Vuprofeta

Nhlamuselo: I rungula leri huhuteriweke; nhlavutelo ya ku rhandza ka Xikwembu ni xikongomelo xa xona. Vuprofeta ku nga ha va ku vhumbhiwa ka swilo leswa ha taka, dyondzo leyinene leyi huhuteriweke, kumbe marito yo lerisa kumbe yo avanyisa ya Xikwembu.

Hi byihi vuprofeta lebyi rhekhodiweke eBibeleni lebyi ana se byi nga hetiseka?

Leswaku u kuma swikombiso, vona swihloko-nkulu leswi nge “Bibele,” “Masiku Ya Makumu” ni lexi nge “Masiku Ya Swiendlakalo,” kun’we ni buku leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna,” matluka 343-6.

Hi byihi vuprofeta byin’wana lebyi xiyekaka bya Bibele lebyi bya ha faneleke ku hetiseka?

1 Tes. 5:3: “Siku vanhu va nga ta ku: ‘Ku rhulile, ku hava xo karhata’, hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n’wana; va nga ka va nga poni.”

Nhlav. 17:16: “Timhondzo ta khume leti u ti voneke, tona swin’we ni xivandzana, swi ta venga [w]ansati loyi wa muoswi [Babilona Lonkulu], swi ta endla leswaku a swela ni ku sala a nga ambalanga nchumu, swi dya nyama ya yena, swi n’wi hisa hi ndzilo.”

Ezek. 38:14-19: “U byela Gog, u ku: Hosi Yehova a v̌ulav̌ula ŝeŝo, a ku: Hi siku rero, loko tiko ra mina ra Israel [wa moya] ri ta ṭhama hi ku rula, šana u nga ka u nga ri tiv̌i šana? U ta pfa hi laha u nga kona, le makumu ya ṅwalungu, wena ni matiko la’yo tala na wena, . . . Hi siku rero loko Gog a ta nghena e tikweni ra Israel, ku v̌ula Hosi Yehova, mbilu ya mina yi ta tala e v̌ukari, kutani hikwalaho ka rilonḍo ra mina, ni nḍilo wa ku kariha ka mina, nḍ[a] tiyisa.”

Dan. 2:44: “Ku fuma [loku simekiweke hi Xikwembu] . . . ku ta seletela ni ku herisa ku fuma kuloku hikwako [ka vanhu], kambe kona ku ta v̌a kona hi laha ku nga riki na makumu.”

Ezek. 38:23: “Nḍi ta titwarisa ni ku tikwetsimisa, nḍi ta titiv̌isa e mahlweni ka matiko la’manyingi, ma ta tiv̌a leŝaku hi mina Yehova.”

Nhlav. 20:1-3: “Ndzi vona ntsumi leyi xikaka hi le tilweni, yi tamele xilotlelo xa khele lero enta ku ya ni ku ya, yi tamele ni nketani leyikulu. Kutani yi khoma dragona, nyoka leya khale (hileswaku Diyavulosi, kumbe Sathana), yi n’wi boha nkarhi wo ringana malembe ya 1 000. Yi n’wi hoxa ekheleni, yi pfala, yi n’wi lemela ndzeni leswaku a nga ha yi emahlweni ku xisa vanhu va matiko, ku fikela loko malembe ya 1 000 ma ta va ma hundzile. Endzhaku ka swona, ú ta fanela ku ntshunxiwa nkarhinyana.”

Yoh. 5:28, 29: “Mi nga hlamaleni hi mhaka leyi, hikuva nkarhi wa ta lowu hinkwavo lava nge masirheni va nga ta twa rito ra yena, kutani va ta huma. Lava endleke leswinene va ta pfuka va ya evutomini lebyi nga heriki, lava endleke leswo biha va ta pfuka va ya eku avanyisiweni.”

Nhlav. 21:3, 4: “Ndzi twa ni rito lerikulu leri humaka exiluvelweni ri ku: ‘Vonani, vuako bya Xikwembu byi le vanhwini. Xi ta aka na vona, kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.’”

1 Kor. 15:24-28: “Endzhaku, ku ta fika makumu, siku a nyiketaka Mfumo eka Xikwembu Tatana . . . Loko hinkwaswo swi vekiwile ehansi ka yena N’wana, na yena hi xiviri ú ta vekiwa ehansi ka Xikwembu lexi xi vekeke hinkwaswo ehansi ka yena, leswaku Xikwembu xi va lexi fumaka ehenhla ka hinkwaswo-[nkwaswo].”

Ha yini Vakreste va fanele ku khumbeka swinene hi leswi Bibele yi swi vhumbhaka?

Mt. 24:42: “Hitekani ke, hikuva a mi tivi siku leri Hosi ya n’wina yi nga ta ta ha rona.”

2 Pet. 1:19-21: “Rito ra vaprofeta, hina hi ri kuma ri tiyile ku tlula ni khale [hikwalaho ka leswi humeleleke eku kwetsimeni ka Yesu]. Mi ta va mi endla swona loko mi hlayisa swinene rito rero . . . Hikuva ku hava rito ni rin’we ra vaprofeta leri teke hi ku titwa ka munhu, kambe vanhu lava susumetiweke hi Moya lowo Kwetsima, va vurile leswi humaka eka Xikwembu.”

Swiv. 4:18: “Ndlela ya la’v̌o lulama yi kotisa ku v̌onakala, ku hatima ka kona ku engeteleka ku fikela nhlekanhi lo’wukulu.”

Mt. 4:4: “Munhu a nga ka a nga hanyi hi vuswa ntsena, kambe ú ta hanya hi marito hinkwawo lama humaka enon’weni wa Xikwembu.” (Sweswo swi katsa switshembiso swa xona swa vuprofeta leswi hlamarisaka.)

2 Tim. 3:16: “Matsalwa lawa hinkwawo ma huhutiwile hi Xikwembu, ma pfuna ku dyondzisa, ni ku laya, ni ku ololoxa, ni ku tolovetisa leswo lulama.” (Xiitaliki i xerhu.) (Xisweswo Rito ra Xikwembu hinkwaro leri tsariweke, hi fanele ku ri dyondza hi ku hiseka.)

Loko Munhu A Ku—

‘Mi kandziyisa ngopfu vuprofeta. Leswi lavekaka ntsena i ku amukela Kreste tanihi Muponisi wa wena kutani u hanya vutomi lebyi faneleke bya Vukreste’

U nga ha hlamula u ku: ‘Ku tlangela xiphemu xa Yesu Kreste i swa nkoka hakunene. Kambe xana a wu swi tiva leswaku xivangelo xin’wana lexi endleke leswaku Vayuda va lembe-xidzana ro sungula va tsandzeka ku n’wi amukela, a ku ri leswi a va nga ri na mhaka ngopfu ni vuprofeta?’ Kumbexana u nga engetela u ku: (1) ‘Vuprofeta lebyi nga eMatsalweni ya Xiheveru byi vhumbhe nkarhi lowu Mesiya (Kreste) a a ta humelela ha wona ni leswi a ta swi endla. Kambe Vayuda vo tala a va swi tekelanga enhlokweni leswi vuprofeta byebyo a byi vula swona. A va ri ni mianakanyo ya vona vini ya leswi Mesiya a fanele ku swi endla, kutani hikwalaho ka sweswo va ale N’wana wa Xikwembu. (Vona tluka 429, ehansi ka xihloko lexi nge “Yesu Kreste.”)’ (2) ‘Namuntlha hi hanya enkarhini lowu Kreste a sunguleke ku fuma ha wona tanihi Hosi ya le tilweni naswona u avanyisa vanhu va matiko hinkwawo, leswaku va ta ya evuton’wini kumbe eku lovisiweni. (Mt. 25:31-33, 46) Kambe vanhu vo tala va langutele swin’wana.’

Kumbe u nga ha ku: ‘Ndza pfumela leswaku ku va Mukreste wo lulama i swa nkoka. Kambe xana ndzi nga va Mukreste wo lulama loko ndzi endla swin’wana swa leswi Yesu a swi dyondziseke kambe ndzi honisa leswi a vuleke leswaku hi fanele ku swi rhangisa emahlweni evuton’wini? . . . Xiya leswi a swi vuleke hi laha swi tsariweke ha kona laha eka Matewu 6:33.’ Kumbexana u nga engetela u ku: ‘Xana a hi swona leswaku Yesu u hi dyondzise ku khongelela Mfumo wolowo, ni ku wu rhangisa emahlweni ka swikombelo swa hina swa ku rivaleriwa hikwalaho ka ripfumelo ra hina eka yena tanihi Muponisi? (Mt. 6:9-12)’