Ku Hlula Sathana Ni Mintirho Yakwe
“Hikokwalaho, titsongahateni emahlweni ka Xikwembu. Alelani Diyavulosi, kutani ú ta mi siya a tsutsuma.”—YAKOBO 4:7.
1. Xana ‘voko ra lowo biha’ ri va khumbe njhani vanhu namuntlha?
YOBO u vule kahle a ku: “Misav̌a yi nyikiwile mav̌okweni ya la’v̌o biha.” (Yobo 9:24) Naswona sweswi hi langutane ni minkarhi yo nonon’hwa swinene ematin’wini hinkwawo ya vanhu. Hikwalaho ka yini? Hikuva hi hanya “emasikwini ya makumu” ya vulawuri bya vudemona bya Sathana emisaveni. A swi hlamarisi leswi, hikwalaho ko kuceteriwa hi Sathana, ‘vanhu vo biha ni vakanganyisi va yaka emahlweni va nyanya ku biha, va hambukisa van’wana ni ku hambukisiwa hi voxe.’ (2 Timotiya 3:1, 13) Tlhandla-kambirhi, minxaniso, vuhomboloki, tihanyi, vugevenga, ku wa ka ikhonomi, vuvabyi lebyi chavisaka, switlhavi swa ku dyuhala, ntshikilelo wa mintlhaveko—swilo leswi ni swin’wana swi nga ha hi heta matimba.
2. Xana hi nga langutana njhani ni minhlaselo ya Sathana namuntlha?
2 Nala lonkulu, Sathana Diyavulosi, u tshamela ku hlasela vanhu ngopfu-ngopfu vagandzeri va ntiyiso va Xikwembu. Kungu rakwe i ku endla vanhu hinkwavo lava lavaka ku hlayisa vutshembeki leswaku va fularhela Xikwembu ni ku endla leswaku va lovisiwa na yena swin’we ni tintsumi takwe ta mademona. Kambe, ha tiyisekisiwa leswaku loko hi tiyisela hi vutshembeki, Diyavulosi u ta hi balekela. Ku fana na Yesu, hi nga ‘dyondza ku yingisa’ Xikwembu hi swilo leswi hi langutanaka na swona, naswona hi tintswalo ta xona leti nga fanelangiki hi nga kuma vutomi lebyi nga heriki.—Vaheveru 5:7, 8; Yakobo 4:7; 1 Petro 5:8-10.
3, 4. (a) Hi yihi miringo ya le handle leyi Pawulo a langutaneke na yona? (b) Xana Pawulo a tikarhatela yini tanihi nkulu wa Mukreste?
3 Muapostola Pawulo na yena u ringiwe hi tindlela to tala. Loko a kombisa xiyimo xa yena tanihi mutirheli wa Kreste, u tsale a ku: “Ndzi xanisekile ku va tlula, hi ku tirha swo nonon’hwa, ni ku pfaleriwa emakhotsweni, ni ku biwa ku tlurisa mpimo, ni ku va kusuhi ni ku dlawa minkarhi yo tala. Ndzi biwile ka ntlhanu hi Vayuda, ku ba kun’wana ni kun’wana ku ri hi minkhavi ya 39. Ndzi biwile kanharhu hi tinhonga; ndzi khandliwile kan’we hi maribye; kanharhu ngalava leyi a ndzi ri eka yona yi tshovekile; ndzi hetile vusiku hinkwabyo ni nhlekanhi hinkwawo ndzi ri karhi ndzi mbekuka elwandle. Etiendzweni ta mina leto tala, ndzi lave ku dyiwa hi milambu; ndzi lave ku dlawa hi swigevenga; ndzi lave ku dlawa hi varikwerhu; ndzi lave ku dlawa hi vamatiko; ndzi lave ku dlawa ematini ni le mananga; ndzi lave ku dyiwa hi mati ya lwandle; ndzi lave ku dlawa exikarhi ka vamakwerhu va mavunwa; ndzi tikarhatile ni ku tivavisa hi mintirho; hakanyingi ndzi pfumale vurhongo, ndzi twe ndlala ni torha, hakanyingi ndzi pfumarile swakudya, ndzi khomiwa hi xirhami, ndzi pfumala ni swiambalo.
4 “Ehandle ka swin’wana leswi ndzi nga swi hlayiki, ndza tikeriwa masiku hinkwawo ni ku karhateka emoyeni, loko ndzi anakanya [mavandlha, NW] hinkwa[w]o. Loko un’wana a tsanile, xana a ndzi tsananga na mina xana? Loko un’wana a wisiwa, xana na mina a ndzi twi ku vava ngopfu xana?” (2 Vakorinto 11:23-29) Xisweswo, Pawulo u hlayise vutshembeki loko a langutana ni minxaniso ni miringo ya vanhu va le handle, naswona tanihi nkulu wa Mukreste, a a tikarhatela swinene ku tiyisa vamakwavo lava tsaneke evandlheni, a va pfuna leswaku va hlayisa vutshembeki. I xikombiso lexinene ngopfu eka vakulu va Vakreste namuntlha!
Ku Hlayisa Vutshembeki Eku Xanisiweni
5. Xana ntlhantlho wa nxaniso lowu kongomeke hi wihi?
5 Xana Sathana u tirhisa tindlela tihi leswaku a herisa vutshembeki? Hi laha swi kombisiweke ha kona laha henhla, yin’wana ya tindlela ta matimba swinene ta Sathana i nxaniso lowu kongomeke, kambe wu kona ntlhantlho wa sweswo. Vaefesa 6:10, 11 ya hi laya: “Mi namarhela Hosi, mi tiseketela hi ntamu wa yona lowu nga tsandziwiki ha nchumu. Havaxelani swisirhelelo ni matlhari hinkwawo lawa Xikwembu xi mi nyikaka wona, leswaku mi ta kota ku yima mi lwa ni mano [kumbe, “tindlela ta vukanganyisi,” nhlamuselo ya le hansi ya NW] layo biha ya Diyavulosi.”
6. Xana swi nga kombisiwa njhani leswaku Timbhoni ta Yehovha ti ‘hlurile hi ku helela’?
6 Eminkarhini yo tala emasikwini lawa ya makumu, Timbhoni ta Yehovha ti langutane ni miringo. Xisweswo, hi nga vula swin’we na Pawulo hi ku: “Eka sweswo hinkwaswo, hi hlula hi va hi hlurisisa hikwalaho ka yena loyi a hi rhandzeke.” (Varhoma 8:37) Leswi swi kombisiwa hi rhekhodo ya vutshembeki ya Timbhoni ta Yehovha etikampeni ta nxaniso ta le Jarimani, Austria, Poland na Yugoslavia hi nguva ya Manazi exikarhi ka 1933 na 1945 ehansi ka ntshikilelo wa Vukhomunisi eVuxeni bya Yuropa exikarhi ka 1945 na 1989, ni le nkarhini wa minxaniso leyi weleke swiphemu swa Afrika na Latin Amerika eminkarhini leyi ya ha ku hundzaka.
7. Hi swihi swikombiso leswi nyanyulaka swa vutshembeki leswi vikiwaka swi huma aEtiyopiya?
7 Timbhoni ta Yehovha aEtiyopiya ti veke xikombiso lexi tiyisaka xa vutshembeki exikarhi ka 1974 na 1991. Un’wana wa vahlayisi va khotso loyi a voyameleke ngopfu etipolitikini u byele makwerhu un’wana la pfaleriweke a ku: “Swi nga antswa loko ko ntshunxiwa tinghala entangeni wa tona ku tlula ku ntshunxa n’wina!” Vaxanisi lava va nsele va xanise malandza ya Yehovha, naswona endzhaku ka malembe ma nga ri mangani huvo leyi ku mangariwaka eka yona yi lerise leswaku va dlayiwa. Ntsumbu wa makwerhu un’wana wu vekiwe erivaleni leswaku ku chavisiwa van’wana. Vamakwerhu van’wana lava endleke xikombelo xo tenga mhaka ya xigwevo xa rifu va ntshunxiwile hi huvo yin’wana leyi anakanyelaka, naswona van’wana va ‘vahluri’ lava vo tshembeka va nyikele tinkulumo enongonokweni wa Ntsombano wa Muganga wa “Dyondzo ya Xikwembu” eAddis Ababa eku sunguleni ka 1994.a—Yohane 16:33; ringanisa 1 Vakorinto 4:9.
8. Xana Sathana u ringete njhani ku tirhisa ‘ku dlayeteriwa ka vanhu va swivongo’?
8 Sathana u tsandzekile ku herisa vutshembeki bya vamakwerhu volavo vo tshembeka, hi nhlaselo lowu kongomeke. Kutani, xana hi tihi tindlela tin’wana ta vukanganyisi leti a ti tirhisaka? Nhlavutelo 12:12 yi vula leswi landzelaka hi masiku lawa ya makumu: “Mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” Leswi a tsandzekeke ku heta vanhu va Xikwembu lava tshembekeke hi ku tirhisa nxaniso, hi ku hlundzuka u ringeta ku dlayetela vaaki hinkwavo, a swi kanakanisi leswaku u lava ku dlaya vanhu va Yehovha swin’we ni lavan’wana. Xisweswo leswi vitaniwaka ku dlayeteriwa ka vanhu va swivongo swi humelerile etindhawini ta khale ka Yugoslavia, naswona ku dlaya rixaka ku ringetiwile eLiberia, Burundi ni le Rwanda.
9. Ha yini marhengu ya Sathana ma tsandzeka minkarhi yo tala? Nyika swikombiso.
9 Kambe, hakanyingi marhengu ya Sathana ma vuya hi yena, hikuva maxangu ya Sathana ma endla vanhu va timbilu letinene leswaku va lemuka leswaku ntshembo wa vona wa xiviri wu sekeriwe eMfun’weni wa Xikwembu, lowu Timbhoni ta Yehovha ti wu huwelelaka hi ku hiseka. (Matewu 12:21) Hakunene, lava tsakelaka va khitikanela eMfun’weni wolowo! Hi xikombiso, eBosnia leri weriweke hi minkitsikitsi ni le Herzegovina, enkhubyeni wa Xitsundzuxo xa rifu ra Yesu hi March 26, 1994, lava a va ri kona a va ri 1 307, a va tlula va lembe ra le mahlweni hi 291. Ku vikiwe tinhlohlorhi ta lava a va ri kona eSarajevo (414), Zenica (223), Tuzla (339), Banja Luka (255) ni le matikweni man’wana. Etikweni ra le kusuhi ra Croatia ku ve ni nhlohlorhi leyintshwa ya lava veke kona va 8 326. Madzolonga lama humelelaka exikarhi ka tona a ma ti sivelanga Timbhoni ta Yehovha ematikweni wolawo leswaku ti yingisa xileriso xa ku “vula rifu ra Hosi, yi kondza yi ta.”—1 Vakorinto 11:26.
ERwanda Leri Hlaseriweke Hi Madzolonga
10, 11. (a) I yini leswi humeleleke etikweni ra Rwanda leri va nge i ra Vukreste? (b) Xana varhumiwa vo tshembeka va tiphofule njhani?
10 Hi 1993, eRwanda laha ku nga ni vahuweleri va Mfumo va 2 080, vanhu va 4 075 va ve kona eNtsombanweni wa Muganga wa “Dyondzo ya Xikwembu,” naswona lava khuvuriweke i 230. Exikarhi ka vona, va 142 va hatlise va endla xikombelo xa ntirho wa vuphayona bya nkarhinyana. Tidyondzo ta le kaya ta Bibele leti fambisiwaka ti andze ti fika eka 7 655 hi 1994—naswona a swi kanakanisi leswaku Sathana a nga ku tsakeli ku andza loku! Hambi leswi vunyingi bya vaaki byi tivulaka Vakreste, ku ve ni ku dlayetelana hi swivongo. L’Osservatore Romano ya le Vatican yi te: “Leswi i ku dlayeteriwa ka rixaka hakunene, loku, khombo ra kona, ri khumbaka ni Makhatoliki.” Ku fe vavanuna, vavasati ni vana lava ringanyetiwaka eka hafu ya miliyoni, naswona vanhu va kwalomu ka timiliyoni timbirhi va sale va ri hava makaya kumbe va boheka ku baleka. Hi ku hlayisa vukala-tlhelo bya tona bya Vukreste byo pfumala vubihi, Timbhoni ta Yehovha ti ringete ku tshamisisana. Madzana ya vamakwerhu va xinuna ni va xisati ma dlayiwile. Kambe eka vandlha rin’wana ra vahuweleri va Mfumo va 65, laha ku dlayiweke vanhu va 13, lava vaka kona eminhlanganweni va andze va fika eka 170 hi August 1994. Swilo swa mphalalo leswi humaka eka Timbhoni ta matiko man’wana swi ve swin’wana swa leswi rhangeke ku fika. Lava poneke ha va tsundzuka eswikhongelweni swa hina.—Varhoma 12:12; 2 Vatesalonika 3:1, 2; Vaheveru 10:23-25.
11 Ku fana ni loko swi endleke hi hlori, varhumiwa vanharhu lava a va ri eRwanda va ponile. Va tsala: “Hi xiya leswaku vamakwerhu emisaveni hinkwayo va langutana ni swiyimo leswi fanaka ni leswi kumbe leswi tlulaka swona, naswona ha swi tiva leswaku hinkwaswo i xiphemu xa xikombiso xa masiku ya makumu ya mafambiselo lawa yo biha. Kambe, loko munhu a khumbeka hi ku kongoma, swi n’wi endla a swi vona kahle swilo leswi naswona swi endla a lemuka leswaku vutomi i bya risima. Matsalwa man’wana ma ve ya nkoka ngopfu eka hina, naswona hi langutele nkarhi lowu swilo swa nkarhi lowu hundzeke swi nga ta ka swi nga ha vuyi emianakanyweni. Kambe sweswi hi fanele ku tshama hi khomekile entirhweni wa Yehovha.”
Vantshwa Lava Hlayisaka Vutshembeki
12, 13. (a) Hi yihi ndlela yo hlayisa vutshembeki leyi muntshwa un’wana a yi tekeke? (b) Vantshwa va hina va nga xi kuma kwihi xikhutazo namuntlha?
12 Yesu u kombise leswaku lava va vengiwaka hi swirho swa ndyangu hikwalaho ka ntiyiso va ta hakeriwa hi “ka dzana.” (Marka 10:29, 30) Leswi swi ve tano hi Entellia, nhwanyana wa malembe ya khume wa le n’walungwini wa Afrika, loyi a rhandzeke vito ra Xikwembu—Yehovha—loko a sungula ku ri twa. U dyondze ni Timbhoni ta Yehovha naswona a a famba timinete ta 90, ku ya ni ku vuya eminhlanganweni, hambi leswi ndyangu wa ka vona lowu a wu nga swi tsakeli a wu n’wi pfalela ehandle loko a vuya. Loko a ri ni malembe ya 13 hi vukhale, u sungule ku chumayela hi yindlu na yindlu, naswona nkaneto wa ndyangu wu tinyike matimba. Siku rin’wana maxaka ya yena ma n’wi bohe mavoko ni milenge, ma n’wi etlerisa emun’wini ku ringana nkombo wa tiawara, va pfa va n’wi chela hi mati ya thyaka. Va n’wi be hi ndlela leyi twisaka ku vava, va n’wi boxa ni tihlo, va hetelela hi ku n’wi hlongola ekaya. Hambi swi ri tano, u kume ntirho exibedlhele ku kondza a faneleka tanihi muongori. Loko a ri ni malembe ya 20 u khuvuriwile kutani endzhaku ka sweswo a teka vuphayona bya nkarhinyana. Hi ku hlamarisiwa hi vutshembeki byakwe, ndyangu wa ka vona wu tlhele wu n’wi amukela ekaya, naswona kaye wa vona va amukele tidyondzo ta le kaya ta Bibele.
13 Entellia u khutaziwe ngopfu hi Pisalema 116, ngopfu-ngopfu tindzimana 1-4, leti a ti hlayeke hi ku phindha-phindha: “Nḍi ranḍa Yehova, hikuv̌a o yingisile rito ra mina, ni ku sinḍisa ka mina. Hikuv̌a o nḍi riyele ndlev̌e ya yena, kutani nḍi ta ṅwi khongela e v̌utomini bya mina hikwabyo. Mapinḍa ya rifu a ma nḍi ṭonḍiyerile, mašangu ya sira a ma nḍi khomile, a nḍi kumile ni gome ni ku v̌av̌iseka, kutani nḍi khongerile v̌ito ra Yehova: Oho Yehova, ponisa moya wa nga!” Yehovha wa swi hlamula swikhongelo swo tano!
14. Xana Timbhoni ta le Poland ti byi kombise njhani vutshembeki lebyi xiyekaka?
14 Tanihi le nkarhini wa Yesu, hakanyingi Sathana u tirhisa ku hisekela vukhongeri etlhelo leswaku a pfurhetela malangavi ya nxaniso—kambe a nga humeleli. Xikombiso xa vamakwerhu va le Poland xa hlamarisa, hi laha xi hlamuseriwaka ha kona eka 1994 Yearbook of Jehovah’s Witnesses. Hambi va ri vantshwa va boheke ku tikombisa va ri vahlayisi va vutshembeki. Hi 1946 un’wana wa vona a ku ri nhwana wa malembe ya 15 hi vukhale loyi a byeriweke leswi: “Endla mfungho wa Khatoliki wa xihambano. Handle ka sweswo u ta duvuriwa!” Hikwalaho ko hlayisa vutshembeki, u huduleriwe enhoveni, a bukuteriwa, a vuya a duvuriwa.—Ringanisa Matewu 4:9, 10.
Tindlela Tin’wana Ta Vukanganyisi Ta Sathana
15, 16. (a) Hi rihi endlelo ra Sathana ra vudemona, naswona xana hi nga n’wi papalata njhani? (b) Ha yini vantshwa va hina va nga fanelanga va wa?
15 Endlelo ra Sathana ra vudemona hakunene i “ku fuma kumbe ku lovisa”! U ni matlhari yo tala yo biha. Kutani, a swi hlamarisi leswi muapostola Pawulo a tsundzuxaka a ku: “A hi lwi ni vanhu va misava leyi, kambe hi lwa ni mimoya leyo biha leyi nge henhla emimpfhukeni: Hi lwa ni tindhuna, ni vafumi, ni tihosi leti fumaka ta nguva leyi ya munyama. Hikokwalaho hlomani swisirhelelo ni matlhari hinkwawo ya Xikwembu wa ha ri nkarhi, leswaku mi ta kota ku tilwela hi siku ra khombo, kutani loko mi ta va mi lwile ku ya fika makumu, mi ta tikuma ma ha tiyile.” (Vaefesa 6:12, 13) Ku navela swilo leswi vonakaka, vuhungasi lebyi thyakeke ni vuxisi, vuyimbeleri bya vusathana, ntshikilelo wa tintangha exikolweni, ku tirhisiwa loko biha ka swidzidzirisi ni vudakwa—hinkwaswo leswi swi nga onha vutomi bya hina. Hikwalaho, muapostola u ya emahlweni a laya: “Minkarhi hinkwayo, rhwalani ku pfumela, xi va xitlhangu xa n’wina, kutani mi ta kota ku timela ha xona miseve hinkwayo leyi pfurhaka ya nyavuntswaka.”—Vaefesa 6:16.
16 Leswi swi tikomba swi ri swa nkoka ngopfu namuntlha loko hi languta vuyimbeleri lebyi thyakeke lebyi Sathana a byi hangalasaka emisaveni leyi. Minkarhi yin’wana byi hlangana hi ku kongoma ni vugandzeri bya Sathana. Xiviko lexi humaka eka ndhuna ya Doroba ra San Diego (U.S.A.) xi te: “Hi tshame hi va ni khonsati laha ntlawa wu veke ni vana va 15 000 lava a va tlhokovetsela va ku ‘Natas’—ku nga rito Satan [Sathana] ri tsariwe hi xindzhaku-ndzhaku.” Vugandzeri bya Sathana byi hlamuseriwa tanihi ncele lowu vantshwa vo tala va welaka eka wona “hikuva a va ri karhi va kayakayeka, va hlundzukile, va ri voxe.” N’wina vantshwa evandlheni ra Vukreste, a mi fanelanga leswaku mi wa! Yehovha u mi nyika xisirhelelo xa moya lexi miseve ya Sathana yi nga ta ka yi nga xi boxi.—Pisalema 16:8, 9.
17. Xana gome ri nga hluriwa njhani?
17 Miseve ya Sathana leyi pfurhaka yi kunguhateriwe ku khumba mintlhaveko. Hi mintshikilelo ya vutomi, yo tanihi vuvabyi kumbe xiyimo xa gome lerikulu, nala wa hina a nga endla leswaku van’wana va titwa va nga pfuni nchumu. Un’wana a nga ha hetiwa matimba hi ku ka a nga swi koti ku heta tiawara to tala entirhweni wa Xikwembu kumbe hikwalaho ko hundziwa hi minhlangano yin’wana ya vandlha. Nkhathalelo wa rirhandzu wa vakulu ni vamakwerhu van’wana va xinuna ni va xisati va timbilu letinene wu nga pfuna eku hluleni ka mintshikilelo yo tika. Tshama u ri karhi u tsundzuka leswaku Yehovha u rhandza malandza yakwe yo tshembeka. (1 Yohane 4:16, 19) Pisalema 55:22 yi ri: “Nyiketa Yehova e timhaka ta wena, o ta ku seketela; a nga ka a nga pfumeli ni siku riṅwe l’a lulameke a ṭekaṭekisiwa.”
18. Hi wahi marhengu ya Sathana lawa van’wana va langutanaka na wona?
18 “Mano” ya Sathana ya vukanganyisi, sweswinyana ma humelele hi xiyimo xin’wana. Ematikweni man’wana vanhu vo tala lava kuleke va ve ni mianakanyo leyi va telaka hi matimba ya leswaku loko va ha ri vatsongo va khumbiwe hi ndlela yo biha hi mihivahivana ya vusathana. Xana mianakanyo yo tano yi huma kwihi? Ku nga khathariseki ndzavisiso lowukulu, mianakanyo ya tintlharhi ta misava ya hambana swinene. Van’wana va languta mianakanyo yo tano tanihi swilo swa xiviri leswi tsundzukiwaka, van’wana va yi languta tanihi milorho—kumbexana leyi vangiwaka hi vutshunguri lebyi sorisaka—kasi van’wana va yi languta tanihi mijamujamu leyi vangiwaka hi mintshikilelo ya le vuhlangini.
19. (a) Hi yihi mianakanyo leyi Yobo a lwisaneke na yona? (b) Xana vakulu va nga xi landzela njhani xikombiso xa Elihu?
19 Swa tsakisa ku xiya leswaku Yobo, nandza wa Xikwembu, u langutane ni ‘mianakanyo leyi hambukisaka’ leyi Sathana a yi tiseke ha Elifasi na Sofara. (Yobo 4:13-18; 20:2, 3) Xisweswo Yobo u langutane ni “ku v̌av̌iseka,” leswi vangeke leswaku a ‘vula marito ya vuhunguki’ malunghana ni “v̌ušungu” lebyi karhataka miehleketo yakwe. (Yobo 6:2-4; 30:15, 16) Elihu u yingisele Yobo khwatsi kutani a n’wi pfuna hi musa leswaku a vona langutelo ra Yehovha ra vutlharhi etimhakeni leti. Hi laha ku fanaka namuntlha, vakulu lava twisisaka va kombisa nkhathalelo eka lava xanisekaka hi ku ka va nga engeteli ‘ntshikilelo’ eka lavo tano. Kambe, ku kotisa Elihu, hi ku lehisa mbilu va va yingisa kutani va va tota mafurha ya Rito ra Xikwembu. (Yobo 33:1-3, 7; Yakobo 5:13-15) Xisweswo un’wana ni un’wana loyi mintlhaveko yakwe yi kavanyetiwaka hi mintshikilelo, ya xiviri kumbe leyi a yi anakanyaka, kumbe loyi a ‘chavisiwaka . . . hi milorho ni hi swivono’ ku fana na Yobo, a nga kuma nchavelelo wa Matsalwa evandlheni.—Yobo 7:14; Yakobo 4:7.
20. Xana Vakreste lava nga ni gome va nga pfuniwa njhani leswaku va hlayisa xiyimo xa vona lexinene xa moya?
20 Sweswi Mukreste a nga tiyiseka leswaku, hi ndlela yo karhi, Sathana hi yena a vangelaka mianakanyo leyi yo chavisa. Loko van’wana evandlheni va xaniseka hi ndlela leyi, va ta va va endla kahle loko va teka swiyimo sweswo swa mianakanyo tanihi matshalatshala ya Sathana ya ku lava ku onha xiyimo xa vona lexinene xa moya. Va lava ku seketeriwa hi Matsalwa hi ku lehisa mbilu ni hi ku twisisa. Hi ku ya eka Yehovha hi xikhongelo ni hi ku pfuneka eka vurisi bya moya, lava nga ni gome va kuma matimba lama hlamarisaka. (Esaya 32:2; 2 Vakorinto 4:7, 8) Xisweswo va ta kota ku tiyisela hi ku tshembeka ni ku ka va nga pfumeleli mianakanyo yo biha leyi onhaka leswaku yi onha ku rhula ka vandlha. (Yakobo 3:17, 18) Ina, va ta kota ku kaneta Diyavulosi, va kombisa moya lowu kombisiweke hi Yesu loko a te: “Suka Sathana.”—Matewu 4:10; Yakobo 4:7.
21. Xana Matsalwa ma tsundzuxa njhani hi tindlela ta Sathana ta vuxisi?
21 Ha swi tiva leswaku xikongomelo xa Sathana i ku onha mianakanyo ya hina hi ndlela yo karhi, hi laha muapostola Pawulo a tsundzuxeke ha kona eka 2 Vakorinto 11:3: “Kukota leswi nyoka yi kanganyiseke Evha hi mano ya yona, ndza chava leswaku hi tindlela tin’wana mianakanyo ya n’wina yi nga onhiwa, kutani mi nga ha swi koti ku landzela Kriste hi ku tinyiketa ni ku tenga.” Ku onhiwa loku nga kona ka nyama hinkwayo kumbe vanhu hinkwavo lava nga ekule ni Xikwembu, ku hi tsundzuxa manyala lama tisiweke hi “Swihontlovila” swo biha ni leswi hombolokeke swa siku ra Nowa, leswi swi tihundzuleke xiyimo xa swona. (Genesa 6:4, 12, 13, nhlamuselo ya le hansi, NW; Luka 17:26) Hikwalaho, a swi hlamarisi leswi Sathana a tirhisaka marhengu ya vukanganyisi ni tindlela ta vuxisi leswaku a phofula vukarhi byakwe, ngopfu-ngopfu eka vanhu va Xikwembu.—1 Petro 5:8; Nhlavutelo 12:17.
22. Loko Sathana a ta va a nga ha ri kona, hi yihi mikateko leyi yi nga languteriwaka?
22 Sathana a nga boxiwi ni ku boxiwa eka tindzimana to hetelela ta buku ya Bibele ya Yobo. Ntlhontlho wakwe wo biha wa leswaku vanhu a va nge swi koti ku hlayisa vutshembeki eka Xikwembu wu kombisiwe wu ri mavunwa hi ku tshembeka ka Yobo. Hi laha ku fanaka, ku nga ri khale loko “ntshungu lowukulu” wa vahlayisi va vutshembeki ‘wu huma enhlomulweni lowukulu,’ Sathana u ta hoxiwa ekheleni. Vavanuna ni vavasati va ripfumelo, ku katsa na Yobo wo tshembeka, va ta hlanganyela ni “ntshungu lowukulu,” leswaku va kuma mikateko ya paradeyisi, leyi tlulaka ni leyi nyikiweke Yobo!—Nhlavutelo 7:9-17; 20:1-3, 11-13; Yobo 14:13.
[Nhlamuselo ya le hansi]
a Vona 1992 Yearbook of Jehovah’s Witnesses, tluka 177.
Swivutiso Swo Pfuxeta
◻ Hi xihi xikombiso lexinene xa vutshembeki lexi Yobo, Yesu na Pawulo va xi vekeke?
◻ Xana vahlayisi va vutshembeki va langutane njhani na Sathana?
◻ Xana vantshwa va nga ma papalata njhani marhengu ya Sathana ya vukanganyisi?
◻ Xana hi nga endla yini leswaku hi lwisana ni mano ya Sathana?
[Xifaniso lexi nga eka tluka 7]
Meswat na Yoalan va le Etiyopiya, sweswi va tirhela Yehovha nkarhi hinkwawo hi ku landza xikombiso xa tata wa vona, loyi a dlayiweke
[Xifaniso lexi nga eka tluka 7]
Entellia, muntshwa la hlayisaka vutshembeki en’walungwini wa Afrika