Ku Khutaza Vayingiseri U Tlhela U Va Tiyisa

KU NGA khathariseki swiphiqo leswi malandza ya Xikwembu ma langutaneke na swona, ma fanele ma kuma xikhutazo evandlheni ra Vukreste. Hikwalaho, vakulu va fanele va tiyiseka leswaku tinkulumo ni ndzayo ya vona swa khutaza. Vakulu va fanele va kotisa “ndhawu ya ku tifihla emhehweni ni vutumbelo exidzedzeni, ku fana ni swinambyana swa mati etikweni leri nga riki na mati, ku fana ni ndzhuti wa ribye lerikulu etikweni leri omeke.”—Esa. 32:2.

Loko u ri nkulu, xana tinkulumo ta wena ti rhurisa moya ni ku khongotela? Xana ta va khutaza lava va tikarhatelaka ku tirhela Yehovha hi vutshembeki? Xana ti khutaza vayingiseri leswaku va hambeta va endla ku rhandza ka Xikwembu, hambiloko vanhu va nga tsakeli kumbe va kaneta? Ku vuriwa yini loko van’wana exikarhi ka vayingiseri va tshikilelekile emianakanyweni, va tikeriwa hi tlhelo ra timali, kumbe va khomiwe hi vuvabyi lebyi nga tshungulekiki? U nga ‘tiyisa vamakwenu hi marito ya nomu wa wena.’—Yobo 16:5.

Tanihi xivulavuri tirhisa nkarhi wa wena leswaku u pfuna vamakwenu va kuma ntshembo ni matimba lama humaka eka Yehovha ni malunghiselelo lawa a hi nyikeke wona.—Rhom. 15:13; Efe. 6:10.

Va Tsundzuxe Leswi Yehovha A Swi Endleke. Ndlela ya nkoka yo khutaza van’wana i ku va kombisa leswi Yehovha a va pfuniseke xiswona vanhu vakwe loko va langutane ni swikarhato enkarhini wa khale.—Rhom. 15:4.

Yehovha u byele Muxe leswaku a “khutaza” ni ku “tiyisa” Yoxuwa, loko Israyele a nga si nghena eTikweni leri Tshembisiweke, laha hi nkarhi wolowo a ku tshama vamatiko lava nga valala. Xana Muxe u swi endlise ku yini? Muxe u tsundzuxe tiko hinkwaro hi swilo leswi Yehovha a ri endleleke swona loko ri huma aEgipta, Yoxuwa na yena a a ri kwalaho. (Det. 3:28; 7:18) Muxe u tlhele a hlamusela ndlela leyi Yehovha a va pfuneke ha yona leswaku va hlula Vaamori. Kutani Muxe u khutaze Yoxuwa a ku: “Vana ni xivindzi, u va ni matimba.” (Det. 31:1-8) Loko u lava ku khutaza vamakwenu, xana u va pfuna leswaku va kuma matimba hi ku va tsundzuxa leswi Yehovha ana se a va endleleke swona?

Minkarhi yin’wana swiphiqo swi rhikinyela vanhu lerova va tivutisa loko va ta pfuka va yi kumile mikateko ya Mfumo. Va tsundzuxe leswaku switshembiso swa Yehovha swa tshembeka.—Yox. 23:14.

Ematikweni man’wana hulumendhe yi veke milawu leyi sivelaka vamakwerhu ku chumayela mahungu lamanene. Loko swi te tano, vakulu lava nga ni rirhandzu va nga pfuna vapfumeri-kulobye hi ku va tiyisa hi leswi humeleleke vaapostola va Yesu Kreste. (Mint. 4:1–5:42) Ku kandziyisa ndlela leyi Xikwembu xi ngheneleleke ha yona etimhakeni leti tsariweke ebukwini ya Estere swi ta va khutaza swinene vamakwerhu leswaku va va ni xivindzi.

Minkarhi yin’wana vanhu va ta eminhlanganweni ya vandlha kambe va nga endli nhluvuko wo ya kwihi. Va nga ha vona onge Xikwembu a xi nge va rivaleli hikwalaho ka ndlela yo homboloka leyi a va hanya hi yona. Kumbexana u nga ha va hlamusela ndlela leyi Yehovha a n’wi khomeke ha yona Hosi Manase. (2 Tikr. 33:1-16) Kumbe u nga ha va byela hi vanhu va khale va le Korinto lava va cinceke ndlela leyi a va hanya ha yona, va hundzuka Vakreste, kutani Xikwembu xi va vula lava lulameke.—1 Kor. 6:9-11.

Xana van’wana va vona onge swiphiqo leswi va langutaneke na swona swi kombisa leswaku Xikwembu a xa ha va rhandzi? U nga ha va tsundzuxa leswi humeleleke Yobo ni ndlela leyi a katekisiweke swinene ha yona hikwalaho ka leswi a tshameke a tshembekile eka Yehovha. (Yobo 1:1-22; 10:1; 42:12, 13; Ps. 34:19) Vachaveleri va mavunwa va Yobo va hembile va vula leswaku Yobo u dyohile. (Yobo 4:7, 8; 8:5, 6) Hi hala tlhelo, loko Pawulo na Barnaba va tiyisa vadyondzisiwa ni ku va “khutaza leswaku va tshama eripfumelweni,” va te: “Hi fanele ku nghena emfun’weni wa Xikwembu hi mahlomulo yo tala.” (Mint. 14:21, 22) Ninamuntlha, u nga tiyisa lava va nga emiringweni hi ku va hlamusela leswaku ku tiyisela miringo i xilaveko eka Vakreste hinkwavo naswona i swa nkoka swinene emahlweni ka Xikwembu.—Swiv. 27:11; Mat. 24:13; Rhom. 5:3, 4; 2 Tim. 3:12.

Khutaza vayingiseri va wena leswaku va anakanya hi tindlela leti Yehovha a hetisiseke switshembiso swa yena ha tona evuton’wini bya vona vini. Hi ku va tsundzuxa tindlela teto, va nga vona leswi Yehovha ana se a va endleleke swona, hilaha a tshembiseke ha kona. Eka Pisalema 32:8, ha hlaya: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.” Loko u pfuna vayingiseri va wena leswaku va tsundzuka ndlela leyi Yehovha a va kongomiseke kumbe ku va tiyisa ha yona, u ta endla leswaku va tivonela hi voxe leswaku Yehovha wa va khathalela, ni leswaku u ta va pfuna hakunene leswaku va hlula miringo yihi na yihi leyi va langutaneke na yona enkarhini wa sweswi.—Esa. 41:10, 13; 1 Pet. 5:7.

Swi Veke eRivaleni Leswaku Wa Swi Tsakela Leswi Xikwembu Xi Swi Endlaka Sweswi. Loko u lava ku khutaza vamakwenu, hlamusela leswi Yehovha a swi endlaka sweswi. Loko u vulavula hi swilo leswi hi ndlela leyi kombisaka leswaku na wena swa ku tsakisa, sweswo swi ta endla leswaku ni vayingiseri va wena va titwa hi ndlela leyi fanaka.

Xiya ndlela leyi Yehovha a hi pfunaka ha yona ku tiyisela mintshikilelo leyi nga kona evuton’wini. U hi komba ndlela leyinene yo hanya. (Esa. 30:21) U hlamusela xivangelo xa vugevenga, ku pfumala vululami, vusweti, mavabyi ni rifu, naswona u hi byela ndlela leyi a nga ta swi herisa ha yona hinkwaswo. Hi ni vamakwerhu lava nga ni rirhandzu. U hi nyike lunghelo ra risima ra xikhongelo. U hi byarhise ntirho wa ku va Timbhoni ta yena. U hi paluxele leswaku Kreste ana se wa fuma etilweni, naswona masiku ya makumu ya mafambiselo lawa ya khale ya le kusuhi ni ku hela.—Nhlav. 12:1-12.

Ku tlhandlekela eka swilo sweswo leswinene hi na minhlangano ha hina ya vandlha, tinhlengeletano ni mintsombano. Loko u vulavula hi tinyiko leti hi ndlela leyi kombaka leswaku na wena wa ti tlangela, u ta khutaza van’wana leswaku va nga tshiki ku hlengeletana ni vamakwavo.—Hev. 10:23-25.

Swiviko leswi nyikaka vumbhoni bya leswaku Yehovha wa ma katekisa matshalatshala ya hina evutirhelini bya nsimu na swona swa tiyisa. Eka lembe-xidzana ro sungula loko Pawulo na Barnaba va kongome eYerusalema, va “[endle] leswaku vamakwavo hinkwavo va tsaka swinene” hi ku yi rungula hi vuxokoxoko mhaka ya ku hundzuriwa ka vamatiko. (Mint. 15:3) Na wena u ta tsakisa vamakwerhu loko u va rungulela mintokoto leyi akaka.

Xin’wana lexi nga khutazaka i ku pfuna vanhu leswaku va vona nkoka wa leswi va swi endlaka. Va bumabumele hileswi va hlanganyelaka evutirhelini bya Vukreste. Bumabumela lava va hlanganyelaka switsongo evutirhelini hikwalaho ka vudyuhari ni vuvabyi kambe va tiyiselaka hi ku tshembeka. Va tsundzuxe leswaku Yehovha a nga ri rivali rirhandzu leri va ri kombiseke hikwalaho ka vito ra yena. (Hev. 6:10) Ripfumelo leri hlulaka ndzingo i nchumu lowukulu. (1 Pet. 1:6, 7) Vamakwerhu va fanele va tsundzuxiwa leswi.

Vulavula Hi Ndlela Leyi Kombisaka Leswaku Wa Khumbeka Hi Ntshembo Lowu Wa Ha Taka. Switshembiso leswi huhuteriweke mayelana ni swilo leswa ha taka i nchumu lowu khutazaka swinene eka hinkwavo lava rhandzaka Xikwembu. Kumbexana vo tala exikarhi ka vayingiseri va ma twe ko tala marito lawa. Kambe loko u vulavula hi ku tlangela hi switshembiso leswi, u ta endla leswaku va swi vona hi mahlo ya mianakanyo, u va pfuna leswaku va swi tshemba, ni ku endla leswaku timbilu ta vona ti tala hi ku tlangela. Ku tirhisa leswi u swi dyondzeke eXikolweni xa Vutirheli bya le Tilweni swi nga ku pfuna ku tlangela.

Yehovha i Mukhutazi Lonkulu ni Munyiki wa matimba eka vanhu va yena. Kambe u nga tirhisana na yena hi ku khutaza ni ku tiyisa van’wana. Loko u kume lunghelo ro vulavula ni vandlha, ri tirhisele ku khutaza.