Tibroxara —I Switirho Swa Nkoka eVutirhelini
1 Hakanyingi mutshila la nga ni ntokoto u rhwala switirho swo hambana-hambana, xin’wana ni xin’wana xi endleriwe ntirho wa xona. Tanihi vahuweleri va Mfumo, hi ni tibroxara to tala to hambana-hambana leti hi pfunaka ku hlangavetana hi vutshila ni swilaveko swa moya swa vanhu lava hi va chumayelaka. (Swiv. 22:29) Eka yindlu yin’wana u nga ha kuma munhu loyi a nga ni gome. Eka yin’wana u nga kuma leswaku n’wini wa muti u lava hulumendhe leyi tshembekaka, loko un’wana a tivutisa loko vutomi byi ri ni xikongomelo hakunene. Xana hi nga ti tirhisisa ku yini tibroxara ta hina ku pfuna vanhu lava?
2 Loko u fambisa broxara leyi nge “Xana Xikwembu Xa Hi Khathalela Hakunene?,” u nga ha vula swin’wana swo fana na leswi:
◼ “Vanhu van’wana lava xiyaka ku xaniseka ni vuhomboloki emisaveni va tala ku sola Xikwembu. Va vula leswaku tanihi leswi Xikwembu xi nga ni matimba hinkwawo, a xi ta herisa ku xaniseka ka hina loko a xi hi khathalela hakunene. U titwisa ku yini hi mhaka leyi? [Yimela nhlamulo.] Pisalema 72:12-14 yi kombisa leswaku Xikwembu xa hi khathalela hakunene. Ku xaniseka ni vuhomboloki a hi nandzu wa xona. Xi tshembise leswaku lava endlaka swo biha va ta susiwa ku nga ri khale. Broxara leyi, Xana Xikwembu Xa Hi Khathalela Hakunene?, yi kombisa leswi xi nga ta swi endla, ni ndlela leyi hi nga vuyeriwaka ha yona.” U nga ha ya emahlweni na bulo hi ku tirhisa tinhlamuselo leti nga eka tluka 27, ndzimana 22.
3 Loko u tirhisa broxara leyi nge “Xikongomelo Xa Vutomi,” u nga ha lava ku sungula hi ndlela leyi:
◼ “Vanhu vo tala swinene va hetelela hi ku tivutisa hi xikongomelo xa vutomi. Xana i ku hanya malembe ya 70 kumbe 80 kutani hi fa? Kumbe, ku hanya swi vula leswi tlulaka sweswo ke? Wena u anakanya yini xana? [Yimela nhlamulo.] Laha eka Pisalema 37:29, hi kuma xikongomelo lexinene xa Xikwembu hi munhu ni misava.” Endzhaku ko hlaya tsalwa, pfula xifaniso lexi nga eka tluka 31, kutani u ya emahlweni u hlamusela leswi ku hanya eParadeyisini swi nga ta va xiswona.
4 Broxara leyi nge “Vonani” yi nga ha nyikeriwa hi ku kombisa xifaniso hinkwaxo xa xifunengeto ivi u vutisa:
◼ “I yini leswi u ehleketaka leswaku swi ta laveka ku endla misava yi languteka hi ndlela leyi? [Yimela nhlamuselo.] Un’wana ni un’wana laha xifanisweni lexi u ni kaya ni ntirho lowu tsakisaka. Ku ni ku rhula ni swakudya swo tala, naswona misava a yi thyakisiwanga. Hambi ti wa ti pfuka, tihulumendhe ta vanhu ti kuma swi nga koteki ku tisa misava yo tano. Hambi swi ri tano, Bibele yi hi tiyisekisa leswaku Xikwembu xi ta ‘endla swilo hinkwaswo swi va leswintshwa.’ [Pfula tluka 30, kutani u hlaya Nhlavutelo 21:3, 4.] Broxara leyi yi nga ku pfuna ku dyondza leswi u faneleke ku endla swona leswaku u ta hanya emisaveni yoleyo leyintshwa.” Loko a komba ku tsakela loku ringaneke, yana eka tluka 3, kutani u kombisa ndlela leyi hi fambisaka dyondzo ya Bibele ha yona.
5 U nga ha tirhisa ndlela leyi loko u fambisa broxara leyi nge “Vutomi eMisaveni”:
◼ “Vanhu vo tala va anakanya leswaku va ta boheka ku ya etilweni leswaku va ta tiphina hi vutomi lebyi nga heriki, kambe u ehleketa yini hi ku hanya hi laha ku nga heriki emisaveni? [Yimela nhlamulo.] Bibele yi hi tiyisekisa leswaku vutomi lebyi nga heriki bya kumeka, naswona yi hi hlamusela ndlela yo fikelela ha yona pakani yoleyo.” Hlaya Yohane 17:3. Kutani komba n’wini wa muti xifaniso xa 49 ivi u vutisa: “Xana a wu swi tsakeli ku hanya emisaveni yo fana na leyi?” Fambisa broxara, kutani u lunghiselela riendzo ro vuyela.
6 Tibroxara ti ni tinhloko-mhaka leti nga enkarhini, ti hlamula swivutiso swa vanhu, naswona ta chavelela. Loko hi tirhisa switirho leswi hi vutshila, hi nga pfuna vanhu lavo tshembeka leswaku “va fika laha va kotaka ku tiva leswi swi nga ntiyiso.”—1 Tim. 2:4.