka. Leswi swi nga endlekisa ku yini kasi Nhlavutelo yi hlamusela swivandzana ni ndzoviso wo chavisa? Kambisisa tindzimana 1 na 2 eka tluka 6 ra buku leyi. Swifaniso leswi nga eka matluka yo hetelela swi nga ha kombisiwa, kun’we ni swivono leswi kombisaka misava ya Paradeyisi eka matluka 302, 308 na 309.
6 Eka maendzo yo vuyela, hi fanele hi aka eka masungulo lama vekiweke eka riendzo ro sungula. Ku nyikela nyingiso wa vukheta eka xivumbeko lexi xa vutirheli bya hina swi ta tisa mikateko leyikulu ya Yehova eka hina ni lava hi yingisaka.—1 Tim. 4:16.