Xana Xikwembu I Xa Xiviri Eka Wena?

LOKO u va ni swiphiqo leswi tshikilelaka, xana wa xi tshinelela Xikwembu hi ku hatlisa hi xikhongelo? Loko swi ri tano, xana wa swi twa leswaku u vulavula ni munhu wa xiviri?

Loko a vulavula hi Tata wa yena wa le tilweni, Yesu Kreste u te: “Loyi a ndzi rhumeke i wa xiviri.” (Yohane 7:28) Ina, Yehovha Xikwembu i wa xiviri, naswona ku khongela eka yena swi fana ni ku ya eka munghana lonkulu swinene la nga munhu leswaku a ku pfuna kumbe a ku nyika ndzayo. Ina, leswaku hi twiwa hi Xikwembu, swikhongelo swa hina swi fanele swi fambisana ni swilaveko swa Matsalwa swa swikhongelo leswi amukelekaka. Hi xikombiso, hi fanele hi tshinelela ‘Mutwi wa swikhongelo’ hi ku titsongahata hi vito ra N’wana wa yena, Yesu Kreste.—Pisalema 65:2; 138:6; Yohane 14:6.

Van’wana va nga ha ehleketa leswaku leswi Xikwembu xi nga vonakiki, a hi xa xiviri. Eka vona, Xikwembu xi nga ha vonaka xi ri lexi nga khathaliki. Hambi ku ri Vakreste van’wana, lava dyondzeke hi timfanelo leti hlamarisaka ta Xikwembu, minkarhi yin’wana va nga ha swi kuma swi tika ku tlangela ndlela leyi xi nga xa xiviri ha yona. Xana u tshame u titwa hi ndlela yoleyo? Loko swi ri tano, i yini lexi nga pfunaka ku endla leswaku Yehovha Xikwembu a va wa xiviri eka wena?

Dyondza Matsalwa

Xana u dyondza Matsalwa yo Kwetsima nkarhi na nkarhi? Loko u dyondza Bibele minkarhi yo tala naswona u yi dyondza hi vuenti, Yehovha Xikwembu u ta va wa xiviri swinene eka wena. Xisweswo, ripfumelo ra wena ri ta tiyisiwa entiyisweni ri ku endla u kota ku “vona Loyi a nga vonakiki.” (Vaheveru 11:6, 27) Hi hala tlhelo, ku dyondza Bibele hi xiwelo a ku tali ku va ni vuyelo lebyikulu eripfumelweni ra wena.

Hi xikombiso: A hi nge dokodela wa wena u ku byele leswaku u tola murhi wo karhi kambirhi hi siku leswaku wu heta swirhumbana leswi tshamelaka ku huma. Xana swirhumbana swa wena a swi ta hela loko a wo tola murhi wa kona kan’we kumbe kambirhi hi n’hweti? A swi tano. Hilaha ku fanaka, mupisalema u hi nyika “nkongomiso wo tirhisa murhi” wa rihanyo ra moya. Hlayela Rito ra Xikwembu “[ehansi] nhlekanhi ni v̌usiku.” (Pisalema 1:1, 2) Leswaku hi tiphina hi vuyelo lebyi teleke, hi fanele hi landzela “nkongomiso wo tirhisa murhi”—ku kambisisa Rito ra Xikwembu siku na siku hi mpfuno wa tibuku ta Vukreste.—Yoxuwa 1:8.

Xana u nga swi tsakela ku endla minkarhi ya wena yo dyondza yi va leyi tiyisaka ripfumelo swinene? Hi lexi xiringanyeto xin’wana: Endzhaku ko hlaya ndzima eka New World Translation of the Holy Scriptures kumbe Bibele yin’wana leyi nga ni matsalwa lama kombisiweke etlhelo, hlawula ndzimana leyi tsakisaka ivi u languta matsalwa lama kombisiweke. Leswi swi ta fuwisa dyondzo ya wena, naswona handle ko kanakana u ta tsakisiwa hi ku twanana ka Bibele hi vuyona. Hi ku fanana, leswi swi ta endla leswaku Mutsari wa yona, Yehovha Xikwembu, a va wa xiviri swinene eka wena.

Ku tirhisa matsalwa lama kombisiweke etlhelo swi nga tlhela swi ku endla u tolovelana ni vuprofeta bya Bibele ni ku hetiseka ka byona. Kumbexana u tolovelane ni vuprofeta bya nkoka bya Bibele, byo tanihi lebyi hlamuselaka ku lovisiwa ka Yerusalema hi Vababilona. Kambe, Bibele yi ni nxaxamelo wa vuprofeta lebyi yelanaka swin’we ni ku hetiseka ka byona. Byin’wana bya byona a byi tiviwi hi vanhu vo tala.

Hi xikombiso, hlaya vuprofeta bya malunghana ni nxupulo wa ku pfuxa Yeriko ivi u kambisisa ku hetiseka ka byona. Yoxuwa 6:26 yi ri: “E nkarini wolowo Yošua a hlambanya, a ku: Ku ta rukaniwa e mahlweni ka Yehova e munhu l’a nga ta pfuša muti lowu wa Yeriko; o ta aka masungulo ya wona e henhla ka mativ̌ula ya yena, ni tinyangwa ta wona e henhla ka šikumanḍeni ša yena.” Byi hetiseke endzhaku ka malembe ya kwalomu ka 500, hikuva ha hlaya eka 1 Tihosi 16:34: “E nkarini wa [Hosi Akabu], Hiel, wa Betel, a aka Yeriko: a aka masungulo ya wona e henhla ka Abiram mativ̌ula ya yena, a bela timbanti ta wona e henhla ka Segub, ṅwana wa šikumanḍeni wa yena, hi laha Yehova a nga v̌ula ha kona ha Yošua, ṅwana Nun.”a I Xikwembu xa xiviri ntsena lexi nga huhutelaka vuprofeta byo tano xi tlhela xi tiyiseka hi ku hetiseka ka byona.

Loko u ri karhi u hlaya Bibele, u nga ha rhandza ku tiva yinhla yo karhi. Hi xikombiso, u nga ha tivutisa leswaku ku hundze malembe mangani vuprofeta byi nga si hetiseka. Ematshan’weni yo vutisa munhu un’wana, ha yini u nga endli matshalatshala yo tikumela swona hi wexe? Hi ku tirhisa tichati ni swipfuneto swo dyondza Bibele, lavisisa tinhlamulo hi ku hiseka ku kondza u ti kuma hilaha a wu ta swi lwela hakona ku kuma mepe lowu kombisaka laha ku nga ni xuma. (Swivuriso 2:4, 5) Ku kuma tinhlamulo swi ta va ni vuyelo lebyi enteke eripfumelweni ra wena naswona swi ta endla leswaku Yehovha Xikwembu a va wa xiviri swinene eka wena.

Khongela Nkarhi Na Nkarhi Naswona Swi Huma eMbilwini

U nga tshuki u wu honisa nkoka wa xikhongelo ni ripfumelo. Vadyondzisiwa va Yesu va endle xikombelo lexi lexi kongomeke: “Hi nyike ripfumelo leri engetelekeke.” (Luka 17:5) Loko Yehovha a nga vonaki a ri wa xiviri eka wena, ha yini u nga khongeli eka yena hi xilaveko xa wena xa ripfumelo leri engetelekeke? Hi ku tshembeka kombela Tata wa wena wa le tilweni leswaku a ku pfuna eku n’wi endleni a va wa xiviri eka wena.

Loko ku ri na xiphiqo lexi ku karhataka, heta nkarhi lowu lavekaka leswaku u tiphofula eka Munghana wa wena wa le tilweni hi mbilu hinkwayo. Loko Yesu a ri kusuhi ni ku fa, u khongele hi vuenti. Hambileswi a soleke mukhuva wa vukhongeri wa ku va vanhu va khongela swikhongelo swo leha leswaku va voniwa hi vanhu, u hete vusiku hinkwabyo a khongela exihundleni emahlweni ka ku va a hlawula vaapostola va yena va 12. (Marka 12:38-40; Luka 6:12-16) Hi nga ha tlhela hi dyondza swo karhi eka Hana, loyi a veke mana wa muprofeta Samuwele. Hi ku navela ku va ni n’wana wa mufana, “u khongele nkarhi wo leha emahlweni ka Yehovha.”—1 Samuwele 1:12, NW.

Hi yihi dyondzo ya nkoka eka leswi hinkwaswo? Loko u ri na ntshembo wo kuma tinhlamulo ta swikhongelo swa wena, u fanele u khongela hi ku gingiriteka, hi mbilu hinkwayo, nkarhi hinkwawo—ina, hi ku pfumelelana ni ku rhandza ka Xikwembu. (Luka 22:44; Varhoma 12:12; 1 Vatesalonika 5:17; 1 Yohane 5:13-15) Ku endla leswi swi ta ku pfuna ku endla leswaku Xikwembu xi va xa xiviri eka wena.

Xiyisisa Ntumbuluko

Vumunhu bya mumpfampfarhuti byi nga paluxiwa hi swifaniso swa yena. Hilaha ku fanaka, “timfanelo . . . leti nga vonakiki” ta Yehovha, Musunguri ni Mutumbuluxi wa vuako hinkwabyo, ti voniwa kahle entumbulukweni. (Varhoma 1:20) Loko hi xiyisisa mintirho ya mavoko ya Yehovha hi vukheta, hi byi twisisa ku antswa vumunhu bya yena, xisweswo u va wa xiviri swinene eka hina.

Loko u swi xiyisisa swinene swilo leswi tumbuluxiweke hi Xikwembu, u nga ha tsakisiwa swinene hi timfanelo ta xona. Hi xikombiso, rungula ra malunghana ni vuswikoti bya swinyenyana byo haha ri nga ha kurisa swinene ku tlangela ka wena vutlhari bya Yehovha. Loko u hlaya hi vuako, u nga ha dyondza leswaku Nxaxamelo wa Tinyeleti, lowu nga mpfhuka wa kwalomu ka 100000 wa malembe-nseve, ko va xin’wana xa swirimele swa magidi ya timiliyoni empfhukeni. Xana sweswo a swi ku kombisi vutlhari bya Muvumbi?

Hakunene, vutlhari bya Yehovha i bya xiviri! Kambe sweswo swi vula yini eka wena? Entiyisweni, a nge pfilunganyiwi hi swiphiqo leswi un’wana ni un’wana wa hina a swi yisaka eka yena hi xikhongelo. Ina, hambi ku ri vutivi lebyi nga nyawuriki bya ntumbuluko byi nga endla leswaku Yehovha a va wa xiviri swinene eka wena.

Famba Na Yehovha

Xana wena hi wexe u nga yi vona ndlela leyi Yehovha a nga wa xiviri ha yona? Ina, loko u fana ni mupatriyarka wo tshembeka Nowa. Minkarhi hinkwayo a a yingisa Yehovha swinene lerova ku vuriwa leswaku: “Noa a ṭhama a famba ni Šikwembu [xa ntiyiso].” (Genesa 6:9) Nowa a a hanya onge Yehovha a a ri etlhelo ka yena. Xikwembu xi nga va xa xiviri eka wena hi ndlela yoleyo.

Loko u famba na Xikwembu, u tshemba switshembiso swa Matsalwa naswona u endla hi ku pfumelelana na swona. Hi xikombiso, u pfumela marito ya Yesu lama nge: “Hambetani mi lava mfumo ni ku lulama ka [Xikwembu] ku sungula, xisweswo swilo leswin’wana hinkwaswo [swilaveko swa swilo leswi vonakaka] mi ta engeteleriwa swona.” (Matewu 6:25-33) I ntiyiso, minkarhi yin’wana swi nga ha endleka leswaku Yehovha a nga ku nyiki leswi u swi lavaka hi ndlela leyi u swi languteleke ha yona. Kambe, loko u khongela ivi u tokota mpfuno wa Xikwembu, u ta va wa xiviri eka wena ku fana ni munhu loyi a nga etlhelo ka wena.

Vuxaka byo tano lebyikulu na Yehovha byi va kona loko munhu a hambeta a famba na Xikwembu. Anakanya hi Manuela, Mbhoni leyi vulavulaka Xipaniya, loyi a tiyiseleke miringo yo tala. U ri: “Nkarhi wihi na wihi loko ndzi ri na xiphiqo kumbe ndzi pfumala, ndzi tirhise nsinya wa nawu lowu kumekaka eka Swivuriso 18:10. Ndzi tsutsumela eka Yehovha ndzi ya lava mpfuno. Minkarhi hinkwayo u ve ‘khokholo ro tiya’ eka mina.” Manuela a nga vula leswi endzhaku ka malembe ya 36 a titshege hi Yehovha naswona a seketeriwa hi yena.

Xana wo ho sungula ku endla Yehovha ntshembo wa wena? U nga heli matimba loko vuxaka bya wena na yena byi nga si va leswi u lavaka leswaku byi va swona. Siku rin’wana ni rin’wana ri hanye kukota munhu loyi a fambaka na Xikwembu. Loko u tiyimisele ku hanya hi ku tshembeka, u ta va ni vuxaka lebyikulu na Yehovha.—Pisalema 25:14; Swivuriso 3:26, 32.

Ndlela yin’wana ya ku famba ni Xikwembu i ku khomeka entirhweni wa yena. Loko u hlanganyela entirhweni wo chumayela hi Mfumo, u mutirhi-kulobye wa Yehovha. (1 Vakorinto 3:9) Ku xiya leswi swi ku pfuna ku endla leswaku Xikwembu xi va xa xiviri swinene eka wena.

Mupisalema wa khutaza: “Ṭhikela Yehova e ndlela ya wena, u ṅwi ṭhemba, kutani yena o ta tira.” (Pisalema 37:5) U nga tshuki u tsandzeka ku teka mindzhwalo yihi na yihi kumbe leswi ku karhataka u swi hoxa eka Xikwembu. Minkarhi hinkwayo yana eka yena loko u lava mpfuno ni nkongomiso. Loko u titshega hi Yehovha Xikwembu hi xikhongelo naswona minkarhi hinkwayo u n’wi tshemba hilaha ku heleleke, u ta titwa u hlayisekile hikuva wa swi tiva leswaku a nge tsandzeki ku ku sirhelela. Xana wa tiyiseka loko u ta eka Yehovha ni swiphiqo swa wena n’wini? U ta tiyiseka—loko Xikwembu xi ri xa xiviri eka wena.

[Nhlamuselo ya le hansi]

[Xifaniso lexi nga eka tluka 21]

Endla leswaku minkarhi ya wena yo dyondza yi va leyi tiyisaka ripfumelo

[Xifaniso lexi nga eka tluka 22]

Tinyike nkarhi wa ku khongela nkarhi na nkarhi, swi huma embilwini

[Xifaniso lexi nga eka tluka 23]

Xiya ndlela leyi timfanelo ta Xikwembu ti kombisiwaka ha yona entumbulukweni

[Swihlovo Swa Kona]

Hummingbird: U.S. Fish and Wildlife Service, Washington, D.C./Dean Biggins; stars: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands