Swikombo Swa Mikandziyiso Leyi Nga Eka Xiyimiso Xa Mihlangano Xa Mahanyelo Ni Ntirho Wa Hina Wo Chumayela
MAY 6-12
LESWI HI SWI DYONDZAKA EBIBELENI | 2 VAKORINTO 4-6
“A Hi Tshiki”
(2 Vakorinto 4:16) Hikokwalaho a hi tshiki, hambiloko munhu loyi hi nga yena ehandle a hlakala, hakunene munhu loyi hi nga yena endzeni wa pfuxetiwa siku ni siku.
Ha Karhala Kambe A Hi Lan’wi
16 Ina, i swa nkoka swinene ku khathalela rihanyo ra hina ra moya. Loko hi ri ni vuxaka lebyikulu na Yehovha Xikwembu, hi nga ha karhala enyameni, kambe a hi nge karhali ku n’wi gandzela. Yehovha hi yena loyi a ‘nyikaka la karhaleke matimba; kasi loyi a nga riki na matimba lamakulu u n’wi engetelela wona.’ (Esaya 40:28, 29) Muapostola Pawulo, loyi a voneke ntiyiso wa marito lawa, u tsale a ku: “A hi tshiki, hambiloko munhu loyi hi nga yena ehandle a hlakala, hakunene munhu loyi hi nga yena endzeni wa pfuxetiwa siku ni siku.”—2 Vakorinto 4:16.
17 Xiya xiga lexi nge “siku ni siku.” Leswi swi vula leswaku hi tirhisa malunghiselelo ya Yehovha siku rin’wana ni rin’wana. Murhumiwa la tirheke hi ku tshembeka ku ringana malembe ya 43, a a pfa a karhala enyameni ni ku hela matimba. Kambe a nga tshikanga. U ri: “Ndzi swi endle mukhuva ku pfuka ka ha ri mixo leswaku ndzi sungula hi ku khongela eka Yehovha ni ku hlaya Rito rakwe ndzi nga si sungula ntirho hambi wu ri wihi. Ku endla swilo leswi siku ni siku swi ndzi pfunile leswaku ndzi tiyisela ku fikela sweswi.” Ina, mikarhi hinkwayo hi nga titshega hi matimba ya Yehovha loko hi khongela ni ku anakanyisisa hi timfanelo takwe leti tlakukeke ni switshembiso swakwe “siku ni siku.”
(2 Vakorinto 4:17) Hikuva hambileswi nhlomulo wu nga wa nkarhinyana naswona wu vevukaka, wu hi tisela ku vangama loku nga ni ntikelo lowukulu swinene ni loku nga heriki;
it-1 724-725
Ku Tiyisela
I swa nkoka leswaku hi nga heleriwi hi ntshembo wo hanya hilaha ku nga heriki emisaveni leyi nga riki na xidyoho. Hambiloko valala va hi xungeta hi rifu, a hi nge tshiki ku tshembeka eka Yehovha. (Rhm 5:4, 5; 1Te 1:3; Nhl 2:10) Maxangu lawa hi langutanaka na wona namuntlha hi ma teka ma nga ri nchumu loko hi tsundzuka leswaku ntshembo lowu hi nga na wona i wa xiviri. (Rhm 8:18-25) Loko hi pimanisa ntshembo wa ku hanya hilaha ku nga heriki ni maxangu lawa hi langutanaka na wona sweswi, hi ta swi xiya leswaku maxangu wolawo mo va ya ‘nkarhinyana naswona ma vevuka’. (2Ko 4:16-18) Loko Mukreste a tsundzuka leswaku maxangu lawa a langutanaka na wona i ya nkarhinyana, sweswo swi ta n’wi endla a tshama a tshembekile ni ku va ni vuxaka lebyinene na Yehovha Xikwembu.
(2 Vakorinto 4:18) hi ri karhi hi veka mahlo ya hina, ku nga ri eka swilo leswi voniwaka, kambe eka swilo leswi nga voniwiki. Hikuva swilo leswi voniwaka i swa nkarhinyana, kambe swilo leswi nga voniwiki i swa hilaha ku nga heriki.
Endla Ndzavisiso
(2 Vakorinto 4:7) Hambiswiritano, hi ni xuma lexi eswibyeni swa vumba, leswaku matimba lama tlulaka lama tolovelekeke ma va ya Xikwembu, ku nga vi ya hina.
“Endlani Leswaku Xikandza Xa Yehovha Xi Tsaka”
David Splane, xirho xa Huvo leyi Fumaka u kambisise nhlokomhaka yoleyo leyi sekeriweke eMatsalweni. (2 Vakorinto 4:7) I yini xuma? Xana i vutivi kumbe i vutlhari? Xivulavuri xi hlamule xi ku: “A swi tano. Xuma lexi muapostola Pawulo a vulavuleke ha xona i ‘vutirheli’ byo ‘endla leswaku ntiyiso wu va erivaleni.’” (2 Vakorinto 4:1, 2, 5) Makwerhu Splane u tsundzuxe swichudeni leswaku tin’hweti ta ntlhanu leti swi ti heteke swi ri karhi swi dyondza a ku ri ku swi lunghiselela xiavelo xa nkoka xa le nsin’wini. Xiavelo xexo i nchumu lowu faneleke wu xiximiwa swinene.
Xivulavuri xi hlamusele leswaku “[swibya] swa vumba” swi vula mimiri ya hina ya nyama. Xi fanise vumba lebyi endliweke hi misava ni lebyi endliweke hi nsuku. Vumba bya nsuku a byi tirhisiwi nkarhi na nkarhi. Hi hala tlhelo, vumba lebyi endliweke hi misava byi endleriwe ku tirhisiwa. Loko hi veka xuma exibyeni xa nsuku, hi nga ha dzika swinene eka xibye xexo ku tlula xuma lexi xi xi tameleke. Makwerhu Splane u te: “N’wina swichudeni, a mi fanelanga mi tilavela ndhuma. Leswi mi nga varhumiwa, mi fanele mi kongomisa vanhu eka Yehovha. Mi swibya swa vumba leswi titsongahataka.”
(2 Vakorinto 6:13) Kutani, ku fana ni ku tlherisela eka n’wina—ndzi vulavula onge hi loko ndzi vulavula ni vana—na n’wina, ndlandlamukani.
Hambetani Mi Rhandzana Tanihi Vamakwenu
7 Ku vuriwa yini hi hina? Hi nga va kombisa njhani vamakwerhu leswaku ha va rhandza? Vanhu lava nga tintangha kumbe va rixaka rin’we swi nga ha va olovela ku kombisana rirhandzu. Naswona mikarhi yo tala lava tsakelaka vuhungasi lebyi fanaka va heta nkarhi wo tala va ri swin’we. Kambe loko swilo leswi hi swi rhandzaka swi pfula vangwa exikarhi ka hina ni Vakreste van’wana, hi fanele hi pfala vangwa rero hi ku va kombisa rirhandzu. Hi ta va hi tlharihile loko hi tivutisa swivutiso leswi nge: ‘Xana mikarhi yin’wana ndzi pfa ndzi tirha nsimu kumbe ku hungasa ni vamakwerhu lava ndzi nga va tolovelangiki ngopfu? Loko ndzi ri eHolweni ya Mfumo, xana a ndzi swi lavi ku tolovelana ni vanhu lava ha ku sungulaka ku hlanganyela hileswi ndzi anakanyaka leswaku va fanele va rhanga va tikombisa loko va faneleka ku va vanghana va mina? Xana ndzi xeweta lavakulu ni lavatsongo evandlheni?’
Ku Hlayiwa Ka Bibele
(2 Vakorinto 4:1-15) Hi yona mhaka leyi hi nga tshikiki, leswi hi nga ni vutirheli lebyi hi ku ya hi tintswalo leti hi kombisiweke tona; 2 kambe hi fularhele swilo leswi ngungumerisiwaka leswi khomisaka tingana, a hi fambi hi vukanganyisi, hambi ku ri ku nyakapfarisa rito ra Xikwembu, kambe hi ku kombisa ntiyiso ha tibumabumela eka ripfalo ra munhu un’wana ni un’wana emahlweni ka Xikwembu. 3 Kutani, loko mahungu lamanene lawa hi ma vulaka, entiyisweni ma funengetiwile, ma funengetiwile eka lava va lovaka, 4 lava van’wana va vona lava nga riki vapfumeri, xikwembu xa mafambiselo lawa ya swilo xi va dlayeke mianakanyo, leswaku ku voninga ka mahungu lamanene lama vangamaka malunghana na Kreste, loyi a nga xifaniso xa Xikwembu, ku nga va voningeli. 5 Hikuva a hi chumayeli ha hina, kambe ha Kreste Yesu la nga Hosi, naswona hina hi ri mahlonga ya n’wina hikwalaho ka Yesu. 6 Hikuva Xikwembu hi xona xi nga te: “Ku vonakala a ku voninge emunyameni,” naswona xi voninge timbilu ta hina leswaku xi ti voningela hi vutivi lebyi vangamaka malunghana ni Xikwembu, hi xikandza xa Kreste. 7 Hambiswiritano, hi ni xuma lexi eswibyeni swa vumba, leswaku matimba lama tlulaka lama tolovelekeke ma va ya Xikwembu, ku nga vi ya hina. 8 Hi kamanyetiwile hi tindlela hinkwato, kambe a hi manyiwanga lerova hi nga swi koti ni ku famba; hi pfilunganyekile, kambe a hi yi pfumali hi ku helela ndlela yo huma; 9 ha xanisiwa, kambe a hi siyiwi eku kayakayeni; ha tlatlalatiwa ehansi, kambe a hi lovisiwi. 10 Emirini wa hina minkarhi hinkwayo, kun’wana ni kun’wana hi tiyisela ku khomiwa hi ndlela leyi dlayaka leyi Yesu a khomiweke ha yona, leswaku vutomi bya Yesu na byona byi kombisiwa emirini wa hina. 11 Hikuva hina lava hanyaka hi tshamela ku langutana ni rifu hikwalaho ka Yesu, leswaku vutomi bya Yesu byi kombisiwa enyameni ya hina leyi faka. 12 Hikwalaho rifu ra tirha eka hina, kambe eka n’wina ku tirha vutomi. 13 Hikwalaho ka leswi sweswi hi nga ni moya wa ripfumelo lowu fanaka ni lowu ku tsariweke ha wona: “Ndzi kombise ripfumelo, hikokwalaho ndzi vulavurile,” na hina hi kombisa ripfumelo hikokwalaho ha vulavula, 14 hi tiva leswaku loyi a pfuxeke Yesu, na hina u ta hi pfuxa swin’we na Yesu naswona u ta hi vonakarisa na n’wina. 15 Hikuva swilo hinkwaswo swi endleriwe n’wina, leswaku musa lowu nga faneriwiki lowu andzisiweke wu engeteleka hikwalaho ka ku nkhensa ka vo tala swinene leswaku ku vangamisiwa Xikwembu.”
MAY 13-19
LESWI HI SWI DYONDZAKA EBIBELENI | 2 VAKORINTO 7-10
“Ntirho Wa Hina Wo Phalala”
(2 Vakorinto 8:1-3) Sweswi ha mi tivisa, vamakwerhu, hi ta musa lowu nga faneriwiki wa Xikwembu lowu nyikiweke mavandlha ya Makedoniya, 2 leswaku hi nkarhi wa ndzingo lowukulu loko va xaniseka, ntsako wa vona lowukulu ni vusiwana bya vona lebyikulu swi andzise rifuwo ra ku hanana ka vona. 3 Hi ku ya hi vuswikoti bya vona bya xiviri, ina, ndzi nyikela vumbhoni, leswi a swi ri ehenhla ka vuswikoti bya vona bya xiviri,
“Xikwembu Xi Rhandza Munyiki La Tsakeke”
Xo sungula, Pawulo u byele Vakorinto malunghana ni vanhu va le Makedoniya, lava n’wangulo wa vona eka matshalatshala ya mphalalo a ma ri xikombiso lexinene. Pawulo u tsarile: “Hi nkarhi wa ndzingo lowukulu loko va xaniseka, ntsako wa vona lowukulu ni vusiwana bya vona lebyikulu swi andzise rifuwo ra ku hanana ka vona.” Vanhu va le Makedoniya a va nga lavi ku khutaziwa leswaku va nyika. Ku hambana ni sweswo, Pawulo u vule leswaku “vona a va hambeta va hi kombela hi xikhongotelo lexikulu hi ku tilavela ka vona lunghelo ra ku nyika ka musa.” Ku hanana hi ntsako ka vanhu va le Makedoniya hi kona loku xiyekaka ngopfu loko hi xiya leswaku vona hi voxe a va ri ‘evusiwaneni lebyikulu.’—2 Vakorinto 8:2-4.
Ntirho Wo Phalala
A KU ri kwalomu ka 46 C.E., naswona tiko ra Yudiya a ri weriwe hi ndlala. Leswi swakudya leswi a swi ri kona a swi ri switsongo swinene, a swi durha swinene naswona vadyondzisiwa va Kreste va le Yudiya a va nga ta swi kota ku swi xava. A ku ri ni ndlala leyikulu, kutani vadyondzisiwa lava a va ri eYudiya a va lava mpfuno lowukulu. Hambiswiritano, a va ri ekusuhi ni ku vona nsirhelelo wa Yehovha lowu vadyondzisiwa va Kreste a va nga si tshama va wu vona. Xana i yini leswi a swi ta humelela?
(2 Vakorinto 8:4) kasi vona a va hambeta va hi kombela hi xikhongotelo lexikulu hi ku tilavela ka vona lunghelo ra ku nyika ka musa ni ra ku hlanganyela evutirhelini lebyi vekeriweke vakwetsimi.
Ntirho Wo Phalala
4 Eka papila rakwe ra vumbirhi leri a ri tsaleleke Vakorinto, Pawulo u hlamusele leswaku Vakreste va ni vutirheli byimbirhi. Hambileswi papila ra Pawulo a ri tsaleriwe Vakreste lava totiweke, namuntlha marito yakwe ma tirha ni le ka “tinyimpfu tin’wana” ta Kreste. (Yoh. 10:16) Xiphemu xin’wana xa vutirheli bya hina i “vutirheli bya ku vuyelelana,” ku nga ntirho wa hina wo chumayela ni wo dyondzisa. (2 Kor. 5:18-20; 1 Tim. 2:3-6) Xiphemu xin’wana xi katsa vutirheli lebyi hi byi endlelaka vapfumeri-kulorhi. Hi ku kongoma, Pawulo a a kombetela eka ‘vutirheli byo phalala.’ (2 Kor. 8:4) Xiga lexi nge “vutirheli bya ku vuyelelana” ni lexi nge ‘vutirheli byo phalala,’ hinkwaswo ka swona swi hundzuluxeriwe ku suka eka rito ra Xigriki leri nge di·a·ko·niʹa leri vulaka “vutirheli.” Ha yini sweswo swi ri leswi xiyekaka?
5 Hi ku tirhisa rito leri fanaka ra Xigriki eka mintirho leyimbirhi, Pawulo u fanise ntirho wo phalala ni mixaka yin’wana ya vutirheli leyi a yi endliwa evandlheni ra Vukreste. U vule leswi eku sunguleni: “Ku ni mintirho yo hambana-hambana, kambe i Xikwembu xin’we lexi endlaka mintirho hinkwayo eka vanhu hinkwavo. Kambe mintirho leyi hinkwayo yi endliwa hi moya wun’we.” (1 Kor. 12:4-6, 11) Entiyisweni, Pawulo u fanise vutirheli byo hambana-hambana bya vandlha ni “ntirho wo kwetsima.” (Rhom. 12:1, 6-8) A swi hlamarisi leswi a voneke swi fanerile leswaku a nyikela hi nkarhi wun’wana wakwe leswaku a “tirhela vakwetsimi”!—Rhom. 15:25, 26.
6 Pawulo u pfune Vakorinto ku twisisa leswaku ha yini ntirho wo phalala a wu ri xiphemu xa vutirheli ni vugandzeri bya vona eka Yehovha. Xiya leswi a swi vuleke: Vakreste lava nyikelaka hi mphalalo va endla tano hikuva va “titsongahatela mahungu lamanene malunghana na Kreste.” (2 Kor. 9:13) Xisweswo, va susumetiwa hi ku navela ka vona ku tirhisa tidyondzo ta Kreste, ta leswaku Vakreste va pfuna vapfumeri-kulobye. Pawulo u vule leswaku swiendlo swa rirhandzu leswi va swi endlelaka vamakwerhu va vona, i swikombiso swa “musa lowu nga faneriwiki lowukulu wa Xikwembu.” (2 Kor. 9:14; 1 Pet. 4:10) Xisweswo, loko xi vulavula hi ku tirhela vamakwerhu va hina lava pfumalaka, leswi katsaka ntirho wo phalala, Xihondzo xo Rindza xa December 1, 1975, xi vule hi ku kongoma xi ku: “A hi fanelanga hi kanakana leswaku Yehovha Xikwembu ni N’wana wakwe Yesu Kreste va wu teka wu ri wa nkoka ntirho wa muxaka lowu.” I ntiyiso leswaku ntirho wo phalala i ntirho wo kwetsima lowu nga wa nkoka.—Rhom. 12:1, 7; 2 Kor. 8:7; Hev. 13:16.
(2 Vakorinto 9:7) Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.
Ndlela Leyi Mintirho Ya Mfumo Yi Seketeriwaka Ha Yona Hi Timali
10 Xo sungula, hi humesa minyikelo ya ku tirhandzela hileswi hi rhandzaka Yehovha naswona hi lavaka ku ‘endla swilo leswi tsakisaka ematihlweni yakwe.’ (1 Yoh. 3:22) Entiyisweni Yehovha u tsakisiwa hi mugandzeri loyi a nyikaka swi huma embilwini. A hi kambisiseni marito ya muapostola Pawulo ya malunghana ni ku nyikela ka Vakreste. (Hlaya 2 Vakorinto 9:7.) Mukreste wa ntiyiso a nga kanakani loko a fanele a nyikela kumbe ku sindzisiwa. Ematshan’weni ya sweswo, u nyikela “hilaha a boheke hakona embilwini yakwe.” Leswi vulaka leswaku, u nyikela endzhaku ka loko a anakanyisise hi xilaveko xa kona ni ndlela leyi a nga nyikelaka ha yona. Munyiki wo tano wa rhandzeka eka Yehovha, hikuva “Xikwembu xi rhandza munyiki la tsakeke.” Vuhundzuluxeri byin’wana byi hlayekisa xileswi: “Xikwembu xi rhandza vanhu lava rhandzaka ku nyika.”
Endla Ndzavisiso
(2 Vakorinto 9:15) A ku nkhensiwe Xikwembu hikwalaho ka nyiko ya xona ya mahala leyi nga hlamuselekiki.
Mi Susumetiwa Hi ‘Nyiko Ya Xikwembu Ya Mahala Leyi Nga Hlamuselekiki’
2 Pawulo a swi tiva leswaku gandzelo ra Yesu i xitiyisekiso xa leswaku switshembiso hinkwaswo swa Xikwembu leswinene swi ta hetiseka. (Hlaya 2 Vakorinto 1:20.) Leswi swi vula leswaku ‘nyiko ya Xikwembu ya mahala leyi nga hlamuselekiki’ yi katsa gandzelo ra Yesu ni swilo hinkwaswo leswinene ku katsa ni rirhandzu leri Yehovha a hi kombaka rona. Nyiko leyi ya nkoka swinene swa tika ku yi hlamusela hi ndlela leyi hi nga ta yi twisisa hilaha ku heleleke. Xana nyiko leyi yo hlawuleka yi fanele yi hi endla hi titwa njhani? Naswona xana yi nga hi susumetela njhani ku lunghiselela Xitsundzuxo xa rifu ra Kreste hi Ravunharhu, March 23, 2016?
(2 Vakorinto 10:17) Kambe loyi a tibumaka, a a tibume eka Yehovha.
Xana Swi Hoxile Ku Tinyungubyisa?
EMatsalweni ya Vukreste ya Xigriki, riendli leri nge kau·khaʹo·mai, leri hundzuluxeriweke ri va “ku tinyungubyisa, khana, ku tibuma,” ri tirhisiwa hi ndlela leyinene ni leyo biha. Hi xikombiso, Pawulo u vula leswaku a “hi khaneni, hi ri ni ntshembo wa ku kuma ku vangama ka Xikwembu.” U tlhele a ku: “Loyi a tibumaka, a a tibume eka Yehovha.” (Varhoma 5:2; 2 Vakorinto 10:17) Leswi swi vula ku tinyungubyisa hi Yehovha tanihi Xikwembu xa hina, leswi swi nga endlaka leswaku hi khana hikwalaho ka vito rakwe lerinene ni ndhuma yakwe.
Ku Hlayiwa Ka Bibele
(2 Vakorinto 7:1-12) Hikokwalaho, leswi hi nga ni switshembiso leswi, varhandziwa, a hi tibasiseni eka swilo hinkwaswo leswi nyamisaka nyama ni moya, hi hetisekisa vukwetsimi hi ku chava Xikwembu. 2 Hi pfuleleni ndhawu. A hi endlanga munhu leswi hoxeke, a hi onhanga munhu, a hi dyelelanga munhu. 3 Leswi a ndzi swi vuleli ku mi vona nandzu. Hikuva ndzi vurile eku sunguleni leswaku mi le timbilwini ta hina leswaku mi fa ni ku hanya na hina. 4 Ndzi ni ntshunxeko lowukulu wo vulavula eka n’wina. Ndzi tibuma ngopfu malunghana na n’wina. Ndzi tale nchavelelo, ndzi khapakhapa ntsako eku xanisekeni ka mina hinkwako. 5 Entiyisweni, loko hi fika eMakedoniya, nyama ya hina a yi kumanga ku wisa, kambe hi ye emahlweni hi xaniseka hi tindlela hinkwato—a ku ri ni tinyimpi ehandle, ku ri ni ku chava endzeni. 6 Nilokoswiritano Xikwembu, lexi chavelelaka lava tsongahatiweke, xi hi chavelerile hi vukona bya Tito; 7 kambe ku nga ri ntsena hi vukona byakwe, kambe ni hi nchavelelo lowu mi n’wi chaveleleke ha wona, hileswi a tlheleke a hi tisela rito ra ku navela ka n’wina, ku kolola ka n’wina, ku ndzi hisekela ka n’wina; lerova ndzi tsake hilaha ku engetelekeke. 8 Hikwalaho, hambiloko ndzi mi hlunamisile hi papila ra mina, a ndzi tisoli. Hambiloko ndzi tisorile eku sunguleni, (ndza swi vona leswaku papila leriya ri mi hlunamisile, kambe a swi ri swa nkarhinyana,) 9 sweswi ndza tsaka, ku nga ri ntsena hileswi a mi hlunamile, kambe hileswi a mi hlunamele eku hundzukeni; hikuva a mi hlunamisiwe hi ndlela ya vukwembu, leswaku mi nga tshuki mi vaviseka hambi ku ri hi yini hikwalaho ka hina. 10 Hikuva ku hlunama hi mukhuva wa vukwembu ku tisa ku hundzukela eku ponisiweni loku mi nga ta ka mi nga tisoli hakona; kambe ku hlunama ka misava ku tswala rifu. 11 Hikuva maswivo, nchumu lowu, ku hlunamisiwa ka n’wina hi ndlela ya vukwembu, ku tswale ku gingiriteka lokukulu ngopfu eka n’wina, ina, ku tibasisa ka n’wina, ina, ku hlundzuka, ina, ku chava, ina, ku navela, ina, ku hiseka, ina, ku lulamisa leswi hoxeke! Mi tikombise mi tengile hi tindlela hinkwato emhakeni leyi. 12 Hakunene, hambiloko ndzi mi tsalerile, a ndzi nga mi tsaleli malunghana ni la endleke leswi hoxeke, hambi ku ri la hoxeriweke, kambe leswaku ku gingiriteka ka n’wina ha hina ku ta kombisiwa exikarhi ka n’wina emahlweni ka Xikwembu.
MAY 20-26
LESWI HI SWI DYONDZAKA EBIBELENI | 2 VAKORINTO 11-13
“Mutwa Lowu Pawulo A Ri Na Wona ‘eNyameni’”
(2 Vakorinto 12:7) ntsena hikwalaho ka tinhlavutelo ta mina leti tlurisaka. Hikokwalaho, leswaku ndzi nga titwi ndzi tlakusiwe ku tlurisa, ndzi nghenisiwe mutwa enyameni, ntsumi ya Sathana, leswaku yi tshamela ku ndzi makala, leswaku ndzi nga tlakusiwi ku tlurisa.
Ku Kuma Matimba Hambiloko U Tsanile
Nandza un’wana wo tshembeka u kombele Yehovha leswaku a susa “mutwa enyameni” ya yena, lowu a wu ri xiphiqo lexi ngo va tshamelo maxelo. Muapostola Pawulo u kombele Xikwembu kanharhu leswaku xi n’wi susela xiphiqo lexi. Ku nga khathariseki leswaku a ku ri xiphiqo xa njhani, swi nga ha endleka xi endle leswaku Pawulo a nga tiphini entirhweni wa Yehovha, ku fana ni loko a ri ni mutwa lowu karhataka. Pawulo u vule leswaku ku tiyisela mutwa lowu enyameni a swi fana niloko a tshamela ku biwa. Yehovha u n’wi hlamule a ku: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.” Yehovha a nga wu susanga mutwa wolowo enyameni. Pawulo a a fanele a lwisana na wona, kambe u te: “Loko ndzi tsanile, hi kona ndzi vaka ni matimba.” (2 Kor. 12:7-10) Xana a a vula yini?
(2 Vakorinto 12:8, 9) Hikwalaho ka leswi ndzi kombele Hosi kanharhu leswaku wu suka eka mina; kambe kunene yona yi ndzi byele yi ku: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.” Hikokwalaho, hi ku tsaka lokukulu, swi nga antswa ndzi tibuma hi ku tsana ka mina, leswaku matimba ya Kreste ma tshama ehenhla ka mina ku fana ni ntsonga.
Yehovha U Nyika ‘Moya Lowo Kwetsima Eka Lava N’wi Kombelaka’
17 Loko Xikwembu xi hlamula swikhongelo swa Pawulo xi n’wi byele leswi: “Musa wa mina lowu nga faneriwiki wu enele ha wena; hikuva matimba ya mina ma endliwa lama hetisekeke eku tsaneni.” Pawulo u te: “Hikokwalaho, hi ku tsaka lokukulu, swi nga antswa ndzi tibuma hi ku tsana ka mina, leswaku matimba ya Kreste ma tshama ehenhla ka mina ku fana ni ntsonga.” (2 Vakorinto 12:9; Pisalema 147:5) Hikwalaho, Pawulo u swi vonile leswaku hi ku tirhisa Kreste, matimba lama sirhelelaka ya Xikwembu a ma tshame ehenhla ka yena ku fana ni ntsonga. Namuntlha, Yehovha u hlamula swikhongelo swa hina hi ndlela leyi fanaka. U sirhelela malandza ya yena ku fana ni vutumbelo ehenhla ka wona.
18 Ina, ntsonga a wu siveli mpfula leswaku yi nga ni kumbe ku yimisa xidzedze leswaku xi nga hungi, kambe wu nyikela nsirhelelo wo karhi eka mpfula ni xidzedze. Hilaha ku fanaka, vutumbelo lebyi kumiwaka hi “matimba ya Kreste” a byi endli leswaku miringo kumbe maxangu ma tshika ku hi wela. Kambe, byi hi sirhelela hi tlhelo ra moya eka swiyimo leswi nga ni khombo swa misava leyi, swin’we ni minhlaselo ya mufumi wa yona Sathana. (Nhlavutelo 7:9, 15, 16) Hikokwalaho, hambiloko u langutane ni ndzingo lowu nga ‘sukiki eka wena,’ u nga tiyiseka leswaku Yehovha wa ku xiya ku tikarhata ka wena ni leswaku u xi hlamurile “xirilo xa wena.” (Esaya 30:19; 2 Vakorinto 1:3, 4) Pawulo u tsarile: “Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.”—1 Vakorinto 10:13; Vafilipiya 4:6, 7.
(2 Vakorinto 12:10) Hikokwalaho ndza tsaka eku tsaneni, eku rhukaniweni, eswiyin’weni swa ku pfumala, eku xanisiweni ni le ku nonon’hweriweni, hikwalaho ka Kreste. Hikuva loko ndzi tsanile, hi kona ndzi vaka ni matimba.
“Loyi A Karhaleke U N’wi Nyika Matimba”
8 Hlaya Esaya 40:30. Hambiloko hi ri ni vuswikoti byo karhi, ku ni swilo leswi hi nga kotiki ku swi endla hi matimba ya hina. Yoleyo i dyondzo leyi hinkwerhu hi faneleke hi yi tsundzuka. Muapostola Pawulo a ri ni vuswikoti kambe ku ni swilo leswi a nga swi koti ku swi endla. Endzhaku ka loko a tiphofurile eka Xikwembu, xi n’wi byele leswi: “Matimba ya mina ma endliwa lama hetisekeke eku tsaneni.” Pawulo u swi twisisile sweswo. Kutani u gimete hi ku vula a ku: “Loko ndzi tsanile, hi kona ndzi vaka ni matimba.” (2 Kor. 12:7-10) A a vula yini hi marito wolawo?
9 Pawulo u xiye leswaku ku ni swilo leswi a nga ta swi kota ku swi endla handle ko pfuniwa hi Xikwembu. Moya lowo kwetsima wa Xikwembu a wu ta n’wi pfuna laha a kayivelaka kona. Ku engetela kwalaho, moya wa Xikwembu a wu ta pfuna Pawulo leswaku a endla mitirho leyi a nga ta kota ku yi endla hi matimba yakwe. Swi tano ni le ka hina namuntlha. Loko Yehovha a hi nyika matimba hi ta tiya.
Endla Ndzavisiso
(2 Vakorinto 12:2-4) Ndzi tiva munhu loyi a nga ni vun’we na Kreste, loyi emalembeni ya 14 lama hundzeke—leswaku a a ri hi miri a ndzi swi tivi, kumbe a a nga ri hi miri a ndzi swi tivi; swi tiviwa hi Xikwembu—a tekeriweke etilweni ra vunharhu a ri tano. 3 Ina, ndza n’wi tiva munhu wo tano—leswaku a a ri hi miri kumbe a a nga ri hi miri, swi tiviwa hi Xikwembu—4 leswaku u tekeriwe eparadeyisini kutani a twa marito lama nga vuriwiki, lawa swi nga pfumeleriwiki leswaku munhu a ma vula.
Swivutiso Swa Vahlayi
‘Tilo ra vunharhu’ leri boxiweke eka 2 Vakorinto 12:2 i Mfumo wa Mesiya lowu nga emavokweni ya Yesu Kreste swin’we ni lava 144 000, ku nga “matilo lamantshwa.”—2 Pet. 3:13.
Wu vitaniwa ‘tilo ra vunharhu’ hikuva Mfumo lowu i wukulu, wu tlakukile.
‘Paradeyisi’ leyi Pawulo a “tekeriwe” eka yona exivonweni yi vula (1) Paradeyisi ya xiviri leyi nga ta va kona laha misaveni, (2) xiyimo xa ku rhula lexi nga ta va kona laha misaveni enkarhini lowu taka, lexi tlulaka lexi nga kona sweswi ni (3) ‘paradeyisi ya Xikwembu’ etilweni leyi nga ta va kona hi nkarhi wun’we ni misava leyintshwa.
(2 Vakorinto 13:12) Xewetanani hi ku ntswontswana ko kwetsima.
it-2 177
Ku Ntswontswana
“Ku Ntswontswana Ko Kwetsima.” Hi nkarhi wa Vakreste vo sungula a ku ri ni “ku ntswontswana ko kwetsima” (Rhm 16:16; 1Ko 16:20; 2Ko 13:12; 1Te 5:26) kumbe “ku ntswontswana ka rirhandzu” (1Pe 5:14), kumbexana, a swi endliwa hi vanhu va rimbewu leri fanaka. Mukhuva wolowo wo xeweta hi ku ntswontswana, swi nga endleka wu sungule hi Vaheveru. Hambileswi Matsalwa ma nga boxiki vuxokoxoko hinkwabyo bya “ku ntswontswana ko kwetsima” kumbe “ku ntswontswana ka rirhandzu,” sweswo swi kombisa rirhandzu ni vun’we lebyi a byi ri kona evandlheni ra Vukreste.—Yh 13:34, 35.
Ku Hlayiwa Ka Bibele
(2 Vakorinto 11:1-15) Ndzi navela leswaku mi ndzi lehisela mbilu hi ku pfumala ku anakanyela lokutsongo. Kambe, entiyisweni, ma ndzi lehisela mbilu! 2 Hikuva ndzi ni mavondzo eka n’wina hi mavondzo ya vukwembu, hikuva mina hi xiviri ndzi mi vutele eka nuna un’we leswaku ndzi ta mi nyiketa mi ri nhwana la tengeke eka Kreste. 3 Kambe ndza chava leswaku hi ndlela yo karhi, hilaha nyoka yi kanganyiseke Evha hakona hi vukanganyisi bya yona, mianakanyo ya n’wina yi nga onhiwa eka ku tshembeka ni ku tenga loku faneleke Kreste. 4 Hikuva, hilaha swi nga hakona, loko un’wana a fika a ta chumayela ha Yesu un’wana ku nga ri yena loyi hi chumayelaka ha yena, kumbe mi amukela moya wun’wana ku nga ri wona lowu mi wu amukeleke, kumbe mahungu lamanene ku nga ri wona lawa mi ma amukeleke, mi n’wi lehisela mbilu hi ku olova. 5 Hikuva ndzi xiya leswaku a ndzi si kumeka ndzi ri wa le hansi hambi ku ri hi nchumu wun’we eka vaapostola va n’wina lavanene ngopfu. 6 Kambe hambiloko ndzi pfumala vutshila eku vulavuleni, hakunene a ndzi byi pfumali evutivini; kambe hi ndlela yin’wana ni yin’wana a hi byi kombisa eka n’wina eka swilo hinkwaswo. 7 Kumbe, xana ndzi endle xidyoho hi ku titsongahata leswaku n’wina mi tlakusiwa, hileswi ndzi mi byeleke mahungu lamanene ya Xikwembu hi ku tsaka handle ka nxavo? 8 Mavandlha man’wana ndzi ma kanganyisile hi ku amukela malunghiselelo ku endlela leswaku ndzi tirhela n’wina; 9 kasi loko ndza ha ri na n’wina naswona ndzi wele eku pfumaleni, a ndzi vanga ndzhwalo ni le ka un’we, hikuva vamakwerhu lava humaka eMakedoniya va nyikele hi xitalo leswi ndzi swi kayivelaka. Ina, ndzi tihlayisile hi tindlela hinkwato leswaku ndzi nga vi ndzhwalo eka n’wina naswona ndzi ta ya emahlweni ndzi tihlayisa tano. 10 I ntiyiso wa Kreste eka mina leswaku a ku nge vekiwi xihinga eku tibumeni loku ka mina eswifundzheni swa Akaya. 11 Hi xivangelo xihi? Hikuva a ndzi mi rhandzi ke? Xikwembu xa swi tiva leswaku ndza mi rhandza. 12 Kutani leswi ndzi swi endlaka ndza ha ta swi endla, leswaku ndzi ta herisa vukanganyisi eka lava lavaka vukanganyisi leswaku va ta kumiwa va ringana na hina exikhundlheni lexi va tibumaka ha xona. 13 Hikuva vanhu vo tano i vaapostola va mavunwa, vatirhi lava xisaka, va tihundzula vaapostola va Kreste. 14 Naswona a swi hlamarisi, hikuva Sathana hi byakwe u tihundzula ntsumi ya ku vonakala. 15 Hikokwalaho a hi nchumu lowukulu loko vatirheli vakwe na vona va tihundzula vatirheli va ku lulama. Kambe makumu ya vona ma ta ya hi mintirho ya vona.
MAY 27–JUNE 2
LESWI HI SWI DYONDZAKA EBIBELENI | VAGALATIYA 1-3
“Ndzi N’wi Kanete Hi Langutanile”
(Vagalatiya 2:11-13) Hambiswiritano, loko Khefasi a ta eAntiyoka, ndzi n’wi kanete hi langutanile, hikuva a a ri ni xisolo. 12 Hikuva ku nga si fika vavanuna van’wana lava humaka eka Yakobo, a a tshamela ku dya ni vanhu va matiko; kambe loko va fika, a suka kutani a tihlawula, hi ku chava va ntlawa lowu yimbeke. 13 Vayuda lavan’wana hinkwavo na vona va tihlanganisa na yena eka vukanganyisi lebyi, lerova hambi a ri Barnaba u fambisane na vona eka vukanganyisi bya vona.
Xana U Hoxa Xandla Eku Kombiseni Ka Vululami Bya Yehovha?
16 Hlaya Vagalatiya 2:11-14. Petro u endle sweswo hikwalaho ko chava vanhu. (Swiv. 29:25) Hambileswi Petro a ri tiva langutelo ra Yehovha emhakeni yoleyo, kambe a chava leswaku Vayuda lava nga Vakreste va le Yerusalema va ta n’wi tekela ehansi loko a tihlanganisa ni Vakreste lava nga yimbangiki. Muapostola Pawulo loyi a ri kona eka nhlangano lowu a wu ri eYerusalema hi 49 C.E., u ye eAntiyoka a ya byela Petro hi vukanganyisi byakwe. (Mint. 15:12; Gal. 2:13) Vakreste lava a va nga ri Vayuda a va ta titwa njhani hi xihoxo lexi Petro a xi endleke? Xana a va ta khunguvanyeka? Xana Petro a a ta lahlekeriwa hi malunghelo ya risima hikwalaho ka xihoxo xakwe?
(Vagalatiya 2:14) Kambe loko ndzi vona leswaku a va nga fambi va lulama hi ku ya hi ntiyiso wa mahungu lamanene, ndzi byele Khefasi emahlweni ka vona hinkwavo: “Loko wena, hambileswi u nga Muyuda, u hanya kukota leswi matiko ma hanyisaka xiswona, ku nga ri leswi Vayuda va hanyisaka xiswona, swi endlekisa ku yini leswaku u sindzisa vanhu va matiko ku hanya hi ku ya hi mukhuva wa Vayuda?”
“A Ku Na Xikhunguvanyiso” Eka Lava Rhandzaka Yehovha
12 Petro u kombise ku chava vanhu, mikarhi yin’wana ku chava koloko ku n’wi vangele ku endla swihoxo; kambe u tshame a tshembekile eka Yesu na Yehovha. Hi xikombiso, u landzule N’wini wa yena erivaleni, ku nga ri kan’we kambe kanharhu. (Luka 22:54-62) Endzhakunyana, Petro u tsandzekile ku endla swilo hi ndlela ya Vukreste, a khoma vapfumeri lava nga vanhu va Matiko onge hiloko Vakreste va Vayuda lava yimbeke va lulame ku va tlula. Hambiswiritano, muapostola Pawulo u yi vone kahle mhaka yoleyo evandlheni a ku nga fanelanga ku va ni xihlawuhlawu. Langutelo ra Petro a a ri hoxile. Pawulo u tshinye Petro hi ku kongoma emahlweni ka ku va van’wana evandlheni va tekelela xiendlo xa Petro. (Gal. 2:11-14) Xana Petro u khunguvanyisiwe hi ndzayo leyi ivi a tshika ku tsutsuma emphikizanweni wa vutomi? Doo! U anakanyisise swinene hi ndzayo ya Pawulo, a yi tirhisa ivi a ya emahlweni ni mphikizano.
Endla Ndzavisiso
(Vagalatiya 2:20) Ndzi beleriwe swin’we na Kreste. A ka ha ri mina loyi a hanyaka, kambe i Kreste loyi a hanyaka evun’weni na mina. Hakunene, vutomi lebyi ndzi byi hanyaka sweswi ndzi ri wa nyama ndzi hanya hi ripfumelo leri nga eka N’wana wa Xikwembu, loyi a ndzi rhandzeke kutani a tinyiketa hikwalaho ka mina.
Tirhela Xikwembu Hi Ku Tshembeka Hambiloko U Langutana Ni “Mahlomulo Yo Tala”
20 Ku vuriwa yini hi minhlaselo leyi tumbeleke? Hi xikombiso, hi nga lwisana njhani ni ku hela matimba? Ndlela yin’wana ya matimba yo endla tano i ku anakanyisisa hi nkutsulo. Muapostola Pawulo u endle tano. Minkarhi yin’wana a a titwa a tshikilelekile. Kambe a a swi tiva leswaku Kreste a nga felanga vanhu lava hetisekeke, u fele vadyohi. Naswona Pawulo a a ri un’wana wa vadyohi volavo. Entiyisweni, u tsale a ku: “Ndzi hanya hi ripfumelo leri nga eka N’wana wa Xikwembu, loyi a ndzi rhandzeke kutani a tinyiketa hikwalaho ka mina.” (Gal. 2:20) Pawulo u wu amukerile nkutsulo. A a pfumela leswaku nkutsulo wu tirha eka yena n’wini.
21 Langutelo rolero—ro teka nkutsulo tanihi nyiko ya wena leyi humaka eka Yehovha—ri nga ku vuyerisa swinene. Sweswo a swi vuli leswaku ku hela matimba ku ta namba ku hela hi ku hatlisa. Van’wana va hina hi nga ha boheka ku lwisana ni nhlaselo lowu lowu tumbeleke kukondza hi nghena emisaveni leyintshwa. Kambe tsundzuka: Hakelo yi ta kumiwa hi lava va nga lan’wiki. Hi le kusuhi swinene ni siku leri vangamaka laha Mfumo wa Xikwembu wu nga ta tisa ku rhula wu tlhela wu endla leswaku vanhu hinkwavo lava tshembekaka va hetiseka. Tiyimisele ku nghena eMfun’weni wolowo—hambiloko u ta nghena hi mahlomulo yo tala.
(Vagalatiya 3:1) N’wina Vagalatiya vo hunguka, i mani loyi a mi tiseke ehansi ka nhlohlotelo wo biha, n’wina lava Yesu Kreste a kombisiweke erivaleni ematihlweni ya n’wina a beleriwile?
it-1 880
Papila Leri Yaka Eka Vagalatiya
Marito ya Pawulo lama hlamarisaka, lama nge, “N’wina Vagalatiya vo hunguka,” a ku na vumbhoni lebyi kombisaka leswaku papila leri a ri kongomisiwe eka rixaka ro karhi ra le Galatiya n’walungu. (Ga 3:1) Ematshan’weni ya sweswo, Pawulo a a tshinya vanhu vo karhi evandlheni lava a va pfumelela ku hambukisiwa hi tidyondzo ta Vayuda leti a ti sindzisa vanhu ku hlayisa Nawu ku nga ri ‘ripfumelo hikwalaho ka mitirho’ ku nga leswi a swi laviwa hi ntwanano lowuntshwa. (2:15–3:14; 4:9, 10) ‘Mavandlha ya le Galatiya’ (1:2) lawa Pawulo a ma tsaleleke a ma katsa tinxaka to hambanahambana, ku nga Vayuda ni lava a va nga ri Vayuda, lava yimbeke ni lava nga yimbangiki, a swi kanakanisi leswaku van’wana va vona a va ha namarhele mikhuva ya va kokwa wa vona. (Min 13:14, 43; 16:1; Ga 5:2) Hinkwavo a va vuriwa Vakreste va le Galatiya hikuva ndhawu leyi a va tshama eka yona a yi vuriwa Galatiya. Kahlekahle Pawulo a tsalela Vakreste lava a a va tiva kahle, a va tshama edzongeni wa xifundzha xa Rhoma, ku nga ri vanhu lava a nga va tivi lava a va tshama exiphen’wini xa le n’walungu lava a nga si tshama a va endzela.
Ku Hlayiwa Ka Bibele
(Vagalatiya 2:11-21) Hambiswiritano, loko Khefasi a ta eAntiyoka, ndzi n’wi kanete hi langutanile, hikuva a a ri ni xisolo. 12 Hikuva ku nga si fika vavanuna van’wana lava humaka eka Yakobo, a a tshamela ku dya ni vanhu va matiko; kambe loko va fika, a suka kutani a tihlawula, hi ku chava va ntlawa lowu yimbeke. 13 Vayuda lavan’wana hinkwavo na vona va tihlanganisa na yena eka vukanganyisi lebyi, lerova hambi a ri Barnaba u fambisane na vona eka vukanganyisi bya vona. 14 Kambe loko ndzi vona leswaku a va nga fambi va lulama hi ku ya hi ntiyiso wa mahungu lamanene, ndzi byele Khefasi emahlweni ka vona hinkwavo: “Loko wena, hambileswi u nga Muyuda, u hanya kukota leswi matiko ma hanyisaka xiswona, ku nga ri leswi Vayuda va hanyisaka xiswona, swi endlekisa ku yini leswaku u sindzisa vanhu va matiko ku hanya hi ku ya hi mukhuva wa Vayuda?” 15 Hina lava hi nga Vayuda hi ntumbuluko, naswona hi nga riki vadyohi lava humaka eka vamatiko, 16 hilaha hi tivaka hakona leswaku munhu u vuriwa la lulameke ku nga ri hikwalaho ka mintirho ya nawu, kambe hi ripfumelo ntsena eka Kreste Yesu, tanihi leswi na hina hi veke ni ripfumelo eka Kreste Yesu, leswaku hi vuriwa lava lulameke hikwalaho ka ripfumelo eka Kreste, naswona ku nga ri hikwalaho ka mintirho ya nawu, hikuva ku hava nyama leyi nga ta vuriwa leyi lulameke hikwalaho ka mintirho ya nawu. 17 Kutani loko na hina hi kumiwe hi ri vadyohi, hi ku lava ku vuriwa lava lulameke hikwalaho ka Kreste, xana Kreste hakunene i mutirheli wa xidyoho? Sweswo swi nga tshuki swi endleka! 18 Hikuva loko ndzi tlhela ndzi aka swilo leswi ndzi tshameke ndzi swi wisa, ndzi tikombisa ndzi ri mutlula-nawu. 19 Loko ku ri mina, hikwalaho ka nawu ndzi file enawini, leswaku ndzi ta hanya eka Xikwembu. 20 Ndzi beleriwe swin’we na Kreste. A ka ha ri mina loyi a hanyaka, kambe i Kreste loyi a hanyaka evun’weni na mina. Hakunene, vutomi lebyi ndzi byi hanyaka sweswi ndzi ri wa nyama ndzi hanya hi ripfumelo leri nga eka N’wana wa Xikwembu, loyi a ndzi rhandzeke kutani a tinyiketa hikwalaho ka mina. 21 A ndzi wu bakanyi musa lowu nga faneriwiki wa Xikwembu; hikuva loko ku lulama ku tisiwa hi nawu, kahle-kahle Kreste a nga felanga nchumu.”