Tekelela Tintswalo Ta Xikwembu Namuntlha
“A hi weleni mav̌okweni ya Yehova, hikuv̌a tintŝalo ta yena ti kulu.”—2 SAMUEL 24:14.
1. Xana Davhida u titwe njhani hi tintswalo ta Xikwembu, naswona ha yini?
HI NTOKOTO Hosi Davhida u swi tivile leswaku Yehova u ni tintswalo ngopfu ku tlula vanhu. Hi ku tshemba leswaku tindlela kumbe mintila ya Xikwembu, i yinene, Davhida u tsakele ku dyondza tindlela ta xona ni ku famba entiyisweni wa xona. (1 Tikronika 21:13; Psalma 25:4, 5) Xana u titwa hi laha Davhida a titweke ha kona?
2. I xitsundzuxo xihi lexi Yesu a xi nyikeleke eka Matewu 18:15-17 ehenhleni ka ku tamela xidyoho lexikulu?
2 Bibele yi hi endla hi twisisa mianakanyo ya Xikwembu, hambi ku ri etimhakeni to tanihi leswaku hi fanele ku endla yini loko un’wana a hi dyohela. Yesu u byele vaapostola va yena, lava endzhakunyana a va ta va valanguteri va Vukriste a ku: “Loko makwenu a ku dyoherile, yana u ya n’wi komba ku hoxa ka yena, mi ri vambirhi ntsena; loko a ku yingisa, u ta va u vuyisile makwenu.” Xihoxo lexi katsekaka laha a ku nga ri xihoxonyana xa munhu ntsena kambe xidyoho lexikulu, tanihi vuxisi kumbe ku hleva. Yesu u vule leswaku loko goza leri ri nga yi ololoxi mhaka ni loko timbhoni ti ri kona, loyi a dyoheriweke u fanele ku famba na vona ku ya kombisa leswaku a ku ri na xihoxo. Xana goza leri i ro hetelela? E-e. “Loko [mudyohi] a ala ku va yingisa, byela nhlengeletano; loko a ala ku yingisa na yona nhlengeletano, eka wena a a kotise muhedeni ni muluvisi.”—Matewu 18:15-17.
3. Yesu a a hlamusela yini hi ku vula leswaku mudyohi la nga hundzukiki a ta ‘kotisa munhu wa matiko ni muluvisi’?
3 Tanihi Vayuda, vaapostola a a va ta swi twisisa leswi a a swi vula swona ku khoma mudyohi ‘tanihi munhu wa matiko ni muluvisi.’ Vayuda va papalate ku hlangana ni vanhu va matiko, naswona va nyenye Vayuda lava tirheke tanihi valuvisi va Rhoma.a (Yohane 4:9; Mintirho 10:28) Hikwalaho, Yesu a a tsundzuxa vadyondzisiwa leswaku loko bandlha ri suse mudyohi, a va ta tshika ku tolovelana na yena. Hambi swi ri tano, sweswo swi hlangana njhani ni ku va Yesu a ri ni valuvisi minkarhi yin’wana?
4. Hi ku languta marito ya yena eka Matewu 18:17, ha yini Yesu a a ta hlangana ni valuvisi ni vadyohi van’wana?
4 Luka 15:1 yi ri: “Valuvisi ni vadyohi hinkwavo va n’wi tshinelela ku ta n’wi yingisa.” Ku nga ri leswaku muluvisi kumbe mudyohi un’wana ni un’wana a a ri kwalaho, kambe “hinkwavo” ri kombisa vo tala. (Ringanisa Luka 4:40.) Hi vahi? Lava a va tsakela ku rivaleriwa swidyoho swa vona. Van’wana vo tano eku sunguleni va kokeriwe eka rungula ra Yohane Mukhuvuri ra ku hundzuka. (Luka 3:12; 7:29) Kutani ke, loko van’wana va te eka Yesu, ku chumayela ka yena eka vona a ku lwisananga ni ndzayo ya yena eka Matewu 18:17. Xiya leswaku ‘valuvisi ni vadyohi lavo tala va twe Yesu ivi va sungula ku n’wi landzelela.’ (Marka 2:15) Lava a ku nga ri vona lava tsakeleke ku ya emahlweni hi ndlela yo biha ya vutomi, ya ku ala mpfuno wihi na wihi. Ku ri na sweswo, va twe rungula ra Yesu naswona timbilu ta vona ti khumbekile. Hambi loko a va ha dyoha, kumbexana a va ringeta ku cinca, “murisi lonene,” hi ku chumayela ka yena eka vona a a tekelela Tata wa yena wa tintswalo.—Yohane 10:14.
Ku Rivalela, I Mfanelo Ya Mukriste
5. Hi xihi xiyimo xa xisekelo xa Xikwembu mayelana ni ku rivalela?
5 Hi na switiyisekiso leswi leswi tsakisaka swa rirhandzu ro rivalela ra Tata wa hina: “Loko hi tivula swidyoho swa hina, . . . xa tshembeka, xi avanyisa hi ku lulama, kutani xi ta hi rivalela swidyoho swa hina, xi hi hlantswa xi susa ku homboloka ka hina hinkwako.” “Ndzi mi tsalela timhaka leti leswaku mi ta ka mi nga dyohi; kambe loko un’wana a tshuka a dyoha, hi ni muyimeri eka Tatana, a nga Yesu Kriste la lulameke.” (1 Yohane 1:9; 2:1) Xana swa koteka ku rivalela munhu la susiweke?
6. Xana munhu la susiweke a nga rivaleriwa ni ku tlheriseriwa hi ndlela yihi?
6 Ina. Hi nkarhi wa ku susa un’wana hikwalaho ka xidyoho lexi a nga hundzukiki eka xona, vakulu lava yimelaka bandlha va n’wi hlamusela leswaku swa koteka eka yena ku hundzuka ivi a rivaleriwa hi Xikwembu. A nga ha va kona eminhlanganweni eHolweni ya Mfumo, laha a nga ta twa ndzetelo wa Bibele lowu wu nga n’wi pfunaka leswaku a hundzuka. (Ringanisa 1 Vakorinto 14:23-25.) Hi ku famba ka nkarhi a nga ha lava ku tlheriseriwa ebandlheni leri baseke. Kutani loko vakulu va hlangana na yena, va ta ringeta ku vona loko a hundzukile naswona a yi tshikile ndlela ya yena ya vudyoho. (Matewu 18:18) Loko swi ri tano, a nga tlheriseriwa hi ku fambisana ni xikombiso lexi nga eka 2 Vakorinto 2:5-8. Loko swi ri leswaku a a susiwe ku ringana malembe yo tala, u ta boheka ku endla matshalatshala lama tiyeke leswaku a endla nhluvuko. A nga ha lava mpfuno wa vukheta endzhaku ka sweswo leswaku a aka vutivi ni ku twisisa kakwe Bibele leswaku a va Mukriste la tiyeke hi tlhelo ra moya.
Ku Tlhelela Eka Yehova
7, 8. I xikombiso xihi lexi Xikwembu xi xi vekeke mayelana ni vanhu va xona lava nge vuhlongeni?
7 Kambe xana vakulu hi voxe va nga ti sungulela hi voxe va tshinelela munhu la susiweke? Ina. Bibele yi kombisa leswaku tintswalo a ti kombisiwi hi ku sivela loku hoxeke ka nxupulo kambe hakanyingi hi swiendlo leswinene. Hi na xikombiso xa Yehova. Loko a nga si rhumela vanhu va yena vo pfumala vutshembeki evuhlongeni, hi vuprofeta u kombise ku navela ka yena ka leswaku va vuya a ku: “Anakanya timhaka leti, wena Yakobo, na wena Israel! hikuv̌a u nanḍa wa mina, . . . nḍi hlangurile milanḍu ya wena tani hi papa, ni ŝidyoho ŝa wena tani hi hunguv̌a; v̌uyela ka mina, hikuv̌a nḍi ku kuṭurile!”—Esaya 44:21, 22.
8 Kutani, hi nkarhi wa vuhlonga Yehova u teke magoza lama engetelekeke, a endla hi ndlela leyinene. U rhumele vaprofeta, vayimeri va yena, ku rhamba Israyele leswaku a ‘n’wi lava ivi a n’wi kuma.’ (Yeremia 29:1, 10-14) Eka Ezekiel 34:16, u tifanise ni murisi ivi vanhu va tiko ra Israyele a va fanisa ni nyimpfu leyi lahlekeke: “Nḍi ta lav̌a le’yi lahlekeke, nḍi lanḍa le’yi tlheleke.” Eka Yeremia 31:10, Yehova nakambe u tirhise xifaniso xa ku va a ri murisi wa Vaisrayele. E-e, a nga tikombisanga tanihi murisi exivaleni xa tinyimpfu la rindzeleke leyi lahlekeke leswaku yi vuya; ematshan’wini ya sweswo, u tikombise a ri murisi loyi a lavaka leti lahlekeke. Xiya leswaku hambi loko vanhu hi ntolovelo va nga hundzuki naswona va ri evuhlongeni, Xikwembu xi sungule matshalatshala yo endla leswaku va vuya. Naswona hi ku fambisana na Malakia 3:6, Xikwembu a xi nga ta yi cinca ndlela ya xona yo tirha eka lunghiselelo ra Vukriste.
9. Xikombiso xa Xikwembu xi landzeriwe njhani ebandlheni ra Vukriste?
9 Xana leswi a swi ringanyeti swona leswaku ku nga va na xivangelo xo tshinelela van’wana lava susiweke lava sweswi va nga ha vaka va hundzukile? Tsundzuka leswaku muapostola Pawulo u nyike nkongomiso wo humesa munhu wo homboloka ebandlheni ra le Korinto. Endzhakunyana u khongotele bandlha ku tiyisa rirhandzu ra vona eka munhu yoloye hikwalaho ka ku hundzuka ka yena, loku endzhaku ku n’wi yiseke eku tlheriseriweni ka yena ebandlheni.—1 Vakorinto 5:9-13; 2 Vakorinto 2:5-11.
10. (a) I nsusumeto wihi lowu faneleke ku susumetela matshalatshala wahi na wahi yo vulavurisana ni vanhu lava susiweke? (b) Ha yini maxaka ya Vukriste ma nga fanelanga ku va wona lama sungulaka ku vulavurisana?
10 Encyclopedia leyi tshahiweke eku sunguleni yi te: ‘Xikongomelo-nkulu xa ku tsema a ku ri ku sirhelela mimpimanyeto ya ntlawa: “comelanyana lexitsongo xi kukumuxa mbila hinkwayo” (1 Vakorinto 5:6). Xikongomelo lexi xi hlamuseriwe kahle eka tinhlamuselo ta le Bibeleni ni tibuku tin’wana leti amukelekaka, kambe ku khathala hi munhu loyi, hambi endzhaku ka ku tsemiwa, a ku ri xisekelo xa xikombelo xa Pawulo eka 2 Vakor. 2:7-10.’ (Xiitaliki i xerhu.) Hikwalaho, namuntlha nkhathalelo wa muxaka lowu, wu fanele ku kombisiwa hi laha ku fanaka, hi varisi va ntlhambi. (Mintirho 20:28; 1 Petro 5:2) Vanghana vo sungula ni maxaka va nga ha tshemba leswaku loyi a susiweke u ta tlhelela kambe hi ku xixima xileriso lexi nga eka 1 Vakorinto 5:11, va nga tolovelani ni munhu loyi a susiweke.b Va swi tshikela varisi lava vekiweke ku teka goza ro vona loko munhu wo tano a tsakela ku tlhelela.
11, 12. I muxaka wihi wa vanhu lava susiweke lava hambi ku ri vakulu va nga fanelangiki ku va vulavurisa, kambe i muxaka wihi lowu va nga wu endzelaka?
11 A swi nga ta fanela hambi ku ri eka vakulu ku tshinelela ka van’wana lava susiweke, tanihi vagwinehi, lava ‘vulavulaka swilo swo soholoka leswaku va hambukisela vadyondzisiwa eka vona.’ Lava i ‘vadyondzisi va mavunwa lava ringetaka ku nghenisa mimpambukwa leyi dlayaka ni ku onha bandlha hi marito ya vuxisi.’ (Mintirho 20:30; 2 Petro 2:1, 3) Nakambe Bibele a yi nyiki xisekelo xihi na xihi xo lava lava susiweke lava pfuxaka timholovo kumbe lava chivirikelaka ku khutaza ku endla leswo biha.—2 Vatesalonika 2:3; 1 Timotiya 4:1; 2 Yohane 9-11; Yuda 4, 11.
12 Hambi swi ri tano, vo tala lava susiweke a va tano. Un’wana a nga ha va a tshike xidyoho lexikulu lexi a a susiwe hikwalaho ka xona. Un’wana a nga hava a tirhise fole kumbe a a nwa ngopfu enkarhini lowu hundzeke, kambe sweswi a nga ringeti ku yisa van’wana eku dyoheni. Tsundzuka leswaku hambi loko Israyele la nge vuhlongeni a nga si tlhelela eka Xikwembu, xi rhumele vayimeri, xi va khutaza ku tlhelela endzhaku. Hambi loko Pawulo kumbe vakulu ebandlheni ra Korinto va teke magoza yo karhi ku languta munhu la susiweke, Bibele a yi swi hlamuseri. Loko munhu yoloye a hundzukile naswona a tshike vunghwavava bya yena, Pawulo u lerise bandlha leswaku ri n’wi tlherisela.
13, 14. (a) I yini lexi kombisaka leswaku van’wana lava susiweke va nga ha ku amukela ku tshineleriwa ka tintswalo? (b) Huvo ya vakulu yi nga ku lunghiselela njhani ku hlangana loku ku faneleke ku endliwa?
13 Eminkarhini ya sweswinyana a ku ri na minkarhi leyi nkulu a kumekaka a endzela munhu la susiweke.c Laha swi faneleke kona, murisi hi ku komisa u kombise magoza lama faneleke ku tekiwa leswaku a tlheriseriwa. Vanhu van’wana vo fana ni lava va hundzukile naswona va tlheriseriwile. Mimbuyelo yo tano leyi tsakisaka yi kombisa leswaku ku nga ha va ni vanhu lava susiweke kumbe lava tsemiweke lava nga amukelaka ku tshinelela ka tintswalo loku endliwaka hi varisi. Kambe vakulu va nga yi tamela njhani mhaka leyi? Kan’we hi lembe, huvo ya vakulu yi fanele ku xiya loko ku ri na vanhu vo tano lava tshamaka ensin’wini ya ka vona.d Vakulu va ta yisa nyingiso eka lava a va susiwile ku tlula lembe. Hi ku ya hi swiyimo, loko swi fanerile, va ta avela vakulu vambirhi (ngopfu-ngopfu lava tolovelaneke ni xiyimo) ku endzela munhu wo tano. A ku na riendzo leri nga ta endleriwa wihi na wihi loyi a kombisaka langutelo leri hoxeke, leri nga ni khombo kumbe lava va vuleke leswaku a va lavi mpfuno.—Varhoma 16:17, 18; 1 Timotiya 1:20; 2 Timotiya 2:16-18.
14 Varisi lava vambirhi va nga ba riqingho ku vutisa mayelana ni ku endla riendzo ro koma kumbe va nga ha hundza hi kona hi nkarhi lowu faneleke. Hi nkarhi wa riendzo, a va fanelanga va visungana kumbe va tsana, kambe va fanele va kombisa nkhathalelo wa vona wa tintswalo lowu kufumelaka. Ematshan’wini yo pfuxeta mhaka ya khale, va nga bula hi tindzimana ta Bibele to tanihi Esaya 1:18 na 55:6, 7 na Yakobo 5:20. Loko munhu yoloye a tsakela ku tlhelela entlhambini wa Xikwembu, hi vunene va nga hlamusela magoza lawa a faneleke a ma teka, tanihi ku hlaya Bibele ni tibuku ta Sosayiti ya Watch Tower, ni ku va kona eminhlanganweni eHolweni ya Mfumo.
15. Vakulu lava hlanganaka ni munhu la susiweke va fanele ku tsundzuka yini?
15 Vakulu lava va fanele va tirhisa vutlhari ni ku twisisa ku vona loko ku ri na xikombiso xa ku hundzuka ni loko riendzo leri landzelaka ri ta va ri fanerile. Kavula, va fanele ku tsundzuka leswaku vanhu van’wana lava susiweke a va nge ‘tlheriseriwi eku hundzukeni.’ (Vaheveru 6:4-6; 2 Petro 2:20-22) Endzhaku ka riendzo, lava vambirhi va ta nyika xiviko xo koma hi nomu eka Komiti Ya Ntirho Ya Bandlha. Vona, nakambe, va ta tivisa huvo ya vakulu eka nhlangano wa vona lowu landzelaka. Goza ra tintswalo ra vakulu ri ta va ri kombisa langutelo ra Xikwembu loko xi ku: “Tlhelelani ka mina, kutani nḍi ta tlhelela ka ṅwina, ku v̌ula Yehova wa mav̌andla.”—Malakia 3:7.
Mpfuno Wun’wana Wa Tintswalo
16, 17. Hi fanele ku va languta njhani Vakriste lava nga maxaka ya un’wana loyi a susiweke?
16 Ku vuriwa yini hi lava va hina lava nga riki valanguteri naswona va nga taka va nga teki magoza yo tano ehenhla ka vanhu lava susiweke? Hi nga endla yini ku fambisana ni lunghiselelo leri hi ku tekelela Yehova?
17 Ntsendze loko un’wana a susiwile kumbe a tsemiwile, hi fanele ku landzela xitsundzuxo lexi nge: “Mi nga tolovelani ni loyi a vuriwaka makwerhu kasi i muoswi, kumbe i munhu wa makwanga, kumbe i mugandzeri wa swikwembu swa hava, kumbe i murhukani, kumbe i xidakwa, kumbe i muxisi; munhu lowo tano, hambi ku ri ku dya mi nga dyi na yena.” (1 Vakorinto 5:11) Kambe nkongomiso lowu wa Bibele a wu fanelanga wu khumba langutelo ra hina ra swirho swa ndyangu wa Vukriste leswi tshamaka ni munhu la susiweke. Vayuda va khale va hlamule hi matimba swinene eka valuvisi lerova rivengo ra vona ri kombisiwe ni le ka ndyangu wa muluvisi. Yesu a nga swi amukelanga sweswo. U vule leswaku mudyohi loyi a aleke mpfuno a a fanele ku khomiwa ‘tanihi munhu wa matiko ni muluvisi’; a nga vulanga leswaku swirho swa ndyangu wa Vukrsite a swi fanele ku khomiwa tano.—Matewu 18:17.
18, 19. Hi tihi tindlela tin’wana leti ha tona hi nga kombisaka Vukriste bya hina eka maxaka yo tshembeka ya munhu la susiweke?
18 Ngopfu-ngopfu hi fanele ku seketela swirho swa ndyangu leswi nga Vakriste vo tshembeka. Va nga ha va va langutane ni switlhavi ni swihinga hikwalaho ko tshama ekaya leri nga ni munhu la susiweke loyi kahle-kahle a nga ha vaka a sola ndlela ya vona ya moya. A nga ha lava leswaku Vakriste va nga endzi ekaya; kumbe loko va ta vona swirho swo tshembeka swa ndyangu, a nga ha sihalala ku va ekule ni vaendzi. Nakambe a nga ha sivela matshalatshala ya ndyangu yo ya eminhlanganweni ni le tinhlengeletanweni hinkwato ta Vukriste. (Ringanisa Matewu 23:13.) Xisweswo Vakriste lava heleke matimba va faneriwa hi tintswalo ta hina.—2 Vakorinto 1:3, 4.
19 Ndlela yin’wana leyi hi nga kombisaka tintswalo ha yona i ‘ku vulavula hi ku chavelela’ ni ku va ni mabulo lama khutazaka ni vanhu vo tano vo tshembeka endyangwini. (1 Vatesalonika 5:14) Nakambe ku na minkarhi leyinene yo nyika nseketelo emahlweni ni le ndzhaku ka minhlangano, loko hi ri entirhweni wa nsimu kumbe loko hi ri swin’we minkarhi yin’wana. A hi fanelanga hi boxa mhaka ya ku susa kambe hi nga bula hi swilo swo tala leswi akaka. (Swivuriso 25:11; Vakolosa 1:2-4) Loko vakulu va ya emahlweni va risa Vakriste endyangwini, hi nga ha kuma leswaku na hina hi nga endza handle ko vulavurisana ni munhu la susiweke. Loko loyi a susiweke a tshuka a hlamula loko hi endza kumbe hi ba riqingho, hi ku olova hi nga kombela xaka ra Vukriste leri hi ri lavaka. Nkarhi wun’wana swirho swa ndyangu wa Vukriste swi nga ha swi kota ku amukela xirhambo xo hlangana ekaya ra hina. Yinhla hi leyi nge: Vona—lavantshwa ni lavakulu—i malandza-kulori, i swirho leswi rhandzekaka swa bandlha ra Xikwembu, a va fanelanga va papalatiwa.—Psalma 10:14.
20, 21. Hi fanele ku titwa ni ku endlisa ku yini loko munhu a tlheriseriwa eku hlanganyeleni?
20 Ndhawu yin’wana yo kombisa tintswalo yi pfuleka loko loyi a susiweke a tlheriseriwa. Swifaniso swa Yesu swi kombisa ntsako etilweni loko ‘mudyohi a hundzuka.’ (Luka 15:7, 10) Pawulo u tsalele Vakorinto malunghana ni munhu loyi a a susiwile, a ku: “[Mi fanela] ku n’wi rivalela, mi n’wi chavelela, leswaku a nga hluriwi hi gome ku tlula mpimo. Hikwalaho, ndza mi khongotela leswaku mi tlhela mi n’wi komba rirhandzu.” (2 Vakorinto 2:7, 8) A hi tirhiseni xitsundzuxo xexo kahle na hi rirhandzu emasikwini ni le mavhikini ya le ndzhaku ka loko munhu a tlheriseriwile.
21 Xifaniso xa Yesu xa n’wana wa vusopfa xi tisa khombo leri hi faneleke ku ri papalata. Makwavo lonkulu a nga tsakanga eku vuyeni ka nwana wa vusopfa kambe a a hlundzukile. Onge hi nga ka hi nga vi lavo tano, lava hlayisaka xidyoho xa nkarhi lowu hundzeke kumbe ku va ni mavondzo loko munhu a tlheriseriwa eku hlanganyeleni. Ematshan’wini ya sweswo, pakani ya hina yi fanele yi fana ni ya tatana, loyi a kombiseke mintlhaveko yo fana ni ya Yehova. Tatana a a tsakile hikuva n’wana wa yena, loyi a lahlekile naswona loyi a swi languteka onge u file, u kumekile kumbe u tlhele a hanya. (Luka 15:25-32) Hi laha ku faneleke, hi ku ntshunxeka hi ta vulavurisana ni makwerhu la tlheriseriweke naswona hi tlhela hi n’wi khutaza. Ina, hi fanele ku swi veka erivaleni leswaku hi kombisa tintswalo, hi laha Tata wa hina wa le tilweni la rivalelaka la nga ni tintswalo a endlaka ha kona.—Matewu 5:7.
22. Ku katseka yini eku tekeleleni ka hina Yehova Xikwembu?
22 A swi kanakanisi leswaku loko hi lava ku tekelela Xikwembu xa hina, hi fanele hi kombisa tintswalo hi ku pfumelelana ni swileriso ni vululami bya xona. Mupisalema u xi hlamusela hi ndlela leyi: “Yehova o ni tintŝalo, o ni nsov̌o, o hlwela ku kariha, o ṭeṭelela ngopfu. Yehova o ni v̌unene ka hikwav̌o, tintŝalo ta yena ti eneta mitiro hikwayo ya yena.” (Psalma 145:8, 9) Mawaku xikombiso xonghasi lexi Vakriste va nga xi tekelelaka!
[Tinhlamuselo ta le hansi]
a “Valuvisi a a va nyenyiwa ngopfu hi vaaki va Yuda va Palestina hikwalaho ka swivangelo swo talanyana: (1) va hlengelete mali ya vulawuri bya tiko rimbe leri tekeke tiko ra Israyele, xisweswo a a va nyikela nseketelo wa le xihundleni eku hlaseleni loku; (2) a va tiveka hi mahanyelo yo biha, va fuwa hi ku dyelela vanhu va ka vona; naswona (3) ntirho wa vona a a wu va endla va hlangana ni Vamatiko nkarhi na nkarhi, va va endla va va lava thyakeke. Ku soriwa ka valuvisi ku kumeka eka T[estamente] L[eyintshwa] ni le bukuwini ya vurhavi . . . Hi ku ya hi papila leri, rivengo a a ri fanele ku kombisiwa hambi ku ri endyangwini wa valuvisi.”—The International Standard Bible Encyclopedia.
b Loko endyangwini wa Vukriste ku ri na xaka leri susiweke, yoloye wa ha ta tama a ri xiphemu xa timhaka ni mintirho leyi tolovelekeke ya siku na siku ya ndyangu. Leswi swi nga katsa ku va kona loko mhaka ya swa moya yi langutiwa tanihi ndyangu.—Vona Xihondzo xo Rindza xa November 15, 1988, matluka 19-20.
c Vona 1991 Yearbook of Jehovah’s Witnesses, matluka 53-4.
d Loko Mbhoni yihi na yihi, eku chumayeleni hi yindlu na yindlu kumbe hi ndlela yin’wana, yi twa hi ta munhu la susiweke loyi a tshamaka ensin’wini ya ka vona, u fanele ku yisa rungula rero eka vakulu.
Xana U Ti Xiyile Tinhla Leti?
◻ Vayuda va va khome njhani valuvisi ni vadyohi, kambe ha yini Yesu a hlangane ni van’wana vo tano?
◻ I xisekelo xihi xa Matsalwa lexi nga kona xa goza ra tintswalo leri se ri tekiweke ehenhla ka vo tala lava lahlekeke?
◻ Tihuvo ta vakulu ti nga ri teka njhani goza ro tano naswona ehenhla ka va mani?
◻ Hi nga ti kombisa njhani tintswalo ehenhla ka lava tlheriseriweke ni le ka mindyangu ya lava susiweke?
[Bokisi leri nga eka tluka 23]
Wihi na wihi loyi a a ri xiphemu xa bandlha ra Xikwembu leri baseke ni leri tsakeke kambe sweswi a susiwile kumbe a tsemiwile, a nga fanelanga a tshama eka xiyimo xexo. Ematshan’wini ya sweswo, munhu yoloye a nga hundzuka ivi a teka goza ro vulavurisana ni vakulu va bandlha. Ndlela yo tlhelela yi pfulekile.
[Laha Xifaniso Xi Humaka Kona eka tluka 24]
Garo Nalbandian