Ku Hlamula Hi Ku Tirhisa Bibele

LOKO hi vutisiwa hi ta vupfumeri bya hina, mahanyelo ya hina, langutelo ra hina hi swilo leswi humelelaka, ntshembo lowu hi nga na wona hi vumundzuku, hi ringeta ku hlamula hi ku tirhisa Bibele. Ha yini? Hikuva i Rito ra Xikwembu. Bibele i xihlovo xa vupfumeri bya hina. Hi hanya hi ku ya hi leswi Bibele yi swi vulaka. Hi yona leyi hi pfunaka ku va ni vonelo ro karhi hi swiendlakalo swa misava. Timitsu ta ntshembo lowu hi nga na wona hi vumundzuku ti dzime ti twelela eswitshembisweni leswi huhuteriweke swa Bibele.—2 Tim. 3:16, 17.

Hi byi xiya kahle vutihlamuleri lebyi fambisanaka ni vito ra hina. Hi Timbhoni ta Yehovha. (Esa. 43:12) Kutani swivutiso hi swi hlamula hi ku ya hi leswi Yehovha a swi vulaka eRitweni rakwe leri huhuteriweke, ku nga ri hi ku ya hi tifilosofi ta vanhu. Kunene, un’wana ni un’wana wa hina u ni vonelo rakwe etimhakeni to karhi, kambe hi pfumelela Rito ra Xikwembu leswaku ri kongomisa langutelo ra hina, hikuva hi tshemba hi ku helela leswaku i ntiyiso. Ina, Bibele yi hi nyika ntshunxeko wa ku endla leswi hi swi tsakelaka etimhakeni to tala. Ematshan’weni ya ku sindzisa van’wana leswaku va amukela leswi hi swi vulaka, hi rhandza ku va dyondzisa misinya ya milawu leyi kumekaka eMatsalweni, xisweswo hi tshika vayingiseri va hina va tiendlela xiboho, hilaha na hina hi endlaka hakona. Ku fana na muapostola Pawulo, hi lava ‘ku khutaza moya wa ku yingisa hi ripfumelo.’—Rhom. 16:26.

Eka Nhlavutelo 3:14, Yesu Kreste u vuriwa “mbhoni yo tshembeka ni ya ntiyiso.” Xana u swi hlamule njhani swivutiso, naswona u hlangavetane njhani ni swiyimo leswi a langutaneke na swona? Minkarhi yin’wana u tirhise swifaniso leswi a swi endla vanhu va anakanya. Minkarhi yin’wanyana u endle tano hi ku vutisa muvutisi leswaku yena u ri twisisa njhani tsalwa ro karhi. Hakanyingi a a hlamula hi ku tshaha matsalwa, a ma veka hi marito man’wana kumbe a kombetela eka wona. (Mat. 4:3-10; 12:1-8; Luka 10:25-28; 17:32) Eka lembe-xidzana ro sungula, hakanyingi Matsalwa-songwa a ma tshama emasinagogeni. A ku na vumbhoni bya leswaku Yesu a a ri ni matsalwa-songwa yakwe, kambe Matsalwa a a ma tiva kahle naswona a a kombetela eka wona hi ku kongoma loko a dyondzisa van’wana. (Luka 24:27, 44-47) U vule a tiyisile leswaku leswi a a swi dyondzisa a swi nga suki eka yena. A a vulavula leswi a swi tweke eka Tata wakwe.—Yoh. 8:26.

Leswi hi swi navelaka i ku landzela xikombiso xa Yesu. A hi si tshama hi twa Xikwembu xi vulavula hi ku kongoma, hilaha Yesu a xi tweke hakona. Kambe Bibele i Rito ra Xikwembu. Loko hi nyikela tinhlamulo leti sekeriweke eka yona, hi papalata ku yisa nyingiso eka hina vini. Hi kombisa leswaku, ematshan’weni yo phofula mianakanyo ya munhu la nga hetisekangiki, hi tiyimisele hi mbilu hinkwayo ku tshika Xikwembu xi vula leswaku ntiyiso hi wihi.—Yoh. 7:18; Rhom. 3:4.

Ina, ku navela ka hina a hi ku tirhisa Bibele ntsena, kambe i ku yi tirhisa hi ndlela leyi yi nga ta pfuna muyingiseri wa hina swinene. Leswi hi swi lavaka hi leswaku a yingisa a nga chavi ku phofula langutelo rakwe. Swi titshege hi langutelo ra munhu wa kona, u nga phofula leswi Bibele yi vulaka swona hi ku rhanga u ku: “Xana a wu swi pfumeli leswaku leswi nga swa nkoka hakunene hi leswi vuriwaka hi Xikwembu?” Kumbe u nga ha ku: “Xana a wu swi tiva leswaku Bibele yi vulavula hi yona mhaka yoleyo?” Loko u vulavula ni munhu loyi a nga yi xiximiki Bibele, swi nga lava leswaku u tirhisa xingheniso xin’wana. U nga ha ku: “U nge ndzi bula na wena hi vuprofeta lebyi bya khale.” Kumbe u nga ha ku: “Buku leyi yi hangalasiweke ku tlula hinkwato ematin’wini ya vanhu yi ri . . . ”

Minkarhi yin’wana u nga hlawula ku tshaha ndzimana yin’wana hi marito ya wena. Kambe loko swi koteka swa antswa u pfula Bibele hi yoxe u hlaya leswi yi swi vulaka. Loko swi koteka, komba munhu wa kona tsalwa eBibeleni yakwe. Ku tirhisa Bibele hi ndlela yo tano leyi kongomeke hakanyingi swi khumba vanhu hi ndlela yo hlamarisa.—Hev. 4:12.

Vakulu lava nga Vakreste va ni vutihlamuleri byo hlawuleka byo tirhisa Bibele loko va hlamula swivutiso. Yin’wana ya timfanelo ta ku va nkulu hi leswaku makwerhu yoloye u fanele a “khomelela swinene eritweni ro tshembeka malunghana ni vutshila byakwe byo dyondzisa.” (Tito 1:9) Xirho xa vandlha xi nga ha endla xiboho xa ntikelo lowukulu evuton’wini, endzhaku ko nyikiwa ndzayo hi nkulu. I swa nkoka swinene leswaku ndzayo ya kona yi va yi sekeriwe hi ku helela eMatsalweni! Xikombiso xa nkulu emhakeni leyi xi nga pfuna van’wana vo tala eka madyondziselo ya vona.