U Nga Kayeli Xikongomelo Xa Ntshunxeko Lowu Humaka Eka Xikwembu
“Laha ku nga ni moya wa Yehova, ku ni ntshunxeko.”—2 VAKORINTO 3:17, NW.
1. Ha yini Esaya 65:13, 14 yi tirha eka Timbhoni ta Yehova?
YEHOVA i Xikwembu xa ntshunxeko. Vona ndlela leyi ntshunxeko lowu humaka eka Xikwembu wu nga nkateko ha yona! Leswi malandza ya yena lama tinyiketeleke ma nga ni ntshunxeko wo tano, marito lawa ya Yehova, Hosi Leyikulu, ma tirha eka wona: “Maŝiv̌o, malanḍa ya mina ma ta dya, kambe ṅwina mi ta v̌a ni ndlala; masiv̌o, malanḍa ya mina ma ta nwa, kambe ṅwina mi ta v̌a ni tora; masiv̌o, malanḍa ya mina ma ta ṭaka, kambe ṅwina mi ta v̌a ni tingana; masiv̌o, malanḍa ya mina ma ta yimbelela hi ku ṭaka ka timbilu ta wona, kambe ṅwina mi ta kolola e ku v̌av̌isekeni ka timbilu ta ṅwina, mi ta huwelela hi ku hela ka timbilu.”—Esaya 65:13, 14.
2. Ha yini vanhu va Yehova va tiphina hi xiyimo lexinene hi tlhelo ra moya?
2 Vanhu va Xikwembu va tiphina hi xiyimo lexi lexinene xa moya hikuva va kongomisiwa hi moya kumbe matimba lama tirhaka. Muapostola Pawulo u te: “Yehova i Moya; naswona laha ku nga ni moya wa Yehova, ku ni ntshunxeko.” (2 Vakorinto 3:17, NW) Hi xihi xikongomelo xa Ntshunxeko lowu humaka eka Xikwembu? Naswona ku laveka yini eka hina leswaku hi wu tirhisa hi xitalo?
Ntshunxeko Lowu Xikwembu Xi Nga Na Wona
3. Xikwembu xi ni muxaka muni wa ntshunxeko, naswona ha yini?
3 Yehova hi yexe u ni ntshunxeko lowu heleleke. Ku hava xivumbiwa xa yena lexi xi nga sivelaka ntshunxeko wa Yena hikuva i Xikwembu xa Matimba Hinkwawo ni Hosi ya Vuako Hinkwabyo. Hi laha munhu wo tshembeka Yobo a vuleke ha kona, “a nga siv̌eriwa hi mani? I mani l’a nga ta ku ka yena: U endla yini?” (Yobo 9:12) Hi ku fanana, hosi ya Babilona Nebukadnetsara yi boheke ku pfumela, yi ku: “A ku na uṅwana l’a nga . . . siv̌elaka [Xikwembu], a ku ka [xo]na: U endla yini?”—Daniel 4: 35.
4. Yehova u wu hlayisisa ku yini ntshunxeko wa yena wu hikiwile?
4 Hambi swi ri tano, misinya ya milawu ya Yehova yo lulama yi hika ntshunxeko wolowo. Leswi swi kombisiwile loko Abrahama a a phofule ku karhateka ka yena hi vaaki va Sodoma ivi a vutisa: ‘Xana Muavanyisi wa misava hinkwayo a nga ka a nga endli leswi lulameke ke?’ Nhlamulo ya Xikwembu yi kombisa leswaku wa byi xiya vutihlamuleri byo endla leswi lulameke. A a ta va a nga ri lovisanga Sodoma loko a ku ri na vaaki lava lulameke eka rona. (Genesa 18:22-33) Nakambe Xikwembu xi hika ntshunxeko wa xona hikuva rirhandzu ni vutlhari bya xona swi xi endla xi hlwela ku kariha naswona xa tikhoma.—Esaya 42: 14.
Mindzilakana Ya Ntshunxeko Wa Vanhu
5. Hi swihi swilo swin’wana leswi hungutaka ntshunxeko wa munhu?
5 Hambi leswi Yehova a nga ni ntshunxeko lowu heleleke, lavan’wana hinkwavo va hanya hi mindzilakana leyi vekiweke hi ntumbuluko, vuswikoti ni xivandla xa vona xo tshama eka xona, kun’we ni swilo swo tanihi ku koma loku nga kona sweswi ka vutomi bya vanhu va vudyoho. Xikwembu xi vumbe munhu a ri na ntshunxeko lowu hetisekeke leswaku a hanya exivandleni lexi Yehova a n’wi vekeleke xona. Ku ni swivangelo swin’wana swo tala leswi endlaka leswaku ntshunxeko wa munhu wu va lowu hikiweke, lowu nga helelangiki.
6. Ku va ehansi ka Xikwembu ku wu khumba njhani ntshunxeko wa hina?
6 Xo sungula, ntshunxeko wa munhu wu hikiwile hikuva Xikwembu xi vumbe munhu leswaku a ta endla xikongomelo xa xona. Yehova u ‘faneriwa hi ku amukela ku dzuneka ni xichavo ni matimba hikuva u vumbe swilo hinkwaswo naswona swi ve kona ni ku vumbiwa hikwalaho ka rirhandzu ra yena.’ (Nhlavutelo 4:11) Kutani munhu u le hansi ka Muvumbi wakwe, loyi a endleke milawu leyinene leyi vanhu va faneleke ku lawuriwa ha yona. Le Israyele wa khale ehansi ka Nawu wa Muxe, Xikwembu a xi lava leswaku vanhu va dlayiwa loko va tirhisa vito ra xona hi ndlela yo biha kumbe loko va tlula nawu wa Savata. (Eksoda 20:7; 31:14, 15; Levitika 24:13-16; Tinhlayo 15:32-36) Hambi leswi hina, tanihi Vakriste, hi nga riki ehansi ka Nawu, ntshunxeko wa hina wu hikiwile hikuva hi le hansi ka Yehova, loyi a nga Muavanyisi, Munyiki wa Nawu ni Hosi ya hina.—Esaya 33:22; Varhoma 14:12.
7, 8. (a) Milawu ya miri yi hika ntshunxeko wa vanhu hi ndlela yihi? (b) Hi yihi milawu yin’wana ya Xikwembu leyi hikaka ntshunxeko wa hina tanihi vanhu?
7 Xa vumbirhi, ntshunxeko wa munhu wu hikiwile hikwalaho ka milawu ya Xikwembu ya miri. Hi xikombiso, hikwalaho ka nawu wa nkoka-misava, munhu a nge tluli ehenhla ka yindlu leyi tlakukeke kambe a nga tivavisi kumbe ku tidlaya. Hakunene milawu ya Xikwembu ya miri yi hika ntshunxeko wa munhu wo endla swilo swo karhi.
8 Xa vunharhu, ntshunxeko wa munhu wu hikiwile hikwalaho ka nawu wa Xikwembu wa mahanyelo. Kumbexana u ku vonile ku hetiseka ka leswi Pawulo a swi tsaleke eka Vagalatiya 6:7, 8: “Mi nga tshuki mi tixisa: Xikwembu a xi vungunyiwi; xin’wana ni xin’wana lexi munhu a xi byalaka, ú ta tshovela xona; loyi a byalaka swo tsakisa ntumbuluko wa yena wa nyama, ú ta tshovela leswo bola leswi humaka eka ntumbuluko wa yena wolowo; kambe loyi a byalaka swo tsakisa Moya, ú ta tshovela leswi humaka eka Moya, byi nga vutomi lebyi nga heriki.” Handle ko kanakana, milawu ya Yehova Xikwembu ya mahanyelo na yona yi hika ntshunxeko wa hina, kambe ku yi yingisa swa laveka eka hina leswaku hi kuma vutomi.
9. Xana ntshunxeko wa hina wu hikiwe njhani hikwalaho ko va xiphemu xa vandla ra vanhu?
9 Xa vumune, ntshunxeko wa munhu wu hikiwile hi leswi a nga xiphemu xa vandla ra vanhu. Hikwalaho, u fanele a va ni ntshunxeko ku fikela eka mpimo lowu wu nga kavanyetiki wa van’wana hi ndlela yo biha. Vakriste va fanele va yingisa “tihosi” ta hulumendhe, hi va yingisela ntsendze loko va nga lavi leswaku hi tlula milawu ya Xikwembu. (Varhoma 13:1; Mintirho 5:29) Hi xikombiso, hi fanele hi yingisa milawu malunghana ni ku hakela swibalo, rivilo leri hi fambisaka movha ha rona ni swin’wana. Mhaka ya leswaku hi fanele hi yingisa milawu yoleyo ya “Khezari” yi kombisa hi laha ku engetelekeke leswaku ntshunxeko wa hina lowu hi nyikiweke hi Xikwembu a wu helelanga.—Marka 12:17; Varhoma 13:7.
Ha Yini Ku Ri Ntshunxeko Lowutsongo?
10, 11. Ha yini Yehova a nyike vanhu ntshunxeko lowutsongo?
10 Hikwalaho ka yini Xikwembu xi nyike vanhu ntshunxeko lowutsongo? Xivangelo xin’wana hi leswaku Muvumbi a ta kota ku va ni swivumbiwa swo tlhariha la misaveni leswi nga ta n’wi xixima ni ku n’wi dzunisa hi marito ni mahanyelo ya swona lamanene. Vanhu va nga swi endla leswi, kasi swiharhi a swi nge swi koti. Swiharhi, hikwalaho ka leswi swi lawuriwaka hi ntumbuluko wa swona, a swi tivi nchumu hi ta mahanyelo lamanene. U nga letela mbyana leswaku yi nga teki xilo xo karhi, kambe u nga ka u nga yi dyondzisi ndlela leyi ku yiva ku biheke ha yona. Xiharhi a xi nge tisunguleli ku dzunisa ni ku xixima Xikwembu, hi mhaka ya leswi swiendlo swa xona swi kunguhatiweke hi ntumbuluko kasi munhu a nga ti hlawulela ku tirhela Muvumbi wakwe hi rirhandzu na hi ku tlangela.
11 Xikwembu xi tlhela xi nyika vanhu ntshunxeko lowu leswaku va pfuneka naswona va tsaka. Va nga kombisa ntshunxeko wa vona lowutsongo hi ku kota ku sungula swilo, va va ni musa ni ntirhisano. Nakambe vanhu va ni ntshuxeko wo hlawula etimhakeni to tanihi ntirho ni ndhawu yo tshama eka yona. Namuntlha, swivangelo swa ikhonomi ni swa politiki hakanyingi swi hika ntshunxeko wolowo wo hlawula, kambe leswi nga ha vangiwa hi makwanga ya munhu, hayi hi ndlela leyi Xikwembu xi vumbeke munhu ha yona eku sunguleni.
12. Ha yini vanhu vo tala va ri evuhlongeni?
12 Hambi leswi Yehova a nyikeke vanhu ntshunxeko lowukulu, vo tala namuntlha va le vuhlongeni lebyi chavisaka. Ku endleke yini? Mpatswa wo sungula wa vanhu, Adamu na Evha, va kayele xikongomelo xa ntshunxeko lowu humaka eka Xikwembu. Va tlule mindzilakana ya Xikwembu eka ntshunxeko wa vona kutani va tlhontlhe vulawuri lebyinene bya Xikwembu ehenhla ka vona, tanihi Hosi Leyikulu, Yehova. (Genesa 3:1-7; Yeremia 10:10; 50:31) Hi ku va va nga enerisiwi hi ku tirhisa ntshunxeko wa vona leswaku va xixima Xikwembu, va wu tirhise hi vutianakanyi, va ti anakanyela leswi lulameke ni leswi hoxeke, xisweswo va hlanganyela na Sathana hi ku xandzukela ka yena Yehova. Kambe, ematshan’weni yo kuma ntshunxeko lowukulu, Adamu na Evha lava dyoheke va nghene eka minsivelo leyi xanisaka ni vuhlonga, ku hunguteka ka ntshunxeko wa vona ivi eku heteleleni ku va rifu. Vana va vona va dye ndzhaka leyi ya ku lahlekeriwa hi ntshunxeko. “Hinkwavo va dyohile, hikokwalaho ku kwetsima loku a va nyikiwile hi Xikwembu, va ku pfumala.” “Ku dyoha ka hakela, hakelo ya kona i rifu.”—Varhoma 3:23; 5:12; 6:23.
13. Ha yini Sathana a swi kotile ku endla vanhu mahlonga?
13 Hi mhaka ya ku xandzuka ka vona aEdeni, Adamu ni vana vakwe na vona va te evuhlongeni eka Sathana Diyavulosi. Phela, “misava hinkwayo yi le hansi ka matimba ya Lowo biha”! (1 Yohane 5:19) Sathana u swi kotile ku kanganyisa ni ku va endla mahlonga vanhu lava hambukeke eka Xikwembu, hikwalaho ka matimba ni vuswikoti bya yena lebyikulu. Ku tlula kwalaho, vanhu va vutianakanyi va fume vanhu leswaku va va vavisa. (Eklesiasta 8:9) Hikwalaho, vanhu hinkwavo va le vuhlongeni bya xidyoho ni rifu, eka Sathana ni mademona yakwe, ni le ka mafambiselo ya tipolitiki ta misava, ikhonomi ni ya vukhongeri.
Ntshunxeko Wa Ntiyiso Wu Endliwa Wu Koteka
14. Ntshembo wa vanhu wa ntshunxeko wa ntiyiso wu titshenge hi yini?
14 Ku kuma ntshunxeko eka xidyoho, rifu na Diyavulosi ni misava yakwe, swi titshege hi ku tiyimisela ka Xikwembu leswaku xi tlhantlha mhaka leyi khumbaka ku faneleka ka vuhosi bya xona bya vuako hinkwabyo. Hikwalaho ka leswi Sathana a pfuxeke mhaka leyi, Yehova u n’wi pfumelerile leswaku a hanya, tanihi leswi a pfumeleleke Faro leswaku a hanya nkarhinyana. Leswaku Yehova a ta kombisa matimba yakwe hi xitalo ni leswaku vito rakwe ri twarisiwa emisaveni hinkwayo. (Eksoda 9:15, 16) Ku nga ri khale Xikwembu xi ta tikombisa tanihi Hosi ya Vuako Hinkwabyo kutani xi kwetsimisa vito ra xona ro kwetsima hi ku susa xisandzu lexi tisiweke ehenhla ka rona hi ku xandzuka ka Sathana, Adamu na Evha. Xisweswo, lava chavaka Yehova va ta kutsuriwa evuhlongeni bya xidyoho ni rifu kutani va ta nghenisiwa emisaveni leyintshwa ya ntshunxeko lowu humaka eka Xikwembu.—Varhoma 8:19-23.
15. Yesu u endle xiphemu xihi eku kondleteleni ka ntshunxeko evanhwini?
15 Xikwembu xi rhumele N’wana wa xona emisaveni tanihi munhu leswaku xi kondletela ntshunxeko evanhwini. N’wana wa Xikwembu, Yesu Kriste u nyikele gandzelo ra nkutsulo, xisekelo xo ntshunxa vanhu, hi ku nyikela vutomi bya yena bya vumunhu lebyi hetisekeke, hi ku tirhandzela. (Matewu 20:28) Nakambe u twarise rungula ra ntshunxeko. Eku sunguleni ka vutirheli bya yena, u tirhise marito lawa eka yena: “Moya wa Hosi, Yehova, wu le ka mina, hikuv̌a o nḍi totile ku byela ŝisiwana e mahungu ya ku saseka; o nḍi rumile ku horisa la’v̌a nga ni timbilu le’ti v̌av̌isekaka, ku tiv̌isa la’v̌a bohiweke leŝaku v̌a ta nṭhunšiwa, ni la’v̌a khoṭiweke leŝaku v̌a ṭa humesiwa.”—Esaya 61:1; Luka 4:16-21.
16. Vayuda va lembe xidzana ro sungula a va fanele ku teka magoza wahi leswaku va kuma ntshunxeko wa ntiyiso?
16 Vanhu va nga wu kumisa ku yini ntshunxeko wolowo? Yesu u te: “Loko mi tiyisela eritweni ra mina, mi vadyondzisiwa va mina hakunene; naswona mi ta tiva ntiyiso, kutani ntiyiso wu ta mi ntshunxa.” Xisweswo valandzeri va Yesu va swi kotile ku kuma ntshunxeko wa moya. (Yohane 8:31, 32, 36) Yesu a ye emahlweni a byela mufumi wa Rhoma, Pontiyo Pilato a ku: “Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso. Un’wana ni un’wana la nga wa ntiyiso, ú yingisa rito ra mina.” (Yohane 18:37) Vayuda lava amukeleke ntiyiso hi laha a wu chumayeriwa ha kona ni ku kombisiwa hi Yesu, va hundzukile eswidyohweni swa vona, va ololoxe ndlela ya vona leyi hoxeke, va tinyikela eka Yehova, naswona va khuvuriwile hi laha Yesu a endleke ha kona. (Matewu 3:13-17; Mintirho 3:19) Hi ndlela leyi va swi kotile ku kuma ntshunxeko wutsongo lowu humaka eka Xikwembu.
17. Ha yini Yehova a nyika malandza yakwe ntshunxeko?
17 Ngopfu-ngopfu Yehova u nyika malandza yakwe ntshunxeko leswaku a tlakusa vuhosi byakwe ni leswaku ma va ni ku rhula kumbe ma vuyeriwa. U ntshunxe Vaisrayele evuhlongeni bya Egipta leswaku va n’wi dzunisa tanihi mfumo wa vaprista, timbhoni ta yena. (Eksoda 19:5, 6; Esaya 43:10-12) Hi ku fanana, Yehova u humese vanhu vakwe evuhlongeni bya Babilona ngopfu-ngopfu leswaku va ta pfuxa tempele ya yena ni ku kondletela vugandzeri bya ntiyiso. (Ezra 1:2-4) Loko mahlonga ma tikarhatele swilaveko swa wona ntsena swa nyama, Yehova u rhumele vaprofeta va yena Hagayi na Zakariya leswaku va va tsundzuxa mintirho ya vona emahlweni ka Xikwembu. Hi ku va ntshunxeko wa vona lowu humaka eka Xikwembu wu va entirhweni lowunene swi endle leswaku tempele yi hetiwa, swi dzunisa Xikwembu, swi tisa ku rhula ni vutomi eka vanhu va xona.
Ku Ka U Nga Xi Kayeli Xikongomelo Xa Ntshunxeko Lowu Humaka Eka Xikwembu
18. Ha yini ku nga vuriwaka leswaku malandza ya Yehova ya manguva lawa a ma xi kayelanga xikongomelo xa ntshunxeko lowu ma nyikiweke hi Xikwembu?
18 Ku vuriwa yini hi malandza ya Xikwembu ya manguva lawa? Tanihi nhlengeletano, a va xi kayelanga xikongomelo xa ntshunxeko wa vona lowu humaka eka Xikwembu. Hi va-1870 va sungule ku ntshunxeka eka swihoxo swa Babilona ivi va ya eka ntshunxeko lowukulu wa Vukriste. Leswi a swi twanana na Swivuriso 4:18, leyi nge: “Ndlela ya la’v̌o lulama yi kotisa ku v̌onakala, ku hatima ka kona ku engeteleka ku fikela nhlekanhi lo’wukulu.” Kambe, tanihi leswi vanhu va khale va Xikwembu va yisiweke ekhotsweni swa nkarhinyana, hi 1918 malandza ya Yehova ma ve evuhlongeni byo karhi eka Babilona Lonkulu. (Nhlavutelo 17:1, 2, 5) Swirho swa mfumo wolowo wa misava wa vukhongeri bya mavunwa swi tsakile loko “timbhoni timbirhi” to fanekisela ti fa hi tlhelo ra moya. Kambe hi tintswalo ta Xikwembu leti nga fanelangiki, malandza ya xona lama totiweke ma pfuxiwile hi 1919, ma ntshunxiwa hi tlhelo ra moya. (Nhlavutelo 11:3, 7-11) Hi ku tirhisa ntshunxeko wa vona lowu humaka eka Xikwembu, va ve timbhoni leti hisekaka ta La nge Henhla-henhla. Hikwalaho, a swi fanela swinene leswi va kumeke vito ra Timbhoni ta Yehova hi 1931! (Esaya 43:10-12) Ngopfu-ngopfu ku sukela hi 1935 Timbhoni leti totiweke ti joyiniwile hi “ntshungu lowukulu,” lowu nga ni ntshembo wo kuma vutomi lebyi nga heriki emisaveni. Na wona a wu xi kayeli xikongomelo xa ntshunxeko wa vona lowu va nyikiweke hi Xikwembu.—Nhlavutelo 7:9-17.
19, 20. (a) Hi yihi ndlela yin’wana leyi xiyekaka leyi vanhu va Yehova va tirhisaka ntshunxeko wa vona lowu va nyikiweke hi Xikwembu kahle? (b) Hi yihi ndlela yin’wana leyi xiyekaka leyi Timbhoni ta Yehova ti tirhisaka kahle ntshunxeko wa tona lowu ti nyikiweke hi Xikwembu?
19 Vanhu va Yehova va wu tirhisa kahle ntshunxeko wa vona lowu va nyikiweke hi Xikwembu hi tindlela timbirhi leti xiyekaka swinene. Yo sungula, va wu tirhisela ku landzela ndlela yo lulama. (1 Petro 2:16) Mawaku ndhuma leyinene swonghasi leyi va nga na yona! Hi xikombiso, munhu un’wana u tshame a nghena eHolweni ya Mfumo eZurich, le Switzerland, kutani a vula leswaku u lava ku va un’wana wa Timbhoni ta Yehova. Loko a vutisiwa xivangelo, a vula leswaku makwavo wa yena wa xisati a a ri Mbhoni naswona u tsemiwile hikwalaho ka ku tikhoma ko biha. U te: ‘Hi yona nhlengeletano leyi ndzi lavaka ku yi joyina—leyi yi nga ku laviki ku tikhoma ko biha.’ Hi xivangelo lexinene New Catholic Encyclopedia yi xiye leswaku Timbhoni ta Yehova ti kume vito lerinene ra ku va “ntlawa wun’wana lowu ti khomaka kahle emisaveni.”
20 Timbhoni ta Yehova nakambe ti tirhisa ntshunxeko wa tona lowu humaka eka Xikwembu hi ku hetisisa ntirho wa tona wo chumayela mahungu lamanene ya Mfumo, hi laha Yesu a endleke ha kona. (Matewu 4:17) Ti huwelela Mfumo wa Yehova, hi rito ra nomu na hi tibuku hi nkarhi wa kona na hi xitshuketa. Hi ku endla tano ti pfuneka swinene, hi ku tiyisa ripfumelo ra tona ni ku vangamisa ntshembo wa tona. Ku tlula kwalaho, ntirho lowu wu ponisa tona ni lava ti yingisaka. (Timotiya 4:16) Malunghana ni ntirho lowu, buku leyi nge Dynamic Religious Movements yi ri: “Swa nonon’hwa ku kuma swirho swa ntlawa wun’wana ni wun’wana leswi tikarhataka evukhongerini bya swona hi laha Timbhoni ti endlaka ha kona.”
21. Hi byihi vumbhoni lebyi nga kona bya leswaku Yehova u katekisa vutirheli bya vanhu vakwe?
21 Mawaku ndlela leyi Yehova a hi katekisaka ha yona eku hetisiseni ka ntshunxeko wa hina lowu humaka eka Xikwembu! Leswi swi nga voniwa eka xiviko xa ntirho wa nsimu xa n’wexemu—nhlohlorhi ya vahuweleri va Mfumo vo tlula mune wa timiliyoni, vanhu vo tlula khume ra timiliyoni va ve kona eka Xitsundzuxo xa rifu ra Yesu. Eka mpimo wun’wana, Ireland ri ve na tinhlohlorhi ta vahuweleri ta 29 leti landzelelanaka; Mexico ri ve na tinhlohlorhi ta 78 hi tin’hweti ta 80; kasi Japani ri ve na tinhlohlorhi ta 153 hi ku landzelelana!
Wu Tirhise Kahle Ntshunxeko Wa Wena Lowu Humaka Eka Xikwembu
22. Hi wihi mongo wa swivutiso swo karhi leswi xokolaka, leswi hi nga ti vutisaka swona?
22 Loko u ri wun’wana wa Timbhoni ta Yehova leti tinyiketeleke, xana u wu tirhisa kahle ntshunxeko lowu Xikwembu xi ku nyikeke wona? Un’wana ni un’wana wa hina u fanele ku tivutisa: ‘Xana ntshunxeko wa mina lowu ndzi nyikiweke hi Xikwembu ndzi wu tirhisa hi vukheta leswaku ndzi papalata ku khunguvanyisa van’wana hi ku tikhoma ko biha? Xana ndzi yi yingisela khwatsi milawu ya Khezari, hambi leswi ndzi rhangisaka milawu ya Xikwembu? Xana ndzi khomisana ni vakulu va bandlha hi xitalo? Xana ntshunxeko wa mina lowu ndzi nyikiweke hi Xikwembu ndzi wu tirhisa hi xitalo eku chumayeleni ka mahungu lamanene? Xana ndzi tshama ndzi ri na ‘swo tala swo swi endla entirhweni wa Hosi’? Xana ndzi hisekela swinene ntirho-vutomi hambi loko a ndzi ta swi kota ku tirhisa ntshunxeko wa mina lowu humaka eka Xikwembu hi ndlela yo antswa hi ku engetela vutirheli bya mina, ndzi fanelekela vutihlamuleri lebyikulu ebandlheni kumbe ntirho wa nkarhi hinkwawo’?
23. Hi fanele hi endla yini leswaku hi nga kayeli xikongomelo xa ntshunxeko lowu humaka eka Xikwembu?
23 Onge hinkwerhu ka hina hi nga “[nantswa ivi hi, NW] v̌ona lesaku Yehova i lo’nene ŝonghasi!” (Psalma 34:8) A hi n’wi tshembeni, hi fambisana ni milawu ya yena naswona hi dzunisa vito ra yena ro kwetsima hi ku twarisa Mfumo wakwe hi ku chivirika. Tsundzuka leswaku lava ‘byalaka ngopfu va ta tshovela ngopfu.’ (2 Vakorinto 9:6) Hikwalaho, a hi endleni ntirho wa mbilu hinkwayo eka Yehova hi tlhela hi kombisa leswaku a hi xi kayelanga xikongomelo xa ntshunxeko lowu humaka eka Xikwembu.
A Wu Ta Hlamula Njhani?
◻ Xikwembu xi na ntshunxeko wa muxaka muni?
◻ Ntshunxeko wa munhu wu na mindzilakana yihi?
◻ Ntshunxeko wa ntiyiso wu endlisiwe ku yini leswaku wu koteka?
◻ Hi fanele hi endla yini leswaku hi papalata ku kayela xikongomelo xa ntshunxeko lowu humaka eka Xikwembu?
[Xifaniso lexi nga eka tluka 9]
Ntshunxeko wa munhu wu hikiwile hikwalaho ka swilo swo tanihi nawu wa nkoka-misava