Ku Tirhisa Tibroxara Hi Laha Ku Humelelaka Hi July
1 Hi rirhandzu, nhlengeletano yi endle tibuku to hambana-hambana leswaku ku hatlisisiwa ntirho wo endla vadyondzisiwa. Tin’wana ta tona i tibroxara leti hlamuselaka tinhloko-mhaka to karhi, tanihi xikongomelo xa Xikwembu hi misava, Vunharhu-un’we, vito ra Xikwembu, hulumendhe ya Mfumo ni ku pfumelela ka Xikwembu vubihi. Xana hi nga ti tirhisisisa ku yini tibroxara hi laha ku humelelaka ku pfuna vanhu ensin’wini ya hina?
2 Broxara leyi nge Xana Xikwembu Xa Hi Khathalela Hakunene? yi hlamusela kahle leswaku misava leyintshwa leyi pfumalaka ku xaniseka yi tshinele. Xana hi nga yi vulavulela njhani? Swiringanyeto swi nga kumiwa ebukwini leyi nge Reasoning ehansi ka xihloko lexikulu lexi nge “Suffering,” ku sukela eka tluka 393, kumbe u nga ha hlawula xingheniso lexi nga eka tlula 12 ehansi ka xihloko lexi nge “Injustice/Suffering.”
3 U nga ha ku:
◼ “Xana u tshama u tivutisa: ‘Xana Xikwembu xa swi vona leswaku vanhu va endliwa nsele ni ku xanisiwa?’” Yimela nhlamulo. Hlaya Pisalema 72:12-14. Kutani u pfula eka tluka 22 ra broxara leyi nge Xana Xikwembu Xa Hi Khathalela Hakunene? ivi u bula hi swihloko leswikulu eka xiyenge 10, swin’we ni nhlamuselo ya xifaniso lexi nga eka tluka 23. Loko broxara yi nga tekiwi, ha yini u nga fambisi xiphephana, tanihi lexi nge Nchavelelo Eka Lava Nga Ni Gome kumbe Vutomi eMisaveni Leyintshwa Ya Ku Rhula?
4 Hulumendhe leyinene i mhaka leyikulu namuntlha. Vo tala va tivutisa loko vulawuri bya munhu byi ta swi kota ku hlanganisa misava. Rungula leri pfunaka ri kumeka ehansi ka “Government,” ku sukela eka tluka 152 ra buku leyi nge Reasoning.
5 U nga ha vutisa:
◼ “Xana swi nga koteka leswaku vanhu va endla hulumendhe leyi nga ta tisa ntsako lowu nga heriki?” Yimela nhlamulo ivi u vutisa: “Xana rhekhodo ya matimu ya vanhu yi komba yini?” Pfula eka Yeremiya 10:23, kumbe u pfula eka tluka 152 ra buku leyi nge Reasoning ivi u hlaya tindzimana ni tinhlamuselo leti faneleke. Endzhaku ka sweswo, u pfula eka matluka 24 na 25 eka broxara leyi nge Hulumendhe ivi u kamba swifaniso ni matsalwa. Hlamusela ndlela leyi hulumendhe ya Xikwembu yi nga ta hlanganisa vanhu ha yona emisaveni hinkwayo. Loko n’wini wa muti a nga yi amukeli broxara, u nga ha fambisa xiphephana lexi nge Xana Misava Leyi Yi Ta Pona?
6 Loko vugevenga byi chaviwa ngopfu endhawini ya ka n’wina, xingheniso lexi landzelaka xi nga ha pfuxa ku tsakela.
7 U nga ha ku:
◼ “Vanhu vo tala va tivutisa, ‘Loko Xikwembu xi ri rirhandzu, ha yini xi pfumelela vubihi?’ Xana na wena u tshama u tivutisa hi leswi?” Yimela nhlamulo, ivi u ku: “Xiya leswaku Swivuriso 19:3 ya laya emhakeni yo sola Xikwembu hikwalaho ka swilo swo biha leswi endliwaka hi vanhu.” Endzhaku ko hlaya ndzimana, kombetela eka tluka 15 ra broxara leyi nge “Vonani, Ndzi Endla Swilo Hinkwaswo Swi Va Leswintshwa”! kutani u hlaya ndzimana 27. Leswi swi nga yisa eka bulo ra tindzimana leti landzelaka.
8 Ku tirhisa tibroxara ku dyondzisa vanhu lava fanaka ni tinyimpfu malunghana ni mahungu lamanene i nchumu lowu hinkwerhu hi nga wu endlaka. Hi nga pfuna vanhu va tinxaka hinkwato leswaku va hlanganyela ni nhlengeletano ya Xikwembu. I lunghelo ra hina ku hlanganyela entirhweni wo chumayela hi ku tirhisa tibroxara ta hina leti nga enkarhini hi laha ku humelelaka.