Chumayelani Eka “Vanhu Va Mixaka Hinkwayo”
1. Vavuri va evhangeli lava humelelaka va fana hi ndlela yihi ni mutshila la nga ni ntokoto?
1 Mutshila la nga ni ntokoto u ni switirho swo tala naswona wa wu tiva nkarhi lowu ha xin’we xa swona a nga xi tirhisaka ha wona nileswaku a nga xi tirhisa njhani. Hilaha ku fanaka, hi ni switirho swo hambana-hambana leswi nga hi pfunaka leswaku hi hetisisa ntirho wa hina tanihi vavuri va evhangeli. Hi xikombiso, ku humesiwe tibroxara leti nga ni tinhloko-mhaka to hambana-hambana leswaku ti hi pfuna ku chumayela eka “vanhu va mixaka hinkwayo.” (1 Kor. 9:22) Xiengetelo xi xaxamete tin’wana ta tibroxara leti, xi hlamusela vanhu lava ti tsaleriweke vona ni ku ringanyeta ndlela leyi ti nga ha fambisiwaka ha yona.
2. Xana hi nga ti fambisa rini tibroxara ensin’wini?
2 Nkarhi Lowu Ti Nga Fambisiwaka Ha Wona: Mutshila u ta tirhisa xitirho hi nkarhi wun’wana ni wun’wana lowu faneleke. Hilaha ku fanaka, hi nga fambisa broxara nkarhi wun’wana ni wun’wana loko hi vona onge munhu u ta vuyeriwa, ku nga ri ntsena hi tin’hweti leti yi fambisiwaka ha tona. Hi xikombiso, loko ku fambisiwa buku leyi nge Leswi Bibele Yi Swi Dyondzisaka naswona hi chumayela n’wini wa muti loyi a nga riki Mukreste loyi a nga yi tsakeriki Bibele, swi nga va swinene ku n’wi fambisela broxara leyi faneleke kutani endzhaku ka loko hi hlakulele ku tsakela eka munhu yoloye hi nga ha tlhela hi n’wi fambisela buku leyi nge Leswi Bibele Yi Swi Dyondzisaka.
3. Ha yini hi fanele hi va ni vuswikoti loko hi tirhisa switirho swa hina swo chumayela?
3 Bibele yi bumabumela lava nga ni vutshila entirhweni wa vona. (Swiv. 22:29) Hakunene, ku hava ntirho lowu nga wa nkoka swinene namuntlha ku tlula “[ntirho] wo kwetsima wa mahungu lamanene.” (Rhom. 15:16) Leswaku hi va “[vatirhi lava] nga riki na nchumu wo khomiwa hi tingana ha wona,” hi ta tikarhatela ku va ni vuswikoti loko hi tirhisa switirho swa hina.—2 Tim. 2:15.