Timbhoni Ta Yehovha

Nhlamuselo: I vandla ra vanhu va Vakreste va misava hinkwayo lava nyikelaka vumbhoni hi ku hiseka malunghana na Yehovha Xikwembu ni swikongomelo swa yena leswi khumbaka vanhu. Va sekela ripfumelo ra vona eBibeleni ntsena.

Hi tihi tidyondzo ta Timbhoni ta Yehovha leti endlaka leswaku ti hambana ni vukhongeri byin’wana?

(1) Bibele: Timbhoni ta Yehovha ti pfumela leswaku Bibele hinkwayo i Rito ra Xikwembu leri huhuteriweke, naswona ematshan’weni yo namarhela dyondzo leyi sekeriweke emikhuveni ya vanhu, ti languta Bibele tanihi mpimanyeto wa tidyondzo ta tona hinkwato.

(2) Xikwembu: Ti gandzela Yehovha tanihi Xikwembu xi ri xin’we xa ntiyiso naswona ti vulavula ha xona hi ku ntshunxeka swin’we ni swikongomelo swa xona swa rirhandzu hi vanhu. Un’wana ni un’wana loyi a nyikelaka vumbhoni hi Yehovha erivaleni hakanyingi u tekiwa tanihi wa ntlawa lowu—“Timbhoni ta Yehovha.”

(3) Yesu Kreste: A ti pfumeli leswaku Yesu Kreste i xiphemu xa Vunharhu-un’we, kambe hi laha Bibele yi vulaka ha kona, ti pfumela leswaku i N’wana wa Xikwembu, mativula ya swivumbiwa swa Xikwembu; leswaku u hanyile a nga si va munhu wa nyama ni leswaku vutomi bya yena byi hundziseriwe ekhwirini ra wanhwana, Mariya, ku suka etilweni; leswaku vutomi byakwe lebyi hetisekeke lebyi endliweke gandzelo byi endla swi koteka leswaku lava kombisaka ripfumelo va ponela evuton’wini lebyi nga heriki; leswaku Kreste i Hosi leyi fumaka emisaveni hinkwayo ku sukela hi 1914, hi matimba lama humaka eka Xikwembu.

(4) Mfumo wa Xikwembu: Ti pfumela leswaku Mfumo wa Xikwembu hi wona ntsena ntshembo wa xiviri wa vanhu; leswaku i hulumendhe ya xiviri; leswaku ku nga ri khale wu ta herisa mafambiselo ya sweswi yo biha ya swilo, ku katsa ni tihulumendhe hinkwato ta vanhu, ni leswaku wu ta tisa mafambiselo lamantshwa laha ku lulama ku nga ta andza kona.

(5) Vutomi bya le tilweni: Ti pfumela leswaku Vakreste va 144 000 lava totiweke hi moya va ta fuma na Kreste eMfun’weni wa le tilweni, va va tihosi leti fumaka na yena. A ti pfumeli leswaku un’wana ni un’wana la “lulameke” u ta ya etilweni.

(6) Misava: Ti pfumela leswaku xikongomelo xa Xikwembu xo sungula hi misava xi ta hetiseka; leswaku misava hinkwayo yi ta akiwa hi vagandzeri va Yehovha ni leswaku va ta kota ku tsakela vutomi lebyi nga heriki va ri vanhu lava hetisekeke; ni leswaku hambi vafi va ta pfuxiwa va kota ku kuma mikateko leyi.

(7) Rifu: Ti pfumela leswaku vafi a va twi nchumu nikatsongo; leswaku a va twi ku vava kumbe ku kuma ntsako endhawini yo karhi ya moya; leswaku ku hava kun’wana lomu va hanyaka kona handle ko tsundzukiwa hi Xikwembu, kutani ntshembo wa tona wa vutomi lebyi taka wu titshege hi ku pfuxiwa eku feni.

(8) Masiku ya makumu: Ti pfumela leswaku sweswi, ku sukela hi 1914, hi hanya emasikwini ya makumu ya mafambiselo lawa yo biha ya swilo; leswaku van’wana lava voneke swiendlakalo swa 1914 va ta tlhela va vona ku herisiwa ka misava leyi yo biha; leswaku varhandzi va ku lulama va ta ponela emisaveni leyi basisiweke.

(9) Ku hambana ni misava: Ti lwela swinene ku nga vi xiphemu xa misava, hi laha Yesu a nga te valandzeri va ntiyiso va ta endla ha kona. Ti kombisa rirhandzu ra ntiyiso ra Vukreste eka vaakelani, kambe a ti hlanganyeli eka tipolitiki kumbe tinyimpi ta tiko rihi na rihi. Ti hlayisa mindyangu ya tona hi swilo leswi vonakaka kambe ti papalata moya wa misava wo rhandza swilo leswi vonakaka ni ndhuma ni ku rhandza ka yona ntsako ku tlula mpimo.

(10) Ti tirhisa ndzayo ya Bibele: Ti pfumela leswaku i swa nkoka ku tirhisa ndzayo ya Rito ra Xikwembu evuton’wini bya siku na siku—ekaya, exikolweni, ebindzwini ni le mavandlheni ya tona. Ku nga khathariseki leswaku munhu a a hanya njhani eku sunguleni, a nga va un’wana wa Timbhoni ta Yehovha loko a fularhela swiendlo leswi soriwaka hi Rito ra Xikwembu ivi a tirhisa ndzayo ya rona leyi humaka eka Xikwembu. Kambe loko munhu endzhaku ka sweswo a endla vuoswi, vumbhisa, vusodoma, a tirhisa swidzidzirisi hi ndlela yo biha, vudakwa, a hemba kumbe a yiva, u ta susiwa enhlengeletanweni.

(Nxaxamelo lowu nga laha henhla wu kombisa hi ku komisa tidyondzo to karhi to hlawuleka ta Timbhoni ta Yehovha kambe leti a hi tona ntsena tinhla leti tidyondzo ta tona ti hambaneke eka ta mintlawa yin’wana. Xisekelo xa Matsalwa xa tidyondzo leti nga laha henhla xi nga kumiwa eka Xikombo xa buku leyi.)

Xana Timbhoni ta Yehovha i vukhongeri bya le Amerika?

I vaseketeri va Mfumo wa Xikwembu, a va seketeli fambiselo ra politiki, ra ikhonomi kumbe ra ntshamisano, ra tiko rihi na rihi ra misava leyi ya khale.

I ntiyiso leswaku Timbhoni ta Yehovha ta manguva lawa ti sungule eUnited States. Leswi yindlu-nkulu ya tona ya misava hinkwayo yi nga kwale, swi endle leswaku swi koteka ku kandziyisa ni ku rhumela tibuku ta Bibele eswiphen’wini swo tala swa misava. Kambe ku hava tiko leri Timbhoni ti ri rhandzaka ku tlula rin’wana; ti kumeka ematikweni hinkwawo, naswona ti ni tihofisi eswiphen’wini swo tala swa misava laha ti wu kongomisaka kona ntirho wa tona etindhawini teto.

Anakanya hi leswi: Yesu tanihi Muyuda u tswaleriwe ePalestina, kambe Vukreste a hi vukhongeri bya le Palestina, a swi tano ke? Ndhawu leyi Yesu a tswaleriweke eka yona a hi yinhla ya nkoka leyi faneleke ku kambisisiwa. Leswi Yesu a swi dyondziseke a swi huma eka Tata wakwe, Yehovha Xikwembu, loyi a khomaka vanhu va matiko hinkwawo handle ka ku ya hi nghohe.—Yoh. 14:10; Mint. 10:34, 35.

Ntirho wa Timbhoni ta Yehovha wu seketeriwa njhani hi timali?

Hi minyikelo ya ku tirhandzela, hi laha a swi ri ha kona hi Vakreste vo sungula. (2 Kor. 8:12; 9:7) Ku hava minhlengo leyi tekiwaka eminhlanganweni ya tona; a ti kombeli mali evanhwini. Minyikelo yihi ni yihi leyi humaka eka vanhu lava tsakelaka yi tirhiseriwa ku yisa ntirho wa misava hinkwayo emahlweni wo dyondzisa Bibele lowu endliwaka hi Timbhoni.

Timbhoni a ti holeriwi loko ti famba hi yindlu na yindlu kumbe loko ti fambisa tibuku ta Bibele eswitarateni. Ti susumeteriwa hi ku rhandza Xikwembu ni vaakelani leswaku ti vulavula hi malunghiselelo ya rirhandzu lawa Xikwembu xi ma endleleke vanhu.

Watch Tower Bible and Tract Society of Pennsylvania, ku nga nhlangano wa le nawini wa vukhongeri lowu tirhisiwaka hi Timbhoni ta Yehovha, wu sunguriwe hi 1884 hi ku pfumelelana ni nawu lowu va nge i Nonprofit Corporation Law of the Commonwealth of Pennsylvania, U.S.A. Xisweswo, hi ku ya hi nawu lowu a hi nhlangano lowu bindzulaka, naswona vanhu a va bindzuli hi ku tirhisa Sosayiti leyi. Papila ra mpfumelelo wa Sosayiti ri ri: “[Sosayiti] a yi lavi leswaku swirho swa yona, vakongomisi kumbe vafambisi va yona va vuyeriwa kumbe va kuma ntswalo wa mali, hi xiwelo kumbe hi ndlela yo karhi.”

Xana Timbhoni ta Yehovha i mpambukwa kumbe i vugandzeri bya mihivahivana?

Van’wana va hlamusela mpambukwa tanihi leswi vulaka ntlawa lowu gwineheke evukhongerini lebyi simekiweke. Van’wana va tirhisa rito leri loko va vula ntlawa lowu landzelaka murhangeri kumbe mudyondzisi wo karhi wa munhu. Rito leri hakanyingi ri tirhisiwa hi ndlela yo monya. Timbhoni ta Yehovha a ti humi ekerekeni yo karhi kambe ti katsa vanhu va swiyimo hinkwaswo swa vutomi ni va swisekelo swo tala swa vukhongeri. A ti tshembanga munhu wo karhi, kambe ti tshemba Yesu Kreste, tanihi murhangeri wa tona.

Vugandzeri bya mihivahivana i vukhongeri lebyi ku vuriwaka leswaku a byi amukeleki kumbe lebyi kandziyisaka ku tinyiketela hi ku ya hi mikhuva leyi vekiweke. Vugandzeri byo tala bya mihivahivana byi landzela murhangeri wa munhu la hanyaka, naswona hakanyingi vanhu va byona va hanya hi mintlawa leyi tihambanisaka ni vanhu van’wana. Hambi swi ri tano, mpimanyeto wa leswi amukelekaka wu fanele ku va Rito ra Xikwembu, naswona Timbhoni ta Yehovha ti yi namarhela swinene Bibele. Vugandzeri bya tona i ndlela ya vutomi, a hi ku tinyiketela ka mikhuva. A ti landzeli munhu wo karhi kumbe ku tihambanisa ni vanhu van’wana. Ti hanya ni ku tirha exikarhi ka vanhu van’wana.

Xana vukhongeri bya Timbhoni ta Yehovha i bya khale ku fikela kwihi?

Hi ku ya hi Bibele, ntlhandlamano wa timbhoni ta Yehovha wu sukela le ndzhaku eka Avele wo tshembeka. Vaheveru 11:4–12:1 yi ri: “Hi ku pfumela, Avele ú humesele Xikwembu magandzelo lama amukelekeke ku tlula ya Kayini . . . Hi ku pfumela, Nowa ú yingisile swinene loko Xikwembu xi n’wi tsundzuxa hi ku n’wi byela leswi a swi nga si vonaka; [a kombisa ku chava Xikwembu, NW] . . . Hi ku pfumela, Abrahama, siku a vitaniweke ku rhurha a ya etikweni leri Xikwembu a xi n’wi tshembisile rona, ú yingisile . . . Hi ku pfumela, Muxe, loko a kurile, ú arile ku vuriwa n’wana wa n’wa-Faro. Ematshan’wini ya sweswo, ú tihlawulele ku xaniseka swin’we ni vanhu va Xikwembu, ku ri na ku titsakisa nkarhinyana hi ku hanya eku dyoheni . . . Hikokwalaho, leswi hi rhendzeriweke hi vunyingi lebyikulu lebyi bya timbhoni, na hina a hi tshikeni hinkwaswo leswi swi hi sivelaka ku ya emahlweni, ni vudyoho lebyi hatlaka ku hi namarhela, hi tsutsuma hi ri ni ku tiyisela eku tsutsumeni ka mpfhuka lowu hi vekeriweke wona.”—Xiitaliki i xerhu.

Loko yi vulavula hi Yesu Kreste, Bibele yi ri: “Marito ya loyi a nga Amen, mbhoni leyi tshembekeke ya ntiyiso, masungulo ya leswi tumbuluxiweke hi Xikwembu, hi lawa.” (Xiitaliki i xerhu.) Xana a a ri mbhoni ya mani? Yena hi yexe u vule leswaku u twarise vito ra Tata wa yena. A a ri mbhoni leyikulu ya Yehovha.—Nhlav. 3:14; Yoh. 17:6.

Lexi tsakisaka hi leswaku Vayuda van’wana va vutisile loko ntirho wa Yesu Kreste wu yimela “dyondzo leyintshwa.” (Mar. 1:27) Endzhakunyana, Vagriki van’wana a va anakanya leswaku muapostola Pawulo a a sungula “dyondzo leyintshwa.” (Mint. 17:19, 20) A yi ri yintshwa etindleveni ta lava a va yi twa, kambe nchumu wa nkoka hi leswaku a a yi ri ntiyiso, lowu pfumelelanaka hi ku helela ni Rito ra Xikwembu.

Matimu ya manguva lawa ya Timbhoni ta Yehovha ma sungule hi ku vumbiwa ka ntlawa wa dyondzo ya Bibele eAllegheny, Pennsylvania, U.S.A., eku sunguleni ka va 1870. Eku sunguleni a va tiviwa tanihi Swichudeni swa Bibele, kambe hi 1931 va kume vito leri sekeriweke eMatsalweni leri nge Timbhoni ta Yehovha. (Esa. 43:10-12) Tidyondzo ni swiendlo swa vona a hi swintshwa kambe i ku kondleteriwa ka Vukreste bya lembe-xidzana ro sungula.

Xana Timbhoni ta Yehovha ti pfumela leswaku vukhongeri bya tona hi byona ntsena lebyi lulameke?

Bibele a yi pfumelelani ni mavonelo ya manguva lawa ya leswaku ku ni tindlela to tala leti amukelekaka to gandzela Xikwembu. Vaefesa 4:5 yi vula leswaku “ku ni Hosi yin’we, ni ku pfumela kun’we.” Yesu u te: “Nyangwa leyi yisaka evutomini yi khumile swinene, ni ndlela leyi yaka kona yi larile, kutani lava va yi kumaka a va talanga. . . . A hi hinkwavo lava nge ka mina: ‘Hosi, Hosi’ lava nga ta nghena eMfun’weni wa matilo, kambe ku ta nghena la endlaka ku rhandza ka Tata wa mina la nge matilweni.”—Mt. 7:13, 14, 21; nakambe vona 1 Vakorinto 1:10.

Hi ku phindha-phindha Matsalwa ma kombetela eka ntlawa wa tidyondzo ta Vukreste bya ntiyiso tanihi “ntiyiso,” naswona Vukreste byi vuriwa “ndlela ya ntiyiso.” (1 Tim. 3:15; 2 Yoh. 1; 2 Pet. 2:2) Hikwalaho ka leswi Timbhoni ta Yehovha ti seketelaka tidyondzo ta tona hinkwato, mimpimanyeto ya tona ya mahanyelo, ni mafambiselo ya nhlengeletano eBibeleni, ripfumelo ra tona eBibeleni hi yoxe tanihi Rito ra Xikwembu ri ti nyika xivindzi xa leswaku leswi ti nga na swona i ntiyiso hakunene. Kutani xiyimo xa tona a hi xa ku tikurisa kambe xi kombisa ntshembo wa leswaku Bibele hi wona mpimanyeto lowu faneleke wo pima vukhongeri bya munhu. A ti anakanyi hi swa tona ntsena kambe ti hisekela ku avelana tidyondzo ta tona ni van’wana.

Xana vukhongeri byin’wana a byi yi landzeli Bibele?

Byo tala bya yi tirhisanyana. Kambe xana byi dyondzisa ni ku endla leswi yi swi tameleke? Anakanya hi leswi: (1) Eka vuhundzuluxeri byo tala bya byona bya Bibele byi suse vito ra Xikwembu xa ntiyiso minkarhi ya magidi. (2) Dyondzo ya Vunharhu-un’we, mianakanyo ya byona hi Xikwembu, yi lombiwa evuhedenini naswona yi kurisiwe ku ta fikela laha yi nga kona namuntlha eka malembe-xidzana yo tala endzhaku ka loko ku tsariwa ka Bibele ku herile. (3) Ku pfumela ka byona ka leswaku ku nga fi ka moya-xiviri wa munhu i xisekelo xa vutomi lebyi yaka emahlweni a ku humi eBibeleni; ku huma eBabilona wa khale. (4) Nhloko-mhaka ya ku chumayela ka Yesu a ku ri Mfumo wa Xikwembu, naswona u rhume vadyondzisiwa vakwe leswaku va vulavula ni van’wana ha wona; kambe namuntlha tikereke a ti tali ku vulavula hi Mfumo wolowo naswona swirho swa tona a swi wu endli ntirho wo chumayela ‘mahungu lawa lamanene ya mfumo.’ (Mt. 24:14) (5) Yesu u vule leswaku valandzeri vakwe va ntiyiso va ta voniwa kahle hi ku rhandzana hi ku tinyiketela. Xana sweswo swi tano evukhongerini bya Vujagana loko matiko ma ya enyimpini? (6) Bibele yi vula leswaku vadyondzisiwa va Kreste a va nga ta va xiphemu xa misava, naswona u tsundzuxa leswaku un’wana ni un’wana loyi a lavaka ku va munghana wa misava u tiendla nala wa Xikwembu; kambe tikereke ta Vujagana ni swirho swa tona swi dzike etimhakeni ta politiki ta matiko. (Yak. 4:4) Hi ku ya hi rhekhodo yo tano, xana ku nga vuriwa hi ku tshembeka leswaku byi namarhela Bibele hakunene?

Xana Timbhoni ta Yehovha ti yi fikelela njhani nhlamuselo ya tona ya Bibele?

Yinhla-nkulu hi leswaku Timbhoni ti pfumela swinene leswaku Bibele i Rito ra Xikwembu ni leswaku leswi yi swi tameleke swi tsaleriwe ku letela hina. (2 Tim. 3:16, 17; Rhom. 15:4; 1 Kor. 10:11) Kutani a ti tirhisi tinhlamuselo ta filosofi leswaku ti balekela marito ya yona ya ntiyiso kumbe leswaku ti tsetselela ndlela ya vutomi ya vanhu lava tshikeke mimpimanyeto ya yona ya mahanyelo.

Loko ti kombisa nhlamuselo ya ririmi ro fanekisela eBibeleni, ti tshika Bibele yi tihlamusela hi yoxe, ematshan’weni yo nyika mianakanyo ya tona enhlamuselweni ya yona. (1 Kor. 2:13) Swikombiso swa nhlamuselo ya marito yo fanekisela hakanyingi swi kumeka eswiphen’wini swin’wana swa Bibele. (Hi xikombiso, vona Nhlavutelo 21:1; kutani, malunghana ni nhlamuselo ya “lwandle,” hlaya Esaya 57:20. Leswaku u twisisa “Xinyimpfana” lexi ku vulavuriwaka ha xona eka Nhlavutelo 14:1, vona Yohane 1:29 na 1 Petro 1:19.)

Malunghana ni ku hetiseka ka vuprofeta, ti tirhisa leswi Yesu a swi vuleke mayelana ni ku xalamukela swiendlakalo leswi fambisanaka ni leswi vhumbhiweke. (Lk. 21:29-31; ringanisa 2 Petro 1:16-19.) Hi vukheta ti kombisa swiendlakalo sweswo ivi ti hlamusela leswi Bibele yi kombisaka leswaku swi vula swona.

Yesu u vule leswaku emisaveni u ta va ni “nandza la tshembekaka, wo tlhariha” (ntlawa wa valandzeri vakwe lava totiweke), ku nga ndlela leyi a a ta phamela ha yona swakudya swa moya eka lava vumbaka ndyangu wa ripfumelo. (Mt. 24:45-47) Timbhoni ta Yehovha ti xiya lunghiselelo rero. Hi laha a swi ri ha kona hi Vakreste va lembe-xidzana ro sungula, ti languta eka huvo leyi fumaka ya ntlawa wolowo wa “nandza” leswaku yi tlhantlha swivutiso swo nonon’hwa—ku nga ri hi ku landza vutlharhi bya munhu, kambe hi ku tirhisa vutivi bya vona bya Rito ra Xikwembu ni ntirhisano wa xona ni malandza ya xona, ni hi mpfuno wa moya wa Xikwembu, lowu va wu khongelelaka hi matimba.—Mint. 15:1-29; 16:4, 5.

Ha yini tidyondzo ta Timbhoni ta Yehovha ti cincile hi ku famba ka malembe?

Bibele yi kombisa leswaku Yehovha u pfuna malandza yakwe leswaku ma twisisa xikongomelo xa yena hi mukhuva lowu yaka emahlweni. (Swiv. 4:18; Yoh. 16:12) Xisweswo, vaprofeta lava huhuteriweke hi Xikwembu leswaku va tsala swiphemu swa Bibele a va nga ti tivi tinhlamuselo ta swin’wana leswi va swi tsaleke. (Dan. 12:8, 9; 1 Pet. 1:10-12) Vaapostola va Yesu Kreste va swi lemukile leswaku a swi tele leswi a va nga swi twisisi enkarhini wa vona. (Mint. 1:6, 7; 1 Kor. 13:9-12) Bibele yi kombisa leswaku a ku ta va ni ku engeteleka lokukulu ka vutivi bya ntiyiso ‘enkarhini wa makumu.’ (Dan. 12:4) Vutivi lebyi engetelekeke hakanyingi byi lava leswaku munhu a cinca mianakanyo yakwe. Timbhoni ta Yehovha ti tiyimisele ku endla ku cinca koloko hi ku titsongahata.

Ha yini Timbhoni ta Yehovha ti chumayela hi yindlu na yindlu?

Yesu u vhumbhe leswaku ntirho lowu wu ta endliwa esikwini ra hina: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” Nakambe u letele valandzeri vakwe a ku: “Yanani eka vamatiko hinkwavo, mi va endla vadyondzisiwa.”—Mt. 24:14; 28:19.

Loko Yesu a rhuma vadyondzisiwa vakwe vo sungula, u va lerise leswaku va ya emitini ya vanhu. (Mt. 10:7, 11-13) Muapostola Pawulo u vule leswi malunghana ni vutirheli byakwe: “A ndzi mi fihlelanga nchumu xa leswi swi fanelaka ku mi pfuna, ndzi ri karhi ndzi mi tivisa Rito ni ku mi dyondzisa erivaleni ni le mindyangwini ya n’wina.” (Xiitaliki i xerhu.)—Mint. 20:20, 21; nakambe vona Mintirho 5:42.

Rungula leri Timbhoni ti ri huwelelaka ri khumba vutomi bya vanhu; ti lava ku tiyiseka leswaku ti va fikelela hinkwavo. (Sof. 2:2, 3) Maendzo ya tona ma susumetiwa hi rirhandzu—ngopfu-ngopfu hi ku rhandza Xikwembu, ni vaakelani.

Nhlangano wa varhangeri va vukhongeri eSpain wu te: “Kumbexana [tikereke] ti swi honisa ngopfu leswi swi hlanganisaka ntirho lowukulu wa Timbhoni—ku endzela makaya, loku fambisanaka ni ndlela ya vaapostola ya kereke ya khale. Hambi leswi tikereke, minkarhi yin’wana, ti hetaka hi ku aka titempele ntsena, ti chaya tinsimbi to vitana vanhu ni ku chumayela endzeni ka tindhawu ta tona ta vugandzeri, [Timbhoni] ti landzela ndlela ya vaapostola ya ku famba hi yindlu na yindlu ni ku tirhisa nkarhi wun’wana ti nyikela vumbhoni.”—El Catolicismo, Bogotá, Colombia, September 14, 1975, tl. 14.

Kambe ha yini Timbhoni ti phikelela ti nghena hambi emakaya ya vanhu lava nga ni ripfumelo ro hambana ni ra tona?

A ti sindzisi rungula ra tona eka van’wana. Kambe ta swi tiva leswaku swi nga ha endleka vanhu va rhurhela kun’wana ni leswaku swiyimo swa vanhu swa cinca. Namuntlha munhu a nga ha va a khomeke ngopfu a nga swi koti ku yingisela; siku rin’wana a nga ha tinyika nkarhi. Xirho xo karhi xa ndyangu xi nga ha va xi nga tsakeli, kambe van’wana va nga ha swi tsakela. Vanhu hi voxe va cinca; swiphiqo leswikulu swa vutomi swi nga ha endla munhu a xalamukela xilaveko xa swa moya.—Nakambe vona Esaya 6:8, 11, 12.

Ha yini Timbhoni ta Yehovha ti xanisiwa ni ku hehliwa?

Yesu u te: “Loko misava yi mi venga, tivani leswaku yi rhangile yi venga mina, yi nga si mi venga. Loko a mi ri va misava, misava a yi ta rhandza swa yona. Kambe leswi mi nga riki va misava, ni leswi ndzi mi hlawuleke eka yona, misava ya mi venga.” (Yoh. 15:18, 19; nakambe vona 1 Petro 4:3, 4.) Bibele yi kombisa leswaku misava hinkwayo yi le hansi ka vulawuri bya Sathana; hi yena muhlohloteri lonkulu wa nxaniso.—1 Yoh. 5:19; Nhlav. 12:17.

Yesu nakambe u byele vadyondzisiwa vakwe a ku: “Mi ta vengiwa hi vanhu hinkwavo hikwalaho ka vito ra mina.” (Mar. 13:13) Rito leri nge “vito” laha ri vula leswi Yesu a nga swona hakunene, Hosi ya Vumesiya. Nxaniso wu vangiwa hi leswi Timbhoni ta Yehovha ti rhangisaka swileriso swa yena eka swa mufumi wihi na wihi wa misava.

Loko Munhu A Ku—

‘Ha yini n’wina mi nga katseki eku endleni ka swilo swo pfuneta ku endla misava (vanhu-kuloni) yi va ndhawu yo antswa yo tshama eka yona?’

U nga ha hlamula u ku: ‘A swi kanakanisi leswaku swiyimo swa vanhu va ka hina i swa nkoka eka wena, naswona ni le ka mina i swa nkoka. Ndzi kombela ku vutisa, Hi xihi xiphiqo lexi u vonaka leswaku ku fanele ku rhanga ku tlhanthliwa xona?’ Kumbexana u nga engetela u ku: ‘Ha yini u anakanya leswaku lexi i xilaveko lexikulu? . . . Swi le rivaleni leswaku goza ra xihatla emhakeni leyi ri nga pfuna, kambe ndza tiyiseka leswaku hi nga tsakela ku vona nhluvuko lowu nga ta tshama wu ri kona. Yoleyo i ndlela leyi hina tanihi Timbhoni ta Yehovha hi yi langutaka ha yona mhaka leyi. (Hlamusela leswi hi swi endlelaka vanhu leswaku va tirhisa misinya ya milawu ya Bibele evuton’wini bya vona leswaku va kuma rimitsu ra mhaka hi voxe; ni leswi Mfumo wa Xikwembu wu nga ta swi endla, ni leswaku ha yini wona wu ta kota ku tlhantlha swiphiqo swa vanhu hi laha ku nga heriki.)’

Kumbe u nga ha ku: ‘(Endzhaku ko hlanganisa tinhla to karhi enhlamulweni leyi hundzeke . . . ) Vanhu van’wana va hoxa xandla eku antswiseni ka ndhawu ya ka vona hi ku humesa mali; van’wana va swi endla hi ku pfuna hi ku tirhandzela. Timbhoni ta Yehovha ti swi endla haswimbirhi. Inge ndzi ku hlamusela.’ Kumbexana u nga engetela u ku: (1) ‘Leswaku a va un’wana wa Timbhoni ta Yehovha, munhu u fanele ku hakela swibalo swa yena hi ku tshembeka; leswi nyikaka hulumendhe mali yo endla mintirho leyi lavekaka.’ (2) ‘Hina hi endla leswi tlulaka sweswo, hi endzela makaya ya vanhu, hi kombela ku dyondza na vona Bibele mahala. Loko va tolovela leswi Bibele yi swi vulaka, va dyondza ku tirhisa misinya ya milawu ya Bibele ivi va kota ku langutana ni swiphiqo swa vona.’

Swin’wana leswi u nga ha swi vulaka: ‘Ndza tsaka leswi u boxeke mhaka leyi. Vanhu vo tala a va si tshama va vutisa leswaku va tiva leswi Timbhoni ti swi endlaka hi timhaka ta ndhawu ya ka vona. Swi le rivaleni leswaku ti tele tindlela to pfuna ha tona.’ Kumbexana u nga engetela u ku: (1) ‘Van’wana va swi endla hi ku simeka vumbiwa—swibedlhele, makaya ya vadyuhari, tindhawu to pfuna lava godzomberiweke hi swidzidzirisi, ni swin’wana. Van’wana va nga ha tinyiketela ku ya emakaya ya vanhu, va pfuna hi laha va swi kotaka ha kona. Sweswo hi leswi Timbhoni ta Yehovha ti swi endlaka.’ (2) ‘Hi xiye leswaku ku na swin’wana leswi swi nga hundzulaka langutelo ra munhu ra vutomi, sweswo i vutivi bya leswi Bibele yi swi kombisaka tanihi xikongomelo xa ntiyiso xa vutomi ni leswi vumundzuku byi swi tameleke.’

Xiringanyeto xin’wana: ‘Ndza tsaka ku ku twa u vutisa xivutiso xexo. Hi nga tsaka loko ho vona swiyimo swi antswa, a swi tano ke? Ndzi kombela ku ku vutisa, Xana u titwa njhani hi leswi Yesu Kreste a swi endleke? Xana u nga vula leswaku ndlela leyi a pfuneke vanhu ha yona a yi ri yinene? . . . Hina hi ringeta ku landza xikombiso xakwe.’

‘Vakreste va fanele ku va timbhoni ta Yesu, hayi ta Yehovha’

U nga ha hlamula u ku: ‘I mhaka leyi tsakisaka leyi u yi boxaka. Naswona u vurisile loko u ku hi ni vutihlamuleri bya ku va timbhoni ta Yesu. Hi yona mhaka leyi xiphemu xa Yesu exikongomelweni xa Xikwembu xi kandziyisiwaka etibukwini ta hina. (U nga ha tirhisa buku leya ha ku humaka kumbe magazini leswaku u kombisa mhaka leyi.) Kambe hi leyi mhaka leyi kumbexana yi nga yintshwa eka wena. (Nhlav. 1:5) . . . Xana Yesu a a ri “mbhoni leyo tshembeka” ya mani? (Yoh. 5:43; 17:6) . . . Yesu u veke xikombiso lexi hi faneleke ku xi tekelela, a swi tano ke? . . . Ha yini swi ri swa nkoka swonghasi ku tiva Yesu ni Tata wakwe? (Yoh. 17:3)’