Hi Nga Tiyiseka Njhani Leswaku Ku Ta Va Ni Ku Pfuxiwa Ka Lava Feke?

Xana vanhu lava pfumelaka leswaku vanhu va ta pfuxiwa a va tlharihanga? Muapostola Pawulo a a nga titwi hi ndlela yoleyo. U huhuteriwe ku tsala a ku: “Loko hi ve ni ntshembo eka Kreste evuton’wini lebyi ntsena, hi hina hi faneleke ku tweriwa vusiwana ngopfu ku tlula vanhu hinkwavo. Hambiswiritano, Kreste se u pfuxiwile eka lava feke, a va xirhangana xa lava va etleleke eku feni.” (1 Vakorinto 15:19, 20) Pawulo a a tiyiseka hi mhaka ya ku pfuxiwa ka vafi. Sweswo swi tiyisekisiwe hi ku pfuxiwa ka Yesu.a (Mintirho 17:31) Hikwalaho, Pawulo u vule leswaku Yesu i “xirhangana,” hi yena wo sungula ku pfuxeriwa ku hanya hilaha ku nga heriki. Loko Yesu a pfuxiwile, swi le rivaleni leswaku ni van’wana va ta pfuxiwa.

Twana xivangelo xin’wana lexi nga ku endlaka u tiyiseka hi ntshembo wa ku pfuxiwa ka vafi. Yehovha i Xikwembu xa ntiyiso. “Xikwembu . . . a xi nge hembi.” (Tito 1:2) Yehovha a nga si tshama a hemba naswona a nge pfuki a hembile. Xana a nga tshembisa ku pfuxa vafi, a kombisa leswaku a nga va pfuxa kambe a nga endli hilaha a tshembiseke hakona? Sweswo a swi nge twali.

Ha yini Yehovha a tshembisa leswaku u ta pfuxa vafi? Hikwalaho ka rirhandzu rakwe. Yobo u vutisile a ku: “Xana loko munhu la tiyeke emirini a fa a nga tlhela a hanya? U ta vitana, mina ndzi ta ku hlamula. U ta navela ntirho wa mavoko ya wena.” (Yobo 14:14, 15) Yobo a a tiyiseka leswaku Tata wakwe wa le tilweni wa swi navela ku n’wi pfuxa. Xana Xikwembu xa ha titwa hi ndlela yoleyo? “Hikuva hi mina Yehovha; a ndzi hundzukanga.” (Malakiya 3:6) Xikwembu xa ha swi navela ku vona vafi va pfuxiwa va hanye kahle naswona va tsakile. Leswi hi leswi mutswari la nga ni rirhandzu a nga swi navelaka endzhaku ka ku feriwa hi n’wana. I ntiyiso leswaku Xikwembu a xi fani ni vanhu hikuva xi ni matimba ya ku endla leswi xi swi navelaka.—Pisalema 135:6.

Yehovha u ta nyika N’wana wakwe matimba ya leswaku a tisa ntsako lowu nga heriki eka lava feriweke. Kambe Yesu u titwa njhani hi ku pfuxiwa ka vafi? Loko a nga si pfuxa Lazaro, Yesu u vone gome leri vamakwavo va Lazaro ni vanghana a va ri na rona kutani “a rila.” (Yohane 11:35) Siku rin’wana Yesu u hlangane ni noni ya le Nayini, leyi a yi feriwe hi n’wana loyi a a tswariwe a ri swakwe. Yesu ‘u yi twele vusiwana, a ku eka yona: “U nga rili.”’ Hiloko a pfuxa n’wana wa yona. (Luka 7:13) Gome ni rifu swi n’wi twisa ku vava Yesu. Hikwalaho, u ta tsaka swinene loko a endla leswaku vanhu emisaveni hinkwayo va tsaka ku nga ri leswaku va xaniseka.

Xana u tshame u twa ku vava hikwalaho ko feriwa? U nga ha titwa onge rifu ri nge herisiwi. Kambe Xikwembu xi ta ri herisa hi ku tirhisa N’wana wa xona leswaku a pfuxa lava feke. Tsundzuka leswaku Xikwembu xi lava u ku vona hi mahlo ya mianakanyo ku hetiseka ka xitshembiso xolexo. Xi lava u va kona leswaku u ta amukela varhandziwa va wena. Tianakanye mi ri karhi mi kunguhata vumundzuku swin’we, mi nga ha karhateki hi rifu.

Lionel loyi ku vulavuriweke ha yena eka xihloko xo sungula u ri: “Ndzi dyondze hi mhaka ya ku pfuxiwa ka vafi. Eku sunguleni a ndzi nga yi tshembi naswona ni munhu loyi a ndzi byeleke yona a ndzi nga n’wi tshembi. Ndzi kambisise Bibele kutani ndzi kuma leswaku mhaka leyi i ntiyiso. Ndzi swi rindzele hi mahlongati ku tlhela ndzi vona kokwa wa mina.”

Xana u nga tsakela ku tiva leswi engetelekeke? Timbhoni ta Yehovha ti nga tsakela ku ku komba eBibeleni ya wena leswaku ha yini ti tshemba leswaku vafi va ta pfuxiwa enkarhini lowu taka.b