Ku Vulavula Hi Mapapila

MAPAPILA ma antswise vutomi ni mahanyelo ya vanhu va timiliyoni. Vunyingi bya tibuku ta Matsalwa ya Vukreste ya Xigriki a byi ri mapapila eku sunguleni. Hina namuntlha hi nga tsala mapapila leswaku hi tiyisa lava ha ku vaka vapfumeri, hi vulavurisana ni vanghana, hi khutaza vamakwerhu lava byarheke vutihlamuleri byo hlawuleka, hi tiyisa lava cangayilaka ni ku andlala rungula leri lavekaka emhakeni ya ku khathalela mintirho ya vandlha.—1 Tes. 1:1-7; 5:27; 2 Pet. 3:1, 2.

Ku tsala mapapila nakambe i ndlela leyi humelelaka ya ku nyikela vumbhoni. Etindhawini tin’wana, vanhu vo tala va tshama etifuletini leti ku nga pfumeleriwiki mani na mani ku nghena eka tona kumbe etihotela to tshama eka tona leti swi nga oloviki ku chumayela eka tona. Van’wana a va tali ku kumeka ekaya, kutani a hi koti ku vulavula na vona loko hi nyikela vumbhoni hi yindlu ni yindlu. Van’wana va tshama etindhawini leti nga ekule.

Vuvabyi, maxelo yo biha kumbe ku vekeriwa nkarhi wo va u ri ekaya, minkarhi yin’wana swi nga endla leswaku u nga swi koti ku huma ekaya. Xana u nga swi kota ku tsala papila u nyikela vumbhoni lebyi engetelekeke eka xaka kumbe munhu loyi u tshameke u vulavulanyana na yena? Xana ku ni xichudeni xa wena xa Bibele lexi rhurheke? Loko u xi tsalela papila swi nga endla leswaku xi ya emahlweni xi tsakela timhaka ta moya. Kumbexana u nga avelana rungula leri faneleke ra Matsalwa ni mimpatswa leya ha ku tekanaka, leya ha ku kumaka n’wana kumbe lava ha ku feriwaka hi murhandziwa wa vona.

Ku Nyikela Vumbhoni Hi Papila

Loko u nyikela vumbhoni hi papila eka munhu loyi u nga n’wi tiviki, rhanga hi ku titivisa. U nga hlamusela leswaku u hlanganyela entirhweni lowu endliwaka ematikweni hinkwawo hi ku tirhandzela. Loko u vona swi fanerile, n’wi tivise leswaku u wun’wana wa Timbhoni ta Yehovha. N’wi tivise leswaku ha yini u n’wi tsalela kunene ematshan’weni ya ku n’wi endzela hi xiviri. Tsala onge hi loko u vulavula na yena hi ku kongoma. Nilokoswiritano, hi ku pfumelelana ni xitsundzuxo xa ku va “ni vuxiyaxiya kukota tinyoka [ni ku] kala nandzu kukota matuva,” u fanele u lemuka mpimo wa rungula leri u nga ri paluxaka malunghana na wena n’wini loko u titivisa eka yena.—Mat. 10:16.

Eka papila ra kona, tsala leswi a wu ta swi byela munhu wa kona loko a wu n’wi endzele hi xiviri. U nga tirhisa xingheniso lexi humaka ebukwini leyi nge Ku Hlamulana kumbe u tirhisa xingheniso xa Matsalwa lexi tekiweke enkandziyisweni wa sweswinyana wa Vutirheli Bya Hina Bya Mfumo. U nga vutisa xivutiso, u khutaza munhu wa kona leswaku a anakanya ha xona. Vahuweleri van’wana va hlamusela leswaku hi ni lunghiselelo ra ku hlamula swivutiso swa Bibele mahala, kutani va tshaha swihloko swo hambana-hambana eka yin’wana ya tibuku leti hi ti tirhisaka ku dyondzisa ha tona. Ku ni xikombiso xa papila leri tsariweke hi xikongomelo xa ku nyikela vumbhoni eka tluka 73. Ri nga ku nyika vuthala ntsena, kambe i swinene ku tirhisa rungula hi ku ya hi xiyimo xa munhu. Loko swi nga ri tano, vanhu va nga kuma papila leri fanaka hi ku phindha-phindha.

Vanhu vo tala a va swi rhandzi ku hlaya muhwenga wa papila leri humaka eka munhu loyi va nga n’wi tiviki. Kutani ku nga va vutlhari ku komisa papila ra wena. Gimeta papila ra wena ra ha nandziha eka loyi u n’wi tsaleleke. Swi nga va swinene ku nghenisa ni xirhambo xa ximfumo xa ku n’wi rhambela eminhlanganweni eHolweni ya Mfumo. U nga nghenisa ni xiphephana, broxara kumbe nkandziyiso wa Xihondzo xo Rindza kumbe wa Xalamuka!, u hlamusela leswaku minkandziyiso leyi a nga yi kuma nkarhi na nkarhi loko a swi tsakela. Kumbe u nga vutisa loyi u n’wi tsaleleke papila loko a swi tsakela ku endzeriwa ekaya, leswaku mi ta bula hi leswi engetelekeke malunghana ni mhaka leyi u n’wi tsaleleke yona.

Xitsundzuxo Malunghana Ni Xivumbeko Xa Papila

Sweswi xiya papila leri landzelaka ra xikombiso. Lemuka leswi landzelaka: (1) Ra languteka, a ri pfuva-pfuvananga. (2) Hambiloko mvhilopho ya kona yo lahleka, loyi ku tsaleriweke yena u ta va a ha ri ni vito ni adirese ya poso ya mutsari leyi tsariweke epapileni hi roxe. (3) Xikongomelo xa papila xi vuriwe hi ku olova ni hi ku kongoma eka ndzimana yo sungula. (4) Ndzimana yin’wana ni yin’wana yi ni rungula ra yona. (5) Hi ku landza xikongomelo xa rona, papila leri a ri tsariwanga hi ku ntshunxeka ngopfu naswona a hi ra ximfumo ku tlula mpimo.

Eka papila ra ximfumo, ro tanihi leri matsalana wa vandlha a nga ri tsalelaka hofisi ya rhavi, ku ta tsariwa ni vito ra vandlha ra kona, vito ra matsalana, adirese ya yena ya poso ni siku ra kona. Ku ta tsariwa ni vito ni adirese ya munhu kumbe vandlha leri papila ra kona ri kongomisiwaka eka rona. Endzhaku ka sweswo ku landzela xiloso lexi faneleke. Eka tindzimi tin’wana mahetelelo ya papila yo tanihi “Wa wena” kumbe “Wa n’wina,” ma tsariwa ehenhla ka nsayino. Nsayino hi woxe wu fanele wu endliwa hi voko.

Eka papila rin’wana ni rin’wana, tirhisa mapeletelo lamanene, ririmi leri faneleke ni mahikahatelo ya kona, naswona papila ra kona ri fanele ri languteka. Sweswo swi ta endla leswaku papila ra wena ni rungula ra rona swi xiximeka.

Ehandle ka mvhilopho, minkarhi hinkwayo tsala adirese ya wena—ngopfu-ngopfu ya poso. Loko u vona onge ku tsala adirese ya wena swi nga pfuxa swin’wana loko u nyikela vumbhoni hi papila eka vanhu lava u nga va tiviki, kombela vakulu loko swi nga koteka leswaku u tirhisa adirese ya Holo ya Mfumo ya ka n’wina. Adirese ya Sosayiti ya Watch Tower a yi fanelanga yi tirhisiwa emhakeni leyi, hikuva sweswo swi nga komba leswaku papila ra wena ri huma etihofisini ta Sosayiti naswona swi nga vanga hasahasa. Loko wo nghenisa buku yo karhi kambe u nga tsalanga adirese ya wena, ni sweswo swi nga endla leswaku loyi a kumaka papila ra wena a anakanya leswaku ri huma eka Sosayiti.

Tiyiseka leswaku u tirhisa xitempe xa ntsengo lowu faneleke, ngopfu-ngopfu loko u nghenise ni nkandziyiso wo karhi. Loko ntsengo wa xitempe wu nga ringananga, loyi ku tsaleriweke yena a nga ha hakerisiwa mali leyi kayivelaka, kutani sweswo swi nga hundzula rungula ra wena ri va ra hava. Tsundzuka leswaku ematikweni yo tala, loko ku nghenisiwe broxara kumbe magazini, mali ya ku swi posa yi tlula ya ku posa papila ntsena.

Mhaka Leyi Hlayekaka

Loko u gimete papila ra wena, tlhela u ri hlaya ku vona loko ri tamele rungula leri faneleke. Xana ri twala njhani? Xana ri tsariwe hi xinghana ni hi vuxiyaxiya? Rirhandzu ni tintswalo hi tin’wana ta timfanelo leti hi lwelaka ku ti kombisa eka ndlela leyi hi tirhisanaka ha yona ni van’wana. (Gal. 5:22, 23) Loko u vona onge ku ni leswi nga fanelangiki kumbe leswi hundzeletiweke, tirhisa mavekelo man’wana.

Papila ri nga fika laha wena u nga tsandzekaka ku fika kona. Sweswo swi endla leswaku ri va nchumu wa nkoka evutirhelini bya hina. Leswi papila ra wena ri hlamuselaka wena n’wini ni leswi u pfumelaka eka swona, kambisisa leswi ri swi vulaka, ndlela leyi ri langutekaka ni ku twala ha yona. Ri nga pfuna munhu leswaku a nghena endleleni leyi yisaka evuton’wini, ri n’wi tiyisa kumbe ku n’wi khutaza.