Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • yb11 matl. 39-72
  • Ku Chumayela Ni Ku Dyondzisa eMisaveni Hinkwayo

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ku Chumayela Ni Ku Dyondzisa eMisaveni Hinkwayo
  • Buku Ya Lembe Ya Timbhoni Ta Yehovha Ya 2011
Buku Ya Lembe Ya Timbhoni Ta Yehovha Ya 2011
yb11 matl. 39-72

Ku Chumayela Ni Ku Dyondzisa eMisaveni Hinkwayo

MARITO ya Yesu ma nga ha va ma twale ma hlamarisa eka vadyondzisiwa va yena va lembe-xidzana ro sungula. U profete leswaku a va ta vengiwa hi matiko hinkwawo—a va ta dlayiwa ni ku xanisiwa. Ku tlula kwalaho, vo tala a va ta khunguvanyeka ni ku xengiwa. Kambe Yesu u vule leswaku mahungu lamanene a ma ta chumayeriwa emisaveni hinkwayo. (Mat. 24:9-14) Xana ntirho wo chumayela a wu ta famba kahle hi ndlela yihi hambiloko vanhu lava wu endlaka emisaveni hinkwayo va kanetiwa? Eka matluka lama landzelaka, u ta kuma nhlamulo ya xivutiso lexi, lexi tlhontlhaka mianakanyo.

Mintsengo Hinkwayo Ya 2010

Marhavi Ya Timbhoni Ta Yehovha: 116

Nhlayo Ya Matiko Lama Vikeke: 236

Ntsengo Wa Mavandlha: 107 210

Lava Veke Kona eXitsundzuxweni

eMisaveni Hinkwayo: 18 706 895

Lava Dyeke eXitsundzuxweni eMisaveni Hinkwayo: 11 202

Nhlayo Ya Vahuweleri Va Ntirho

Wa Mfumo: 7 508 050

Avhareji Ya N’hweti Ni N’hweti

Ya Vahuweleri Lava Chumayelaka: 7 224 930

Ku Andza Ka Tiphesente Loko

Ku Ringanisiwa Na 2009: 2,5

Ntsengo Wa Lava Khuvuriweke: 294 368

Avhareji Ya N’hweti Ni N’hweti

Ya Maphayona Yo Pfuna: 287 960

Avhareji Ya N’hweti Ni N’hweti

Ya Maphayona Ya Nkarhi Hinkwawo: 844 901

Ntsengo Wa Tiawara Leti Tirhiweke

eNsin’wini: 1 604 764 248

Avhareji Ya N’hweti Ni N’hweti

Ya Tidyondzo Ta Le Kaya Ta Bibele: 8 058 359

Hi lembe ra ntirho ra 2010, Timbhoni ta Yehovha ti tirhise mali yo tlula R1 biliyoni ku khathalela maphayona yo hlawuleka, varhumiwa ni valanguteri va miganga ni va swifundzha eswiavelweni swa vona swa ntirho wa nsimu.

◼ Emisaveni hinkwayo ku ni vatirhi va 20 062 lava tinyiketeleke, lava tirhaka emarhavini yo hambana-hambana. Hinkwavo i swirho leswi nga ehansi ka Xiboho xa Malandza yo Hlawuleka ya Nkarhi Hinkwawo ya Timbhoni ta Yehovha eMisaveni Hinkwayo.

AFRICA

MATIKO 57

VAAKA-TIKO 888 219 101

VAHUWELERI 1 222 352

TIDYONDZO TA BIBELE 2 596 614

NTLAWA WA VANHU WU LAVA NTIYISO. Eximutanini xin’wana xa le Madagascar, vanhu va 80 va hlawule ku tshika Kereke Ya Tiko Ya Protestente. Va tiakele kereke ivi va sungula ku tilavela vukhongeri bya ntiyiso, va endla ndzavisiso eka kereke yin’wana ni yin’wana leyi nga kona kwalaho. Va gimete hi ku vula leswaku Makhatoliki a ma yi dyondzi Bibele nileswaku exikarhi ka Kereke ya Lutere ku ni timholovo. Vanhu lava va tlhele va vona leswaku kereke ya Pentecostal a yi nga dyondzisi ntiyiso nileswaku Kereke ya Savata a yi ri ni swiyilayila swo tala swinene. Kutani va ye eka makwerhu un’wana wa xinuna kutani va kombela leswaku a va dyondzisa Bibele. Makwerhu loyi u nambe a pfumela.

Vahuweleri va nga ri vangani va pfumerile ku endzela vanhu lava, lava tsakelaka. Vamakwerhu va hlangane ni vanhu va 26 lava a va hlengeletane ekerekeni leyi a va tiakele yona naswona a va tiyimiserile ku yingisela rungula ra Bibele. Vamakwerhu va tirhise ndzima 15 ya buku leyi nge, Leswi Bibele Yi Swi Dyondzisaka leswaku va hlamusela ndlela yo kuma vukhongeri lebyi amukelekaka eka Xikwembu. Vanhu volavo a va enerisekile hi leswi va swi tweke. Loko vamakwerhu va tlhelela a ku ri ni vanhu va 73. Naswona eka riendzo ra vunharhu, a ku ri ni vanhu va 142!

SMS LEYI RHUMERIWEKE EKA MUNHU LA HOXEKE. Mbhoni leyi vuriwaka Menen leyi tshamaka aEtiyopiya yi rhumele xichudeni xa yona xa Bibele ndzimana ya lembe ya 2009 eka selfoni leswaku yi xi khutaza. Hambiswiritano, yi tsale tinomboro leti hoxeke naswona rungula rero ri ye eka selfoni yin’wana. Wansati loyi a kumeke rungula leri a a tshamela ku ri hlaya naswona a ri ku: “‘Chumayela mahungu lamanene hi rixaladza.’—Mintirho 20:24, NW.” Tanihi leswi wansati loyi a a chava Xikwembu, u pfumelelane ni rungula rero kambe a a nga swi tivi leswaku a nga ri tirhisa njhani. Nakambe u hlamarisiwe hi maletere lawa a a nga ma twisisi lawa a ma ri emakumu lama nge “NW” (New World Translation [ku nga Bibele ya Xinghezi ya Vuhundzuluxeri Bya Misava Leyintshwa]). Ku hundze mavhiki a ri karhi a anakanya hi leswi vuriwaka hi tsalwa leri. Eku heteleleni, u fonele munhu loyi a nga n’wi rhumelela rungula rolero. Makwerhu wa hina wa xisati u hlamarile loko a twa leswi nga endleka hi rungula ra yena kambe u tirhise nkarhi wolowo leswaku a hlamula swivutiso leswi humaka embilwini swa wansati yoloye. Leswi swi endle leswaku a fambiseriwa dyondzo ya Bibele, leyi fambisiwaka kambirhi hi vhiki.

MAPHAYONA LAMANTSHWA LAMA TIRHISANAKA. Persis, loyi a tshamaka eCameroon, u ve muhuweleri la nga khuvuriwangiki loko a ri ni malembe ya tsevu. Xiviko xa yena xo sungula xa nsimu xi kombise leswaku u ni tidyondzo ta khume ta le kaya ta Bibele. Matsalana wa vandlha a a ehleketa leswaku lexi i xihoxo. Loko Persis a vutisiwa u hlamusele leswaku hakunene u dyondza Bibele ni swichudeni swa khume. Matsalana u tlhele a vutisa a ku: “U swi tivisa ku yini leswaku u fanele u vika nkarhi wo tanihi kwihi hikuva a wu na yona wachi leyi ku kombaka nkarhi?” U vule leswaku wa swi tiva leswaku nkarhi wo wisa exikolweni a wu ri awara. A a sungula ku chumayela loko nkarhi wolowo wu sungula kutani a gimeta loko va tlhelela etlilasini. Ku chumayela ka yena hi xivindzi ku khumbe mana wa yena ni n’wana wa nhwanyana wa makwavo wa mana wa yena, lava hi ku famba ka nkarhi va veke vahuweleri lava nga khuvuriwangiki. Sweswi Persis u ni malembe ya khume, u khuvuriwile naswona i phayona ra nkarhinyana hambileswi a ha nghenaka xikolo. Aasy munghana wa yena la nga ni malembe ya nhungu se i muhuweleri la nga khuvuriwangiki. Xichudeni xin’wana xa Bibele loko xi vulavula ha vona xi te: “A ndzi tsakile eminhlanganweni loko ndzi vona vana va pfuxela vanhu hinkwavo, ngopfu-ngopfu vanhu lava dyuhaleke, loko va nga si ya tshama ni vatswari va vona. Leswi a ndzi nga si swi vona ekerekeni leyi ndzi nghenaka yona. Ndza swi tiva leswaku vana lava kulaka hi ndlela leyi va ta va vanhu vo antswa enkarhini lowu taka.”

MATIKO YA AMERIKA

MATIKO 55

VAAKA-TIKO 918 834 998

VAHUWELERI 3 673 750

TIDYONDZO TA BIBELE 3 967 184

A NGA GONGONDZANGA. Miriam, loyi a tshamaka eBolivia, u khongele eka Xikwembu ku ringana vhiki hinkwaro. Xikhongelo xa yena a xi ku: “Ndzi kombela leswaku u ndzi pfuna ndzi ku tiva kambe a ndzi swi lavi ku pfuniwa hi Timbhoni ta Yehovha. A ndzi swi lavi leswaku ti ta gongondza enyangweni wa mina.”

Loko vhiki rero se ri ta hela, ku rile riqingho ra yena. A ku ri Candy, loyi a nga phayona ro hlawuleka, loyi a a lava ku tisela Miriam timagazini ta hina ku nga si hela awara. Miriam u pfumerile. Ku nga si hela ni awara Candy se a a fikile enyangweni wa yena. Miriam u hatle a pfula nyangwa ivi a byela Candy leswaku a nghena a tshama ehansi. Miriam u sungule ku ya ehansi ni le henhla a ri karhi a hlakahla nhloko ya yena naswona a swi ri erivaleni leswaku u hlundzukile. Candy u n’wi vutisile leswaku se a ku onhake yini. Miriam u te: “Ndzi tsemeke nhlana. Ku ringana nkarhi lowu tlulaka vhiki a ndzi ri karhi ndzi khongela Xikwembu leswaku xi ndzi kongomisa, kambe ndzi swi veke erivaleni eswikhongelweni swa mina leswaku a ndzi swi lavi ku pfuniwa hi Timbhoni ta Yehovha leti minkarhi hinkwayo a ti gongondza enyangweni wa mina! Kutani wena ematshan’weni yo gongondza, u ndzi bele riqingho! Hi mpfhuka u be riqingho eka awara leyi nga hundza, a ndzi ri karhi ndzi khongela Xikwembu leswaku u nga ti u ta ndzi endzela. Hi leswi u fikile! Ndzi tsemeke nhlana! Swi le rivaleni leswaku xi lava leswaku n’wina Timbhoni ta Yehovha mi ndzi pfuna.” Va nambe va sungula ku dyondza swin’we.

VA N’WI SIYE VA ANAKANYA LESWAKU U FILE. Pasensi u tshame a va ndhuna ya ximutana leyi a yi dumile kumbe kapiten eSuriname naswona a a tolovelane swinene ni granman, ku nga hosi ya le ndhawini hinkwayo leyi nga le kusuhi ni nambu ni le ndzeni ka tiko. Pasensi a a lwela mindhavuko ya ndhawu yoleyo hi ku tinyungubyisa. A a kaneta Timbhoni ta Yehovha hikuva a a ehleketa leswaku ti xungeta ndhavuko wa vona.

Hi ku famba ka nkarhi, jaha rin’wana ri vule leswaku ri ni vuswikoti byo tiva vanhu lava tirhisaka vungoma eswimitanini. Valandzeri va rona vo tala a va tluta na rona hi swikwekwetsu, va ba vanhu lava hehliwaka ni ku tlhela va teka nhundzu ya vona. Vanhu a va boheka ku hakela jaha leri mali yo tala swinene leswaku va ta basisiwa eka moya wo homboloka lowu a ku vuriwa leswaku va na wona. Pasensi a a ri un’wana wa vanhu vo tala lava biweke va nga ri na nandzu naswona u siyiwe ku ehleketiwa leswaku u file. Hambi ku ri munghana wa yena loyi a a ri granman a nga swi kotanga ku n’wi pfuna hikuva a a chava leswaku vutomi bya yena ni ndhuma ya yena a swi ta va ekhombyeni loko a pfuna munhu loyi a a hehliwa hi ku va mungoma. Vanghana ni maxaka a va aleriwa leswaku va n’wi pfuna. Hambiswiritano, mukon’wana wa Pasensi u kanye mbilu kutani a n’wi yisa eximutanini lexi a ku tshama Timbhoni ta Yehovha to tala eka xona. Vamakwerhu va vulavule hi mhaka leyi naswona tanihi leswi a va swi tiva leswaku leswi swi nga ha va hoxa ekhombyeni, va hlawule ku n’wi pfuna. Va hlele leswaku Pasensi a fambisiwa hi xikwekwetsu a yisiwa eximutanini lexi nga le kusuhi laha makwerhu un’wana a a ri mininjhere ya rivala leritsongo ra swihaha-mpfhuka. Ku suka kwalaho, khale ka mukaneti loyi u fambisiwe hi xihaha-mpfhuka a yisiwa edorobeni leswaku a ya tshunguriwa.

Pasensi, loyi a hlakarheleke eka timbanga ta yena, u khumbiwe hi rirhandzu leri a kombisiweke rona hi vanhu lava a tshameke a va kaneta. U sungule ku dyondza Bibele kutani a khuvuriwa hi December 2009. Sweswi Pasensi i muchumayeri wa mahungu lamanene la hisekaka naswona hambileswi a nga ni malembe ya 80, u swi kotile ku va phayona ra nkarhinyana hi April 2010.

A A EHLEKETA LESWAKU WA YI TIVA BIBELE. Eric, wanuna la nga ni malepfu u fike eminhlanganweni ya vandlha eUnited States a khome Bibele hi voko. Loko makwerhu un’wana a n’wi xewetile, Eric u sungule ku vutisa hi tidyondzo leti hi pfumelaka eka tona. U arile loko a nyikiwa buku leyi nge, Leswi Bibele Yi Swi Dyondzisaka a vula leswaku u lava leswaku ku tirhisiwa Bibele ntsena. Eka xiyimiso xa yena xa ku hlaya Bibele a a hlaya matluka ya 20 hi siku, naswona a a hlaye Bibele hinkwayo minkarhi yo tala swinene. Endzhaku ka minhlangano, bulo ra yena ni makwerhu loyi ri ye emahlweni ku ringana tiawara leti tlulaka tinharhu. Loko bulo rero ri hela, Eric u te, “Se ndzi sungula ku hlundzuka.” Makwerhu loyi u vutisile leswaku ha yini. Eric u hlamule a ku: “A ndzi tshemba leswaku Matsalwa ndzi ma tiva kahle swinene. Hambiswiritano, endzhaku ka bulo leri, ndza swi vona leswaku a ndzi ma tivi nikatsongo.” U amukele buku leyi nge, Leswi Bibele Yi Swi Dyondzisaka.

Hi siku leri landzelaka, va sungule ku dyondza Bibele swin’we. Hi siku leri Eric a kumeke buku leyi nge, Leswi Bibele Yi Swi Dyondzisaka u hete vusiku hinkwabyo a hlaya tindzima ta khume to sungula ta buku leyi. Xana u gimete hi ku vula yini? U te: “Se ndzi wu kumile ntiyiso!” A va hlaya tiawara tinharhu ku ya eka ta mune hi siku, masiku ya ntlhanu hi vhiki. U sungule ku lunghiselela ni ku va kona eminhlanganweni hinkwayo naswona a a famba ni ndyangu wa yena hinkwawo. Ku nga si hela vhiki ro sungula, u tsale mapapila a surisa vito ra yena eka tikereke tinharhu to hambana-hambana, a byevula malepfu ya yena naswona a tiyimisela leswaku a nge he pfuki a tlangele tiholideyi. Ku nga si hela mavhiki mambirhi, u tsarisile eXikolweni xa Vutirheli bya le Tilweni naswona ku nga si hela mavhiki ya mune se a a ri muhuweleri la nga khuvuriwangiki. U khuvuriwe hi April 2010, endzhaku ka tin’hweti ta tsevu ntsena a hlangane ni Timbhoni ta Yehovha!

U KHUVURIWE A RI NI MALEMBE YA NKOMBO. Paola loyi a tshamaka evupela-dyambu bya Mexico, u kurisiwa hi vakokwa wa yena. Kokwa wa yena wa xisati u sungule ku dyondza Bibele ni Timbhoni ta Yehovha loko Paola a ri ni malembe ya ntlhanu. Paola a a yingisela naswona ntiyiso wu dzime timitsu embilwini ya yena. Hambileswi kokwa wa yena a nga endlangiki nhluvuko, Paola u sungule ku ya eminhlanganweni a ri yexe. A a kombela vakokwa wa yena leswaku va n’wi pfuna ku ambala ni ku n’wi pfuna leswaku a tsemakanya xitarata loko a ya eHolweni ya Mfumo.

Loko Paola se a dyondze ku hlaya ni ku tsala, u tsarise eXikolweni xa Vutirheli bya le Tilweni a tlhela a va muhuweleri. Leswi a a rhandza Yehovha, u khuvuriwe a ri ni malembe ya nkombo. Loko a vutisiwa leswaku ha yini a ya eminhlanganweni a tlhela a chumayela hi ku hiseka hambileswi ndyangu wa ka vona wu nga n’wi seketeliki, Paola loyi sweswi a nga ni malembe ya khume u ri: “Ndzi ti rhandza swinene tinkulumo hikuva ti ndzi khutaza leswaku ndzi ya emahlweni ndzi dyondza Bibele nileswaku ndzi fambela ekule ni swiphiqo. Naswona ndzi chumayela hileswi ndzi lavaka ku dyondzisa vanhu swilo leswi Yehovha a nga ta va endlela swona enkarhini lowu taka ni ku va komba leswaku Bibele yi nga va endla va va na ntsako hambi ku ri sweswi.”

MAKWERHU WA XISATI U CHUMAYELE VANHU LAVA N’WI BELAKA RIQINGHO HI XIHOXO. EDominican Republic, makwerhu un’wana wa xisati a a tshamela ku kuma tinqingho leti nga kongomangiki eka yena, leti a ti n’wi kavanyeta entirhweni. Endzhaku ka masiku ma nga ri mangani, u sungule ku ehleketa a ku, ‘Ndzi nga tirhisa nkarhi lowu leswaku ndzi chumayela.’ Xana u swi endle njhani sweswo? Loko a hlamula tinqingho leti fikeke eka yena hi xihoxo, a a vula leswaku u kombela ku khomeriwa hileswi riqingho ri fikeke eka yena hi xihoxo kambe a a engetela hi ku vula a ku, “Ndzi kombela ku ku vutisa xivutiso, Xana u yi hlayile Bibele namuntlha?” Hambileswi vanhu van’wana a va namba va veka riqingho ehansi, va nga ri vangani a va vula leswaku a va yi hlayanga Bibele. Kutani a a va vutisa a ku, “Xana wa swi tiva leswaku ha yini swi ri swa nkoka swinene ku yi hlaya?” Leswaku a va hlamula hi ku tirhisa Matsalwa, a a va hlayela Pisalema 1:1-3. Mutirhela-mfumo un’wana u vulavule nkarhi wo leha ni makwerhu loyi wa xisati naswona u vule leswaku a nga na yona Bibele. Ku endliwe malunghiselelo ya leswaku a yiseriwa Bibele ni minkandziyiso leyi sekeriweke eBibeleni. Endzhaku ka mavhiki mambirhi, mutirhela-mfumo loyi u be riqingho, kambe enkarhini lowu a a nkhensa makwerhu loyi wa xisati hi leswi a tsakeleke ku vulavula na yena a tlhela a nkhensa minkandziyiso.

Wansati un’wana loyi a beke nomboro leyi hoxeke ya riqingho, u vutisile a ku, “Xana u Mbhoni ya Yehovha?” Loko makwerhu loyi a hlamurile leswaku i Mbhoni ya Yehovha, wansati loyi u sungule ku rila, a vula leswaku i muhuweleri la holeke. Makwerhu loyi wa xisati u n’wi khutazile a tlhela a hlela leswaku ku va ni muhuweleri loyi a nga ta n’wi pfuna leswaku a tlhela a tirhela Yehovha. Sweswi wansati loyi se i muhuweleri la hisekaka.

ASIA NI LE MIDDLE EAST

MATIKO 47

VAAKA-TIKO 4 587 021 833

VAHUWELERI 652 251

TIDYONDZO TA BIBELE 601 306

“WANSATI WA MUSAMARIYA.” A ku ri ximumu siku rin’wana naswona a ku hisa le Kazakhstan. Maphayona mambirhi, ku nga makwerhu wa xinuna ni wa xisati, a ma ri karhi ma chumayela hiloko ma vona wansati un’wana a ri karhi a ka mati exihlobyeni. Makwerhu wa xinuna u kombele mati naswona loko a ri karhi a nwa, makwerhu wa xisati u sungule ku chumayela wansati loyi. Wansati loyi u tsakele rungula rero hiloko a rhamba maphayona lawa leswaku ma ta ekaya ka yena leswaku a ta dyondza leswi engetelekeke hi swilo leswi ma n’wi byeleke swona. Va vulavule nkarhi wo lehanyana kutani maphayona lawa ma n’wi siyela minkandziyiso leyi sekeriweke eBibeleni. Makwerhu loyi wa xisati u tshembise leswaku u ta tlhelela eka yena endzhaku ka masiku mambirhi.

Hilaha makwerhu loyi wa xisati a a tshembise hakona, u tlhelerile a ri ni mana wa yena, loyi na yena a nga Mbhoni. Va kume wansati loyi a yime ehandle ka yindlu ya yena, a khome minkandziyiso leyi a va n’wi nyike yona. U yi tlherisele eka makwerhu loyi wa xisati ivi a ku: “Minkandziyiso leyi i ya Timbhoni ta Yehovha! Vukhongeri bya n’wina i bya le Rhaxiya!”

Kutani mana wa makwerhu loyi wa xisati u kombele ku hlayela wansati loyi ndzimana ya le Matsalweni loko va nga si famba. Tanihi leswi a a lava ku komba wansati loyi vito ra Xikwembu eMatsalweni, u pfule eka Eksoda 3:15 ivi a yi hlaya a ku: “Yehovha Xikwembu xa vatata wa n’wina, Xikwembu xa Abrahama, Xikwembu xa Isaka ni Xikwembu xa Yakobe u ndzi rhume eka n’wina.” Lexi hlamariseke vamakwerhu lava va xisati, wansati loyi u va kombele leswaku va nghena endlwini. I yini lexi endleke leswaku a cinca miehleketo ya yena hi xitshuketa? Wansati loyi a a ri ni vakokwana lava mavito ya vona a ku ri Abrahama, Isaka na Yakobe. U vule leswaku loko ku ri leswaku Yehovha a a ri Xikwembu xa vakokwa wa yena, a nga fanelanga a hlongola Timbhoni ta yena. Eka riendzo leri landzeleke, va sungule ku dyondza Bibele. A a swi navela swinene ku dyondza ntiyiso lerova dyondzo a yi fambisiwa kambirhi hi vhiki. Hambileswi a a kanetiwa hi vana va yena va majaha, u tiyise vuxaka bya yena na Yehovha naswona sweswi i muhuweleri la nga khuvuriwangiki. Ku engetela kwalaho, nsati wa n’wana wa yena swin’we ni mana wa nsati wa n’wana wa yena na vona va dyondza Bibele naswona va va kona minkarhi hinkwayo eminhlanganweni. Tanihi leswi ndlela leyi va hlanganeke na yena ha yona eku sunguleni yi fanaka ni leyi nga eka Yohane 4:3-15, evandlheni va n’wi vitana leswaku i “wansati wa Musamariya.”

“NDZI NI SWIVUTISO SWO KARHI.” Makwerhu un’wana wa xisati la dyuhaleke wa le Cyprus u tsale a ku: “Hi Ravunharhu nimixo, a ndzi nga titwi kahle kambe ematshan’weni ya leswaku ndzi tshama ekaya, a ndzi swi navela swinene ku ya chumayela exitarateni. Kutani ndzi khongele eka Yehovha, ndzi kombela leswaku a rhumela munhu loyi a a ri ni nkarhi loyi a a ta fika a tshama ekusuhi na mina ebenceni, leswaku ndzi ta sungula dyondzo ya Bibele. Ku nga ri khale ku fike jaha ra le Nepal. A ndzi khome timagazini hi voko naswona loko ndzi nga si vulavula na rona, ri ndzi vutise leswaku timagazini leti ti vulavula hi yini. Loko ndzi ri byele leswaku ti sekeriwe eBibeleni, ri te: ‘Manana ndzi ni nkarhi, xana swi lulamile leswaku ndzi tshama laha tlhelo ka wena? Ndzi ni swivutiso swo karhi hi Bibele leswi ndzi nga rhandzaka ku ku vutisa swona.’

“Ndzi pfumerile hikuva sweswo hi swona leswi a ndzi swi kombele eka Yehovha! Jaha leri ri ye emahlweni ri ku: ‘Xivutiso xa mina xo sungula xi ri, Xana Bibele yi dyondzisa yini hakunene?’ Ndzi hlamale swinene lerova ndzi tsandzeke no hlamula! Ndzi humese buku leyi nge Xana Bibele Yi Dyondzisa Yini Hakunene? enkwameni wa mina, hiloko ndzi ri komba yona. Ri langute buku, ri ndzi languta kutani ri vutisa ri ku, ‘Xana nhloko-mhaka ya buku leyi a yi fani ni xivutiso lexi ndzi hetaka ku ku vutisa xona?’ Kutani ndzi nambe ndzi sungula dyondzo ya Bibele hi nkarhi wolowo ebenceni ya le phakeni! Sweswi ri va ni dyondzo ya Bibele nkarhi hinkwawo naswona ri va kona minkarhi hinkwayo eminhlanganweni naswona ri vule leswaku ri navela ku tsarisa eXikolweni xa Vutirheli bya le Tilweni. Ndzi ri tlangela swinene lunghelo ra ku titshega hilaha ku heleleke hi matimba ya Yehovha ni hi nkongomiso wa yena loko ndzi ri entirhweni wa Vukreste hambiloko minkarhi yin’wana ndzi titwa ndzi karhele.”

MUKHALABYE A DYONDZISA XIGEVENGA LEXI DLAYEKE NTUKULU WA YENA. Ntukulu wa Miguel u dlayiwe eka malembe ma nga ri mangani lama hundzeke. Munhu loyi a n’wi dlayeke, ku nga Esmeraldo, u khomiwile kambe a nga wu pfumelanga nandzu wolowo loko a tengisiwa ehubyeni. Nilokoswiritano, hikwalaho ka vumbhoni lebyi a byi ri kona, u pfaleriwe ekhotsweni.

Hi ku famba ka nkarhi, nkulu un’wana u kombele Miguel leswaku a famba na yena leswaku va ya chumayela ekhotsweni ra le Philippine laha Esmeraldo a a pfaleriwe kona. Miguel a a kanakana ku ya, hikuva a a swi tiva leswaku xigevenga lexi dlayeke ntukulu wa yena xi le khotsweni rero. Hambiswiritano, u fambile naswona u fike a dyondzisa vabohiwa van’wana lava a va dyondzeriwa Bibele. Loko ku ri karhi ku dyondziwa Bibele, u yimise nhloko hiloko a vona Esmeraldo a ri karhi a ta a kongome eka yena. Leswaku Miguel a nga nyanyisi xiyimo lexi kumbexana a xi ta biha swinene, u vulavule hi musa na yena a ku: “Esmer, a ndzi telanga ku lwa kambe ndzi tele ku ta kombisa rirhandzu ra mina eka vanhu vo fana na wena. Vona, hi le ku buleni hi Bibele ni wanuna loyi. Leswi nga ku humelela a swi ta va swi nga humelelanga loko a a wu ri tiva Rito ra Xikwembu. Ndzi kombela leswaku u dyondza Bibele na hina.” Lexi hlamariseke Miguel hileswaku Esmeraldo u tshamile kukondza va heta ku dyondza. Tanihi leswi a a khumbiwe hi leswi a swi dyondzeke, u byele Miguel hi ku kongoma leswaku hakunene hi yena loyi a dlayeke ntukulu wa yena. Kutani u kombele ku rivaleriwa.

Nkulu luya, loyi a a nga swi twanga leswaku va vulavula hi yini, u swi vonile leswaku va le ku dyeni ka bulo leri tsakisaka, hiloko a kombela Miguel leswaku a dyondza na Esmeraldo. Eku sunguleni Miguel a a chava, hi ku tiva leswaku wanuna loyi a a nga dlayanga ntukulu wa yena ntsena kambe u pfumerile ku dyondza na yena. Swi n’wi tekele nkarhi wo leha Esmeraldo ku hanya hi ku pfumelelana ni milawu ya Xikwembu; kambe ku tikarhata ka yena ku ve ni vuyelo lebyinene naswona hi February 1, 2010, u khuvuriwile a kombisa ku tinyiketela ka yena eka Yehovha. Tanihi leswi Miguel a lavaka ku kombisa ndzivalelo wa Vukreste eka leswi Esmeraldo a swi endleke, sweswi u le ku endleni ka matshalatshala ya leswaku Esmeraldo a komiseriwa xigwevo xa yena leswaku a ta swi kota ku hlanganyela hi xitalo eku dyondziseni van’wana ntiyiso wa Bibele.

YUROPA

MATIKO 47

VAAKA-TIKO 739 193 855

VAHUWELERI 1 575 094

TIDYONDZO TA BIBELE 830 888

U HETELELE A ENDLE SWILO SWIMBIRHI LESWI A A SWI NAVELA. Nelena, la nga ni malembe ya 19 naswona a tshamaka eBulgaria, a a navela ku endla swilo swimbirhi—ku khuvuriwa ni ku va phayona ra nkarhinyana. Hambiswiritano, u khomiwe hi vuvabyi bya ku nga tirhi kahle ka misiha ni ku nga tirhi ka switwi swa yena, ku nga vuvabyi lebyi byi nga si tshungulekaka. U hefemula hi ku tirhisa muchini naswona leswi swi endla leswaku a nga swi koti ku famba-famba. Leswaku a hetisisa ku navela ka yena ko sungula, ku nga ku khuvuriwa, a swi tika hikuva swiyimo a swi nga n’wi pfumeleli leswaku a huma laha a tshamaka kona leswaku a ta ya enhlengeletanweni. Kutani loko a ri ni malembe ya 18, ku nyikeriwe nkulumo leyi sekeriweke eMatsalweni ekaya ka vona ivi endzhaku ka sweswo a khuvuriwa ebhavhini lerikulu.

Ku vuriwa yini hi ku navela ka yena ka ku va phayona ra nkarhinyana? Hi nguva leyi maxelo ma nga manene ha yona, wa swi kota ku hefemula a nga pfuniwi hi muchini ku ringana awara kumbe ku tlula. Kutani u tsarisa leswaku a va phayona ra nkarhinyana naswona muhuweleri un’we u n’wi fambisa hi xitulu xa lava lamaleke, va nghena hi yindlu ni yindlu. Nakambe Nelena u fambisa dyondzo ya le kaya ya Bibele hi ku bela xichudeni riqingho hi ku tirhisa Internet. Minkarhi yin’wana, vamakwerhu va xisati va le vandlheni va fambisa tidyondzo ta vona ta Bibele ekaya ka va Nelena, leswi n’wi nyikaka nkarhi wa leswaku a hlanganyela. Hikwalaho ka sweswo, Nelena u swi kotile ku va phayona ra nkarhinyana kanharhu n’wexemu. U ri: “Ndzi tsakile hileswi ndzi endleke swilo swimbirhi leswi a ndzi navela ku swi endla. Ku endla swilo leswi swi ndzi tshinete swinene eka Yehovha, Mutumbuluxi wa mina la nga ni rirhandzu.”

SWESWI U BOHA THAYI. Makwerhu un’wana wa xisati wa le Armenia a a hlekuriwa entirhweni wa yena wa ku tihanyisa hileswi a nga Mbhoni ya Yehovha. Mutirhi-kulobye un’wana a a tolovele ku n’wi pfuka, a vula leswaku “vanhu lava bohaka tithayi” a va kanganyise makwerhu loyi wa xisati leswaku a amukela vukhongeri bya vona. Endzhaku ka loko makwerhu loyi a ringete ko tala ku vulavurisana na yena kambe swi nga pfuni, u hlawule ku swi ba hi makatla swilo leswi a a swi vula naswona “a nga hlamulanga,” a tekelela Yesu Kreste. (Mat. 27:12) Eku heteleleni mutirhi loyi u hlongoriwile hikwalaho ka ku tikhoma ka yena hi ndlela yo biha ni hi leswi a a dyisa makwerhu loyi wa xisati mbitsi. Endzhaku ka tin’hweti to hlayanyana, ku fike wanuna un’wana a ri karhi a lavana ni makwerhu loyi wa xisati laha a a tirha kona. A ku ri khale ka mutirhi-kulobye wa yena loyi a a nga n’wi dyisi byi rhelela. Makwerhu loyi wa xisati u hlamarisiwe hi ndlela leyi wanuna loyi a a languteka ha yona. Hambileswi a a hlekule Timbhoni hileswi ti bohaka tithayi, sweswi hi yena loyi a a bohe thayi naswona a a khome ni bege yo hoxa tibuku. U byele makwerhu loyi wa xisati a ku: “Ndzi kombela leswaku u ndzi khomela hikwalaho ka marito yo tlhava lawa ndzi ma vuleke eka wena. Sweswi ndza swi tiva leswaku ndzi kume ntiyiso.” Wanuna loyi a a dyondze Bibele ni Timbhoni ta Yehovha naswona hambileswi a a kanetiwa hi ndyangu wa yena, u khuvuriwile naswona i phayona ra nkarhi hinkwawo.

“XANA WA N’WI TIVA MANANA NADIA?” Nadia i phayona ra nkarhi hinkwawo evandlheni leri nga le n’walungu wa Italy. Hi September 2009 u vulavule ni wanuna un’wana eka intercom, naswona wanuna loyi u nambe a n’wi nghena enon’wini a n’wi byela leswaku wa ha ku loveriwa hi nsati nileswaku a a nga lavi ku vulavula na yena. Hi Sonto leyi landzelaka, Nadia u tlhelerile leswaku a ya n’wi chavelela a tlhela a n’wi byela hi ntshembo wa ku pfuxiwa ka vafi lowu nga eBibeleni, kambe wanuna loyi a a nga lavi no twa nchumu. Dyondzo ya Xihondzo xo Rindza leyi khomiweke hi ndzhenga wolowo a yi ri ni ntokoto wa makwerhu un’wana wa xisati loyi a tsaleke papila a tsalela munhu un’wana loyi a a feriwe hi munhu loyi a a n’wi rhandza. Leswi swi endle leswaku Nadia a ehleketa hi wanuna loyi a a ha ku vulavula na yena eka intercom, kutani u endle xiboho xo n’wi tsalela papila ra ku n’wi chavelela a tlhela a katsa vuxokoxoko bya ntshembo wa ku pfuxiwa ka vafi. Endzhaku ka masiku mambirhi, u siye papila rero ebokisini ra poso ra wanuna yoloye.

Endzhaku ka masiku yo hlayanyana, Nadia a a ri karhi a chumayela exitarateni hiloko a yimisa wanuna un’wana loyi a nga ni malembe ya va-70 leswaku a ta n’wi hlayela ndzimana ya le Bibeleni. Wanuna loyi u n’wi vutisile loko a ri Mbhoni ya Yehovha, hiloko Nadia a vula leswaku hi yena Mbhoni ya Yehovha. Wanuna loyi u vule leswaku u endzeriwe hi Mbhoni yin’wana ya Yehovha, leyi n’wi siyeleke papila leri khutazaka swinene leri n’wi khumbeke mbilu. Kutani wanuna loyi u vutisile a ku: “Xana wa n’wi tiva Manana Nadia?” Leswi havumbirhi bya vona a va hlamarile, Nadia u titivisile kutani a endla malunghiselelo ya leswaku yena ni nuna wa yena va n’wi endzela. Wanuna yoloye u sungule ku dyondzeriwa Bibele naswona sweswi u va kona minkarhi hinkwayo eminhlanganweni.

A VA SWI KOTI KU DYONDZA NA VONA HINKWAVO. Edorobeni ra Bujanovac, edzongeni wa Serbia ku tshama Timbhoni ta mune leti khuvuriweke. Vahuweleri lava va Mfumo a va tsakile swinene loko eXitsundzuxweni xa 2010 ku va ni vanhu va 460! Vakulu va vandlha leri nga le kusuhi va hlele leswaku ku khomiwa minhlangano nkarhi na nkarhi le Bujanovac endhawini leyi hirhiwaka. Hi xiringaniso, vanhu lava tlulaka 50 va va kona. Hikwalaho ka leswi vanhu vo tala va ri amukelaka rungula ra Mfumo, maphayona yo hlawuleka lama averiweke ensin’wini leyi a ma swi koti ku dyondza Bibele ni vanhu hinkwavo lava tsakelaka. Hikwalaho, ma dyondza ntsena ni vanhu lava taka eminhlanganweni va yi lunghiselele kahle minhlangano hinkwayo.

MAKWERHU WA XISATI LA NGA NI MALEMBE LAMA TLULAKA DZANA! Elin, loyi a nga muhuweleri lonkulu ku va tlula hinkwavo eSweden, u ni malembe ya 110, ku nga malembe lawa Yoxuwa a ma hanyeke. (Yox. 24:29) U tshama ekaya ra vadyuhari naswona u tirhisa nkarhi wun’wana ni wun’wana lowu a wu kumaka leswaku a vulavula ni vaendzi swin’we ni hinkwavo lava a hlanganaka na vona kwalaho. U fambisa tibuku to tala. Loko nkulu un’wana ni n’wana wa yena wa nhwanyana va ri karhi va chumayela hi yindlu ni yindlu endhawini leyi va tshamaka eka yona, va hlangane ni wansati un’wana la nga vula leswaku Elin u n’wi chumayerile nileswaku u n’wi siyele buku. Leswi swi endle leswaku va va ni bulo lerinene.a

U KUME TIBUKU EKEREKENI. Tatyana, loyi a tshamaka eBelarus, u hlamarile loko siku rin’wana a beriwa riqingho hi wansati un’wana loyi a a nga n’wi tivi. Wansati yoloye a a lava ku kuma tinhlamulo ta le Bibeleni ta swivutiso swa yena. Endzhaku ka sweswo va ve ni bulo lerinene. Xana u ti kume njhani tinomboro ta riqingho ta Tatyana? Wansati loyi u vule leswaku siku rin’wana loko a endzele ekerekeni, u kume buku leyi nge Leswi Bibele Yi Swi Dyondzisaka ni Bibele leyi nge Vuhundzuluxeri Bya Misava Leyintshwa ehansi ka bence nileswaku etibukwini leti a ku tsariwe tinomboro ta riqingho ta Tatyana. Tibuku leti ti fike njhani ekerekeni? A ti yisiwe hi mana wa nhwanyana un’wana loyi a tshameke a dyondza Bibele na Tatyana. Swi le rivaleni leswaku xikongomelo xa manana loyi a ku ri ku ya vutisa mufundhisi loko n’wana wa yena wa nhwanyana a fanele a ti hlaya kumbe a nga ti hlayi. Hikwalaho ka swivangelo swo karhi, tibuku teto ti sale ehansi ka bence. Wansati loyi u ti vone kwalaho hiloko a ti teka a famba na tona ekaya. Ku beriwa riqingho koloko ku endle leswaku va yisa bulo ra vona ra Bibele emahlweni.

BAJI LERI LAHLEKEKE RI PFUNA MAKWERHU WA XISATI LESWAKU A CHUMAYELA. Elena, makwerhu wa xisati la nga phayona ro hlawuleka, u vone baji ro saseka ri ri exitarateni eMinsk le Belarus. Baji rero a ri basile naswona a swi ri erivaleni leswaku a ri cukumetiwanga. Loko a ri teka u kume leswaku ku ni R8 800 exikhwameni xa rona. Loko a ri karhi a languta vanhu lava hundzaka, u nambe a vona wanuna loyi a a swi tikomba leswaku hi yena la lahlekeriweke hi baji rero. A a ri karhi a ya ehansi ni le henhla onge hiloko a lavana ni nchumu wo karhi. Elena u boheke ku tsutsuma leswaku a ya kuma wanuna loyi. Wanuna yoloye a a ri n’wamabindzu wa le Bangladesh, loyi a a tshama eMoscow. A a tsake swinene loko a kuma baji ra yena ra ha ri ni mali. Nakambe a a lava ku tiva leswaku ha yini makwerhu loyi wa xisati a n’wi tlherisele baji ra yena, a kala a tsutsuma leswaku a ta n’wi nyika rona. Makwerhu loyi u vule leswaku i Mbhoni ya Yehovha. N’wamabindzu loyi u vule leswaku emasikwini ma nga ri mangani lama hundzeke, Timbhoni timbirhi ti vulavule na yena. U phikizane na tona ku ringana timinete ta kwalomu ka 30 naswona a a yimelela vukhongeri bya yena. Kutani wanuna loyi u vutise Elena leswaku a nga swi kombisa njhani leswaku wa tlangela hileswi baji ra yena ri vuyisiweke. U vule leswaku a nga swi lavi ku hakeriwa hileswi a tlheriseleke baji rero, kambe ndlela leyinene yo kombisa leswaku wa tlangela a ku ta va ku dyondza Bibele ni Timbhoni ta Yehovha loko a tlhelela eMoscow. U pfumerile leswaku u ta endla tano.

OCEANIA

MATIKO 30

VAAKA-TIKO 39 384 408

VAHUWELERI 101 483

TIDYONDZO TA BIBELE 62 367

KU LANGUTANA NI XIPHIQO XO VULAVULA. Hamish, makwerhu wa xinuna la nga ni malembe ya 23 la tshamaka eAustralia, u ni xiphiqo lexikulu swinene xa ku vulavula lexi endlaka leswaku marito lawa a ma vulaka ma hlanga-hlangana kumbe a tsandzeka ku vulavula. Hambiswiritano, xiphiqo lexi a xi endlanga leswaku a nga hisekeli ku vulavula erivaleni kumbe ntirho wa nsimu. Hi xikombiso, loko Hamish a nyikela nkulumo eHolweni ya Mfumo, u rhanga a thayipa leswi a nga ta swi vula eka muchini wa elektroniki lowu khomiwaka hi voko lowu hundzulaka leswi a nga swi tsala ivi wona wu swi hlaya kunene. Loko a nyikela nkulumo, u veka muchini lowu eka xikurisa-marito kutani a endla leswaku marito lawa a nga ma thayipa ma sungula ku vulavula. Marito wolawo ma kokiwa hi xikurisa-marito kutani ma twala eka swipikara. Loko nkulumo ya yena yi lava leswaku vayingiseri va hlamula, u thayipa swiga leswi kombelaka leswaku vayingiseri va hlamula ni ku va nkhensa. Loko a ri ensin’wini u vulavula hi ndlela leyi fanaka, a tirhisa swiga leswi a swi lunghiseleleke, matsalwa lawa a ma tshaheke a tlhela a thayipa hi xihatla! Hikwalaho ka sweswo, u ni maendzo yo tala yo vuyela lamanene. Ku sukela hi 2007, loko Hamish a hlawuriwe leswaku a va nandza wa vutirheli, u ve phayona ra nkarhinyana ko hlayanyana lembe na lembe.

MUCHINI WA YENA WO GANDLISA WU VA NI XIPHIQO. David wa le New Caledonia loyi a tirhaka ku lunghisa tikhompyuta, u beriwe riqingho hi wansati un’wana loyi muchini wa yena wo gandlisa a wu ri ni xiphiqo—a wu ala ku gandlisa rungula ro karhi. David u hatle a lunghisa xiphiqo xexo kambe u hlamarile loko a vona marito lama tsariweke eka phepha leri a ha ku ri gandlisa, lama nge: “MI NGA HI endzeli. Hi n’wi amukerile Yesu laha kaya. A hi lavi vukhongeri byin’wana.”

David u byele n’wini wa muti a ku: “Ndzi khomele, kambe loko ndzi ri karhi ndzi lunghisa muchini wa wena wo gandlisa, ndzi hlaye leswi a swi tsariwe eka phepha leri nga huma. Ha yini u tsale marito lawa?”

U te: “Phela, Timbhoni ta Yehovha ti hi endzela mahelo-vhiki man’wana ni man’wana. Hi karhele ku ti vona endhawini leyi. Ndza ku byela, ku hava Mbhoni leyi nga ta nghena laha ndlwini.”

David u vutisile a ku: “Xana wa swi tiva leswaku ana se u rhambe yin’wana ya tona laha ndlwini ya wena?”

Wansati loyi u hlamule a ku: “A swi nge endleki sweswo!”

David u te: “Ndzi Mbhoni ya Yehovha! Naswona u ndzi rhambile leswaku ndzi nghena!” Wansati loyi u hlamarile naswona u khomiwe hi tingananyana. Hi musa, David u hlamuserile leswaku ha yini Timbhoni ta Yehovha ti endzela vanhu emakaya ya vona. Endzhaku ka sweswo ku landzele bulo leri tekeke tiawara timbirhi. Endzhaku ka masiku ma nga ri mangani, David u tlhele a endzela wansati loyi ni nuna wa yena. Va vule leswaku endzhaku ko anakanyisisa hi leswi nga humelela, a va tiyiseka leswaku Xikwembu hi xona xi nga kongomisa David eka vona. Hikwalaho, a va nga ta ala loko a va endzela! Sweswi va yi amukela minkarhi hinkwayo minkandziyiso ya hina.

U TSHAMA A RI NI SWIPHEPHANA. Nathan, la nga ni malembe ya 12 u tshama eAustralia. Enkwameni wa yena wa tibuku ta xikolo u hoxa swiphephana leswi sekeriweke eBibeleni naswona minkarhi hinkwayo u chumayela vanghana va yena exikolweni. Siku rin’wana loko a muka a vuya exikolweni, u vone mukhegula un’wana a yime emahlweni ka yindlu ya yena. Mukhegula loyi u n’wayiterile hiloko Nathan na yena a n’wayitela ivi a n’wi nyika xiphephana xin’we. Kutani mukhegula loyi u n’wi byele leswaku nuna wa yena u fe emalembeni manharhu lama hundzeke. Hi nkarhi wolowo Nathan u pfule nkwama wa yena kutani a humesa xiphephana lexi nge, Hi Wihi Ntshembo Wa Varhandziwa Lava Feke? Mahlo ya mukhegula loyi ma sungule ku tenga-tenga mihloti loko Nathan a n’wi byela leswaku vafi va ta pfuxiwa laha a nga tlhelaka a vona nuna wa yena eParadeyisini. Mukhegula loyi u vutisile a ku: “Kambe xana maxangu hinkwawo ma ta hela rini?” Nathan u humese xiphephana xin’wana lexi nge, Maxangu Hinkwawo Ma Ta Hela Ku Nga Ri Khale! Kutani mukhegula loyi u vutise Nathan leswaku i yini swilo swin’wana leswi a swi pfumelaka. Nathan u tlhele a humesa xiphephana xin’wana enkwameni wa yena lexi nge, Xana Timbhoni Ta Yehovha Ti Pfumela Yini? Endzhaku ka sweswo Nathan u fambile. Endzhaku ka mavhiki yo hlayanyana u vone mukhegula loyi nakambe a yime emahlweni ka yindlu ya yena. Mukhegula loyi u n’wi vitanile kutani a n’wi angarha. U te: “Nathan, endzhaku ka loko u ndzi nyike swiphephana leswiya, vavasati vambirhi lava nga Timbhoni va ndzi endzerile kutani sweswi ndzi dyondza na vona Bibele!”

A VA RI NI XIRHAMBO XIN’WE NTSENA XA XITSUNDZUXO. Michael u pfunetile loko ku akiwa miako leyintshwa ya rhavi eSolomon Islands. Endzhaku ka sweswo, u hlawule ku ya chumayela vanhu va le Xihlaleni xa Mbanika, ku nga xihlala lexi ngo va xoxe lexi a a tshama eka xona loko a ha ri n’wana, laha vabuti wa yena a va tshama kona. A ku nga ri na Timbhoni exihlaleni lexi. Nakambe a ku na xikepe lexi yaka exihlaleni lexi minkarhi hinkwayo, a ku na poso naswona ku ni riqingho rin’we ntsena.

U ye eXihlaleni xa Mbanika na Hansly loyi a nga phayona lera ha riki muntshwa. Loko va fika, va nambe va aka Holo ya Mfumo va tirhisa matluka ya murhi lowutsongo wa ncindzu naswona va rhambe vanhu leswaku va va kona eXitsundzuxweni xa rifu ra Kreste. Tanihi leswi vamakwerhu lavambirhi a va ri ni xirhambo xin’we ntsena lexi gandlisiweke, va xi kombe vanhu kutani va hlamusela nkoka wa Xitsundzuxo.

Hi siku ra le mahlweni ka Xitsundzuxo, vamakwerhu lava va tlute tiawara timbirhi va ya eka tlhelo lerin’wana ra xihlala leswaku va ya rhamba ndyangu lowu a wu tshama kwalaho. Hambiswiritano, va kume ku ri ni vana ntsena ekaya. Michael u hlawule ku siya xirhambo xexo, ku nga xona ntsena lexi a va ri na xona. U xi nyike nhwanyana lonkulu kutani a kombela leswaku a xi nyika tata wa yena.

Hi ndzhenga lowu nga landzela loko Michael na Hansly va ri karhi va lunghiselela Xitsundzuxo, va vone ndyangu wolowo wu ri karhi wu ta hi xikwekwetsu. Tatana loyi a a xi hlayile xirhambo xexo hiloko a gimeta hileswaku Xitsundzuxo xi fanele xi ri xiendlakalo xa nkoka swinene, kutani u te ni ndyangu wa yena hinkwawo. Hi madyambu wolawo, vanhu va 52 va ve kona eXitsundzuxweni. Michael na Hansly va hambeta va chumayela ni ku dyondza Bibele ni vanhu lava veke kona.

[Nhlamuselo ya le hansi]

a Elin u fe loko buku leyi ya lembe ya ha tsariwa.

[Chati leyi nga eka matluka 40-47]

2010 SERVICE YEAR REPORT OF JEHOVAH’S WITNESSES WORLDWIDE

(Hlaya nkandziyiso)

Mimepe leyi nga eka matluka 48-50]

(Hlaya nkandziyiso)

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela