U Nga Hluriwi Hi Ku Vilela
“MI NGA tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona. Vubihi bya siku rin’wana ni rin’wana byi enele rona.” (Matewu 6:34) Hakunene ndzayo yoleyo leyi nyikiweke hi Yesu Kreste ya tirha eka hina hinkwerhu lava hanyaka exikarhi ka vanhu va namuntlha lava endlaka swilo hi rivilo ni lava nga ni gome.
Kambe, loko hi vulavula ntiyiso, xana swi nga koteka leswaku hi nga vileli hi swiphiqo, swiboho, vutihlamuleri ni mindzhwalo ya hina? Vanhu va timiliyoni va karhatekile, va le nhlomulweni naswona va tikeriwa. Hi yona mhaka leyi bindzu ra swiverhamisa-mianakanyo ri nga ni mali yo tala swinene.
Ndlela Yo Veka Swipimelo
Hi fanele hi kunguhata ni ku tilulamisela ku langutana ni vutihlamuleri, swiavelo, swiboho ni swiphiqo swa hina—hambi i swa xihatla kumbe a hi swa xihatla. Bibele yi hi khutaza ku ‘tshama ehansi hi hlayela ntsengo’ hi nga si nghenela ntirho wun’wana ni wun’wana lowukulu. (Luka 14:28-30) Leswi swi katsa ku ti anakanyisisa hi vukheta tindlela tin’wana leti nga hlawuriwaka, hi kambisisa vuyelo bya kona ni ku hlayela ntsengo loko swi ta enkarhini, matimba ni mali.
Hambiloko munhu a fanele a ehleketisisa hi vukheta hi leswi nga humelelaka, a swi koteki kumbe a swi pfuni ku ringeta ku anakanyisisa hi nchumu wun’wana ni wun’wana lowu nga humelelaka. Hi xikombiso, hikwalaho ka ku khathala hi vuhlayiseki bya ndyangu, u nga ha ehleketa hi leswi u nga swi endlaka loko yindlu ya wena yo tshuka yi tshwile. U nga xava switshubula-musi ni swo timela ndzilo kutani u swi vehela endlwini. U nga kunguhata ni ku kombisa swirho swa ndyangu tindhawu to hambana-hambana ta ku balekela ndzilo ha tona. Kambe hi kwihi ku hambana exikarhi ka ku kunguhata lokunene loku tirhaka ni ku vilela loku hundzeletiweke loku nga fanelangiki? Ku vilela ko tano ku sungula loko u sungula ku karhatiwa hi swiyimo swo tala leswi u swi ehleketaka, leswi vunyingi bya swona byi vangiwaka hi ku ehleketela ngopfu. U nga hluriwa hi mianakanyo leyi kavanyetaka, yi ku khorwisa leswaku u fanele u honise swo karhi kumbe ndyangu wa wena a wu sirhelelekanga hilaha ku ringaneke. Ku vaviseka loku wena hi wexe u tivangelaka kona ku nga ku tshikilela swinene lerova ku ku pfumata vurhongo.
Muxe eMahlweni Ka Faro
Yehovha Xikwembu u nyike muprofeta wakwe Muxe xiavelo xo tika. Xo sungula, Muxe a a fanele a ya eka Vaisrayele a va khorwisa leswaku Yehovha u n’wi hlawurile leswaku a va humesa aEgipta. Xa vumbirhi, Muxe a a fanele a ya eka Faro ivi a n’wi kombela leswaku a tshika Vaisrayele va famba. Xo hetelela, Muxe a a fanele a rhangela ntshungu wa vanhu va timiliyoni, wu tsemakanya mananga wu ya etikweni leri a ku tshama vanhu lava nga swirha eka wona. (Eksoda 3:1-10) Leswi hinkwaswo handle ko kanakana a swi chavisa, kambe, xana Muxe u pfumelele vutihlamuleri lebyi leswaku byi n’wi karhata emiehleketweni?
Swi le rivaleni leswaku Muxe a a karhatekile hi swilo swo hlayanyana. U vutise Yehovha a ku: “Loko nḍi ta famba e ka v̌ana v̌a Israel, nḍi v̌a byela, nḍi ku: Šikwembu ša v̌atata wa ṅwina ši nḍi rumile ka ṅwina, v̌ona v̌a ku ka mina: E v̌ito ra šona i mani? nḍi ta ku yini ka v̌ona?” Yehovha u n’wi hlamurile. (Eksoda 3:13, 14) Nakambe Muxe a a karhatekile hi leswi nga tshukaka swi endleka loko Faro a nga n’wi kholwi. Yehovha u tlhele a n’wi hlamula muprofeta loyi. Xiphiqo xo hetelela—Muxe a a swi tiva leswaku ‘a a nga swi koti ku vulavula kahle.’ Xana xiphiqo lexi a xi ta lulamisiwa njhani? Yehovha u endle leswaku Aroni a vulavulela Muxe.—Eksoda 4:1-5, 10-16.
Muxe u ye emahlweni a endla hilaha Yehovha a n’wi leriseke hakona, a lunghekile hi tinhlamulo ta swivutiso swakwe naswona a ri ni ripfumelo eka Xikwembu. Ku ri ni ku tixanisa hi mianakanyo leyi chavisaka ya leswi swi nga tshukaka swi humelerile loko a hlangana na Faro, Muxe ‘u endle tano.’ (Eksoda 7:6) Loko a a pfumelele ku vilela leswaku ku n’wi hlula, leswi a swi ta va swi tsanise ripfumelo rakwe ni xivindzi lexi lavekaka leswaku a hetisisa xiavelo xakwe.
Ndlela leyi Muxe a langutaneke ni xiavelo xakwe hi ku ringanisela ha yona, i xikombiso xa leswi muapostola Pawulo a swi vitaneke “mianakanyo yo hluteka.” (2 Timotiya 1:7; Tito 2:2-6) Loko Muxe a a nga ri ni mianakanyo yo hluteka, hi ku olova a a ta va a karhatiwe hi ku kula ka xiavelo xakwe lerova a nga xi amukeli.
Ku Lawula Miehleketo Ya Wena
Xana u angurisa ku yini loko evuton’wini bya wena bya siku ni siku u hlangavetana ni ku ringiwa ka ripfumelo ra wena kumbe miringo yin’wana? Xana wa chava ivi u ehleketa hi swihinga ni swiphiqo leswi u nga ta langutana na swona? Kumbe, xana u va ni langutelo lerinene hi swona? Van’wana va ri, ‘U nga peli nambu u nga si fika eka wona.’ Phela swi nga endleka ku nga vi na xilaveko xa ku pela nambu wolowo u ehleketaka ha wona! Xisweswo, ha yini u karhateka hi nchumu lowu swi nga endlekaka leswaku wu nga humeleli? Bibele yi ri: “Ku vilela embilwini ya munhu hi kona loku nga ta yi tshova.” (Swivuriso 12:25, NW) Hakanyingi, munhu u ta hlwela ku endla xiboho, a vekela swilo etlhelo ku fikela loko nkarhi wu fambile.
Khombo lerikulu i ku vaviseka hi tlhelo ra moya loku nga vangiwaka hi ku vilela loku nga fanelangiki. Yesu Kreste u kombise leswaku ku tlangela “rito ra mfumo” ku nga kamanyetiwa hi ku helela hi matimba ya vuxisi ya rifuwo ni “ku vilela ka mafambiselo lawa ya swilo.” (Matewu 13:19, 22) Tanihi laha mitwa yi nga sivelaka swimilana leswaku swi kula swi veka mihandzu, xisweswo ku vilela loku nga lawuriwiki ku nga hi sivela ku endla nhluvuko hi tlhelo ra moya ni ku veka mihandzu leyi dzunisaka Xikwembu. Ku vaviseka ka ku tivangela, loku onhaka ku tlhele ku sivela van’wana leswaku va tinyiketela eka Yehovha. Lexi va vilerisaka hi lexi, ‘Ku ta endleka yini loko ndzi nga hanyi hi ku pfumelelana ni ku tinyiketela ka mina?’
Muapostola Pawulo u hi byele leswaku enyimpini ya hina ya moya, hi lwela ku tisa “miehleketo hinkwayo evukhumbini leswaku hi yi endla yi yingisa Kreste.” (2 Vakorinto 10:5) Nala wa hina lonkulu, Sathana Diyavulosi, u ta swi tsakela swinene ku tirhisa mivilelo ya hina leswaku a hi heta matimba ni ku hi tsanisa enyameni, emintlhavekweni ni hi tlhelo ra moya. I mutshila eku tirhiseni ku kanakana leswaku a phasa lava nga ri xalamukelangiki khombo. Hi yona mhaka leyi Pawulo na yena a tsundzuxeke Vakreste leswaku va nga “nyiki Diyavulosi ndhawu.” (Vaefesa 4:27) Tanihi “xikwembu xa mafambiselo lawa ya swilo,” Sathana u swi kotile ku ‘dlaya mianakanyo ya lava nga riki vapfumeri.’ (2 Vakorinto 4:4) Hi nga tshuki hi n’wi pfumelela leswaku a lawula mianakanyo ya hina!
Mpfuno Wu Kona
Loko n’wana a langutane ni swiphiqo, a nga ya eka tata wakwe la nga ni rirhandzu kutani a kuma nkongomiso ni ku chaveleriwa. Hilaha ku fanaka, hi nga yisa swiphiqo swa hina eka Tata wa hina wa le tilweni, Yehovha. Entiyisweni, Yehovha u hi rhamba leswaku hi lahlela mindzhwalo ya hina ni mivilelo ya hina eka yena. (Pisalema 55:22) Ku fana ni n’wana loyi a nga ha vileriki hi swiphiqo swa yena loko a kume switiyisekiso leswi humaka eka tata wakwe, a hi fanelanga hi lahlela mindzhwalo ya hina eka Yehovha ntsena, kambe hi fanele ku tlhela hi yi siya eka yena.—Yakobo 1:6.
Hi yi lahlela njhani mivilelo ya hina eka Yehovha? Vafilipiya 4:6, 7 yi ri: “Mi nga vileli ha nchumu, kambe eka hinkwaswo hi xikhongelo ni xikombelo swin’we ni ku nkhensa tivisani Xikwembu swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” Ina, Yehovha u ta angula swikhongelo swa hina leswi phikelelaka ni swikombelo hi ku hi nyika ku rhula ka le ndzeni loku hlayisaka mianakanyo ya hina leswaku yi nga kavanyetiwi hi mivilelo leyi nga lavekiki.—Yeremiya 17:7, 8; Matewu 6:25-34.
Kambe, leswaku hi endla hi ku pfumelelana ni swikhongelo swa hina, a hi fanelanga hi tihambanisa ni van’wana, ku nga ha va hi ndlela ya xiviri kumbe hi mianakanyo. (Swivuriso 18:1) Ematshan’weni ya sweswo, hi ta va hi endla kahle loko hi anakanyisisa hi minsinya ya milawu ni vukongomisi bya Bibele lebyi khumbanaka ni xiphiqo xa hina, xisweswo hi papalata ku titshega hi ku twisisa ka hina vini. (Swivuriso 3:5, 6) Lavatsongo ni lavakulu va nga hundzulukela eBibeleni ni le tibukwini ta Watch Tower leswaku va kuma rungula leri fuweke leri vulavulaka hi ku endla swiboho ni ku langutana ni swiphiqo. Ku engetela kwalaho, evandlheni ra Vukreste hi katekisiwile hi vakulu vo tlhariha ni lava nga ni ntokoto ni Vakreste van’wana lava wupfeke lava va tshamaka va lunghekile ku vulavula na hina. (Swivuriso 11:14; 15:22) Lava va nga khumbekangiki ngopfu emintlhavekweni hi swiphiqo swa hina naswona va ri ni vonelo ra Xikwembu emhakeni leyi, hakanyingi va nga hi pfuna leswaku hi va ni langutelo rin’wana hi swiphiqo swa hina. Hambileswi va nga ta ka va nga hi endleli swiboho, va nga va xikhutazo lexikulu naswona va nga hi seketela.
“Rindzela Xikwembu”
A nga kona la nga kanetaka leswaku swi tisa ntshikilelo lowukulu ku langutana ni swiphiqo swa hina swa xiviri siku rin’wana ni rin’wana, hi nga vuli nchumu hi ku karhateka hi leswi hi ngo swi ehleketela. Loko ku vilela hi leswi swi nga tshukaka swi humelerile ku hi chavisa naswona ku hi karhata, kutani ke, a hi hundzulukeleni eka Yehovha hi xikhongelo ni xikombelo. Lava nkongomiso, vutlhari ni mianakanyo leyi hlutekeke eRitweni ni le nhlengeletanweni yakwe. Hi ta kuma leswaku hambi ko humelela yini, ku na mpfuno wo langutana na nchumu wolowo.
Hi ku twa ku tikeriwa ni ku pfilunganyeka, mupisalema u yimbelerile a ku: “Ha yini u ri ni gome, Wena moya-xiviri wa mina, ha yini u tlhaveka endzeni ka mina? Rindzela Xikwembu, hikuva ndza ha ta xi dzunisa leswi xi nga ku ponisiwa ka mina lokukulu ni Xikwembu xanga.” (Pisalema 42:11, NW) Onge yoleyo ku nga va ndlela leyi hi titwaka ha yona.
Ina, kunguhatela leswi u nga swi langutelaka, kutani leswi u nga swi langutelangiki u swi tshikela Yehovha. ‘U lahlela ku vilela hinkwako ka wena eka yena, hikuva wa ku khathalela.’—1 Petro 5:7.
[Xifaniso lexi nga eka tluka 23]
Ku fana na Davhida, xana u lahlela mindzhwalo ya wena ni mivilelo eka Yehovha?