Ku Vuyela U Ya Pfuxa Ku Tsakela eBibeleni
1 Nkarhi wun’wana hi hlangana ni vanhu ensin’wini lava tsakelakanyana mahungu lamanene kambe hi kuma leswaku va khomekile a va swi koti ku vulavula na hina hi nkarhi lowu hi endzaka ha wona. Xana ha ringeta ku tlhela hi vuya hi nkarhi wun’wana hi ta avelana na vona rungula ra Mfumo? Kumbexana hi ve ni bulo ro nandziha ni n’wini wa muti, kambe a nga yi teki buku. Xana ha tlhelela hi ya vulavurisana na yena hi ntiyiso?
2 I swa nkoka ku hlanganisa nsimu ya hina hi vukheta ni ku landzelela ku tsakela hinkwako loku hi ku kumaka. Xana hi endla maendzo yo vuyela eka lava amukelaka buku kumbe timagazini ntsena? Loko swi ri tano, hi ta va hi honisa vanhu lava tsakelaka. Entiyisweni a hi nge vuli leswaku munhu a nga lulameriwanga hi xikhutazo xa moya lexi engetelekeke hi mhaka ya leswi a nga yi tekangiki buku. (Ringanisa Varhoma 14:4.) Kumbexana endzhaku ka riendzo ra hina, n’wini wa muti a nga ha ehleketa hi leswi hi swi vuleke kumbe a nga ha tsakela matshalatshala lawa hi ma endleke yo n’wi endzela. A nga ha va ni ku tsakela swinenenyana loko hi vuya.
3 Loko u vuyela eka munhu loyi a a khomekile, u nga ha ku:
◼ “Ndzi tsakela ku tlhela ndzi ku vona. Nkarhi lowu hundzeke loko ndzi ri laha, a hi vulavulanga hikuva a wu nga ri na nkarhi. Ndza swi vona leswaku u munhu la khomekeke, ndzi ta komisa. Swi le rivaleni leswaku wa khumbeka hi rihanyo ra wena ni ra van’wana lava u va rhandzaka. Kutani, xana a wu swi tiva leswaku Xikwembu xi tshembise leswaku xi ta herisa vuvabyi hinkwabyo? Xana sweswo a swi nga ta tsakisa? [Yimela nhlamulo.] Vona yinhla leyi nga eka ndzimana 4 ya broxara leyi nge ‘Vonani, Ndzi Endla Swilo Hinkwaswo Swi Va Leswintshwa’!” Loko nkarhi wu pfumela, hlaya ndzimana ivi u kambisisa rin’wana ra matsalwa lama nga le hansi eka tluka 4 lama hlamuselaka swiyimo swa misava leyintshwa. Loko n’wini wa muti a swi amukela, u nga ha kota ku sungula dyondzo ya le kaya ya Bibele.
4 Loko u tlhela u endzela munhu loyi a nga teka xiphephana, u nga vula swo fana ni leswi:
◼ “Enkarhini lowu hundzeke loko ndzi ku vona, u teke xiphephana lexi nge I Mani Loyi Kahle-kahle A Fumaka Misava? Xana swa ku nonon’hwela ku pfumela leswaku Sathana u fuma misava leyi? [Yimela nhlamulo.] Languta ndzimana yo sungula eka tluka 6.” Hlaya ndzimana ivi u vutisa: “Ha yini Sathana a lava ku hi kanganyisa?” Endzhaku ka nhlamulo ya n’wini wa muti, kambisisani swin’we ndzimana ya vumune eka tluka 3. U nga ha ya emahlweni u hlanganisa xiphephana hinkwaxo kumbe u nga ha humesa broxara leyi nge Xana Xikwembu Xa Hi Khathalela Hakunene? ivi u languta ndzimana 8 eka tluka 13.
5 Ku ni xivangelo lexinene xo tiya nhlana ni ku landzelerisisa ku tsakela loku hi ku kumaka entirhweni wo chumayela hambi loko ku ri kutsongo. I swa nkoka ku khathalela van’wana, ku susumeteleka ku va pfuna va dyondza ntiyiso. Nhlengeletano ya Yehovha yi humesa tibuku ni marungula lawa ma nga hi pfunaka ku endla van’wana va vona xilaveko xa vona xa moya.—Mt. 5:3.
6 Loko u ve ni bulo ro nandziha ni un’wana loyi kumbexana a tsakelakanyana, u nga tshiki ku vuyela u ya hlakulela ku tsakela. Swi nga ha ku endla u sungula dyondzo ya le kaya ya Bibele ni ku nghenisa un’wana endleleni leyi yisaka evuton’wini. Hi mi khutaza hinkwenu leswaku mi hambeta mi hlanganyela entirhweni lowu wu ponisaka vutomi.—1 Tim. 4:16.