Mintirho Ya Timbhoni Ta Yehovha Ya Manguva Lawa

Papua New Guinea

Ku chumayela mahungu lamanene etikweni leri leri hisaka a swi nga olovi. Ku ni makhwati lama tlhumeke, tinhlangasi to tala ni tintshava leti nga ni maribye. Tinxaka ta kwalomu ka gidi ti tshama etikweni leri naswona ku vulavuriwa tindzimi leti tlulaka 800. Hlaya u twa ndlela leyi vamakwerhu lava nga ni xivindzi va hluleke swihinga leswi ha yona leswaku va ta byela vanhu van’wana ntiyiso wa le Bibeleni. Nakambe tlhela u hlaya u twa hi xivindzi ni ku tiyimisela ka vagandzeri-kulorhi lava tshikeke vukholwa-hava ni mindhavuko leyi nga sekeriwangiki ematsalweni leswaku va ta va malandza yo tshembeka ya Yehovha. Hakunene rungula leri ri ta tiyisa ripfumelo ra wena.

Estonia

Leri i rungula leri tsakisaka ra vamakwerhu va xinuna ni va xisati lava tirhaka hi matimba lava yiseke swilaveko swa Mfumo emahlweni hambiloko va langutane ni ku xanisiwa hi tihanyi. Kuma leswaku “kalichi ya Mfumo wa le tilweni” a ku ri yini ni ndlela leyi phorisa ri ti tshoveke voko ha yona loko ri ri ehofisini ya rhavi. Kuma ndlela leyi vamakwerhu va yi tirhiseke leswaku va tiendlela muchini wa vona wo gandlisa ni ku tiendlela inki ya vona. Twana ndlela leyi malandza ya Yehovha lama titsongahataka ma tiyiseleke mavhiki mambirhi yo tika loko ma famba hi xitimela ni ndlela leyi ma poneke maxelo yo tika ya le Siberia ha yona. Hlaya u twa leswaku ha yini makwerhu un’wana wa xisati a te, “A swi va swinene loko ndzi pfaleriwa ndzexe.” Ina, lawa i matimu ya ku tshembeka, ya xivindzi ni ya ku tirha hi matimba ya malandza ya Xikwembu yo tshembeka ya le Estonia.