Swikombo Swa Mikandziyiso Leyi Nga Eka Xiyimiso Xa Mihlangano Xa Mahanyelo Ni Ntirho Wa Hina Wo Chumayela
APRIL 1-7
LESWI HI SWI DYONDZAKA EBIBELENI | 1 VAKORINTO 7-9
“Ku Nga Byi Ngheneli Vukati I Nyiko”
(1 Vakorinto 7:32) Kunene, ndzi lava mi ntshunxeka eku vileleni. Wanuna la nga tekangiki u vilela hi swilo swa Hosi, hi ndlela leyi a nga amukelekaka ha yona eka Hosi.
Vuyeriwa Swinene Hileswi U Nga Nghenelangiki Vukati
3 Hakanyingi munhu loyi a nga nghenelangiki vukati u ni nkarhi wo tala ni ntshunxeko lowukulu ku tlula munhu loyi a ngheneleke vukati. (1 Kor. 7:32-35) Byebyo i vuyelo byo hlawuleka lebyi nga ha n’wi pfulelaka ndlela yo ndlandlamuxa vutirheli byakwe, yo ndlandlamuka erirhandzwini ni yo tshinela eka Yehovha. Hikwalaho, Vakreste vo hlayanyana va xiye ndlela leyi swi vuyerisaka ha yona ku nga ngheneli vukati kutani va tibohe ku “amukela” ku nga byi ngheneli ku ringana nkarhi wo karhi. Kumbexana eku sunguleni van’wana a va nga tiyimiselanga ku ka va nga ngheneli vukati, kambe loko swiyimo swa vona swi cincile, va anakanyisise swinene hi xiyimo xa vona kutani va xiya leswaku na vona va nga swi kota ku tshama va nga ngheneli vukati hi ku pfuniwa hi Yehovha. Xisweswo, va pfumelelana ni swiyimo swa vona leswi cinceke kutani va amukela ku tshama va nga byi ngheneli vukati.—1 Kor. 7:37, 38.
(1 Vakorinto 7:33, 34) Kambe wanuna la tekeke u vilela hi swilo swa misava, hi ndlela leyi a nga amukelekaka ha yona eka nsati wa yena, 34 naswona u avene. Ku tlula kwalaho, wansati la nga tekiwangiki loyi a nga nhwana, u vilela hi swilo swa Hosi, leswaku a kwetsima emirini ni le moyeni wa yena. Hambiswiritano, wansati la tekiweke u vilela hi swilo swa misava, hi ndlela leyi a nga amukelekaka ha yona eka nuna wa yena.
Tinhla-nkulu Ta Mapapila Lama Yaka Eka Vakorinto
7:33, 34—Xana “swilo swa misava” leswi wanuna la tekeke kumbe wansati la tekiweke a vilelaka ha swona i yini? Pawulo a a vulavula hi timhaka leti fambisanaka ni swilo swa vutomi bya siku ni siku leti Vakreste lava ngheneleke vukati va faneleke va karhateka ha tona. Swilo swa kona swi katsa swakudya, swiambalo ni ndhawu yo tshama eka yona, kambe a swi katsi swilo swo biha swa misava leyi, leswi Vakreste va faneleke va swi papalata.—1 Yoh. 2:15-17.
(1 Vakorinto 7:37, 38) Kambe loko munhu a yima a tiyile embilwini ya yena, a nga ri na xilaveko, kambe a kota ku lawula ku rhandza ka yena, naswona embilwini ya yena a endle xiboho xo hlayisa vutengi byakwe bya rimbewu, u ta va a endla kahle. 38 Hikwalaho loyi na yena a nyikelaka vunhwana bya yena bya rimbewu evukatini u endla kahle, kambe loyi a nga byi nyikeliki evukatini u ta va a endla kahle ngopfu.
Ku Titshamela-wexe—Ndlela Yo Tirha Handle Ko Kavanyetiwa
14 Mukreste loyi a nga nghenelangiki vukati kambe a nga rhangisiki ntirho wa Xikwembu a nga antswi ku tlula lava ngheneleke vukati. U tshama a ri yexe, ku nga ri “hikwalaho ka Mfumo,” kambe hikwalaho ka swivangelo swa yena n’wini. (Matewu 19:12) Wanuna kumbe wansati loyi a nga nghenelangiki vukati u fanele a “tikarhatela swa Hosi,” a tikarhatela ku “tsakisa Hosi,” ni ‘ku tinyikela ku tirhela Hosi handle ko kavanyetiwa.’ Leswi swi vula ku nyikela nyingiso wa hina lowu heleleke eku tirheleni ka Yehovha na Kreste Yesu. Hi ku endla tano, hi kona laha ntsena Mukreste loyi a nga nghenelangiki vukati a endlaka ku ‘antswa’ ku tlula Vakreste lava ngheneleke vukati.
Endla Ndzavisiso
(1 Vakorinto 7:11) Kambe loko a boheka ku hambana na yena, a a tshame a nga tekiwi kumbe a tlhela a vuyelelana ni nuna wa yena; naswona wanuna a nga fanelanga a tshika nsati wa yena.
lv 220-221
Xiengetelo
Eka swiyimo swin’wana leswi nga tiyiselekiki, Vakreste van’wana va hlawule ku thala vatekani va vona kumbe va dlaya vukati hambiloko va nga endlanga vuoswi. Eka swiyimo swo tano, loyi a thalaka kumbe a dlaya vukati u fanele a ‘tshama a nga teki kumbe ku tekiwa, loko swi nga ri tano va vuyelana.’ (1 Vakorinto 7:11) Loko Mukreste a ri eka xiyimo xo tano a nga na mfanelo yo lava munghana un’wana wa vukati. (Matewu 5:32) Hi leswi swiyimo leswi nga tiyiselekiki leswi van’wana va vonaka swi fanerile leswaku munhu a nga thala vukati hikwalaho ka swona.
Ku nga hlayisi ndyangu hi vomu. Ndyangu wu nga ha tikuma wu ri swisiwana, wu pfumala swo tihanyisa ha swona hikwalaho ka leswi wanuna a alaka hi vomu ku wu hlayisa. Bibele yi ri: “Loko munhu a nga pfuni . . . lava va nga va ndyangu wa yena wa xiviri, u landzurile vupfumeri, kutani u tlula ni vamatiko hi ku biha.” (1 Timotiya 5:8) Loko wanuna wo tano a nga lavi ku cinca tindlela ta yena, wansati a nga ha hlawula ku sirhelela vutomi byakwe ni bya vana va yena hi ku thala. I ntiyiso leswaku, vakulu va vandlha va fanele va kambisisa hi vukheta swihehlo swa leswaku wanuna la nga Mukreste a nga hlayisi ndyangu wakwe. Hikuva loko wanuna a ala ku wundla ndyangu wakwe a nga susiwa evandlheni.
Ku biwa hi ndlela ya tihanyi. Munghana wa vukati loyi a nga ni rigombo a nga bukutela nkatakwe lerova vutomi bya yena byi va ekhombyeni. Loko munghana wa vukati la nga ni rigombo a ri Mukreste, vakulu va fanele va kambisisa mhaka leyi ku vona loko ku ri ntiyiso kumbe mavunwa. Timholovo ni ku kariha i swilo leswi nga endlaka leswaku munhu a susiwa evandlheni.—Vagalatiya 5:19-21.
Ku siveriwa ku gandzela Xikwembu hilaha ku heleleke. Munghana wa vukati a nga tshamela ku sivela nkatakwe leswaku a gandzela Xikwembu kumbe a ringeta ku n’wi sindzisa ku tlula nawu wa Xikwembu hi tindlela to karhi. Loko swi ri tano, loyi a xungetiwaka hi ndlela leyi u fanele a tiendlela xiboho xa leswaku u ta swi kotisa ku yini ‘ku yingisa Xikwembu ku tlula munhu.’—Mintirho 5:29.
Eka swiyimo leswi ku buriweke ha swona laha henhla, munghana wa vukati la nga riki na nandzu a nga fanelanga a sindzisiwa ku thala kumbe ku tshama ni nkatakwe. Hambiloko vanghana lava wupfeke ni vakulu va vandlha va nyikela mpfuno ni ndzayo leyi humaka eMatsalweni, a va nge tivi hinkwaswo leswi endlekaka exikarhi ka nuna ni nsati. I Yehovha ntsena loyi a nga kotaka ku vona sweswo. Wansati loyi a hundzeletaka swiphiqo leswi nga kona endyangwini wakwe ntsena leswaku a ta kota ku hambana ni nuna wakwe u ta va a nga xiximi lunghiselelo ra Xikwembu ra vukati, swi tano ni le ka wanuna. Yehovha u kota ku vona loko munghana wa vukati a ringeta ku kuma marhengu yo thala vukati, hambiloko a ringeta ku tumbetela van’wana. I ntiyiso leswaku “swilo hinkwaswo swi lo dla, swi paluxeka erivaleni ematihlweni ya loyi hi nga ta tihlamulela eka yena.” (Vaheveru 4:13) Kambe loko ku ri ni xiyimo lexi nga tiyiselekiki lexi tekaka nkarhi wo leha, a nga kona Mukreste la faneleke a sola loyi a thalaka vukati hikwalaho ko tikeriwa. Eku heteleleni “hinkwerhu hi ta yima emahlweni ka xitshamo xa vuavanyisi xa Xikwembu.”—Varhoma 14:10-12.
U Nga Tshama U Tengile Emisaveni Leyo Biha
Kutani vantshwa a va fanelanga va tsutsumela vukati loko va sungula ku twa minsusumeto ya rimbewu. Vukati byi lava leswaku munhu a tiboha naswona ku hanya hi ku pfumelelana ni vutihlamuleri byebyo swi lava ku wupfa. (Genesa 2:24) Swa antswa ku rindza u kala u ‘hundza vurhumbuki bya vuntshwa,’—nkarhi lowu nsusumeto wa swa rimbewu wu nga ni matimba naswona wu nga soholotaka swiboho swa wena. (1 Vakorinto 7:36) Hakunene i vuhunguki naswona i xidyoho leswaku munhu lonkulu la navelaka ku nghenela vukati a tikhoma hi ndlela yo biha ni munhu la nga tekanangiki na yena ntsena hileswi a nga n’wi kumiki munghana wa vukati!
Ku Hlayiwa Ka Bibele
(1 Vakorinto 8:1-13) Malunghana ni swakudya leswi nyikeriwaka eka swifaniso swa hava: ha swi tiva leswaku hinkwerhu hi na byona vutivi. Vutivi bya tikukumuxa, kambe rirhandzu ra aka. 2 Loko munhu a ehleketa leswaku u tiva xo karhi, u va a nga si xi tiva hilaha a faneleke ku xi tiva hakona. 3 Kambe loko munhu a rhandza Xikwembu, u tiviwa hi xona. 4 Kutani malunghana ni ku dya swakudya leswi nyikeriwaka eka swifaniso swa hava, ha swi tiva leswaku xifaniso xa hava a hi nchumu emisaveni, ni leswaku ku ni Xikwembu xin’we ntsena. 5 Hikuva hambileswi ku nga ni lava vuriwaka “swikwembu,” hambi etilweni kumbe emisaveni, tanihi leswi ku nga ni “swikwembu” swo tala ni “tihosi” to tala, 6 kahle-kahle eka hina ku ni Xikwembu xin’we, ku nga Tatana, loyi swilo hinkwaswo swi humaka eka yena, naswona hina hi va yena; nakambe ku ni Hosi yin’we, ku nga Yesu Kreste, loyi swilo hinkwaswo swi veke kona ha yena, naswona na hina hi ve kona ha yena. 7 Nilokoswiritano, a hi vanhu hinkwavo lava nga ni vutivi lebyi; kambe van’wana, hikwalaho ka leswi va toloveleke xifaniso xa hava ku ta fika sweswi, va dya swakudya tanihi nchumu lowu nyikeriwaka eka xifaniso xa hava, kutani ripfalo ra vona ri va leri nyameke hileswi ri tsaneke. 8 Kambe swakudya a swi nge endli leswaku hi amukeleka eka Xikwembu; loko hi nga dyi, a hi kayiveli nchumu, naswona loko hi dya, a hi vuyeriwi hi nchumu. 9 Kambe tshamani mi ri karhi mi tivonela leswaku mfanelo leyi ya n’wina hi ndlela yo karhi a yi vi xikhunguvanyiso eka lava tsaneke. 10 Hikuva loko un’wana o ku vona, wena loyi u nga ni vutivi, u vurhame eswakudyeni etempeleni ya swifaniso swa hava, xana ripfalo ra yoloye la tsaneke a ri nge tiyisiwi lerova a dya swakudya leswi nyikeriweke swifaniso swa hava? 11 Kunene, munhu loyi a tsaneke u onhiwa hi vutivi bya n’wina, kasi i makwenu loyi Kreste a n’wi feleke. 12 Kambe loko mi dyohela vamakwenu hi ndlela yoleyo, kutani mi vavisa ripfalo ra vona leri tsaneke, mi dyohela Kreste. 13 Hikokwalaho, loko swakudya swi khunguvanyisa makwerhu, a ndzi nge he pfuki ndzi dye nyama nikatsongo, leswaku ndzi nga khunguvanyisi makwerhu.
APRIL 8-14
LESWI HI SWI DYONDZAKA EBIBELENI | 1 VAKORINTO 10-13
“Yehovha Wa Tshembeka”
(1 Vakorinto 10:13) A mi si weriwa hi ndzingo loko wu nga ri lowu tolovelekeke evanhwini. Kambe Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.
Swivutiso Swa Vahlayi
Muapostola Pawulo u tsale leswaku Yehovha a “nge mi tshiki mi ringiwa hi ndlela leyi tlulaka leswi mi nga swi tiyiselaka.” (1 Kor. 10:13) Xana leswi swi vula leswaku Yehovha u yi vona ka ha ri emahlweni miringo leyi hi nga yi tiyiselaka kutani a hlawula leyi hi faneleke hi langutana na yona?
▪ Loko mhaka leyi a ku ri ntiyiso anakanya ndlela leyi a yi ta khumba vutomi bya hina ha yona. Hi xikombiso, a hi nge n’wana wa makwerhu un’wana u tisungile kutani makwerhu loyi a tivutisa a ku: ‘Xana Yehovha u kambisise ka ha ri emahlweni kutani a vona leswaku mina ni nsati wa mina hi ta ri tiyiselela rifu ra n’wana wa hina? Xana leswi swi endleke hileswi Xikwembu xi voneke leswaku hi ta swi kota ku swi tiyiselela?’ Xana ku ni xivangelo lexi twalaka xo tshemba leswaku Yehovha u kunguhata ka ha ri emahlweni leswi nga ta endleka evuton’wini bya hina?
Ku anakanyisisa hi marito ya Pawulo lama nga eka 1 Vakorinto 10:13, swi endla hi vula leswaku a ku na xivangelo lexi nga eMatsalweni xo tshemba leswaku Yehovha u kambela ka ha ri emahlweni miringo leyi hi nga kotaka ku yi tiyisela kutani a hlawula leyi faneleke yi hi wela. A hi kambisiseni swivangelo swa mune leswi nga endlaka hi vula tano.
Xo sungula, Yehovha u nyike vanhu ntshunxeko wo tihlawulela. U lava leswaku hi tihlawulela ndlela leyi hi lavaka ku hanya ha yona. (Det. 30:19, 20; Yox. 24:15) Loko hi hlawula ndlela leyinene, Yehovha u ta hi kongomisa. (Swiv. 16:9) Kambe loko hi hlawula ndlela yo biha hi ta tshovela leswi hi swi byaleke. (Gal. 6:7) Loko ku ri leswaku Yehovha wa hi hlawulela miringo leyi hi faneleke hi langutana na yona, swi ta vula leswaku a hi na wona ntshunxeko wo tihlawulela.
Xa vumbirhi, Yehovha a nga hi sirheleli eka “nkarhi ni xiendlakalo lexi nga languteriwangiki.” (Ekl. 9:11) Timhangu to chavisa ti nga hi wela hikwalaho ka leswi hi nga ha vaka hi ri endhawini leyi nga fanelangiki hi nkarhi lowu nga fanelangiki. Yesu u vulavule hi mhangu leyi khumbeke vanhu va 18 lava weriweke hi xihondzo kutani va fa naswona u vule leswaku rifu ra vona a ri vangiwanga hi Xikwembu. (Luka 13:1-5) Kutani a swi twali ku vula leswaku Xikwembu xi kunguhata ka ha ri emahlweni leswaku i mani loyi a faneleke a fa kumbe a hanya eka timhangu to tano leti ngo tiendlekela.
Xa vunharhu, un’wana ni un’wana wa hina wa katseka eka swihehlo swa Sathana leswi khumbaka mhaka ya ku tshembeka. Tsundzuka leswaku Sathana u sole vanhu hinkwavo lava tirhelaka Yehovha, a vula leswaku a va nge swi koti ku tshama va tshembekile eka yena loko va langutane ni miringo. (Yobo 1:9-11; 2:4; Nhlav. 12:10) Loko Yehovha a a hi hlawulela miringo leyi faneleke yi hi wela hikwalaho ka leswi a vonaka leswaku a hi nge swi koti ku yi tiyiselela, sweswo a swi ta vula leswaku Sathana a a tiyisile.
Xa vumune, Yehovha u hlawula ku nga tivi swilo hinkwaswo leswi nga ta hi endlekela. Mhaka ya leswaku Xikwembu xi tiva miringo leyi nga ta hi endlekela yi nga ha kombisa leswaku xi fanele xi tiva swilo hinkwaswo hi vumundzuku bya hina. Kambe vonelo ro tano a ri humi eMatsalweni. Xikwembu xi nga swi kota ku tiva vumundzuku bya hina. (Esa. 46:10) Kambe Bibele yi kombisa leswaku xa hlawula leswi xi lavaka ku swi tiva hi leswi nga ta endleka enkarhini lowu taka. (Gen. 18:20, 21; 22:12) Xi endla sweswo hikwalaho ka leswi xi xiximaka ntshunxeko wa hina wo tihlawulela. Xana leswi a hi swona leswi a hi ta swi langutela eka Xikwembu lexi minkarhi hinkwayo xi tirhisaka matimba ya xona hi ndlela leyi faneleke?—Det. 32:4; 2 Kor. 3:17.
Kutani hi fanele hi ma twisisa njhani marito ya Pawulo lama nge: “Xikwembu . . . a xi nge mi tshiki mi ringiwa hi ndlela leyi tlulaka leswi mi nga swi tiyiselaka”? Eka tsalwa leri, Pawulo a a vulavula hi leswi Yehovha a swi endlaka loko hi ri emiringweni ku nga ri loko yi nga si hi wela. Marito ya muapostola Pawulo ma hi tiyisekisa leswaku hambi ho wela hi ndzingo wihi na wihi evuton’wini, Yehovha u ta hi seketela ntsena loko hi tshembela eka yena. (Ps. 55:22) Hi ta kambisisa swivangelo swimbirhi leswi paluxaka xivangelo xa ku va Pawulo a vule marito lawa.
Xo sungula, miringo leyi hi langutanaka na yona yi “[tolovelekile] evanhwini.” Minkarhi yo tala miringo leyi hi langutanaka na yona ya fana ni leyi vanhu van’wana va langutanaka na yona. Hi nga swi kota ku yi tiyiselela miringo yo tano loko hi titshega hi Xikwembu. (1 Pet. 5:8, 9) Loko Pawulo a tsala marito lama nga eka 1 Vakorinto 10:13 a a kombetela eka miringo leyi Vaisrayele va langutaneke na yona loko va ri emananga. (1 Kor. 10:6-11) Vaisrayele a va ta swi kota ku yi tiyiselela miringo yoleyo. Ku ringana minkarhi ya mune, Pawulo u vule leswaku “van’wana va vona” a va yingisanga. Lexi twisaka ku vava, Vaisrayele van’wana va tikhome hi ndlela yo biha hikuva a va nga titsheganga hi Xikwembu.
Xa vumbirhi, “Xikwembu xa tshembeka.” Ndlela leyi Xikwembu xi tirhisaneke ni vanhu va xona ha yona yi kombisa leswaku xi kombisa rirhandzu ra xona ro tshembeka eka “lava va xi rhandzaka ni lava va hlayisaka milawu ya xona.” (Det. 7:9) Mhaka leyi yi kombisa leswaku minkarhi hinkwayo Xikwembu xi hetisisa leswi xi swi tshembisaka. (Yox. 23:14) Loko hi kambisisa ndlela leyi Yehovha a va khomeke ha yona vanhu lava n’wi rhandzaka ni ku n’wi yingisa, hi nga tiyiseka leswaku u ta hetisisa switshembiso leswimbirhi loko hi langutana ni miringo: (1) A nge yi pfumeleli yi hi tikela lerova hi nga swi koti ku yi tiyisela naswona (2) ‘u ta hi nyika ndlela yo huma’ eka yona.
Yehovha u va nyika njhani ndlela yo huma emiringweni lava titshegaka ha yena loko va langutane ni miringo? I ntiyiso leswaku loko a swi lava a nga yi susa miringo yoleyo. Kambe tsundzuka marito ya Pawulo lama nge: “[Yehovha u] ta mi nyika ndlela yo huma, leswaku mi kota ku swi tiyisela.” Kambe minkarhi yo tala u hi nyika “ndlela yo huma” hi ku hi nyika leswi hi swi lavaka leswaku hi kota ku tiyisela. Anakanya hi tindlela tin’wana leti Yehovha a hi nyikaka ndlela yo huma ha tona:
▪ Wa hi “[chavelela] enhlomulweni ya hina hinkwawo.” (2 Kor. 1:3, 4) Yehovha a nga rhurisa mianakanyo ya hina, timbilu ta hina ni ndlela leyi hi titwaka ha yona hi ku tirhisa Rito rakwe, moya lowo kwetsima ni swakudya swa moya leswi hlonga ro tshembeka ri hi phamelaka swona.—Mat. 24:45; Yoh. 14:16; Rhom. 15:4.
▪ A nga hi kongomisa hi ku tirhisa moya lowo kwetsima. (Yoh. 14:26) Loko hi langutana ni miringo, moya lowo kwetsima wu nga hi pfuna ku tsundzuka Matsalwa ni misinya ya milawu leswaku hi endla swiboho leswinene.
▪ A nga tirhisa tintsumi leswaku ti hi pfuna.—Hev. 1:14.
▪ A nga hi pfuna hi ku tirhisa vamakwerhu lava hi marito ni swiendlo swa vona va nga va ka “mpfuno lowu tiyisaka” eka hina.—Kol. 4:11.
Xana marito ya Pawulo lama nga eka 1 Vakorinto 10:13 ma vula yini? Yehovha a nga hi hlawuleli miringo leyi hi faneleke hi langutana na yona. Kambe loko hi weriwa hi miringo, hi nga tiyiseka hi leswi: Loko hi tshemba Yehovha hi ku helela a nge yi pfumeleli miringo leswaku yi hi tikela lerova hi nga swi koti ku yi tiyisela. Mikarhi hinkwayo u ta hi nyika ndlela yo kota ku langutana na yona leswaku hi tiyisela. Marito lawa ma chavelela hakunene!
(1 Vakorinto 10:13) A mi si weriwa hi ndzingo loko wu nga ri lowu tolovelekeke evanhwini. Kambe Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.
(1 Vakorinto 10:13) A mi si weriwa hi ndzingo loko wu nga ri lowu tolovelekeke evanhwini. Kambe Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.
Endla Ndzavisiso
(1 Vakorinto 10:8) Naswona hi nga hanyi hi vumbhisa, tanihi leswi van’wana va vona va endleke vumbhisa, kutani ku wa 23 000 ya vona hi siku rin’we.
Swivutiso Swa Vahlayi
Hikwalaho ka yini 1 Vakorinto 10:8 yi vula leswaku ku dlayiwe Vaisrayele va 23 000 hi siku rin’we hikwalaho ka ku endla vumbhisa, kasi Tinhlayo 25:9 yi vula leswaku ku dlayiwe 24 000 wa vona?
Ku ni swilo swo hlayanyana leswi nga vaka swi endle leswaku ku nyikeriwa tinhlayo to hambana eka tindzimana leti timbirhi. Nchumu lowu kongomeke ku nga va leswaku nhlayo ya kona kahle-kahle yi le xikarhi ka 23 000 na 24 000, xisweswo ku endliwa ntsengo lowu katsakanyiweke wa tinhlayo teto timbirhi.
Xiya nchumu wun’wana lowu nga vaka wu vange sweswo. Muapostola Pawulo u tshahe mhaka leyi vulavulaka hi Vaisrayele lava a va ri eXitimi tanihi xikombiso lexi a xi lemukisa Vakreste va le mutini wa khale wa Korinto, lowu a wu dume hi vudlakuta bya wona. U tsarile a ku: “Naswona hi nga hanyi hi vumbhisa, tanihi leswi van’wana va vona va endleke vumbhisa, kutani ku wa 23 000 ya vona hi siku rin’we.” Loko a vulavula hi lava va dlayiweke hi Yehovha hikwalaho ka vumbhisa, Pawulo u boxe nhlayo ya 23 000.—1 Vakorinto 10:8.
Kambe Tinhlayo ndzima 25 yi hi byela leswaku “Israyele [u tihlanganise] na Bali wa Peyori; kutani ku hlundzuka ka Yehovha ku va kukulu ehenhla ka Israyele.” Hiloko Yehovha a lerisa Muxe leswaku a dlaya “hinkwavo lava va nga varhangeri va vanhu.” Hikwalaho, Muxe u lerise vaavanyisi leswaku va hetisisa xileriso xexo. Eku heteleleni, loko Finiyasi a teke goza ra xihatla ra ku dlaya Muisrayele loyi a teke ni wansati wa Mumidiyani enxaxeni, “ntungu wu yimisiw[ile].” Mhaka leyi yi gimeta hi marito lama nge: “Lava va feke hikwalaho ka ntungu a va ringana 24 000.”—Tinhlayo 25:1-9.
Swi le rivaleni leswaku nhlayo leyi nyikeriweke ebukwini ya Tinhlayo a yi katsa “varhangeri va vanhu” lava dlayiweke hi vaavanyisi ni lava va dlayiweke hi Yehovha hi ku kongoma. Kumbexana varhangeri lava dlayiweke hi vaavanyisi a va ri gidi, lerova ntsengo hinkwawo wu va 24 000. A swi tiveki loko varhangeri volavo va endle vumbhisa, va hlanganyerile eminkhubyeni kumbe va nyike vanhu mpfumelelo wo endla swilo swo tano, kambe va ve ni nandzu wa ku “tihlanganisa na Bali wa Peyori.”
Malunghana ni rito leri nge ku “tihlanganisa,” buku yin’wana ya tinhlamuselo ta Bibele yi vula leswaku ri nga vula “ku namarhelana ni munhu wo karhi.” Vaisrayele a va ri vanhu lava tinyiketeleke eka Yehovha, kambe loko va “tihlanganisa na Bali wa Peyori,” va onhe vuxaka bya vona na Xikwembu. Malembe ya kwalomu ka 700 endzhaku, Yehovha u vule leswi landzelaka hi Vaisrayele hi nomu wa Hosiya: “Vona va ye eka Bali wa Peyori, va tinyiketela eka nchumu lowu nyumisaka, kutani va nyenyetsa kukota nchumu lowu va wu rhandzaka.” (Hosiya 9:10) Hinkwavo lava endleke tano a va faneriwa hi vuavanyisi byo fehla bya Xikwembu. Xisweswo, Muxe u tsundzuxe vana va Israyele a ku: “Mahlo ya n’wina hi wona ma voneke leswi Yehovha a swi endleke emhakeni ya Bali wa Peyori, leswaku munhu un’wana ni un’wana la landzeleke Bali wa Peyori hi yena loyi Yehovha Xikwembu xa n’wina a n’wi loviseke exikarhi ka n’wina.”—Deteronoma 4:3.
(1 Vakorinto 11:5, 6) kambe wansati un’wana ni un’wana loyi a khongelaka kumbe ku profeta a nga funengelanga nchumu enhlokweni u tsongahata nhloko ya yena, hikuva swi fana ni loko a ri wansati loyi a byevuleke nhloko. Hikuva loko wansati a nga tifunengeti nchumu, a a tsemete ni misisi; kambe loko wansati a nyuma ku tsemeta misisi kumbe ku yi byevula, a a tifunengete.
(1 Vakorinto 11:10) Hi yona mhaka leyi wansati a faneleke a va ni xikombiso xa vulawuri enhlokweni ya yena hikwalaho ka tintsumi.
Swivutiso Swa Vahlayi
Xana muhuweleri wa xisati u fanele a ambala xo funengeta nhloko loko a fambisa dyondzo ya Bibele a ri ni muhuweleri wa xinuna?
▪ Eka nhlokomhaka ya “Swivutiso Swa Vahlayi” leyi nga eka Xihondzo xo Rindza xa July 15, 2002, ku vuriwe leswaku makwerhu wa xisati u fanele a ambala xo funengeta nhloko loko a fambisa dyondzo ya Bibele loko ku ri ni muhuweleri wa xinuna la khuvuriweke kumbe a nga khuvuriwangi. Endzhaku ka loko mhaka leyi yi tlhele yi kambisisiwa swi vonake swi fanerile leswaku nkongomiso lowu wu antswisiwa.
Loko muhuweleri wa xisati a fambisa dyondzo ya Bibele a ri ni muhuweleri wa xinuna loyi a khuvuriweke, makwerhu wa xisati u fanele a ambala xo funengeta nhloko. Loko a endla tano, u va a kombisa ku xixima nawu wa Yehovha wa vunhloko evandlheni ra Vukreste, hikuva u endla ntirho lowu hi ntolovelo a wu ta endliwa hi makwerhu waxinuna. (1 Kor. 11:5, 6, 10) Kumbexana a nga ha kombela makwerhu wa xinuna leswaku a fambisa dyondzo loko a vona swi fanerile.
Hi hala tlhelo, loko makwerhu wa xisati a famba ni muhuweleri wa xinuna la nga khuvuriwangiki loyi a nga riki nuna wa yena, hi kuya hi Matsalwa a swi bohi leswaku a ambala xo funengeta nhloko. Kambe mapfalo ya vamakwerhu van’wana va xisati ma nga ha va susumetela ku ambala xo funengeta nhloko ni le ka swiyimo swo tano.
Ku Hlayiwa Ka Bibele
(1 Vakorinto 10:1-17) A ndzi lavi leswaku mi nga swi tivi, vamakwerhu, leswaku vatata wa hina hinkwavo a va ri ehansi ka papa, naswona hinkwavo va pele lwandle 2 kutani hinkwavo va khuvuleriwa eka Muxe hi papa ni hi lwandle; 3 naswona hinkwavo va dye swakudya leswi fanaka swa moya, 4 hinkwavo va nwe swakunwa leswi fanaka swa moya. Hikuva a va nwa eribyeni lerikulu ra moya leri a ri va landzela, naswona ribye rero lerikulu a ri ri Kreste. 5 Nilokoswiritano, vo tala va vona Xikwembu a xi va amukelanga, hikuva va wisiwile emananga. 6 Kutani swilo leswi swi ve swikombiso eka hina, leswaku hi nga vi vanhu lava navelaka swilo swo biha, tanihi leswi vona va swi naveleke. 7 Naswona hi nga vi vagandzeri va swifaniso swa hava, kukotisa leswi van’wana va vona va endleke swona; hilaha ku tsariweke hakona: “Vanhu va tshame ehansi va dya ni ku nwa, kutani va suka va yima va titsakisa.” 8 Naswona hi nga hanyi hi vumbhisa, tanihi leswi van’wana va vona va endleke vumbhisa, kutani ku wa 23 000 ya vona hi siku rin’we. 9 Naswona hi nga ringi Yehovha, tanihi leswi van’wana va vona va n’wi ringeke, kutani va lovisiwa hi tinyoka. 10 Naswona hi nga vi van’unun’uti, tanihi leswi van’wana va vona va n’unun’uteke, kutani va lovisiwa hi mulovisi. 11 Swilo leswi swi va humelerile tanihi swikombiso, naswona swi tsaleriwe leswaku swi va xilemukiso eka hina lava hi fikeriweke hi makumu ya mafambiselo ya swilo. 12 Hikwalaho loyi a ehleketaka leswaku u yimile a a tivonele leswaku a nga wi. 13 A mi si weriwa hi ndzingo loko wu nga ri lowu tolovelekeke evanhwini. Kambe Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela. 14 Hikokwalaho, varhandziwa, balekelani ku gandzela swifaniso swa hava. 15 Ndzi vulavula na n’wina tanihi vanhu lava nga ni ku twisisa; swi avanyiseni hi n’wexe leswi ndzi swi vulaka. 16 Xinwelo xa nkateko lexi hi xi katekisaka, xana a hi ku hlanganyela engatini ya Kreste? Xinkwa lexi hi xi phemaka, xana a hi ku hlanganyela emirini wa Kreste? 17 Hikwalaho ka leswi ku nga ni xinkwa xin’we, hina, hambileswi hi nga tala, hi miri wun’we, hikuva hinkwerhu hi dya xinkwa xexo xin’we.
APRIL 22-28
LESWI HI SWI DYONDZAKA EBIBELENI | 1 VAKORINTO 14-16
“Xikwembu Xi Ta Va ‘Swilo Hinkwaswo Eka Vanhu Hinkwavo’”
(1 Vakorinto 15:24, 25) Endzhaku ku fika makumu, loko a nyiketa mfumo eka Xikwembu tlhelo Tata wa yena, loko a herise hulumendhe hinkwayo ni vulawuri ni vuhosi hinkwabyo. Hikuva u fanele a va hosi ku fikela loko Xikwembu xi veke valala hinkwavo ehansi ka milenge ya yena.
“Rifu Ri Ta Herisiwa”
10 “Makumu” i makumu ya ku Fuma ka Kreste ka Gidi ra Malembe, loko hi ku titsongahata ni hi ku tshembeka Yesu a teka Mfumo a wu nyika Xikwembu tlhelo Tata wakwe. (Nhlavutelo 20:4) Xikongomelo xa Xikwembu xa ku “hlengeleta swilo hinkwaswo nakambe eka Kreste” xi ta va xi hetisekile. (Vaefesa 1:9, 10) Kambe, Kreste u ta sungula a herisa “hulumendhe hinkwayo ni vulawuri ni vuhosi hinkwabyo” lebyi lwisanaka ni ku rhandza ka Xikwembu tanihi Hosi. Leswi a hi ndzoviso lowu endliwaka hi Armagedoni ntsena. (Nhlavutelo 16:16; 19:11-21) Pawulo u ri: “[Kreste] u fanele a va hosi ku fikela loko Xikwembu xi veke valala hinkwavo ehansi ka milenge ya yena. Rifu i nala wo hetelela la nga [ta herisiwa].” (1 Vakorinto 15:25, 26) Ina, vuthala hinkwabyo bya xidyoho xa Adamu swin’we ni rifu swi ta va swi susiwile. Kutani ke, Xikwembu xi ta va xi humese vanhu hinkwavo “eka masirha-bako ya xitsundzuxo” hi ku pfuxa vafi.—Yohane 5:28.
(1 Vakorinto 15:26) Rifu i nala wo hetelela la nga ta herisiwa.
Mfumo Wu Hetisisa Ku Rhandza Ka Xikwembu eMisaveni
21 Kambe xana ku vuriwa yini hi vuyelo lebyi tolovelekeke bya vuvabyi, nchumu lowu nga papalatekiki lowu eku heteleleni wu vangaka xidyoho, ku nga rifu? Yoloye i ‘nala wa hina wo hetelela,’ ku nga nala loyi a lwisanaka ni vanhu lava nga hetisekangiki loyi a nga ta herisiwa ku nga ri khale. (1 Vakorinto 15:26) Kambe xana rifu i nala loyi Yehovha a n’wi chavaka? Xiya leswi Esaya a swi profeteke: “U ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.” (Esa. 25:8) Xana u nga wu vona hi tihlo ra mianakanyo nkarhi wolowo? Ku ri hava minkosi, masirha, ku rila ni gome! Ku hambana ni sweswo—ku ta va mihloti ya ntsako loko Yehovha a hetisisa switshembiso swakwe swo tsakisa swo pfuxa lava feke! (Hlaya Esaya 26:19.) Eku heteleleni, timbanga ta ntsandza-vahlayi leti vangiweke hi rifu ti ta horisiwa.
(1 Vakorinto 15:27, 28) Hikuva Xikwembu “xi veke swilo hinkwaswo ehansi ka milenge ya yena.” Kambe loko xi vula leswaku ‘swilo hinkwaswo swi vekiwe ehansi,’ swi le rivaleni leswaku xona lexi vekeke swilo hinkwaswo ehansi ka yena a xi katsiwi. 28 Kambe loko swilo hinkwaswo swi ta va swi vekiwe ehansi ka yena, kutani N’wana na yena u ta tiveka ehansi ka xona lexi vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.
Ku Rhula Ku Ringana Gidi Ra Malembe Ni Le Ndzhaku Ka Wona!
17 A ku na ndlela yin’wana yo hlamusela ndlela leyi vutomi byi nga ta va xiswona emakumu ka gidi ra malembe ku tlula marito lama nge, “leswaku Xikwembu xi va swilo hinkwaswo eka vanhu hinkwavo.” Xana sweswo swi vula yini? Anakanya hi nkarhi lowu hundzeke aEdeni loko vanhu lava hetisekeke, Adamu na Evha, va ha ri xiphemu xa ndyangu wa Yehovha wo rhula. Yehovha Hosi leyi Lawulaka, a a swi fuma hi ku kongoma swivumbiwa hinkwaswo leswi a swi vumbeke, ku nga khathariseki leswaku swi hanya etilweni kumbe emisaveni. A swi kota ku vulavula na swona hi ku kongoma, swi n’wi gandzela ni ku katekisiwa hi yena. A a ri “swilo hinkwaswo eka vanhu hinkwavo.”
Endla Ndzavisiso
(1 Vakorinto 14:34, 35) Vavasati a va tshame va miyerile emavandlheni, hikuva a swi pfumeleriwi leswaku va vulavula, kambe a va titsongahate, hilaha ni Nawu wu vulaka hakona. 35 Kutani loko va lava ku dyondza swo karhi, a va vutise vanuna va vona ekaya, hikuva swa nyumisa leswaku wansati a vulavula evandlheni.
w12 9/1 9, bokisi
Xana Muapostola Pawulo U Arise Vavasati Leswaku Va Nga Vulavuli?
“Muapostola Pawulo u tsale a ku: “Vavasati a va tshame va miyerile emavandlheni.” (1 Vakorinto 14:34) Xana a a vula yini? Xana a a langutela vutlhari bya vona ehansi? Nikatsongo. Entiyisweni, hakanyingi u vulavule hi dyondzo leyinene ya vavasati. (2 Timotiya 1:5; Tito 2:3-5) Eka papila rakwe leri a ri tsaleleke Vakorinto, Pawulo a nga khutazanga vavasati ntsena kambe u khutaze ni vanhu lava a va ri ni nyiko yo vulavula hi tindzimi ni vaprofeta leswaku va “[tshama] va miyerile” loko mupfumeri un’wana a ri karhi a vulavula. (1 Vakorinto 14:26-30, 33) Swi nga ha endleka leswaku vavasati van’wana lava nga Vakreste a va hiseka ngopfu eka ripfumelo ra vona lerintshwa lerova va kavanyeta xivulavuri leswaku va ta vutisa swivutiso, hilaha a ku ri ntolovelo endhawini yoleyo. Leswaku ku papalatiwa hasahasa yoleyo, Pawulo u va khutaze leswaku va “[vutisa] vanuna va vona ekaya.”—1 Vakorinto 14:35.
(1 Vakorinto 15:53) Hikuva nchumu lowu wu onhakaka wu fanele ku ambala ku ka wu nga onhaki, ni nchumu lowu wu faka, wu fanele wu ambala ni ku ka wu nga fi.
it-1 1197-1198
Ku Nga Onhaki
Lava nga ta fuma na Yesu etilweni va ta pfuxeriwa etilweni, va ta va ni vutomi lebyi nga onhakiki naswona a swi nge he koteki leswaku va fa, va tava va ri swivumbiwa swa moya. Loko va ha hanya, va tirhele Yehovha hi ku tshembeka kutani sweswi va kuma mimiri ya moya leyi nga onhakiki hilaha Pawulo a swi hlamuseleke ha kona eka 1 Vakorinto 15:42-54. Swi le rivaleni leswaku va katekisiwa hi ku ka va nga ha fi naswona miri lowu Xikwembu xi va nyikaka wona a wa ha onhaki, a wa ha boli kumbe ku lovisiwa. Xikwembu xi va nyika matimba yo kota ku hanya naswona a va ha fani ni swivumbiwa swin’wana leswi swi titshegeke hi ntumbuluko leswaku swi kota ku hanya. Leswi swi komba leswaku Xikwembu xa va tshemba. Kambe ku nyikiwa ka vona vutomi byebyo, a swi vuli swona leswaku a va ha lawuriwi hi Xikwembu; ku fana ni Murhangeri wa vona Kreste Yesu, va ta ya emahlweni va yingisa Tata wa vona.—1 Kor. 15:23-28; vona ku ka u nga fi; moya-xiviri
Ku Hlayiwa Ka Bibele
(1 Vakorinto 14:20-40) Vamakwerhu, mi nga vi vana lavatsongo ematimbeni ya ku twisisa, kambe mi va swihlangi evubihini; ntsena mi va lava kuleke hi ku helela ematimbeni ya ku twisisa. 21 ENawini ku tsariwe va ku: “‘Ndzi ta vulavula ni vanhu lava hi marimi ya vanhu vambe ni hi milomu ya vanhu vambe, kambe ni le nkarhini wolowo a va nge ndzi yingisi,’ ku vula Yehovha.” 22 Hikwalaho tindzimi a hi xikombiso eka vapfumeri, kambe eka lava nga riki vapfumeri, kasi ku profeta a hi ka lava nga riki vapfumeri, kambe i ka vapfumeri. 23 Hikokwalaho, loko vandlha hinkwaro ri hlengeletana ndhawu yin’we kutani hinkwaro ri vulavula hi tindzimi, kambe ku nghena vanhu lava tolovelekeke kumbe lava nga riki vapfumeri, xana a va nge vuli leswaku ma penga? 24 Kambe loko mi profeta hinkwenu, kutani ku nghena loyi a nga riki mupfumeri kumbe munhu loyi a tolovelekeke, hinkwavo va n’wi tshinya, hinkwavo va n’wi kambela khwatsi; 25 swihundla swa mbilu ya yena swa vonaka, lerova u ta wa hi xikandza a gandzela Xikwembu, a ku: “Xikwembu xi le xikarhi ka n’wina hakunene.” 26 Kutani ku fanele ku endliwa yini vamakwerhu? Loko mi hlengeletana, un’wana u ni pisalema, un’wana u ni dyondzo, un’wana u ni nhlavutelo, un’wana u ni ririmi rimbe, un’wana u ni vuhlamuseri. Swilo hinkwaswo a swi endleriwe ku aka. 27 Naswona loko ku ri ni loyi a vulavulaka hi ririmi rimbe, va nga tluli vambirhi kumbe vanharhu, nakambe a va siyerisane; kutani un’wana a a hundzuluxele. 28 Kambe loko muhundzuluxeri a nga ri kona, a a miyele evandlheni a vulavulela embilwini ni ku vulavula ni Xikwembu. 29 Ku tlula kwalaho, a ku vulavule vaprofeta vambirhi kumbe vanharhu, naswona lavan’wana a va twisise nhlamuselo ya kona. 30 Kambe loko un’wana a ri ni nhlavutelo loko a ha tshame kwalaho, lowo sungula a a miyele. 31 Hikuva hinkwenu mi nga profeta ha un’we-un’we leswaku hinkwavo va ta dyondza, hinkwavo va khutaziwa. 32 Naswona tinyiko ta moya ta vaprofeta ti fanele ku lawuriwa hi vaprofeta. 33 Hikuva Xikwembu a hi Xikwembu xa mpfilumpfilu, kambe i xa ku rhula. Tanihi le mavandlheni hinkwawo ya vakwetsimi, 34 vavasati a va tshame va miyerile emavandlheni, hikuva a swi pfumeleriwi leswaku va vulavula, kambe a va titsongahate, hilaha ni Nawu wu vulaka hakona. 35 Kutani loko va lava ku dyondza swo karhi, a va vutise vanuna va vona ekaya, hikuva swa nyumisa leswaku wansati a vulavula evandlheni. 36 Yini? Xana rito ra Xikwembu ri hume eka n’wina, kumbe ri fikelele n’wina ntsena ke? 37 Loko munhu a ehleketa leswaku i muprofeta kumbe u ni nyiko ya moya, a a pfumele swilo leswi ndzi mi tsalelaka swona, hikuva i swileriso swa Hosi. 38 Kambe loko munhu a pfumala vutivi, u hambeta a pfumala vutivi. 39 Hikwalaho vamakwerhu, hambetani mi hisekela ku lava ku profeta, kambe mi nga swi aleli ku vulavula hi tindzimi. 40 Kambe swilo hinkwaswo a swi endliwe hi ku tenga ni hi ku hleleka.
APRIL 29–MAY 5
LESWI HI SWI DYONDZAKA EBIBELENI | 2 VAKORINTO 1-3
“Yehovha—‘Xikwembu Xa Nchavelelo Hinkwawo’”
(2 Vakorinto 1:3) A ku dzunisiwe Xikwembu tlhelo Tata wa Hosi ya hina Yesu Kreste, Tatana la nga ni tintswalo letikulu tlhelo Xikwembu xa nchavelelo hinkwawo.
‘Rilani Ni Vanhu Lava Rilaka’
4 Tata wa hina loyi a nga ni tintswalo na yena u tshame a twa ku vava hikwalaho ko feriwa hi vanhu lava a a va rhandza vo tanihi Abrahama, Isaka, Yakobe, Muxe na Hosi Davhida. (Tinhl. 12:6-8; Mat. 22:31, 32; Mint. 13:22) Rito ra Xikwembu ra hi tiyisekisa leswaku Yehovha u wu rindzele hi mahlongati nkarhi lowu a nga ta pfuxa malandza yakwe. (Yobo 14:14, 15) Ma ta tiphina hi vutomi naswona ma ta va ni rihanyo lerinene. Tsundzuka leswaku N’wana wa Xikwembu loyi xi n’wi rhandzaka “hilaha ku hlawulekeke” u fe rifu ro vava swinene. (Swiv. 8:22, 30) Yehovha u twe ku vava swinene hikwalaho ka rifu ra Yesu.—Yoh. 5:20; 10:17.
(2 Vakorinto 1:4) lexi hi chavelelaka enhlomulweni wa hina hinkwawo, leswaku hi ta swi kota ku chavelela lava nga emahlomulweni ya mixaka-xaka hi nchavelelo lowu Xikwembu xi hi chavelelaka ha wona.
‘Rilani Ni Vanhu Lava Rilaka’
14 Mikarhi yin’wana swi nga tika ku tiva leswi u nga swi vulaka loko u chavelela munhu la feriweke. Nilokoswiritano, Bibele yi vula leswaku “ririmi ra lavo tlhariha ra horisa.” (Swiv. 12:18) Vo tala va kume marito lawa va nga chavelelaka lava feriweke ha wona eka broxara leyi nge, Loko U Feriwa Hi Loyi U N’wi Rhandzaka. Kambe hakanyingi lexi pfunaka ngopfu i ku “rila ni vanhu lava rilaka.” (Rhom. 12:15) Gaby la loveriweke hi nuna u ri: “Loko ndzi ku swi khumbu, a ndzi rila naswona loko vamakwerhu va rila na mina a ndzi chaveleleka. Sweswo swi endle ndzi xiya leswaku vamakwerhu va twa ku vava ku fana na mina.”
Endla Ndzavisiso
(2 Vakorinto 1:22) Xi tlhele xi veka ni mfungho wa xona eka hina naswona xi hi nyike xitiyisekiso xa leswi nga ta ta, ku nga moya, etimbilwini ta hina.
Swivutiso Swa Vahlayi
Xana i yini “xitiyisekiso” ni “mfungho” leswi Mukreste un’wana ni un’wana la totiweke a swi kumaka eka Xikwembu?—2 Kor. 1:21, 22.
▪ Mfungho: Hi ku ya hi buku yin’wana, rito ra Xigriki leri hundzuluxeriweke ri va “mfungho” eka 2 Vakorinto 1:22, a “ri ri rito ra le nawini etimhakeni ta mabindzu” leri vulaka “ku hakela xikweleti ro sungula, dipoziti, xihlambanyo, ku nga ku hakela malinyana ya leswi u swi xaveke, kutani swi va erivaleni leswaku hi ku ya hi nawu nchumu wu lowu hakeriweke se i wa wena, kumbe se u sayine kontraka.” Emhakeni ka vatotiwa, hakelo ya vona yo hetelela kumbe leswi va vuyeriwaka ha swona swi hlamuseriwa eka 2 Vakorinto 5:1-5, ku nga ku ambala mirhi wa le tilweni lowu nga boliki. Vuyelo bya kona byi katsa ni ku ka va nga ha fi.—1 Kor. 15:48-54.
Eka Xigriki xa manguva lawa, ku tirhisiwe rito leri yelanaka ni ku hoxiwa ka wansati xingwavila loko a vutiwa. Lexi i xikombiso xa kahle eka lava va nga ta va nsati wa Kreste hi ndlela yo fanekisela.—2 Kor. 11:2; Nhlav. 21:2, 9.
▪ Xitiyisekiso: Enkarhini lowu hundzeke, xitiyisekiso a xi tirha ku fana ni ku sayina ku kombisa leswaku nchumu wo karhi i wa wena kumbe ku pfumelelana hi mhaka yo karhi. Emhakeni ya vatotiwa, va “funghiwa,” hi ndlela yo fanekisela. (Efe. 1:13, 14) Kambe mfungho wu va wa nkarhinyana, kukondza a tiyisekisiwa ro hetelela emahlweninyana ka ku va a fa a ha tshembekile kumbe emahlweninyana ka nhlomulo lowukulu.—Efe. 4:30; Nhlav. 7:2-4.
(2 Vakorinto 2:14-16) Kambe a ku nkhensiwe Xikwembu lexi minkarhi hinkwayo xi hi kongomisaka enxaxamelweni wa ku hlula hi fambisana na Kreste naswona xi endla nun’hwelo wa ku tiviwa ka xona wu twiwa ha hina endhawini yin’wana ni yin’wana! Hikuva eka Xikwembu hi nun’hwelo wo nandziha wa Kreste exikarhi ka lava ponisiwaka ni le xikarhi ka lava lovaka; eka lavo hetelela hi nun’hwelo lowu humaka eku feni wu ya eku feni, eka lavo sungula hi nun’hwelo lowu humaka evuton’wini wu ya evuton’wini. Naswona i mani la fanelekaka kahle eka swilo leswi?
Xana A Wu Swi Tiva?
Xana muapostola Pawulo a a ehleketa hi yini loko a vulavula hi ku ‘kongomisiwa enxaxamelweni’?
▪ Pawulo u te: “Xikwembu . . . [xi hi kongomisa] enxaxamelweni wa ku hlula hi fambisana na Kreste naswona xi endla nun’hwelo wa ku tiviwa ka xona wu twiwa ha hina endhawini yin’wana ni yin’wana! Hikuva eka Xikwembu hi nun’hwelo wo nandziha wa Kreste exikarhi ka lava ponisiwaka ni le xikarhi ka lava lovaka; eka lavo hetelela hi nun’hwelo lowu humaka eku feni wu ya eku feni, eka lavo sungula hi nun’hwelo lowu humaka evuton’wini wu ya evuton’wini.”—2 Vakorinto 2:14-16.
Pawulo a a kombetela eka mukhuva wa Varhoma wo endla minkhuvo yo xixima ndhuna-nkulu leyi nga hlula valala va Tiko enyimpini. Eminkhubyeni yoleyo, nhundzu swin’we ni vabohiwa lava kumiweke enyimpini a va vekiwa erivaleni naswona a ku endliwa switlhavelo hi tinkuzi loko hi hala tlhelo ndhuna-nkulu leyi nga hlula enyimpini yi dzunisiwa hi vanhu hinkwavo. Endzhaku ka sweswo, vabohiwa vo tala lava kumiweke enyimpini a va dlayiwa.
The International Standard Bible Encyclopedia yi kombisa leswaku xigego lexi nge “nun’hwelo wo nandziha wa Kreste,” lexi eka van’wana xi vulaka vutomi kasi eka van’wana xi vulaka rifu “swi nga ha endleka leswaku xi tekiwe eka mukhuva wa Varhoma wa ku hisiwa ka murhi wa risuna hi nkarhi wa minkhuvo ya vona. Swi nga ha endleka leswaku nun’hwelo wa kona a wu tsundzuxa vabohiwa lava nga kumiwa enyimpini leswaku va ta dlayiwa ku nga ri khale.”
Ku Hlayiwa Ka Bibele
(2 Vakorinto 3:1-18) Xana ha sungula nakambe ku tibumabumela? Kumbe, xana swi nga ha endleka, ku fana ni vanhu van’wana, hi lava mapapila ya xibumabumelo lama taka eka n’wina kumbe lama humaka eka n’wina? 2 N’wina mi papila ra hina, leri tsariweke etimbilwini ta hina, leri tivekaka naswona ri hlayiwaka hi vanhu hinkwavo. 3 Hikuva mi kombisiwe mi ri papila ra Kreste leri tsariweke hi hina hi nga vatirheli, leri nga tsariwangiki hi inki kambe hi moya wa Xikwembu lexi hanyaka, ku nga ri eswiphepherheleni swa ribye, kambe eswiphepherheleni swa nyama, etimbilwini. 4 Kutani ha Kreste hi ni ku tiyiseka ka muxaka lowu eka Xikwembu. 5 Ku nga ri leswaku hina hi faneleka kahle ku languta nchumu wun’wana ni wun’wana wu ri lowu humaka eka hina, kambe ku faneleka kahle ka hina ku huma eka Xikwembu, 6 lexi xi hi endleke hi faneleka kahle ku va vatirheli va ntwanano lowuntshwa, ku nga ri va nawu lowu tsariweke, kambe va moya; hikuva nawu lowu tsariweke wu gwevela rifu, kambe moya wa hanyisa. 7 Ku tlula kwalaho, loko nawu lowu humesaka rifu ni lowu kovotliweke hi tinhlanga emaribyeni wu ve kona hi ku vangama, lerova vana va Israyele va nga xi honoleli xikandza xa Muxe hikwalaho ka ku vangama ka xikandza xakwe, ku vangama loku a ku ta herisiwa, 8 ha yini ku tirha ka moya ku nga vangami hilaha ku engetelekeke swinene? 9 Hikuva loko nawu lowu a wu humesa xigwevo a wu vangama, ku vangama loku humesaka ku lulama ku andza swinene ngopfu. 10 Entiyisweni, hambi ku ri lexi nga tshama xi endliwa lexi vangamaka xi tekeriwe ku vangama emhakeni leyi, hikwalaho ka ku vangama loku ku xi tlulaka. 11 Hikuva loko lexi a xi ta herisiwa a xi nghenisiwe hi ku vangama, lexi salaka a xi ta va ni ku vangama lokukulu ngopfu. 12 Hikokwalaho, leswi hi nga ni ntshembo wo tano, hi tirhisa ntshunxeko lowukulu wo vulavula, 13 naswona a hi endli ku fana na Muxe la nga veka nturhu exikandzeni xakwe, leswaku vana va Israyele va nga honoleli makumu ya lexi nga ta herisiwa. 14 Kambe matimba ya vona ya mianakanyo ma tlanyarile. Hikuva ku fikela siku leri ra namuntlha, nturhu wowolowo wa ha ri kona, a wu susiwi loko ku hlayiwa ntwanano wa khale, hikuva wu herisiwa ha Kreste. 15 Entiyisweni, ku fikela ni namuntlha, nkarhi wun’wana ni wun’wana loko ku hlayiwa nawu wa Muxe, nturhu wu le timbilwini ta vona. 16 Kambe loko ku hundzukeriwa eka Yehovha, nturhu wa susiwa. 17 Kutani Yehovha i Moya; naswona laha moya wa Yehovha wu nga kona, ku ni ntshunxeko. 18 Hinkwerhu ka hina, loko hi vonakarisa ku vangama ka Yehovha kukota swivoni hi swikandza leswi fununguriweke, hi hundzuleriwa exifanisweni lexi fanaka ku suka eku vangameni ku ya eku vangameni, hilaha swi endliwaka hakona hi Yehovha la nga Moya.