Xana U Nga Tinyiketela Ku Ya Tirha eBethele?
1 Ku ve ni xiendlakalo xo hlamarisa hi 778 B.C.E. Exivonweni, muprofeta Esaya u vone “Yehovha a tshame exiluvelweni xo tlakuka.” Endzhaku ka sweswo, Esaya u twe tiserafi ti vangamisa Yehovha ti ku: “Wa kwetsima, wa kwetsima, wa kwetsima Yehovha wa mavuthu.” Anakanya ndlela leyi sweswo a swi tsakisa ha yona! Hi nkarhi wolowo Yehovha u vutise xivutiso xa nkoka swinene, a ku: “Xana ndzi ta rhuma mani, i mani la nga ta hi yela?” A ku hlamuseriwi vuxokoxoko bya xiavelo xa kona kumbe leswaku loyi a a ta xi amukela a a ta vuyeriwa hi yini. Kambe, handle ko kanakana, Esaya u hlamule a ku: “Hi mina loyi! Ndzi rhume.”—Esa. 6:1, 3, 8.
2 Vanhu va Yehovha va tiveka hi ku va ni moya wo tinyiketela ni ku endla xin’wana ni xin’wana lexi Yehovha a va byelaka xona. (Ps. 110:3) Sweswi xirhambo xo hlawuleka xi ya eka hinkwavo lava nga tinyiketelaka ku ya tirha eBethele. Xana u tiyimiserile ku xi amukela hi moya lowunene ku fana na Esaya?
3 Ku tshama ku ri ni xilaveko xa vamakwerhu lava nga ta tirha eBethele. Leswi swi lava leswaku va swi navela hi mbilu hinkwayo ku rhangisa Mfumo ni ku tinyiketela ku endla xin’wana ni xin’wana lexi nga ha lavekaka leswaku va seketela ntirho wo chumayela emisaveni hinkwayo. (Mat. 6:33) Entiyisweni, ku va xirho xa ndyangu wa Bethele, swi nyika munhu lunghelo ro hlawuleka ro tirhela Yehovha hi moya-xiviri hinkwawo. Njhani?
4 Ntirho Lowu Endliwaka eBethele: Anakanya hi ntirho hinkwawo lowu endliwaka eBethele ya laha Afrika Dzonga. Ku ni vamakwerhu va xinuna ni va xisati va kwalomu ka 700 va ndyangu wa Bethele lava nga ni lunghelo ro seketela ntlawa wa hlonga ro tshembeka ni ro tlhariha swin’we ni Huvo leyi Fumaka eku kandziyisiweni ka Tibibele ni minkandziyiso leyi sekeriweke eBibeleni leyi tirhisiwaka ematikweni ya le dzongeni wa Afrika ni le ka dyondzo ya munhu hi xiyexe. (Mat. 24:45) Hi xikombiso, eka lembe ra ntirho leri hundzeke, ku kandziyisiwe ku tlhela ku rhumeriwa swibukwana ni tibroxara ta 7 491 648, timagazini ta 58 065 866 ni tikopi ta Vutirheli Bya Hina Bya Mfumo ta 8 030 370. Ntirho lowu hinkwawo wu endliwe hikwalaho ka matshalatshala ya swirho hinkwaswo swa ndyangu wa Bethele. Hikwalaho ka ku cincela eka lunghiselelo leri olovisiweke ro fambisa tibuku, swi endle leswaku yi engeteleka swinene nhlayo ya timagazini ni tibuku leti kandziyisiwaka. Hi xikombiso, sweswi ku kandziyisiwa ntlhanu wa timiliyoni ta timagazini n’hweti yin’wana ni yin’wana. Sweswi ndzawulo yo Rhumela Minkandziyiso yi rhumela tibuku to tlula kaye wa timiliyoni n’hweti na n’hweti emavandlheni ya laha Afrika Dzonga ni le mavandlheni ya le Malawi, Mozambhiki, Zambia ni le Zimbabwe, naswona hi tlhela hi ma hlayisela yona. Hinkwaswo leswi swi komba leswaku ntirho wu ta tshama wu ri karhi wu engeteleka. Ku tlhela ku nyikeriwa nkongomiso eka mavandlha ya 1 800 lama languteriwaka hi rhavi ra hina. Nakambe ri tlhela ri pfuna marhavi ya le Afrika etimhakeni ta vunjhiniyara ni ku aka makaya lama engetelekeke ya Bethele ni Tiholo ta Tinhlengeletano naswona sweswi ku laveka Tiholo ta Mfumo ta kwalomu ka 3 000 ematikweni ya laha Afrika lama nga evuswetini. Ku laveka madzana ya vatirhi vo tirhandzela lava nga ta endla ntirho wo kandziyisa ni ku rhumela minkandziyiso, ku basisa, ku lunghisa swilo, ku lunghiselela swakudya, ku xava swilo, ku pfuna lava vabyaka ni mintirho yin’wana yo tala leyi endliwaka eBethele.
5 Ku endla ntirho lowu hinkwawo swi lava matimba kambe swa enerisa hi tlhelo ra moya. Swa hi tsakisa ku tiva leswaku matimba ya hina hinkwawo hi ma tirhisela ku seketela ntirho wo chumayela ni wo dyondzisa. Ku tirha ka hina eBethele swi hi pfuna ku tiva vuxokoxoko byo tala hi nhlengeletano ya Yehovha. Hi tsundzuxiwa leswaku mupisalema u khutaze Vaisrayele leswaku va tikarhatela ku wu tiva kahle nkongomiso wa Xikwembu wa laha misaveni.—Ps. 48:12, 13.
6 Mikateko Ya Ku Tirha eBethele: Xana lava tirhaka eBethele va titwa njhani hi lunghelo leri? Twana swin’wana swa leswi vuriweke hi lavakulu ni lavatsongo lava nga endyangwini wa Bethele. Xirho xin’wana xa ndyangu wa Bethele lexi tirheke malembe manharhu eBethele xi ri: “Ku va eBethele ku tiyise vuxaka bya mina na Yehovha. Loko ndzi ri karhi ndzi tirha laha ndzi ya ndzi dyondza ndlela leyi Bethele yi tirhaka ha yona, naswona sweswo swi ndzi dyondzisa swo tala hi vumunhu bya Yehovha. Ntirho wa Bethele wu tlhele wu ndzi pfula mahlo ndzi vona leswaku Yehovha u tirhisa mixaka hinkwayo ya vanhu. Naswona a swi kali swi lava leswaku u va la hetisekeke leswaku u ta amukeleka eka yena.”
7 Makwerhu un’wana la ha riki muntshwa u ri: “Ndzi tsundzuka ndzi anakanya ndzi ku, ‘Mawaku ndlela leyi swi nga ta tsakisa ha yona ku nghena emisaveni leyintshwa kutani ndzi byela vanhu va khale lava tshembekeke leswaku ndzi hete malembe yo tala ndzi tirha eBethele, ku nga ri ku endla mali emisaveni.’”
8 Loko makwerhu la ha riki muntshwa a tsundzuka ndzetelo lowu a wu kumeke u te: “Swi ve nkateko lowukulu eka mina ku dyondza hi vumunhu bya mina n’wini ni ku endla nhluvuko. Sweswi ndzi titwa ndzi faneleka ku antswa ku tirhela Yehovha. Ndzi titwa ndzi kota ku lehisa mbilu swinene, ndzi kota ku tikhoma naswona ndzi ni rirhandzu swinene.”
9 Loko makwerhu un’wana wa xisati a anakanya mikateko leyi a yi kumeke ku ta fikela sweswi, u ri: “Nongonoko wa swilo swa moya lowu nga kona laha wu ndzi dyondzise leswi engetelekeke hi Yehovha ni hi ndlela leyi ndzi nga n’wi tekelelaka ku antswa ha yona eka ndlela leyi a anakanyaka ha yona, a titwaka ha yona ni le ka mintirho ya yena. Kutani leswi ndzetelo lowu hi wu kumaka wu nga heriki ni mikateko ya kona a yi heli.”
10 Makwerhu la heteke malembe ya 59 evutirhelini bya nkarhi hinkwawo, lawa ya 43 eka wona a ma heteke eBethele u te: “Bethele a yi fani ni yindlu ya tinghwendza hilaha vo tala va ehleketaka hakona. Hi endla swo tala hikwalaho ka xiyimiso xa vutomi bya hina. . . . A ku si tshama ku va ni siku leri ndzi nga ya entirhweni ivi ndzi tisola hi leswi ndzi swi endleke. Ha yini? Hikuva loko hi tinyiketela eka Yehovha hi moya-xiviri hinkwawo, hi enerisiwa hi ku tiva leswaku ‘hi endle leswi a hi fanele hi swi endlile.’”—Luka 17:10.
11 Makwerhu un’wana, la tirheke eBethele malembe ya 62 u te: “Ndzi kholwa hi mbilu hinkwayo leswaku a yi kona ndhawu leyi fanaka ni Bethele emisaveni hinkwayo loko hi nga si nghena emisaveni leyi nga Paradeyisi. A ndzi si tshama ndzi tisola nikan’we hi ku va ndzi hlawule ku heta vutomi bya mina hinkwabyo ndzi ri entirhweni wa nkarhi hinkwawo. Ku ve ntsako lowukulu ku tivonela hi ya mina ni ku hlanganyela eku andzeni lokukulu ka nhlengeletano ya Yehovha ya la misaveni! Hi mpfuno wa Yehovha, ndzi tiyimisele ku ya emahlweni ndzi tshama eBethele ni ku tinyiketela hi moya-xiviri hinkwawo eku yiseni ka timhaka ta Mfumo emahlweni.”
12 Swirho leswi swa ndyangu wa Bethele swi lo vulavula hi mikateko yi nga ri yingani leyi u nga tiphinaka ha yona loko u tinyiketela ku ya tirha eBethele. Leswaku u fanelekela ntirho lowu ku ni timfanelo tin’wana leti u faneleke u va na tona. Hi tihi tin’wana ta timfanelo leti lavekaka leswaku munhu a va xirho xa ndyangu wa Bethele?
13 Swilaveko Swa Ku Fanelekela Ku Tirha eBethele: Swilaveko swa xisekelo swa lava endlaka xikombelo xo ya tirha eBethele swi kombisiwe eka bokisi leri nga laha. Ku engetela kwalaho, i swa nkoka leswaku vamakwerhu lava tinyiketelaka ku ya tirha eBethele, va nga vi “lava rhandzaka mintsako.” (2 Tim. 3:4; 1 Kor. 13:11) Swirho swa ndyangu wa Bethele swi fanele swi va vavanuna ni vavasati va moya lava nga ni mukhuva lowunene wa dyondzo ya vona vini naswona va leteleke matimba ya vona ya ku twisisa leswaku va “hambanisa leswi lulameke ni leswi hoxeke.” (Hev. 5:14) Ku wupfa ka vona tanihi Vakreste ku fanele ku vonaka eka hinkwaswo leswi va swi endlaka evuton’wini bya vona, ku katsa ni le ka maambalelo, ku tisasekisa ni vuyimbeleri ni vuhungasi lebyi va byi hlawulaka. Leswi swirho swa ndyangu wa Bethele swi tinyiketeleke swi tirha kun’wana ni kun’wana laha ku nga ni xilaveko. Vamakwerhu lava ha riki vantshwa va nyikiwa mintirho leyi lavaka matimba, leyi katsaka ku kandziyisa, ku hlela ni ku rhumela minkandziyiso, ku lunghisa swilo, ku basisa miako, ku hlantswa swiambalo ni ku lunghiselela swakudya. (Swiv. 20:29) Ku hambana ni ntirho wo tihanyisa, xiavelo xin’wana ni xin’wana xa enerisa swinene hikuva i ntirho wo kwetsima lowu yisaka ku dzuneka eka Yehovha.—Kol. 3:23.
14 Lava va taka eBethele va fanele va tiyimisela ku tshama lembe, va nga si endla swiboho swin’wana. Leswi swi va endla leswaku va leteriwa ku va vatirhi lava nga ni ntokoto. Ntshembo lowu nga kona hileswaku leswi swi ta va pfuna leswaku va endla Bethele kaya ra vona. Ku rhandza Yehovha hi swona swi susumetaka swirho swa ndyangu wa Bethele leswaku swi veka ntirho wa Mfumo emahlweni ka swilaveko swa swona, leswi swi tsakisa Yehovha.—Mat. 16:24.
15 Xilaveko Lexi Nga Kona Sweswi: Hikwalaho ka mintirho leyi endliwaka eBethele, sweswi ku ni xilaveko lexikulu xa vamakwerhu va xinuna lava nga tekangiki. Eka lava endleke swikombelo ku rhanga ku tekiwa lava nga maphayona ya nkarhi hinkwawo, hambileswi sweswo swi nga riki xilaveko. Minkarhi yin’wana swa endleka leswaku ku vitaniwa vamakwerhu va xisati lava nga tekiwangiki ni mimpatswa, lava nga emalembeni ya 19 ku ya ka 35 lava nga ni vuswikoti byo karhi lebyi lavekaka. Ku engetela kwalaho, vamakwerhu van’wana va xinuna ni va xisati lava ha ku hundzaka eka malembe ya 35 lava nga ni vutshila byo karhi lebyi lavekaka, va khutaziwa leswaku va endla swikombelo swo ta eBethele. Hi xikombiso, ku laveka madokodela, ya meno, ya vuolori, van’watinkota va le nawini, vanjhiniyara, vaongori, valunghisi va mimovha ni tilori kumbe lava tivaka ku tirha hi swilo swa elektroniki. Ku ni xilaveko xa xihatla xa vahundzuluxeri va tindzimi hinkwato leti hundzuluxeriwaka erhavini ra hina. Hambiswiritano, a hi khutazi munhu leswaku a ya kuma dyondzo yo hlawuleka kumbe ndzetelo wo karhi a anakanya leswaku sweswo swi ta n’wi pfulela tindlela ta ku va a vitaniwa eBethele. Lava ana se va kumeke vuleteri byo hlawuleka, kumbexana va byi kume va nga si kuma ntiyiso, va nga rhandza ku tsala rungula ro koma malunghana ni ntirho wa vona ivi va ri rhumela swin’we ni xikombelo xa vona xa ku lava ku ta tirha eBethele.
16 Loko wo endla xikombelo kambe u nga vitaniwi ku ta tirha eBethele, u nga heli matimba. Swi nga va swinene ku hambeta u endla xikombelo kan’we lembe rin’wana ni rin’wana. Vamakwerhu van’wana lava tivaka mintirho yo hlawuleka leyi nga lavekaka eBethele, va tinyiketele leswaku va ta tirha hi ku tirhandzela swa nkarhinyana. Va nga ha endla xikombelo xa ku ta tirha eBethele swa nkarhinyana ku ringana mavhiki mambirhi, manharhu kumbe mune ku ya fika eka tinh’weti tinharhu. Loko u tsakela lunghiselelo leri, hi kombela leswaku u tsalela erhavini.
17 Lava va tirhaka eBethele va ni lunghelo ro hlawuleka ra ku tirhela Yehovha swin’we ni vamakwavo lava nga Vakreste. Huvo leyi Fumaka ya wu tlangela moya wa ku tinyiketela lowu kombisiwaka hi hinkwavo lava tinyiketelaka leswaku va ta khathalela swilaveko swa vamakwavo emisaveni hinkwayo.—Filp. 2:20-22; 2 Tim. 4:11.
18 Vantshwa—Tilunghiseleleni Ku Ya Tirha eBethele Sweswi: Munhu u sungula ku tilunghiselela ntirho wa le Bethele a ha ri kule swinene ni ku fikelela malembe lama lavekaka ya 19 hi vukhale. Xana vantshwa va nga endla yini leswaku va tilunghiselela ku ya tirha eBethele? Yesu u te: “I mani eka n’wina loyi loko a lava ku aka xihondzo a nga rhangiki a tshama ehansi a hlayela ntsengo, a vona loko wu ringene ku xi heta?” (Luka 14:28) Tanihi leswi swi nga swa nkoka ku lunghiselela ni ku kunguhata leswaku muako wun’wana ni wun’wana wu ta hela, i swa nkoka swinene leswaku vantshwa va anakanyisisa hi ndlela leyi va kunguhataka vumundzuku bya vona ha yona entirhweni wa Yehovha! Va fanele va tivekela masungulo lama tiyeke va ha ri emalembeni ya le hansi leswaku va ta kota ku fikelela tipakani ta moya. Tanihi muntshwa, hi wahi masungulo lama u tivekelaka wona? Loko pakani ya wena ku ri ku ya tirha eBethele, swi ta ku pfuna ku anakanyisisa hi leswi landzelaka hi vukheta.
19 ‘Tilunghiselele Ku Amukela’ Lunghelo Leri Ro Hlawuleka Ra Ntirho: Hilaha swi tsariweke hakona eka Matewu 19:12, Yesu u khutaze vadyondzisiwa va yena leswaku va ‘tilunghiselela ku amukela’ ku tshama va nga tekanga. Ha yini? A ku nga ri hikwalaho ka leswaku ku ta vuyeriwa vona hi voxe, kambe a ku ri “hikwalaho ka mfumo wa matilo.” Hilaha ku fanaka Pawulo u khutaze nchumu lowu fanaka wa ku “tirhela Hosi nkarhi hinkwawo [handle ko rivatiwa] hi nchumu.” (1 Kor. 7:32-35) Khombo ra kona, vo tala va hupiwa hi lunghelo leri ra ku tirha eBethele va nga si nghenela vukati hileswi va kunguhataka ku teka va nga si mila ni meno. Hi lava ku khutaza vamakwerhu va xinuna lava ha riki vantshwa leswaku va tirhisa matimba ya vona entirhweni wa nkarhi hinkwawo va nga si va ni vutihlamuleri bya ndyangu. Kutaku loko va endla xiboho xa ku teka endzhaku ka nkarhi, va ta va vavanuna vo antswa hikwalaho ka ntokoto lowu va wu kumeke evuton’wini ni le ntirhweni wa Vukreste. Endzhaku ko tirha malembe yo hlayanyana eBethele, van’wana va nghenele vukati ivi va ya emahlweni va tirha swin’we va ri mpatswa. Loko va va ni malunghelo yo karhi endzhaku ka nkarhi, yo fana ni ntirho wa ku famba-famba kumbe wa vurhumiwa, kunene a va kali va tisola hi nkarhi lowu va wu heteke va tirha eBethele.
20 U Nga Hambukisiwi Hi Ku Hlongorisa Swilo Leswi Vonakaka: I swinene leswaku muntshwa un’wana ni un’wana a tivutisa leswi: ‘Xana pakani ya mina endzhaku ka ku thwasa exikolweni xa le henhla i ku dyondzela ntirho-vutomi lowu ndzi nga ta tirha nkarhi hinkwawo kumbe i ku tirhela Yehovha nkarhi hinkwawo?’ I ntiyiso leswaku ku tirhela Yehovha swi ta lava munhu a titsona swo karhi. Kambe swi tano ni hi ku dyondzela ntirho-vutomi! Eku heteleleni, hi yihi ndlela leyi nga ta va ni vuyelo bya nkarhi wo leha hakunene? Yesu u nyike nhlamulo leyi nga lo dlaa, erivaleni. Hi ku ya hi Matewu 6:19-21, u te: “Tshikani ku tihlayisela xuma emisaveni, laha nsumba ni nkurhe swi dyaka kona, ni laha makhamba ma tshovaka kona ma yiva. Ku ri na sweswo, tihlayiseleni xuma etilweni, laha nsumba ni nkurhe swi nga dyiki kona, ni laha makhamba ma nga tshoviki kona ma yiva. Hikuva laha xuma xa wena xi nga kona, hi laha ni mbilu ya wena yi nga ta va kona.” Hi khongelela leswaku timbilu ta hina ti nga tshuki ti hi kucetela ku hlongorisa ntirho wa ku tihanyisa emisaveni kumbe swilo leswi vonakaka ematshan’weni ya ku lava ku tirhela Yehovha hi moya-xiviri hinkwawo. Hinkwerhu hi fanele ku xiya leswaku pakani ya risima leyi hi faneleke ku yi fikelela i ku va ni vuxaka lebyinene na Yehovha, leswaku hi ta tsakisa mbilu ya yena. (Swiv. 27:11) Loko hi rhangisa Yehovha evuton’wini bya hina ha ha ri vantshwa, hi kombisa lomu xuma xa hina xi nga kona ni ndlela leyi Mfumo wu nga wa nkoka ha yona eka hina. Tsundzuka, “nkateko wa Yehovha—hi wona lowu fuwisaka, naswona a nga engeteli ku vaviseka eka wona.” (Swiv. 10:22) Vantshwa va ni lunghelo lerinene ra ku kombisa laha timbilu ta vona ti nga kona hi ku nkhensa Yehovha hi nchumu wa risima hikwalaho ka swilo hinkwaswo leswi a va nyikeke swona. Ku tirha eBethele ku nyika hinkwavo lava fikelelaka swilaveko swa kona lunghelo rolero lerinene.
21 Lava Va Tirhaka eBethele Va Fanele Ku Basa eMahanyelweni: Mupisalema u vutise a ku: “Xana jaha ri nga yi tengisisa ku yini ndlela ya rona?” U hlamule a ku: “Hi ku tshama ri rindzile hi ku landza rito ra [Yehovha].” (Ps. 119:9) Sweswo swi ta katsa ku papalata nchumu wun’wana ni wun’wana lowu fambisanaka ni mafambiselo ya swilo ya Sathana lama hombolokeke. Swilo swo naveta rimbewu swa Internet, ku tikhoma ko biha hi tlhelo ra rimbewu, vuyimbeleri lebyi thyakeke, vuhungasi lebyi nga ni manyala ni ku nwa byala wa ha ri ntsongo ngopfu, leyi i yin’wana ya mintlhamu leyi Sathana a phasaka vantshwa va hina ha yona leswaku va nga ti fikeleli tipakani ta moya. Ku laveka ku tiyimisela ka xiviri leswaku hi lwa ni marhengu ya yena. Tanihi muntshwa, loko u tivona leswaku wa swi endla swin’wana swa swilo leswi, vulavula ni vakulu evandlheni ra ka n’wina kutani u tihumesa emikhuveni yoleyo u nga si endla xikombelo xa ku ta tirha eBethele. I swa nkoka ku va ni ripfalo leri baseke leswaku hi kota ku tirhela Yehovha hi xitalo.—1 Tim. 1:5.
22 Dyondza Ku Hanyisana Ni Van’wana: Xilaveko xa nkoka leswaku u kota ku tirha eBethele hilaha ku humelelaka i ku dyondza ku hanyisana ni van’wana. Ndyangu wa Bethele eAfrika Dzonga wu vumbiwa hi vamakwerhu va kwalomu ka 700 va mindhavuko yo hambana-hambana. Hambileswi vumunhu lebyi byo hambana-hambana byi engetelaka vuxongi bya Bethele, minkarhi yin’wana byi tlhela byi tisa mintlhontlho. Loko u anakanya ku ta tirha eBethele, swi nga va swinene ku tivutisa: ‘Xana ndzi nyangatseka hi ku olova loko van’wana va bakanya vonelo ra mina? Xana van’wana swa va olovela ku hanyisana na mina?’ Loko swi lava u antswisa timfanelo leti, u nga ha yimayimi, sungula ku ti antswisa sweswi. Loko u endla tano swi ta ku pfuna leswaku u antswisa swinene loko swi ta emhakeni ya ku hanyisana ni ku tirhisana ni swirho swa ndyangu wa Bethele.
23 Tirha hi matimba leswaku u va munhu wa moya, hi ku hlakulela vuxaka lebyikulu na Yehovha. Endla xiyimiso lexinene xa dyondzo ya wena n’wini, leyi faneleke yi katsa ku hlaya Bibele siku ni siku. Hisekela ku byela van’wana hi mahungu lamanene. Loko u endla swilo leswi, u ta endla leswaku ku ya emahlweni ka wena ku vonaka. (1 Tim. 4:15) Mawaku vumundzuku lebyinene bya lava va tilunghiselelaka ntirho wa nkarhi hinkwawo sweswi!
24 Vatswari, Letelani Vana Va N’wina: I yini lexi vatswari va nga xi endlaka leswaku va khutaza vana va vona leswaku va hlakulela ku nghenela ntirho wa nkarhi hinkwawo? Yesu u te: “Un’wana ni un’wana loyi a leteriwaka hi ku hetiseka u ta fana ni mudyondzisi wakwe.” (Luka 6:40) N’wana la leteriweke kahle u ta tekelela timfanelo letinene ta mudyondzisi wa yena la tinyiketeleke. Nsinya lowu wa nawu wu fanele wu endla leswaku vatswari lava nga Vakreste va anakanyisisa ha wona loko va ri karhi va tikarhatela ku letela vana va vona “hi xikongomelo xa ku tinyiketela loku nga ni vukwembu.” (1 Tim. 4:7) Leswi vana va voyameleke eku tekeleleni ka mikhuva ya vatswari va vona loko swi ta etimhakeni ta moya, i swinene leswaku vatswari va tivutisa leswi: ‘Xana hina vini ha wu tlangela ntirho lowu endliwaka eBethele wa ku yisa swilaveko swa vugandzeri bya Yehovha bya ntiyiso emahlweni? Xana ha yi vona mikateko ya Yehovha hi lunghiselelo ra Bethele? Xana ha kholwa leswaku ku hanyela ku tirhela Yehovha i ntirho wa nkoka lowu vana va hina va nga wu hlawulaka?’ Ku tlangela ka hina ntirho wa Bethele hi mbilu hinkwayo ni leswi endliwaka kona swi ta hi pfuna ku byala moya lowu fanaka wa ku tlangela eka vana va hina.
25 Elkana na Hana a va byi tlangela hi mbilu hinkwayo vugandzeri bya ntiyiso. Va va vekele xikombiso lexinene vatswari lava nga Vakreste namuntlha. Le Israyele wa khale, i vavanuna lava nga Vaisrayele ntsena lava a va boheka ku “humelela emahlweni ka xikandza xa Hosi ya ntiyiso, Yehovha,” kanharhu hi lembe etabernakeleni. Hambiswiritano, Elkana a a famba kwalomu ka tikhilomitara ta 30, laha handle ko kanakana a a famba hi milenge ni ndyangu wa yena hinkwawo “lembe ni lembe” leswaku a ta endla xitlhavelo entsindza lowu wa vugandzeri bya Yehovha. (Eks. 23:17; 1 Sam. 1:3, 4, 9, 19; 2:19) Swi le rivaleni leswaku nhloko leyi ya ndyangu a yi lava leswaku ndyangu wa yona hinkwawo wu rhandza swilo swa moya ku fana na yona.
26 Hana a a rhandza vugandzeri bya ntiyiso ku fana ni nuna wa yena. A a titwa a ri ni ndzhwalo wa ku hlanganyela eku seketeleni ka vugandzeri bya ntiyiso etabernakeleni. Hana u endle xihlambanyo xa leswaku loko Yehovha o n’wi nyika n’wana wa jaha, u ta nyikela ha yena leswaku a tirha etabernakeleni. (1 Sam. 1:11) Nawu wa Muxe a wu nyika wanuna lunghelo ra ku herisa xihlambanyo lexi nga fanelangiki, lexi nsati wa yena a xi endleke. (Tinhl. 30:6-8) Hambiswiritano, handle ko kanakana Elkana u xi amukerile xihlambanyo xa Hana, leswi kombisaka leswaku na yena a a seketela xikombiso xexo xa vugandzeri bya ntiyiso!—1 Sam. 1:22, 23.
27 Xana n’wana wa vona Samuwele u wu tekelerile moya lowunene ni ku tlangela loku kombisiweke hi vatswari va yena? Ina, u wu tekelerile. Loko a ha ri jaha, Samuwele u endle mintirho leyi a averiweke yona hi ku tirhandzela ni hi vutshembeki naswona u leteriwe ku khathalela malunghelo lama engetelekeke entirhweni wa Xikwembu. Endzhaku ka loko Samuwele a sungule ku tirha etabernakeleni, Elkana na Hana va ye emahlweni va kombisa ku tsakela ntirho wa yena. Va hambete va n’wi endzela minkarhi hinkwayo leswaku va ta n’wi khutaza ni ku n’wi seketela loko a ri karhi a ya emahlweni entirhweni wa nkarhi hinkwawo.—1 Sam. 2:18, 19.
28 Mawaku xikombiso lexinene lexi Elkana na Hana va xi vekeleke vatswari lava nga Vakreste namuntlha! Loko vana va hina va hi twa hi vula hi mbilu hinkwayo ndlela leyi hi ri tlangela ha yona lunghelo ro tirha eBethele ni ku vona moya wa ku tinyiketela lowu hi wu kombisaka hi ku yisa timhaka ta Mfumo emahlweni, na vona etimbilwini ta vona va ta hlakulela ku lava ku tirhela van’wana. Vatswari vo tala swi va fambela kahle loko va nghenisa moya lowu lowunene eka vana va vona. N’wana un’wana wa malembe ya nkombo u tsale a ku: “Loko ndzi kula ndzi lava ku ya eBethele, naswona ku ni swilo swo hlayanyana leswi ndzi lavaka ku swi endla kona. (1) Ku thayipa timagazini ta Xihondzo xo Rindza ni Xalamuka!, (2) ku tirha endzawulweni ya n’wina ya swifaniso ni (3) ku petsa swiambalo. Ndzi ta endla ntirho wun’wana ni wun’wana lowu nga kona. A swi na mhaka leswaku ndzi ta kuma wa njhani.” Swi tsakisa ngopfu loko hi vona vana va hina va hlakulela moya wo tano wa ku tinyiketela etimbilwini ta vona!
29 Vantshwa, tsundzukani leswaku “misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yoh. 2:17) Hambetani mi hlakulela tipakani ta moya, ku katsa ni lunghelo ro hlawuleka ra ku tirha eBethele. Vatswari, tekelelani xikombiso xa vanhu vo tshembeka va nkarhi lowu hundzeke, lava khutazeke vana va vona ku hlakulela moya wa ku tinyiketela eka Xikwembu. (2 Pet. 3:11) Onge hinkwerhu hi nga endla leswi hi faneleke ku swi endla leswaku hi pfuna vamakwerhu lava ha riki vantshwa leswaku va tirhela Muvumbi wa hina Lonkulu hi xitalo hilaha va nga kotaka hakona, hikuva sweswo swi ni “xitshembiso xa vutomi bya sweswi ni lebyi nga ta ta.”—1 Tim. 4:8; Ekl. 12:1.
[Bokisi eka tluka 4]
Swilaveko Swa Xisekelo Swa Ntirho Wa Bethele
● U fanele u va ni lembe u khuvuriwile
● U va munhu wa moya la rhandzaka Yehovha ni nhlengeletano yakwe hi mbilu hinkwayo
● U va u hanye kahle emoyeni, emianakanyweni, emintlhavekweni ni le mirini
● U ri muaka-tiko kumbe u ri ni mpfumelelo wa le nawini wa ku tshama la Afrika Dzonga
● U kota ku hlaya, ku tsala ni ku vulavula Xinghezi kahle
● U ri ni malembe yo sukela eka 19 ku ya eka 35 hi vukhale