Swilaveko Swa Vatirheli Lavantshwa Ni Lava Tiyeke
1 Mupisalema Davhida u vutisile: “Oho Yehova! ṅeni wa wena o ta v̌a mani e nṭongeni wa wena? O ta v̌a mani l’a nga ta aka e nṭhav̌eni ya wena le’yo kwetsima šana?” Hi marito ma nga ri mangani lama hlawuriweke kahle, Davhida u hlamurile: “Hi l’a hanyaka e ku lulameni, a endla le’ŝi lulameke, kutani a v̌ula le’ŝi tiyeke.” (Ps. 15:1, 2) Swilaveko sweswo a swi hundzukanga. Hinkwavo lava taka ku ta gandzela evandlheni ra Vukreste namuntlha va fanele ku cukumeta swiendlo leswi thyakeke ni vudakwa. Exikarhi ka vanhu va Yehovha a yi kona ndhawu ya vanhu va timholovo, va vukarhi kumbe vakanganyisi. Ku nga khathariseki leswaku hi vatirheli lavantshwa kumbe lava tiyeke, hi fanele ku tshembeka eku hlayiseni ka mimpimanyeto leyi tlakukeke leyi tsariweke eRitweni ra Xikwembu.—Gal. 5:19-21.
2 Va tele lavantshwa lava hlanganyelaka ni nhlengeletano ya Yehovha. Lavatsongo ni lavakulu va hundzule mianakanyo ya vona leswaku ndlela ya vona yi fambisana ni swilaveko swa Xikwembu. Mufana un’wana wa le Amerika Dzonga u kule handle ka ndzetelo wa vatswari naswona u tivangele swiphiqo leswikulu. Loko a ri ni malembe ya 18, a a tinyiketele eka swidzidzirisi naswona a a tshame nkarhi wo leha ekhotsweni hi mhaka yo yiva leswaku a yisa mukhuva wakwe emahlweni. Hikwalaho ka dyondzo ya Bibele, u tseme vunghana ni vanghana vakwe va khale, a kuma vanghana lavantshwa exikarhi ka Timbhoni ta Yehovha, kutani eku heteleleni u nyiketele vutomi byakwe eka Xikwembu.
3 Hi ku fanana, hi fanele hi tiyimisela ku tsakisa Xikwembu hi mahanyelo ya hina hinkwawo, ‘eku lulameni ni ku tshembeka ka ntiyiso.’ (Ef. 4:24) Hi fanele ku “[hluvula] munhu wa khale ni mitiro ya yena” ivi hi ‘ambala vumunhu lebyintshwa, lebyi endliwaka byintshwa hi vutivi lebyi kongomeke’ leswaku hi kota ku tshama enhlengeletanweni ya Xikwembu leyi kotisaka ntshava.—Kol. 3:9, 10.
4 Rito Ra Xikwembu, I Nkucetelo Wa Matimba: Vumunhu bya Yehovha hi laha hi paluxeriweke byona eBibeleni byi nga yi khumba swinene miehleketo ya hina ni swiendlo swa hina hi ndlela leyinene. (Rhom. 12:2) Rito ra yena ri ni ntamu wa ku hundzula mianakanyo ni ku kambisisa timbilu. (Hev. 4:12) Matsalwa lama huhuteriweke ma hi dyondzisa leswaku ku rhandza ka Yehovha ku lava leswaku hi hanya vutomi lebyi lulameke, hi hlanganyela hi xitalo evutirhelini bya le rivaleni naswona hi nga yi languteli ehansi minhlangano ya Vukreste.
5 Eminkarhini leyi yo nonon’hwa, mintshikilelo leyi kulaka yi nga kucetela Mukreste leswaku a tlula milawu ya Xikwembu. Loko ku honisiwa dyondzo ya munhu hi yexe, dyondzo ya ndyangu, minhlangano ya vandlha kumbe ntirho wa nsimu, hambi ku ri Mukreste loyi a a tiyile a nga hambuka eripfumelweni, kumbexana a wela eka mahanyelo yo biha. Hi yona mhaka leyi Pawulo a nga tsalela Timotiya a ku: “Hambeta u tilangutisisa wena ni ku dyondzisa ka wena” nakambe “U hambeta u anakanya hi leswi ndzi swi vulaka.”—1 Tim. 4:16, NW; 2 Tim. 2:7, NW.
6 Ku nga khathariseki leswaku ha ha ku hlanganyela kumbe hi tiyile hi malembe yo tala ya ntokoto, hi fanele hi swi vona kahle swilaveko swa Xikwembu, hi ringanisela hi ku helela evutirhelini, naswona hi hlayisa ntshembo lowu tiyeke leswaku vutomi bya hina byi ta hlayiseka. (1 Pet. 1:13-16) Ku landzela swilaveko swa Xikwembu siku na siku i swa nkoka ngopfu.
7 Tiendlele pakani yo ya entirhweni wa nsimu eka n’hweti leyi yo hetelela ya lembe ra ntirho ra 1993. Tiyimisele ku pfuna van’wana va kula eripfumelweni ni ku humelela swinene evutirhelini bya nsimu. (Rhom. 1:12) Nkarhi hinkwawo anakanya hi swilo leswi lulameke hi ku hamba u va ni dyondzo ya munhu hi xiyexe, dyondzo ya ndyangu ni ku va kona eminhlanganweni. (Flp. 4:8) Matshalatshala ya wena ya ku tsakisa Xikwembu hi ku hanya hi ku landza swilaveko swa xona a ma nge weli hansi.—Kol. 3:23, 24.