Xiphemu Xa Vatswari

Handle ko kanakana, ku kurisa vana leswaku va va vanhu lavakulu lava ringaniselaka emisaveni ya namuntlha a swi olovi.

U.S. NATIONAL Institute of Mental Health yi humese vuyelo bya nkambisiso wa vatswari lava a va tekiwa va ri lava humelelaka—lava vana va vona, va malembe yo tlula 21, “a va ri vanhu lavakulu lava a va tikomba va hanyisana kahle ni vaaki lavan’wana.” Vatswari lava va vutisiwile: ‘Hi ku ya hi ntokoto wa n’wina, xana hi xihi xitsundzuxo lexikulu lexi mi nga xi nyikaka vatswari van’wana?’ Tinhlamulo to tala a ti ku: ‘Va kombe rirhandzu lerikulu,’ ‘va laye hi ndlela leyi akaka,’ ‘tshamani swin’we,’ ‘dyondzisa vana va wena ku hlawula leswinene eka leswo biha,’ ‘khutaza ku xiximana,’ ‘va yingise khwatsi,’ ‘va letele ematshan’weni ya ku va byeletela’ naswona u ‘vula ntiyiso.’

Hambi swi ri tano, vatswari a hi vona ntsena lava tirhelaka ku va ni vana lavakulu lava leteriweke kahle. Vadyondzisi na vona va endla xiphemu xa nkoka eka leswi. Muleteri un’wana wa xikolo la nga ni ntokoto u te: “Xikongomelo lexikulu xa dyondzo i ku seketela vatswari leswaku va va ni vana lava nga ni vutihlamuleri, lava tiyeke kahle emianakanyweni, emirini ni le mintlhavekweni.”

Kutani vatswari ni vadyondzisi va ni pakani leyi fanaka—yo kurisa vantshwa lava endzhaku ka nkarhi va nga ta va vanhu lava wupfeke ni lava ringaniselaka lava tsakelaka vutomi ni lava kotaka ku hanyisana khwatsi ni vanhu van’wana.

I Vatirhi-kuloni, A Va Lavi Mphikizano

Hambi swi ri tano, swiphiqo swi va kona loko vatswari va tsandzeka ku tirhisana ni vadyondzisi. Hi xikombiso, vatswari van’wana a va na mhaka nikatsongo ni dyondzo ya vana va vona; van’wana va ringeta ku phikizana ni vadyondzisi. Loko magazini wa le Furwa wu bula hi xiyimo lexi, wu te: “Mudyondzisi a ka ha ri yena ntsena la kongomisaka. Vatswari, hikwalaho ka ku tikarhatela leswaku vana va vona va humelela, va xopelela tibuku ta xikolo, va xiyisisa ni ku sola madyondziselo, naswona va hatlisa va teka goza loko n’wana wa vona a nga humeleli kahle.” Swiendlo swo tano swi nga ha lwisana ni timfanelo ta vadyondzisi.

Timbhoni ta Yehovha ti anakanya leswaku vana va tona va vuyeriwa loko vatswari va tirhisana ni vadyondzisi, va hisekela ni ku hoxa xandla eka dyondzo ya vana va vona. Va ni ntshembo wa leswaku, ntirhisano wo tano i wa nkoka swinene tanihi leswi ntirho wa wena tanihi mudyondzisi wu yaka wu nonon’hwa swinene.

Swiphiqo Swa Le Xikolweni Namuntlha

Hi ku fambisana ni vanhu lava swi kumekaka eka vona, swikolo a swi sirhelelekanga eka swiphiqo leswi tolovelekeke evanhwini. Swiphiqo swa ntshamisano swi andze ngopfu emalembeni lama hundzeke. Loko yi hlamusela swiyimo swa le xikolweni xin’wana eUnited States, The New York Times yi vikile: “Swichudeni swa khudzehela etlilasini, swi xungetana etiphasejini leti tsala-tsariweke swiga leswi nga sulekiki, swichudeni leswinene swi tekeriwa ehansi. . . . Swichudeni swo tala swi langutana ni swiphiqo swo tanihi ku hlayisa vana, ku hlayisa vatswari lava nga swi kotiki ku famba ni ku tiponisa eka madzolonga ya mintlawa. Siku rin’wana ni rin’wana, ku xwa vana va kwalomu ka n’we-xa-ntlhanu.”

Lexi chavisaka ngopfu i xiphiqo lexi kulaka xa misava hinkwayo xa madzolonga ya le xikolweni. Ku lwa loku a ku pfa ku va kona loku katsaka ku dlidlimetana ni ku dodombisana swi siviwe hi ku duvulana ni ku tlhavana. Matlhari ma andze ngopfu, ku hlaselana ku engetelekile, ni vana va rhandza madzolonga va ha ri vatsongo.

Handle ko kanakana, a hi matiko hinkwawo lama langutanaka ni swiyimo swo tano swo biha. Hambi swi ri tano, vadyondzisi vo tala emisaveni hinkwayo va langutana ni xiyimo lexi boxiweke eka magazini wa vhiki na vhiki wa le Furwa lowu nge Le Point: “Mudyondzisi a nga ha xiximiwi; a nga ha ri na matimba.”

Ku pfumala xichavo ko tano eka vulawuri ku vanga khombo lerikulu eka vana hinkwavo. Hikwalaho Timbhoni ta Yehovha ti ringeta ku dyondzisa vana va tona ku yingisa ni ku xixima vulawuri, timfanelo leti hakanyingi ti nga riki kona exikolweni namuntlha.

[Marito lama tshahiweke exihlokweni lama nga eka tluka 29]

Timbhoni ta Yehovha ti ni ntshembo wa leswaku vana va tona va pfuneka loko vatswari va tirhisana ni vadyondzisi, va hoxa xandla etidyondzweni ta vana va vona

[Xifaniso lexi tataka tluka hinkwaro lexi nga eka tluka 26]

[Xifaniso lexi nga eka tluka 28]

Vadyondzisi va endla xiphemu lexikulu leswaku vana va va vanhu lavakulu lava tiyeke

[Xifaniso lexi nga eka tluka 30]

Vatswari lava humelelaka va heta nkarhi va ri ni vana va vona