“Hambetani Mi Endla Leswi Hi Ku Ndzi Tsundzuka”
1 Yesu u byele valandzeri vakwe leswaku va tlangela siku ra ku fa ka yena. (Luka 22:19) Nkhuvo lowu wu ta va xitsundzuxo xa gandzelo lerikulu leri Yesu a ri endleke hikwalaho ka vanhu. Lembe leri Timbhoni ta Yehova emisaveni hinkwayo ti ta tlangela Xitsundzuxo xa rifu ra Yesu hi Ravuntlhanu, April 17, loko dyambu se ri perile.
2 Ku Lunghiselela Ka Munhu Hi Yexe: Hi nga lunghiselela njhani leswaku hi tlangela xiendlakalo lexi hi laha ku faneleke? Ndlela yin’wana i ku langutisisa vutomi ni vutirheli bya Yesu hi xikhongelo. U ve Mukutsuri wa vanhu hi ku endla gandzelo hi vutomi bya yena lebyi hetisekeke. (Mat. 20:28) Leswaku hi pfuna un’wana ni un’wana ku tlangela lunghiselelo leri, hi bumabumela leswaku mi kambisisa tindzima 112 ku ya ka 116 ta buku leyi nge Nghwazi Leyi Tshameke Yi Hanya.
3 Ku hlaya ka hina ka Bibele lembe leri emahlweni ka Xitsundzuxo, hi laha ku kombisiweke ha kona eka 1992 Calendar of Jehovah’s Witnesses, ku hlanganisa tindzimana leti hlawuriweke leti humaka ebukwini ya Bibele ya Marka. Ku hlaya loku ko hlawuleka ka Bibele ku hleleriwe masiku ya tsevu ku sukela hi Sonto ku ya ka Ravuntlhanu, April 12-17. Hinkwerhu ka hina hi fanele hi tinyika nkarhi lowu eneleke wo anakanyisisa hi swiendlakalo leswi leswikulu.
4 Ku Lunghiselela Loku Heleleke Ka Vakulu: Tiyisekisani leswaku swirhambo swa Xitsundzuxo swa kumeka. Xana ku ni switshamo leswi eneleke swa hinkwavo lava languteriwaka ku va kona? Laha holo yin’we yi nga ta tirhisiwa hi mabandlha yo tlula rin’we, malunghiselelo lamanene ma laveka leswaku bandlha rin’wana ni rin’wana ri va ni nkarhi lowu eneleke wo tlangela Xitsundzuxo. Lava tirhaka tanihi varindzi va fanele va tivisiwa hi mintirho ya vona. Va fanele va rhangela eku amukeleni ka vanhu lavantshwa lava taka. Ku fanele ku hlawuriwa xivulavuri lexi nga ta nyikela mhaka yi twala na hi ndlela ya Matsalwa. Avelani vakulu kumbe malandza ya vutirheli lama nga ni vutihlamuleri leswaku ma fambisa swifanekiselo. Xinkwa lexo ke comela ni vhinyo yo tshwuka leyi tengeke swi fanele swi va kona. Leswaku u kuma switsundzuxo leswi engetelekeke, vona nkandziyiso wa Xihondzo xo Rindza xa February 1, 1985, tluka 19.
5 Loko hi lunghiselela hi vukheta ka ha ri ni nkarhi, hi ta kombisa leswaku hi twisisa nkoka wa xiendlakalo lexi xo hlawuleka ni leswaku hi lava ku tlangela Xitsundzuxo xa rifu ra Kriste hi ku pfumelelana ni xileriso xa Yesu.—1 Vakor. 11:23-26.