‘Vana Mulandzeri Wa Mina’​—Xana Yesu A A Vula Yini?

1, 2. Hi xihi xirhambo xa nkoka ngopfu lexi munhu a nga xi kumaka, naswona hi xihi xivutiso lexi hi nga ha tivutisaka xona?

HI XIHI xirhambo xo tsakisa ngopfu lexi u nga tshama u xi kuma? U nga ha tsundzuka siku leri a wu rhambiwe kun’wana, ko tanihi le mucatweni wa vanhu vambirhi lava u va rhandzaka ngopfu. Kumbe u nga ha ehleketa hi siku leri u vitaniweke leswaku u ya endla ntirho wo karhi wa nkoka. A swi kanakanisi leswaku loko u kuma swirhambo sweswo a wu nga tikoti hi ku tsaka, naswona u swi teke ku ri lunghelo. Kambe sweswi mhaka-nkulu, hileswaku se u kume xirhambo xo tlula hinkwaswo. Un’wana ni un’wana wa hina u xi kumile xirhambo xa kona. Kutani ndlela leyi hi angulaka ha yona eka xona a hi mhaka ya matlangwana. I xiboho xa nkoka ku tlula hinkwaswo leswi hi nga ta swi endla evuton’wini.

² Hi xihi xirhambo xa kona? Xi huma eka Yesu Kreste, N’wana la nga swakwe wa Yehovha, Xikwembu xa Matimba Hinkwawo, naswona xi tsariwe eBibeleni. Eka Marka 10:21 hi twa marito ya Yesu lama nge: ‘Tana u va mulandzeri wa mina.’ Nisweswi un’wana ni un’wana wa hina wa ha rhambiwa. Hi fanele hi tivutisa, ‘Xana ndzi ta angula njhani?’ Kumbexana u ehleketa leswaku nhlamulo ya wena yi le rivaleni. Xana u kona la nga alaka xirhambo xa nkoka swonghasi? Lexi hlamarisaka, vanhu vo tala va xi ala. Ha yini?

3, 4. (a) I yini lexi nga ha vonakaka xi naveleka eka jaha leri nga ya eka Yesu ri ya vutisa hi ta vutomi lebyi nga heriki? (b) Hi tihi timfanelo letinene leti Yesu a nga ha vaka a ti vonile eka jaha leri fuweke ngopfu leri nga mufumi?

³ Hi xikombiso, xiya munhu loyi a rhambiweke hi xiviri eka malembe ya 2 000 lama hundzeke. A a xiximekaka swinene. A a ri ni swilo swinharhu leswi vanhu va swi tekaka swi ri swa nkoka ngopfu​—vuntshwa, rifuwo ni xikhundlha. Bibele yi hlamusela leswaku a a ri “jaha,” a “fuwe ngopfu” naswona a a ri “mufumi.” (Matewu 19:20; Luka 18:18, 23) Hambiswiritano, a ku ri ni nchumu wun’wana wo hlawuleka ngopfu hi jaha leri. Ri twe hi ta Yesu, Mudyondzisi Lonkulu, kutani ri n’wi tsakela.

⁴ Vafumi vo tala va le minkarhini yoleyo, Yesu a va nga n’wi kombi xichavo lexi n’wi faneleke. (Yohane 7:48; 12:42) Kambe jaha leri nga mufumi a ri nga fani na vona. Bibele yi hi byela leswi: “Kuteloko [Yesu] a huma, a khoma ndlela, munhu un’wana a tsutsuma a fika a nkhinsama emahlweni ka yena ivi a n’wi tlhandleka xivutiso a ku: ‘Mudyondzisi Lonene, xana ndzi fanele ndzi endla yini leswaku ndzi kuma ndzhaka ya vutomi lebyi nga heriki?’” (Marka 10:17) Xiya ndlela leyi jaha leri a ri swi navela ha yona ku vulavula na Yesu, ri n’wi tsutsumerile hilaha munhu wihi na wihi la nga xisiwana a a ta va a endle hakona. Ku tlula kwalaho, ri nkhinsame emahlweni ka Kreste hi xichavo. Hikwalaho a ri titsongahata naswona a ri swi xiya leswaku ri ni ndlala ya moya. Yesu u ti xiyile timfanelo teto letinene. (Matewu 5:3; 18:4) A swi hlamarisi leswi ‘Yesu a ri languteke ivi a titwa a ri rhandza.’ (Marka 10:21) Xana Yesu u xi hlamule njhani xivutiso xa jaha rero?

Xirhambo Xo Hlawuleka Ngopfu

5. Xana Yesu u ri hlamule njhani jaha leri fuweke, naswona hi swi tivisa ku yini leswaku vusiwana a ku nga ri xona “xilo xin’we” lexi a xi kayivela eka rona? (Vona nhlamuselo ya le hansi.)

⁵ Yesu u kombe leswaku Tata wakwe ana se u ri andlarile rungula leri hlamulaka xivutiso xa nkoka xa ndlela yo kuma vutomi lebyi nga heriki. U tshahe Matsalwa, kutani jaha rero ri vule hi ku tiyiseka leswaku rona ri landzela Nawu wa Muxe hi ku tshembeka. Hambiswiritano, Yesu hi vutlhari byakwe lebyikulu, u vone leswi nga embilwini ya rona. (Yohane 2:25) U vone leswaku jaha leri nga mufumi ri ni xiphiqo lexikulu lexi khumbaka vuxaka bya rona ni Xikwembu. Hikwalaho Yesu u ri byele leswi: “U kayivela xilo xin’we.” Xana a ku ri yini “xilo xin’we” xa kona? Yesu u te: “Famba, u ya xavisa swilo leswi u nga na swona u nyika swisiwana.” (Marka 10:21) Xana Yesu a a vula leswaku munhu u fanele a va xisiwana leswaku a ta tirhela Xikwembu? Doo!a Kreste a a paluxa yinhla yin’wana ya nkoka ngopfu.

6. Hi xihi xirhambo lexi Yesu a xi hundziseleke eka jaha leri nga mufumi, naswona xana ndlela leyi ri anguleke ha yona yi paluxe yini hi leswi nga embilwini ya rona?

⁶ Leswaku a paluxela jaha leri leswi a ri kayivela swona, Yesu u ri rhambile a ku: ‘Tana u va mulandzeri wa mina.’ Ehleketa ha swona​—N’wana wa Xikwembu Lexi nge Henhla-henhla a ri karhi a rhamba jaha rolero hi xiviri leswaku ri n’wi landzela! Yesu u tlhele a ri tshembisa hakelo leyikulu ngopfu. U te: “U ta va ni xuma etilweni.” Xana jaha rero leri nga mufumi ri xi amukele xikan’we-kan’we xirhambo xexo xa nkoka? Rungula ra kona ri ri: ‘Ri hlunamisiwe hi marito lawa, ri famba ri ri ni gome, hikuva a ri ri ni swilo swo tala.’ (Marka 10:21, 22) Kutani marito ya Yesu lawa jaha leri a ri nga ma langutelanga ma paluxe xiphiqo lexi nga embilwini ya rona. A ri rhandza rifuwo ra rona hi mbilu hinkwayo, naswona a swi kanakanisi leswaku a ri rhandza xikhundlha ni ndhuma leyi munhu a yi kumaka hi ku va mufuwi. Khombo ra kona a ri swi rhandza ngopfu swilo sweswo ku tlula ndlela leyi a ri n’wi rhandza ha yona Kreste. “Xilo xin’we” lexi a ri xi kayivela enkarhini wolowo a ku ri ku rhandza Yesu na Yehovha hi mbilu ya rona hinkwayo lerova ri nga titsona swilo hinkwaswo. Leswi jaha leri a ri nga ri na rona rirhandzu rero ri xi arile xirhambo xexo xo hlawuleka! Kutani, wena u nghena njhani emhakeni leyi?

7. Ha yini hi nga tiyisekaka leswaku xirhambo xa Yesu xa hi katsa na hina?

⁷ Xirhambo xa Yesu a xi nga kongomisiwanga eka jaha rero ntsena; naswona a xi nga kongomisiwanga eka vanhu vo karhi ntsena. Yesu u te: ‘Loko munhu a lava ku ndzi landzela, a a ndzi landzele nkarhi hinkwawo.’ (Luka 9:23) Xiya leswaku “munhu” wihi ni wihi a nga va mulandzeri wa Kreste loko hakunene a swi “lava.” Vanhu vo tano va timbilu letinene Xikwembu xi va kokela eka N’wana wa xona. (Yohane 6:44) A ku rhambiwi lava fuweke ntsena, swisiwana ntsena, va rixaka ro karhi ntsena kumbe va tiko ro karhi ntsena naswona a hi lava hanyeke enkarhini wolowo ntsena, kambe vanhu hinkwavo va ni lunghelo ro amukela xirhambo xa Yesu. Kutani xirhambo xa Yesu lexi nge, ‘Tana u va mulandzeri wa mina,’ entiyisweni xa ku khumba na wena. Kambe ha yini u fanele u lava ku landzela Kreste? Naswona kahle-kahle ku n’wi landzela swi katsa yini?

Ha Yini U Fanele U Va Mulandzeri Wa Kreste?

8. Hi xihi xilaveko lexi vanhu hinkwavo va nga na xona, naswona ha yini?

⁸ Ku ni mhaka yin’wana leyi hi faneleke hi yi tiva: Hi leswaku tanihi vanhu hi ni xilaveko xa nkoka xo va ni murhangeri lonene. A hi vanhu hinkwavo lava pfumelaka leswaku va ni xilaveko xexo, kambe xona xi kona. Yeremiya muprofeta wa Yehovha u huhuteriwe ku tsala mhaka leyi nga ntiyiso wa xiviri a ku: “Oho Yehovha, ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Vanhu a va na vuswikoti hambi ku ri lunghelo ro tifuma. Hakunene, ematin’wini ya vanhu vurhangeri bya vanhu a byi humeleli. (Eklesiasta 8:9) Enkarhini wa Yesu, varhangeri a va tshikilela vanhu, va va khoma hi ndlela yo biha ni ku va hambukisa. Yesu la khathalaka hi vanhu u swi xiyile sweswo loko a vula leswaku vanhu lava tolovelekeke a va “fana ni tinyimpfu leti nga riki na murisi.” (Marka 6:34) Swa ha ri tano ninamuntlha. Munhu un’wana ni un’wana u lava murhangeri loyi a nga ta n’wi tshemba ni ku n’wi xixima. Xana Yesu i murhangeri wo tano? Xiya swivangelo swi nga ri swingani swa ku faneleka ka yena.

9. I yini lexi hambanisaka Yesu ni varhangeri lavan’wana hinkwavo?

⁹ Xo sungula, Yesu u hlawuriwe hi Yehovha Xikwembu. Kambe varhangeri vo tala va vanhu va hlawuriwa hi vanhu-kulobye lava nga hetisekangiki, lava hakanyingi va kanganyisiwaka ni lava endlaka swihoxo loko va avanyisa. Yesu a nga fani ni varhangeri volavo. Xithopo xa yena hi xoxe xi hi byela sweswo. Rito leri nge “Kreste,” ni leri nge “Mesiya,” ma vula “Mutotiwa.” Ina, Yesu u totiwile kumbe u hlawuriwe hi ndlela yo hlawuleka eka xikhundlha xa yena xo kwetsima, hi Hosi leyi Lawulaka ya vuako hinkwabyo. Yehovha Xikwembu u vule leswi hi N’wana wakwe: “Maswivo! Nandza wa mina loyi ndzi n’wi hlawuleke, la rhandzekaka eka mina, loyi moya-xiviri wa mina wu n’wi amukeleke! Ndzi ta veka moya wa mina ehenhla ka yena.” (Matewu 12:18) Mutumbuluxi wa hina hi yena ntsena la tivaka murhangeri loyi hi faneleke hi rhangeriwa hi yena. Vutlhari bya Yehovha i bya hilaha ku nga heriki kutani byi hi siya hi nga kanakani nikatsongo hi murhangeri loyi a n’wi hlawuleke.​—Swivuriso 3:5, 6.

10. Ha yini xikombiso xa Yesu xi ri lexinene ngopfu lerova vanhu va fanele va xi landzela?

¹⁰ Xa vumbirhi,Yesu u hi vekele xikombiso lexi hetisekeke ni lexi khutazaka. Murhangeri lonene ngopfu u ni timfanelo leti vanhu lava a va fumaka va ti xiximaka naswona va ti tekelelaka. Marito yakwe ma fambisana ni mintirho kutani ma khutaza vanhu leswaku va hanya hi ku lulama. Hi tihi timfanelo leti u nga ti tsakelaka swinene eka murhangeri? Xana i xikhutazo? Xana i vutlhari? Xana i ntwela-vusiwana? Xana i ku tiyisela ka yena loko a langutane ni maxangu? Loko u ri karhi u dyondza hi ta vutomi bya Yesu loko a ha ri emisaveni u ta kuma leswaku a a ri na tona timfanelo teto hinkwato​—ni tin’wana to tala. Yesu a a n’wi fanekisela kahle Tata wakwe wa le tilweni naswona a a ri ni timfanelo hinkwato leti fanaka ni ta Xikwembu. A a ri munhu la hetisekeke hi tindlela hinkwato. Kutani hi kuma swo karhi leswi hi faneleke hi swi tekelela loko hi xiya swiendlo swa yena hinkwaswo niloko hi xiya hinkwaswo leswi a swi vuleke ni ndlela leyi a a titwa ha yona. Bibele yi vula leswaku u hi ‘siyele ntila leswaku hi landzelerisisa mikondzo yakwe.’​—1 Pet. 2:21.

11. Xana Yesu u swi kombise njhani leswaku i “murisi lonene”?

¹¹ Xa vunharhu, Kreste u hanye hi ku pfumelelana ni marito yakwe lama nge: “Hi mina murisi lonene.” (Yohane 10:14) Eka vanhu va le minkarhini ya Bibele, xifaniso xexo a xi tolovelekile. Varisi a va tirha hi matimba leswaku va khathalela tinyimpfu leti va ti langutelaka. “Murisi lonene” a a veka vutomi bya yena ekhombyeni leswaku tinyimpfu ti sirheleleka. Hi xikombiso, Davhida kokwa wa Yesu a a ri murisi evuntshweni byakwe, naswona minkarhi yin’wana u veke vutomi byakwe ekhombyeni leswaku a sivela xivandzana leswaku xi nga hlaseli tinyimpfu takwe. (1 Samuwele 17:34-36) Yesu u va endlele swo tlula sweswo valandzeri vakwe. U nyikele hi vutomi byakwe hikwalaho ka vona. (Yohane 10:15) Xana i vangani varhangeri lava nga ni moya wo tano wo rhangisa swilaveko swa van’wana?

12, 13. (a) Xana murisi u tiva tinyimpfu ta yena hi ndlela yihi, na tona ti n’wi tiva hi ndlela yihi? (b) Ha yini u lava ku risiwa hi Murisi Lonene?

¹² Yesu a a ri “murisi lonene” hi ndlela yin’wana. U te: “Tinyimpfu ta mina ndza ti tiva ni tinyimpfu ta mina ta ndzi tiva.” (Yohane 10:14) Anakanyisisa hi xikombiso lexi xa Yesu. Eka munhu loyi a nga tiviki nchumu, ntlhambi wa tinyimpfu wo va ntlhambi ntsena. Hambiswiritano, murisi u tiva yin’wana ni yin’wana ya tinyimpfu ta yena. U tiva ta tintswele leti ti nga ta lava mpfuno wakwe ku nga ri khale loko ti veleka, ni swinyimpfana leswi nga kotiki ku tifambela leswi lavaka ku tlakuriwa naswona u tiva ni nyimpfu leyi vabyaka kumbe leyi nga vaviseka. Na tona tinyimpfu ti n’wi tiva kahle murisi wa tona. Ti tiva rito rakwe, naswona a ti nge kavanyetiwi hi rito ra murisi un’wana. Loko a ti vitana leswaku ti papalata khombo ti baleka hi xihatla. Ti ya laha a ti kongomisaka kona. Na yena wa ku tiva laha a faneleke a ti kongomisa kona. Wa ku tiva lomu ku nga ni byanyi byo nona bya rihlaza, laha ku nga ni swinambyana swa mati yo tenga ni madyelo lama hlayisekeke. Loko a ri karhi a ti risa, na tona ta swi vona leswaku ti hlayisekile.​—Pisalema 23.

¹³ Xana a wu swi naveli ku va ni murhangeri wo tano? Murisi Lonene u tiviwa hi ku khoma valandzeri va yena hi ndlela leyinene ku tlula yoleyo. U ku tshembisa ku ku kongomisa leswaku u hanya vutomi byo tsakisa lebyi nga ni xikongomelo sweswi ni hilaha ku nga heriki! (Yohane 10:10, 11; Nhlavutelo 7:16, 17) Hikwalaho hi fanele hi rhanga hi tiva leswaku ku laveka yini leswaku hi va valandzeri va Kreste.

Leswi Swi Vulaka Swona Ku Va Mulandzeri Wa Kreste

14, 15. Leswaku u va mulandzeri wa Kreste, ha yini swi nga enelanga ku tivula Mukreste ntsena kumbe ku va ni vuxaka lebyikulu na Yesu ntsena?

¹⁴ Namuntlha vanhu va madzana ya timiliyoni va vona onge va xi amukerile xirhambo xa Kreste. Entiyisweni va hlawule ku tivitana Vakreste. Kumbexana va nghena kereke leyi vatswari va vona va va kuriseleke eka yona. Kumbe va nga ha vula leswaku va ni vuxaka lebyikulu na Yesu ni ku n’wi amukela tanihi Muponisi wa vona. Kambe, xana sweswo swi va endla valandzeri va Kreste? Xana hi swona leswi Yesu a a vula swona loko a hi rhamba leswaku hi va valandzeri va yena? Ku katseka swo tala leswaku munhu a va mulandzeri wa yena.

¹⁵ Xiya Vujagana​—ematikweni lawa vunyingi bya vaaki va wona va tivulaka valandzeri va Kreste. Xana Vujagana byi tikomba byi tirhisa tidyondzo ta Yesu Kreste? Kumbe, xana ematikweni wolawo hi vona rivengo, ntshikilelo, vugevenga ni vuhomboloki byo tanihi lebyi nga kona emisaveni hinkwayo? Murhangeri wa Mahindu la xiximekaka, Mohandas Gandhi u tshame a ku: “A ku na un’wana loyi a nga tshama a pfuna vanhu ku fana na Yesu. Entiyisweni, a ku na xo biha hi Vukreste.” U tlhandlekele a ku: “Xiphiqo xi na n’wina Vakreste. A mi hanyi hi swona leswi mi swi dyondzisaka.”

16, 17. I yini lexi hakanyingi xi kayivelaka eka lava tivulaka Vakreste, naswona valandzeri va Kreste va xiviri va vonaka hi yini?

¹⁶ Yesu u vule leswaku vadyondzisiwa vakwe va xiviri a va nge tiviwi hi ku tivula hi nomu kumbe hi ku tivitana hi vito ro karhi ntsena kambe va ta tiviwa ngopfu hi mintirho ya vona. Hi xikombiso, u te: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.” (Matewu 7:21) Ha yini vanhu vo tala lava vulaka leswaku Yesu i Hosi ya vona va nga endli ku rhandza ka Tata wa yena? Tsundzuka jaha leriya ra mufumi leri fuweke. Hakanyingi, ku ni ‘xilo xin’we lexi kayivelaka’ eka lava tivulaka Vakreste​—ku nga ku rhandza Yesu hi moya-xiviri hinkwawo swin’we ni Loyi a n’wi rhumeke.

¹⁷ Xana sweswo swi endlekisa ku yini? Phela, vanhu hinkwavo va timiliyoni lava tivulaka Vakreste va vula leswaku va rhandza Kreste. Kambe ku rhandza Yesu na Yehovha a swi vuli ntsena ku va rhandza hi nomu. Yesu u te: “Loko munhu a ndzi rhandza u ta hlayisa rito ra mina.” (Yohane 14:23) Nakambe loko a vulavula tanihi murisi, u te: “Tinyimpfu ta mina ti yingisa rito ra mina, naswona ndza ti tiva, kutani ta ndzi landzela.” (Yohane 10:27) Ina, a hi rhandzi Kreste hi nomu ntsena kumbe hi ndlela leyi hi titwaka ha yona, kambe hi n’wi rhandza ngopfu-ngopfu hi swiendlo swa hina.

18, 19. (a) Xana ku dyondza hi Yesu swi fanele swi hi khumba njhani? (b) Hi xihi xikongomelo xa buku leyi, naswona yi ta va vuyerisa njhani lava ku nga khale va titeka va ri valandzeri va Kreste?

¹⁸ Hambiswiritano, swiendlo swa hina swi kombisa vumunhu bya hina. Hi fanele hi cinca vumunhu bya hina. Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Loko hi nghenisa vutivi lebyi kongomeke ha Yesu hi tlhela hi anakanyisisa ha byona, sweswo swi ta khumba timbilu ta hina. Hi ta ya hi n’wi rhandza swinene naswona hi ta tshama hi ri karhi hi navela ku n’wi landzela nkarhi hinkwawo.

¹⁹ Hi xona xikongomelo xa buku leyi. A yi nge hi hlamuseli ntsena hi ku komisa vutomi ni ntirho lowu Yesu a wu endleke, kambe yi ta hi pfuna leswaku hi yi twisisa kahle ndlela leyi hi faneleke hi n’wi landzela ha yona.b Yi endleriwe ku hi pfuna leswaku hi tikambisisa hi ku ya hi leswi Matsalwa ma swi vulaka kutani hi tivutisa leswi, ‘Xana hakunene ndzi landzela Yesu?’ (Yakobo 1:23-25) Kumbexana i khale u ri karhi u tivona u ri nyimpfu leyi kongomisiwaka hi Murisi Lonene. Kambe, nkarhi hinkwawo hi nga kuma tindlela to endla nhluvuko emhakeni leyi. Bibele yi hi khutaza yi ku: “Tshamani mi ri karhi mi tikambela ku vona loko mi ri eripfumelweni, tshamani mi tikombisa leswi n’wina mi nga swona.” (2 Vakorinto 13:5) Swi lava hi endla matshalatshala leswaku hi tiyiseka leswaku hakunene hi kongomisiwa hi Yesu Murisi wa hina Lonene la nga ni rirhandzu, loyi Yehovha hi byakwe a n’wi hlawuleke leswaku a hi rhangela.

20. I yini leswi hi nga ta dyondza ha swona eka ndzima leyi landzelaka?

²⁰ Onge ku dyondza ka wena buku leyi ku nga tiyisa rirhandzu leri u nga na rona ha Yesu na Yehovha. Loko rirhandzu rero ri ri karhi ri ku kongomisa evuton’wini, u ta va ni ku rhula ni ku eneriseka kona kwala misaveni leyi ya khale, naswona u ta hanyela ku dzunisa Yehovha hilaha ku nga heriki hikwalaho ka leswi a hi nyikeke Murisi Lonene. Ina, ku dyondza ka hina ha Kreste ku fanele ku sekeriwa eka masungulo lamanene. Kutani swi fanerile leswi eka Ndzima 2 hi nga ta dyondza hi ntirho wa Yesu eka xikongomelo xa Yehovha hi vuako hinkwabyo.