Swivutiso Swa Vahlayi

◼ Xana ku hundzuluxela ka Yohane 21:15 aka New World Translation ni le ka Testamente Leyintshwa hi Xitsonga ku lulamile tanihi leswi ku hambanaka ni ku hundzuluxela ka khale ka Xitsonga ke?

New World Translation, kun’we ni Testamente Leyintshwa hi Xitsonga ti ri: “Xana wa ndzi rhandza ku tlula leswi?” kasi ku hundzuluxela kun’wana ko tanihi Bibele ya Xitsonga ya khale, ku ri: “Šana wa nḍi ranḍa ku tlula lav̌a?” Hi kwihi ku hundzuluxela loku lulameke?

Yesu la pfuxiweke a a ri eLwandle ra Galeliya loko a tlakusa xivutiso lexi. Nhlamulo ya Petro eka yena a yi ku: “‘Ina, Hosi, wa swi tiva leswaku ndza ku rhandza.’ Yesu a ku ka yena: ‘Risa swinyimpfana swa mina.’”—Yohane 21:15.

Risivi ra Xigriki, touʹton leri nga evunyingini ri nga hundzuluxeriwa va ku “leswi” kumbe “lava.” Hikwalaho, swichudeni swi ringanyete tinhlamuselo tinharhu leti ku nga vaka tona ta xivutiso xa Yesu:

1. Xana u ndzi rhandza ku tlula leswi u va rhandzisaka xiswona vadyondzisiwa lava van’wana?

2. Xana u ndzi rhandza ku tlula leswi vadyondzisiwa lava va ndzi rhandzisaka xiswona?

3. Xana u ndzi rhandza ku tlula swilo leswi, swo tanihi tinhlampfi?

A hi anakanyisiseni hi leti tinharhu ku vona leswaku hi yihi leyi fanelekaka ngopfu.

Xo Sungula. Entiyisweni, a hi vangani Vakriste lava nga anakanyaka Kriste a vutisa a ku, ‘Xana u ndzi rhandza ku tlula leswi vadyondzisiwa u va rhandzisaka xiswona ke?’ Kavula hi fanerile! A swi ta twala swi hlamarisa swinene ku vutisa Petro xivutiso xo tano. Ku nga ri khale a a ri ebyatsweni ni vadyondzisiwa van’wana va tsevu, kambe loko a vona Yesu ehlalukweni, Petro u sukela vadyondzisiwa ivi a hlambela a ya ehlalukweni. Ku kombisa vunghana lebyi fanaka, loko Kriste a vutise loko vaapostola va lava ku famba ni lava va khunguvanyekeke, Petro u vule leswaku a a tiyimiserile ku tshama etlhelo ka Yesu.—Yohane 6:66-69; 21:7, 8.

Xa Vumbirhi. Ku vuriwa yini hi ku koteka ka leswaku Yesu a a vula ku, ‘Petro, xana u ndzi rhandza ngopfu ku tlula leswi vadyondzisiwa van’wana va ndzi rhandzisaka xiswona?’ Vahlamuseri vo tala va amukele langutelo leri, tanihi leswi Petro emahlweninyana a tivuleke leswaku a a tshembeka swinene eka Yesu ku tlula lava van’wana. (Matewu 26:33-35) Kambe, ku twisisa Yohane 21:15 hi ndlela leyi swi lava leswaku riendli leri nga boxiwangiki ri nghenisiwa, tanihi ku “xana u ndzi rhandza ku tlula ndlela leyi lava va ndzi [rhandzaka] ha yona?” Kambe riendli ro tano leri engetelekeke a ri kona exivutisweni xa Yesu, naswona ri vanga ku nonon’hwa eka mavulavulelo. Ku tlula kwalaho, a swi ta twala swi nga fanelanga eka Yesu ku kombela Petro ku ringanisa mpimo wa rirhandzu rakwe ni mpimo wa rirhandzu leri lava van’wana va nga ha vaka va ri na rona. Xana Yesu a nga va ololoxanga vaapostola loko va wele eku kanetaneni?—Marka 9:33-37; 10:35-44; Luka 22:24-27.

Manuku ke, ku nga va ku ri leswaku Xa Vunharhu hi xona lexi Yesu a a vutisa xona, ‘Xana u ndzi rhandza ku tlula swilo leswi, swo tanihi tinhlampfi?’ Xivutiso xo tano a xi ta va xi fanerile hi ku ya hi leswi Petro a a ri xiswona endzhaku. U ve un’wana wa vadyondzisiwa vo sungula ku landzela Yesu. (Yohane 1:35-42) Hambi swi ri tano, kahle-kahle Petro a nga hatlisanga ku landzelela Yesu nkarhi hinkwawo. Ematshan’wini ya sweswo, u tlhelele eku phaseni ka yena tinhlampfi. Xisweswo, tin’hweti to karhi endzhakunyana Yesu u suse Petro ebindzwini rero ra nkoka ku va ‘muphasi wa vanhu.’ (Matewu 4:18-20; Luka 5:1-11) Hambi swi ri tano, endzhaku ka rifu ra Yesu, Petro u lave ku tlhelela entirhweni lowu, a byela van’wana va vadyondzisiwa a ku: “Ndzi ya rhiya tinhlampfi.”—Yohane 21:2, 3.

Kutani swi nga ha endleka leswaku Yesu a a kombisa Petro xilaveko xo endla ku hlawula loku tiyeke. I yini lexi a a ta xi rhangisa swinene evuton’wini—ku va mulandzeri wa Yesu kumbe ku hlongorisa ntirho-vutomi, hi laha swi ringanyetiweke hi tinhlampfi leti fumbiweke emahlweni ka vona ke? Xana ndhawu leyi tinhlampfi, tinkoka, mabyatso, vunghana ni vaphasi-kulobye va tinhlampfi swi yi tekeke a yi kurise ku yini embilwini ya Petro? Xana Petro hakunene a a ta swi sukela swilo leswi leswi tsakisaka leswaku a rhangisa rirhandzu ra yena eka Kriste ni ku phamela “tinyimpfu letintsongo” ta Yesu loku nga ta landzela ke?—Yohane 21:17.

Hi nga tivutisa xivutiso lexi fanaka lexi katsaka ‘swilo leswi’ leswi nga ha hi kokaka, swo tanihi ntirho wa hina lowu tsakisaka kumbe bindzu, ku tiphina ka hina hi dyondzo ya ku tihanyisa, kaya ra hina kumbe xivumbeko xa hina lexi rhandzekaka xa ku tirivatisa. Hi nga anakanyisisa hi laha ku tiyeke hi ku: ‘Xana ndzi rhandza Yesu ku tlula swihi na swihi kumbe swilo leswi hinkwaswo ke?’ Yesu u kombise leswaku loko nhlamulo ya hina leyi tiyeke yi ri ina, hi ta va hi yi kombisa hi ku phamela “tinyimpfu letintsongo.”

Swi nga voniwa leswaku ku hundzuluxela ka New World Translation ni ka Testamente Leyintshwa hi Xitsonga hi ndlela yoleyo ka pfumelelana ni mongo ni tidyondzo hinkwato ta Yesu.

[Laha Xifaniso Xi Humaka Kona eka tluka 31]

Pictorial Archive (Near Eastern History) Est.