BOKISI RO DYONDZISA 19B
Xinambyana Xi Hundzuka Nambu!
Ezekiyele u vona xinambyana lexi khulukaka xi huma endhawini yo kwetsima ya Yehovha kutani hi singita xi hundzuka nambu wo enta hi xinkarhana! Ematlhelo ya ribuwa u vona mirhi yo xonga leyi nga ni mihandzu yi tlhela yi hanyisa. Swi vula yini leswi?
Nambu Wu Tisa Mikateko
EMIKARHINI YA KHALE: Loko vanhu lava a va ri evuhlongeni va vuyele etikweni ra rikwavo, a va kuma mikateko loko va ri karhi va pfuxeta vugandzeri lebyi tengeke etempeleni
MANGUVA LAWA: Hi 1919 vugandzeri lebyi tengeke byi pfuxetiwile, leswi endleke leswaku ku va ni swilo swo tala leswi pfunaka malandza ya Xikwembu yo tshembeka ma kota ku xi gandzela hi ndlela leyi xi yi amukelaka
ENKARHINI LOWU TAKA: Endzhaku ka Armagedoni, Yehovha u ta hi katekisa hi tindlela to tala, leti katsaka ku hi pfuna leswaku hi va lava hetisekeke ni ku hi dyondzisa swilo leswintshwa
Mati Lama Hanyisaka
EMIKARHINI YA KHALE: Yehovha u va katekise swinene vanhu vakwe lava yingisaka, hambiloko va ya va engeteleka, u ye emahlweni a va dyondzisa, leswi endleke leswaku va n’wi gandzela hi ndlela leyi a yi amukelaka
MANGUVA LAWA: Eparadeyisini yo fanekisela leyi yaka yi kula, vanhu lava yaka va andza va vuyeriwile eka ntiyiso wa le Bibeleni naswona va dyondze hi Yehovha ni ku hlanganyela swin’we ni vanhu lava n’wi gandzelaka hi ndlela leyi a yi amukelaka
ENKARHINI LOWU TAKA: Lava nga ta pona Armagedoni va ta joyiniwa hi vanhu va timiliyoni lava pfuxiweke naswona loko ku ri mikateko ya Yehovha a ha ha vuli, yi to va nela kunene
Mirhi Ya Mihandzu Ni Leyi Hanyisaka
EMIKARHINI YA KHALE: Yehovha u dyondzise vanhu vakwe Rito rakwe naswona u endle leswaku va kota ku n’wi gandzela hi ndlela leyi a yi amukelaka etikweni ra vona leri pfuxetiweke; u tlhele a va pfuna ku tshika ku gandzela swikwembu swa hava
MANGUVA LAWA: Swo tala leswi vanhu va Xikwembu va dyondzisiwaka swona ku suka eBibeleni, swi va pfuna ku tshama va tshembekile eka xona, va papalata swidyoho leswikulu ni ku papalata mavonelo yo biha ya vanhu va misava leyi
ENKARHINI LOWU TAKA: Kreste ni vafumikulobye va 144 000 va ta pfuna vanhu hinkwavo vo tshembeka leswaku va va lava hetisekeke ni leswaku va va ni rihanyo lerinene ni tinghitsi hilaha ku nga heriki!