Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2024 Watch Tower Bible and Tract Society of Pennsylvania
NOVEMBER 4-10
LESWI HI SWI DYONDZAKA EBIBELENI PISALEMA 105
“U Tsundzuka Ntwanano Wakwe Hilaha Ku Nga Heriki”
Hi Nga Ri Tiyisa Njhani Ripfumelo Ra Hina Eka Xitshembiso Xa Yehovha Xo Tisa Misava Leyintshwa?
11 Xiya swilo swin’wana leswi Yehovha a swi tshembiseke vanhu vakwe enkarhini lowu nga hundza leswi a swi vonaka swi nga koteki hi ku ya hi vanhu. U tiyisekise Abrahama na Sara leswaku a va ta kuma n’wana va dyuharile. (Gen 17:15-17) U tlhele a byela Abrahama leswaku vatukulu vakwe a va ta nyikiwa tiko ra Kanana. Eka malembe yo tala lama vatukulu va Abrahama ku nga Vaisrayele va ma heteke va ri mahlonga eEgipta, swi fanele swi vonake onge xitshembiso xexo a xi nga ta endleka. Kambe xi endlekile. Hi ku famba ka nkarhi, loko Yesu a nga si tswariwa, Yehovha u vule leswaku Elizabeta loyi se a a khegurile a ta kuma n’wana. Xitshembiso xin’wana xi hetisekile loko Yehovha a byela Mariya loyi a a ri nhwana leswaku a ta veleka N’wana wakwe loyi Yehovha a vuleke ka ha sale malembe ya magidi entangeni wa Edeni—leswaku a a ta fika!—Gen 3:15.
12 Loko hi anakanyisisa hi switshembiso hinkwaswo leswi Yehovha a swi vuleke ni ndlela leyi swi hetisekeke hayona, hi tiyisa ripfumelo ra hina ra leswaku Yehovha u ni matimba yo tisa misava leyintshwa. (Hlaya Yoxuwa 23:14; Esaya 55:10, 11.) Sweswo swi endla leswaku hi tshama hi lunghekele ku pfuna van’wana va twisisa leswaku xitshembiso xa ku ta ka misava leyintshwa, a hi norho kumbe xitori. Yehovha u vule leswi hi matilo ni misava leyintshwa: “Marito lawa ma tshembeka naswona i ya ntiyiso.”—Nhlav 21:1, 5.
it-2-E 1201 ¶2
Rito
Ntumbuluko, swilo leswi hanyaka ni leswi nga hanyiki swi le hansi ka rito ra Xikwembu naswona xi nga swi tirhisa ku hetisisa swikongomelo swa xona. (Ps 103:20; 148:8) Rito ra Xikwembu ra tshembeka naswona leswi xi swi tshembisaka swa endleka. (Det 9:5; Ps 105:42-45) Hilaha xi vuleke hakona, Rito ra xona “ri tshama hilaha ku nga heriki”; a ri nge tlheleli eka xona ri nga endlanga xikongomelo xa rona.— Esa 40:8; 55:10, 11; 1Pet 1:25.
Endla Ndzavisiso
w86 11/1 19 ¶15
Vantshwa—Leswi Mi Nga Swi Endlaka Leswaku Ndyangu Wu Va Lowu Tsakeke Wu Tlhela Wu Va Ni Vun’we
15 “Va bohe milenge ya [Yosefa] hi tinketana, nhamu yakwe va yi bohe hi tinsimbhi; Kukondza ku fika nkarhi lowu leswi a swi vuleke swi endlekaka, Rito ra Yehovha hi rona ri n’wi lulamiseke.” (Pisalema 105:17-19) Ku ringana malembe ya 13, Yosefa u xaniseke tanihi hlonga ni mubohiwa ku fikela loko xitshembiso xa Yehovha xi hetiseka. Xiyimo xexo xi endle leswaku a tiya. Hambileswi a ku nga ri Yehovha a vanga swiphiqo sweswo, u swi pfumelerile leswaku swi endleka hikwalaho ka xikongomelo. Xana Yosefa a ta swi kota ku hlayisa ntshembo wakwe eka “Rito ra Yehovha” swi nga ri na mhaka vulala bya tihanyi lebyi a a langutane na byona? Xana a ta kombisa vumunhu byakwe lebyinene lebyi wupfeke hi ku endla leswi a swi laveka ku nga ku lehisa mbilu, ku titsongahata, ndlela leyi vuxaka bya yena na Yehovha byi tiyeke hayona ni ku tiyimisela ku hetisisa xiavelo xo tika? Yosefa u hume a fana ni nsuku lowu tengisiweke hi ndzilo—a tengile naswona a ri wa risima eka Xikwembu, naswona xi n’wi tirhise hi ndlela leyi hlamarisaka endzhaku ka sweswo.—Genesa 41:14, 38-41, 46; 42:6, 9.
NOVEMBER 11-17
LESWI HI SWI DYONDZAKA EBIBELENI PISALEMA 106
“Va Rivale Xikwembu Muponisi Wa Vona”
“I Va Mani Lava Yimaka Na Yehovha?”
13 Leswi Vaisrayele a va chavisiwe hi papa ro dzwihala, ndlati, ni swikombiso swin’wana swo chavisa leswi humaka eka Xikwembu, va kombele Muxe leswaku a va muvulavuleri wa vona eka Yehovha. Muxe u pfumele ku va muvulavuleri wa vona eka Yehovha eNtshaveni ya Sinayi. (Eks 20:18-21) Muxe u hete nkarhi wo leha a ri ehenhla ka ntshava. Xana Vaisrayele va sungule ku karhateka hileswi a va nga ha n’wi voni murhangeri wa vona wo tshembeka? Swi vonaka onge ripfumelo ra Vaisrayele a ri titshege hi vukona bya Muxe. Va sungule ku karhateka kutani va ku eka Aroni: ‘Hi endleli xikwembu lexi nga ta hi rhangela, hikuva malunghana na Muxe loyi, wanuna loyi a hi rhangeleke hi huma etikweni ra Egipta, kunene a hi tivi leswaku ku endleke yini ha yena.’—Eks 32:1, 2.
Endla Ndzavisiso
Tinhla-nkulu Ta Buku Ya Vunharhu Ni Ya Vumune Ya Tipisalema
106:36, 37. Tindzimana leti ti hlanganisa ku gandzela swifaniso swin’we ni ku nyikela switlhavelo eka madimona. Leswi swi kombisa leswaku munhu loyi a tirhisaka swifaniso a nga ha sungula ku lawuriwa hi madimona. Bibele ya hi khutaza yi ku: “Tivoneleni swifaniso.”—1 Yohane 5: 21.
NOVEMBER 18-24
LESWI HI SWI DYONDZAKA EBIBELENI PISALEMA 107-108
“Khensani Yehovha, Hikuva Hi Lonene”
Vandlha A Ri Dzunise Yehovha
2 Vandlha a hi ntlawa wa vanhu lava nga vanghana ntsena. A hi nhlengeletano ya vanhu va le mugangeni wo karhi kumbe ntlawa wa vanhu laha ku hlengeletanaka vanhu lava kurisiweke hi ndlela leyi fanaka kumbe lava tsakelaka swilo leswi fanaka entlangwini kumbe eka nchumu wo karhi wo tihungasa hi wona. Ku ri na sweswo, xikongomelo-nkulu xa ku va kona ka vandlha hileswaku ku dzunisiwa Yehovha Xikwembu eka rona. Sweswo se swi ni nkarhi wo leha swi endliwa, hilaha buku ya Tipisalema yi kandziyisaka hakona. Eka Pisalema 35:18 ha hlaya: “Ndzi ta ku vonga enhlengeletanweni leyikulu; ndzi ta ku dzunisa exikarhi ka vanhu vo tala.” Hilaha ku fanaka, Pisalema 107:31, 32, ya hi khutaza: “Vanhu a va nkhense Yehovha hikwalaho ka musa wakwe wa rirhandzu ni mintirho yakwe yo hlamarisa eka vana va vanhu. A va n’wi dzunise enhlengeletanweni ya vanhu.’’
Nkhensani Yehovha Kutani Mi Katekisiwa
4 Loko hi lava ku hlakulela ku va ni mbilu leyi tlangelaka hi tlhela hi tshama hi ri na yona, hi fanele hi xiya hi tlhela hi anakanyisisa hi ndlela yo tlangela mikateko leyi Yehovha a hi nyikeke yona kutani hi swi kambisisa hi vukheta swiendlo swakwe swa rirhandzu ro tshembeka. Loko mupisalema a endla tano, a a hlamarisiwa hi swilo swo tala leswi Yehovha a swi endleke.—Hlaya Pisalema 40:5; 107:43.
Endla Ndzavisiso
it-2-E 420 ¶4
Mowabu
Endzhakunyana, loko Davhida a ri hosi, ku ve ni nyimpi exikarhi ka Israyele na Mowabu. Vamowabu va hluriwile naswona va boheke ku hakela xibalo eka Davhida. Swi tikomba onge loko nyimpi yi hela ku kumeke leswaku mitlawa yimbirhi ya vavanuna va nyimpi va Mowabu yi dlayiwile. Swi tikomba onge Davhida u va pavalarise ehansi kutani a va pima hi ntambhu leswaku a ta kota ku humesa mintlawa yinharhu laha mintlawa yimbirhi a yi ta dlayiwa kasi lowa vunharhu a a ta wu tshika wu hanya. (2Sam 8:2, 11, 12; 1 Tikr 18:2, 11) Kumbexana a ku ri eka nyimpi leyi fanaka loko Benaya n’wana wa Yoyada a “dlaya vana vambirhi va Ariyele wa le Mowabu.’’ (2Sam 23:20; 1Tikr 11:22) Loko Davhida a hlula Vamowabu a ku ri ku hetiseka ka vuprofeta bya Balama lebyi a byi profeteke emalembeni yo tlula 400 lama hundzeke: “Ku ta huma nyeleti eka Yakobo, Ku ta huma nhonga ya vuhosi eIsrayele. Kunene u ta faya mombo wa Vamowabu ni tinhloko ta hinkwavo lava rhandzaka nyimpi.” (Tinhl 24:17) Nakambe hi ku fambisana ni ku hlula loku, mupisalema u vulavule hi Mowabu tanihi ‘xibya xa Xikwembu xo hlambela eka xona.’—Ps 60:8; 108:9.
NOVEMBER 25–DECEMBER 1
LESWI HI SWI DYONDZAKA EBIBELENI PISALEMA 109-112
Seketelani Yesu, Hosi!
Tinhla-nkulu Ta Buku Ya Vuntlhanu Ya Tipisalema
110:1, 2—“Hosi ya [Davhida],” Yesu Kreste, a a endla yini loko a tshama evokweni ra xinene ra Xikwembu? Endzhaku ka ku pfuka kakwe eka lava feke, Yesu u tlhandlukele ematilweni kutani a rindza evokweni ra xinene ra Xikwembu kukondza ku fika 1914 leswaku a ta sungula ku fuma tanihi Hosi. Enkarhini wolowo, Yesu u fume valandzeri vakwe lava totiweke, a va kongomisa eka ntirho wa vona wo chumayela ni wo endla vadyondzisiwa, a tlhela a va lunghiselela leswaku va ta fuma na yena eMfun’weni wakwe.—Matewu 24:14; 28:18-20; Luka 22:28-30.
Lava Va Lwaka Ni Xikwembu A Va Nge Hluli!
3 Ku sukela eku sunguleni ka lembe-xidzana ra vu-20, vanhu va Yehovha a va ri karhi va hlaseriwa. Ematikweni yo tala, vanhu lava nga ni mona va ringete ku sivela—ina, va herisa—ku huweleriwa ka mahungu lamanene ya Mfumo wa Xikwembu. A va ri karhi va kuceteriwa hi Nala wa hina lonkulu, ku nga Diyavulosi, loyi a “famba-famba[ka] ku fana ni nghala leyi vombaka, yi lava wa ku n’wi dya.” (1 Petro 5:8) Loko “nkarhi lowu vekiweke wa matiko” wu herile hi 1914, Xikwembu xi veke N’wana wa xona a va Hosi leyintshwa ya misava, xi n’wi nyika xileriso lexi nge: “Famba u ya hlula exikarhi ka valala va wena.” (Luka 21:24; Pisalema 110:2) Hi ku tirhisa matimba yakwe, Kreste u hlongole Sathana etilweni kutani a n’wi lahlela emisaveni. Diyavulosi u karihele Vakreste lava totiweke swin’we ni vanakulobye va vona, hi ku tiva leswaku nkarhi wakwe wu komile. (Nhlavutelo 12:9, 17) Xana byi ve byihi vuyelo bya ku hlasela loku phikelelaka ka vakaneti lava, lava va lwaka ni Xikwembu?
U Nga Yimi Ndhawu Yin’we—Endla Nhluvuko
Xikhutazo xa ku tirhisa nyiko ya wena xi fambisana ni ku ka u nga yimeli ku byeriwa. Xana wa ya ensin’wini ni van’wana u nga susumetiwanga hi munhu? Xana u tshama u xalamukele ku pfuna swirho swin’wana swa vandlha ra ka n’wina leswa ha ku sungulaka ku hlanganyela, leswa ha riki switsongo hi malembe kumbe leswi nga swigulani? Xana u tiendla u kumeka leswaku u ya basisa Holo ya Mfumo kumbe ku pfuna hi tindlela tin’wana emintsombanweni ni le tinhlengeletanweni? Xana u nga swi kota ku pfa u tsarisela ku va phayona ra nkarhinyana hi ku phindha-phindha? Xana u nga swi kota ku va phayona ra nkarhi hinkwawo kumbe ku ya pfuna evandlheni leri nga ni xilaveko lexikulu? Loko u ri makwerhu wa xinuna, xana u lwela ku fanelekela timfanelo ta Matsalwa ta malandza ya vutirheli ni vakulu? Ku tiyimisela ka wena ku pfuna ni ku amukela vutihlamuleri i xikombiso xa nhluvuko.—Ps. 110:3.
Endla Ndzavisiso
it-1-E 524 ¶2
Ntwanano
Ntwanano Wa Ku Va Muprista Ku Fana Na Melkisedeke. Ntwanano lowu wu boxiwe eka Pisalema 110:4 naswona mutsari wa buku ya Bibele ya Vaheveru a vulavula hi Kreste eka Vaheveru 7:1-3, 15-17. I ntwanano lowu endliweke hi Yehovha a ri na Yesu ntsena. Swi vonaka onge Yesu u vulavule hi wona loko a endla ntwanano wa mfumo ni valandzeri wakwe. (Lk 22:29) Hi ku ya hi xihlambanyo xa Yehovha, Yesu Kreste n’wana wa Xikwembu, a a ta va muprista ku fana na Melkisedeke. Melkisedeke a ri hosi ni muprista wa Xikwembu emisaveni. Yesu Kreste a a ta va Hosi ni Muprista Lonkulu, ku nga ri emisaveni kambe etilweni. U vekiwe ku va Hosi hilaha ku nga heriki endzhaku ka loko a tlhandlukele ematilweni. (Hv 6:20; 7:26, 28; 8:1) Ntwanano lowu i wa hilaha ku nga heriki hikuva Yesu u ta va ehansi ka nkongomiso wa Yehovha tanihi Hosi ni Muprista Lonkulu hilaha ku nga heriki.—Hv 7:3.
DECEMBER 2-8
LESWI HI SWI DYONDZAKA EBIBELENI PISALEMA 113-118
Hi Nga N’wi Hakela Hi Yini Yehovha?
Akekani Hi Rirhandzu
13 Hi ku ya hi marito ya Yesu, swi le rivaleni leswaku xa nkoka swinene i ku rhandza Yehovha. Hambiswiritano, a hi tswariwi hi ri ni rirhandzu lerikulu hi Yehovha. Hi fanele hi ri hlakulela. Loko hi sungula ku twa hi ta yena, hi kokeriwe eka yena hikwalaho ka leswi hi swi tweke. Hakatsongo-tsongo, hi dyondze hi ndlela leyi a lunghiseleleke vanhu misava ha yona. (Genesa 2:5-23) Hi dyondze hi ndlela leyi a tirhisaneke ha yona ni vanhu, a nga hi fularhelanga loko xidyoho xi hlasela vanhu vo sungula, kambe u teke magoza yo hi ponisa. (Genesa 3:1-5, 15) U tirhisane hi tintswalo ni lava a va tshembeka, naswona eku heteleleni u nyikele hi N’wana wa yena la tswariweke a ri swakwe leswaku hi ta rivaleriwa swidyoho swa hina. (Yohane 3:16, 36) Vutivi lebyi engetelekaka byi endle leswaku ku tlangela ka hina Yehovha ku kula. (Esaya 25:1) Hosi Davhida u vule leswaku a a rhandza Yehovha hikwalaho ka nkhathalelo wa Yena wa rirhandzu. (Pisalema 116:1-9) Namuntlha, Yehovha wa hi khathalela, wa hi kongomisa, wa hi tiyisa a tlhela a hi khutaza. Loko hi ya hi dyondza ha yena ngopfu, rirhandzu ra hina ha yena ra kula.—Pisalema 31:23; Sofaniya 3:17; Varhoma 8:28.
Amukela Hi Ntsako—U Tlhela U Nyika Hi Mbilu Hinkwayo
Mupisalema u vutisile a ku: “Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?” (Ps. 116:12) Xana u vuyeriwe hi yini? Yehovha u n’wi pfunile hi nkarhi wa “maxangu ni gome.” Ku tlula kwalaho, Yehovha u “ponise moya-xiviri wa [yena] eku feni.” Kutani a a lava ku “tlherisela” Yehovha swo karhi. Xana mupisalema a a ta endla yini? U te: “Switshembiso leswi hlambanyiweke ndzi ta swi hetisisa eka Yehovha.” (Ps. 116:3, 4, 8, 10-14) A a tiyimisele ku hetisisa switshembiso hinkwaswo leswi a swi hlambanyeke eka Yehovha ni ku endla hinkwaswo leswi a a n’wi lerise swona.
Na wena u nga endla hilaha ku fanaka. Hi ndlela yihi? Hi ku hanya hi milawu ya Xikwembu minkarhi hinkwayo. Hikwalaho, tiyiseka leswaku ku gandzela Yehovha i mhaka ya nkoka evuton’wini bya wena naswona u pfumelela moya wakwe leswaku wu ku kongomisa eka swilo hinkwaswo leswi u swi endlaka. (Ekl. 12:13; Gal. 5:16-18) I ntiyiso leswaku a wu nge swi koti hi ku helela ku tlherisela Yehovha hinkwaswo leswi a ku endleleke swona. Hambiswiritano, ‘Yehovha wa tsaka’ loko a vona leswaku u endla ntirho wa yena hi mbilu hinkwayo. (Swiv. 27:11) Hakunene i lunghelo lerikulu ku tsakisa Yehovha hi ndlela leyi!
Leswi Hi Swi Dyondzaka eBukwini Ya Levhitika
9 Dyondzo ya vumbirhi: Hi tirhela Yehovha hikwalaho ka leswi hi n’wi rhandzaka. Leswaku hi twisisa mhaka leyi, a hi buleni hi switlhavelo swa xinakulobye, ku nga xiphemu xin’wana xa vugandzeri lexi a xi ri xa nkoka eka Vaisrayele va khale. Eka buku ya Levhitika, hi twa leswaku Muisrayele a endla xitlhavelo xa xinakulobye “leswaku a kombisa ku nkhensa.” (Lev. 7:11-13, 16-18) A nga boheki ku endla xitlhavelo xexo kambe a a xi endla hi ku tirhandzela. Munhu un’wana ni un’wana a endla xitlhavelo xexo hi ku tirhandzela hikwalaho ka leswi a rhandza Yehovha Xikwembu xakwe. Munhu loyi a a endla xitlhavelo, ndyangu wakwe ni vaprista hi vona lava a va dya nyama ya xiharhi lexi a ku endliwe xitlhavelo hi xona. Kambe swirho swin’wana swa xiharhi xexo a swi nyikiwa Yehovha. Hi swihi swirho swa kona?
10 Dyondzo ya vunharhu: Hi nyika Yehovha swilo swa nkoka hikwalaho ka leswi hi n’wi rhandzaka. Yehovha a a teka mafurha ya xiharhi ma ri ya nkoka swinene. U tlhele a vula leswaku swirho swin’wana swa xiharhi, ku katsa ni tinso a swi ri swa nkoka swinene. (Hlaya Levhitika 3:6, 12, 14-16.) Hikwalaho, Yehovha a a tsaka swinene loko Vaisrayele hi ku tirhandzela va n’wi nyika swirho swa nkoka swa xiharhi ku katsa ni mafurha. Muisrayele loyi a endla xitlhavelo xo tano, a kombisa leswaku u lava ku nyika Xikwembu swilo swakwe swa nkoka swinene. Hilaha ku fanaka, leswi Yesu a rhandza Yehovha u endle hinkwaswo leswi a nga swi kotaka leswaku a n’wi tirhela hi mbilu hinkwayo. (Yoh. 14:31) Yesu a swi n’wi tsakisa ngopfu ku endla ku rhandza ka Xikwembu naswona a wu rhandza ngopfu nawu wa xona. (Ps. 40:8) A swi kanakanisi leswaku swi n’wi tsakise ngopfu Yehovha loko a vona Yesu a n’wi tirhela hi ku tirhandzela!
11 Ku fana ni switlhavelo swa xinakulobye, hi kombisa ndlela leyi hi titwaka ha yona hi Yehovha hi ku n’wi tirhela hi ku tirhandzela. Hi nyika Yehovha swilo swa nkoka hileswi hi n’wi rhandzaka hi timbilu ta hina hinkwato. Yehovha wa tsaka loko a vona vagandzeri vakwe va timiliyoni va n’wi tirhela hileswi va n’wi rhandzaka ni hileswi va rhandzaka milawu yakwe! Swa chavelela ku tiva leswaku Yehovha wa swi tlangela leswi hi n’wi endlelaka swona naswona wa xi vona xikongomelo xa hina xo endla tano. Hi xikombiso, loko u dyuharile naswona u nga ha swi koti ku n’wi tirhela hilaha u lavaka hakona, tiyiseka leswaku Yehovha wa xi twisisa xiyimo xa wena. U nga ha vona onge leswi u swi endlaka a swi nyawuli kambe Yehovha wa yi vona ndlela leyi u n’wi rhandzaka ha yona ni matshalatshala lawa u ma endlaka yo n’wi tirhela. Wa tsaka loko a ku vona u tikarhatela ku n’wi nyika swilo swa wena swa nkoka
Endla Ndzavisiso
Swivutiso Swa Vahlayi
Mupisalema u huhuteriwe ku yimbelela a ku: “I ka risima ematihlweni ya Yehovha ku fa ka lavo tshembeka vakwe.” (Ps. 116:15) Vutomi bya mugandzeri un’wana ni un’wana wa Yehovha i bya nkoka swinene eka yena. Hambiswiritano, marito lama tshahiweke eka Pisalema 116 a ma kombeteli eka rifu ra mugandzeri un’wana ni un’wana.
Loko ku nyikeriwa nkulumo ya xilahlo, swi hoxile ku tirhisa Pisalema 116:15 ku kombetela eka mufi hambiloko a fe a tshembekile eka Yehovha. Ha yini? Hikuva marito ya mupisalema ma ni nhlamuselo leyi anameke. Ma vula leswaku Xikwembu a xi nge pfumeleli leswaku ntlawa hinkwawo wa malandza ya xona yo tshembeka ma fa hikuva xi ma teka ma ri ya risima.—Hlaya Pisalema 72:14; 116:8.
DECEMBER 9-15
LESWI HI SWI DYONDZAKA EBIBELENI PISALEMA 119:1-56
“Xana Jaha Ri Nga Swi Kotisa Ku Yini Ku Tikhoma Hi Ndlela Leyinene?”
Xana U Tshama U Basile eTimhakeni Hinkwato?
10 Eka Vaefesa 5:5 Pawulo u tsundzuxile a ku: “Tivani mhaka leyi: Ku hava munhu ni un’we la nga ta averiwa ndzhaka eMfun’weni wa Kriste ni wa Xikwembu—loko a ri la oswaka, kumbe la endlaka swa thyaka—kumbe la nga ni makwanga.” Kambe, lembe rin’wana ni rin’wana magidi ya soriwa kumbe ya tsemiwa hikwalaho ka rigangugangu—‘va dyohela miri.’ (1 Vakorinto 6:18) Hakanyingi, i mhaka ya ku pfumala ku ‘tihlayisa hi ku ya hi rito [ra Xikwembu].’ (Psalma 119:9) Hi xikombiso, vamakwerhu vo tala, va tshika ku tihlayisa ka vona emahanyelweni eminkarhini yo wisa. Hi ku honisa xinakulobye xa le tilweni, va sungula vunghana ni vanhu va misava lava va nga eku wiseni. Hi ku ehleketa leswaku lava i ‘vanhu va kahle hakunene,’ Vakriste van’wana va hlanganyele na vona eka swiendlo leswi kanakanisaka. Hi ku fanana, van’wana va ve lava tolovelanaka ngopfu na vatirhi-kulobye. Nkulu un’wana wa Mukriste u ve la tolovelanaka ngopfu na muthoriwa wa xisati lerova a fularhela ndyangu wa yena ivi a sungula ku tshama na yena! Ku susiwa ku landzerile. Marito ya Bibele i ya ntiyiso swonghasi loko ya ku, “Vanghana lavo biha, va borisa mikhuva leyinene!”—1 Vakorinto 15:33.
“Switsundzuxo Swa Wena Ndza Swi Rhandza”
YEHOVHA u nyika vanhu vakwe switsundzuxo leswaku va kota ku langutana ni mintshikilelo ya minkarhi leyi ya mangava. Swin’wana swa switsundzuxo leswi hi swi kuma loko hi tihlayela Bibele, kasi swin’wana hi swi kuma eka tinkulumo kumbe tinhlamulo leti nyikeriwaka eminhlanganweni ya Vukreste. Swo tala swa leswi hi swi hlayaka kumbe hi swi twaka eminhlanganweni leyi a hi swintshwa. Kumbexana hi tshame hi hlaya rungula ro fana na rona nkarhi wun’wana. Kambe, leswi hi nga vanhu lava rivalaka, nkarhi na nkarhi hi fanele hi tsundzuxiwa hi swikongomelo, milawu ni swiletelo swa Yehovha. Hi fanele hi swi tlangela switsundzuxo swa Xikwembu. Swa hi khutaza hi ku hi pfuna leswaku hi anakanya hi leswi swi hi susumeteleke ku tinyiketela ku hanya hi ndlela leyi pfumelelanaka ni ku rhandza ka Xikwembu. Hi yona mhaka leyi mupisalema a yimbeleleleke Yehovha a ku: “Switsundzuxo swa wena ndza swi rhandza.”—Pisalema 119:24.
U Nga Languti Swilo Leswi Nga Pfuniki Nchumu!
2 Hambiswiritano, leswi hi swi langutaka swi nga hi nghenisa ekhombyeni. Vuxaka lebyi nga kona exikarhi ka mahlo ya hina ni mianakanyo ya hina i byikulu swinene lerova leswi hi swi vonaka hi mahlo ya hina ivi swi nghena emianakanyweni ya hina swi nga sungula kumbe swi nyanyisa ku navela ka hina embilwini. Naswona leswi hi hanyaka emisaveni leyi hombolokeke ni leyi rhandzaka ku titsakisa leyi fumiwaka hi Sathana Diyavulosi, ku ni swifaniso swo tala, swinavetisi ni mahungu lama nga hi hambukisaka hi ku olova—hambiloko ho swi languta kumbe hi ma yingisela katsongo. (1 Yoh. 5:19) Hikwalaho, a swi hlamarisi leswi mupisalema a kombeleke Xikwembu a ku: “Endla leswaku mahlo ya mina ma hundza ma nga swi voni swilo leswi nga pfuniki nchumu; ndzi londzovote ndzi hanya endleleni ya wena.”—Ps. 119:37.
Endla Ndzavisiso
Tshemba Rito Ra Yehovha
2 Yinhla-nkulu ya Pisalema 119 i nkoka wa rito kumbe rungula ra Xikwembu. Kumbexana mutsari u endle risimu leri ri landzelelana hi maletere leswaku ri ta va xitsundzuxo. Tindzimana ta yona ta 176 ti sekeriwe eka maletere lama landzelelanaka ya Xiheveru. Eka Xiheveru xo sungula, tindzimana tin’wana ni tin’wana ta 22 ta pisalema ti ni tilayini ta 8 leti sungulaka hi letere leri fanaka. Pisalema leyi yi vulavula hi rito, nawu, switsundzuxo, tindlela, swileriso, swiboho swa vuavanyisi ni milawu ya Xikwembu. Exihlokweni lexi ni le ka lexi landzelaka, Pisalema 119 yi ta kambisisiwa hi ku ya hi vuhundzuluxeri lebyi pakanisaka bya tsalwa ra Bibele ra Xiheveru. Ku anakanyisisa hi mintokoto leyi katsaka malandza ya Yehovha ya le nkarhini lowu hundzeke ni ya sweswi swi fanele swi kurisa ku twisisa ka hina risimu leri huhuteriweke hi Xikwembu swi tlhela swi kurisa ku tlangela ka hina Rito ra Xikwembu leri tsariweke, ku nga Bibele.
DECEMBER 16-22
TREASURES FROM GOD’S WORD PISALEMA 119:57-120
Ndlela Yo Tiyisela Ku Xaniseka
“Ndzi Wu Rhandza Swinene Nawu Wa Wena!”
2 U nga ha tivutisa u ku, “Xana nawu wa Xikwembu wu ve nchavelelo eka mupisalema hi ndlela yihi?” Lexi n’wi tiyiseke hi leswi a a khorwiseka leswaku Yehovha wa n’wi rhandza. Mupisalema a a tsaka hi ku tiva vuyelo lebyinene lebyi vaka kona loko munhu a hanya hi nawu lowu, hambileswi vakaneti van’wana a va n’wi dyisa mbitsi. A a swi xiya leswaku Yehovha wa n’wi khathalela. Ku engetela kwalaho, ku tirhisa ka yena nkongomiso wa nawu wa Xikwembu, ku n’wi endle a tlhariha ku tlula valala vakwe naswona leswi swi n’wi endle a hambeta a hanya. Ku yingisa ka yena nawu swi n’wi endle a va ni ku rhula ni ripfalo lerinene.—Pisalema 119:1, 9, 65, 93, 98, 165.
Xana U Rhandza Switsundzuxo Swa Yehovha Swinene?
3 Switsundzuxo swa Xikwembu a swi ri swa risima eka mupisalema la yimbeleleke a ku: “Ndzi hatlisile, a ndzi hlwelanga ku hlayisa swileriso swa wena. Mapindza ya lavo homboloka ma ndzi rhendzerile. Nawu wa wena a ndzi wu rivalanga.” (Pisalema 119:60, 61) Switsundzuxo swa Yehovha swi hi pfuna ku tiyisela nxaniso hikuva ha tiyiseka leswaku Tata wa hina wa le tilweni a nga tsema mapindza lama hi sivelaka lawa valala va hina va hi bohaka ha wona. Hi ku famba ka nkarhi, wa hi ntshunxa eka swihinga swo tano leswaku hi ta ya emahlweni ni ntirho wo chumayela hi Mfumo.—Marka 13:10.
Tinhla-nkulu Ta Buku Ya Vuntlhanu Ya Tipisalema
119:71—Ku xanisiwa swi va ni vuyelo byihi lebyinene? Maxangu ma nga hi dyondzisa ku titshega hi Yehovha swinene, ku khongela eka yena hi mbilu hinkwayo, ni ku hisekela ku dyondza Bibele kutani hi tirhisa leswi yi swi vulaka. Ku tlula kwalaho, ndlela leyi hi angulaka ha yona loko hi xaniseka yi nga paluxa ku tsana ka hina loku faneleke ku lulamisiwa. Ku xaniseka a ku nge hi dyisi mbitsi loko hi ku pfumelela leswaku ku antswisa vumunhu bya hina.
‘Rilani Ni Vanhu Lava Rilaka’
3 Yehovha Tata wa hina wa le tilweni hi yena muchaveleri wa hinkwavo lava nga ni gome. (Hlaya 2 Vakorinto 1:3, 4.) Yehovha i xikombiso lexikulu xa twela vusiwana, u byela vanhu vakwe a ku: “Mina—hi mina Loyi a mi chavelelaka.”—Esa. 51:12; Ps. 119:50, 52, 76.
5 Hi nga tiyiseka leswaku Yehovha u ta hi chavelela. Kutani loko hi feriwile a hi khongeleni eka Yehovha hi n’wi byela ndlela leyi hi titwaka ha yona. Swa chavelela ku tiva leswaku Yehovha wa ku twisisa ku vava loku hi ku twaka naswona wa hi chavelela! Kambe u hi chavelela njhani?
Endla Ndzavisiso
Tinhla-nkulu Ta Buku Ya Vuntlhanu Ya Tipisalema
119:96—Xana ma vula yini marito lama nge “makumu ya ku hetiseka hinkwako”? Mupisalema a a vulavula hi ku hetiseka hi ku ya hi vonelo ra munhu. Kumbexana a a vula leswaku matwisiselo ya munhu malunghana ni ku hetiseka ma kayivela. Ku hambana ni sweswo, xileriso xa Xikwembu a xi kayiveli helo. Nkongomiso wa xona wu tirha etimhakeni hinkwato ta vutomi. Bibele Ya Xitsonga yi ri: ‘Ndzi vonile ku hetelela ka swilo hinkwaswo leswi hetisekeke, kambe ku lerisa ka wena a ku na laha ku tlhelaka kona.’
DECEMBER 23-29
LESWI HI SWI DYONDZAKA EBIBELENI PISALEMA 119:121-176
Ndlela Yo Papalata Ku Va Ni Gome Swi Nga Fanelanga
Pfumelela Milawu Ni Misinya Ya Milawu Ya Xikwembu Yi Letela Ripfalo Ra Wena
5 Leswaku hi vuyeriwa eka milawu ya Xikwembu, a hi fanelanga hi yi hlaya kumbe ku tolovelana na yona ntsena. Hi fanele hi yi rhandza ni ku yi xixima. Rito ra Xikwembu ri ri: “Vengani leswo biha, mi rhandza leswinene.” (Amo. 5:15) Kambe hi nga swi endla njhani sweswo? Hi fanele hi dyondza ku languta swilo hi ndlela leyi Yehovha a swi langutaka ha yona. Hi xikombiso: A hi nge u ni nkelunkelu. Dokodela wa wena u ku nyika swiringanyeto mayelana ni ndlela leyi u faneleke u dya ha yona, u endla vutiolori ni ku endla ku cinca kun’wana evuton’wini bya wena. Endzhaku ko tirhisa swiringanyeto sweswo, u vona ku cinca! Kumbexana a wu ta n’wi khensa dokodela wa wena hileswi a ku pfuneke leswaku u antswisa rihanyo ra wena
6 Hilaha ku fanaka, Muvumbi wa hina u hi nyike milawu leyi hi sirhelelaka eka vuyelo byo biha bya xidyoho kutani hi antswisa vutomi bya hina. Anakanya ndlela leyi swi hi vuyerisaka ha yona ku landzela milawu ya Bibele malunghana ni mavunwa, ku yiva, ku kunguhata swilo swo biha, ku tikhoma ko biha hi tlhelo ra masangu, madzolonga ni vungoma. (Hlaya Swivuriso 6:16-19; Nhlav. 21:8) Loko hi vona ndlela leyi hi vuyeriwaka ha yona loko hi endla swilo hi ndlela ya Yehovha, ha tsaka ni ku titwa hi rhandza Yehovha swin’we ni milawu yakwe.
Vantshwa—Xana I Yini Lexi Mi Xi Chivirikelaka?
12 Ku tlula hinkwaswo, u fanele u dyondza ku nyenya, ku venga ni ku phirhiwa hi leswo biha. (Pisalema 97:10) Xana u nga swi venga njhani leswi eku sunguleni swi nga ku tsakisaka kumbe swi ku nyanyula? Hi ku ehleketa hi vuyelo bya swona! “Mi nga tshuki mi tixisa: Xikwembu a xi vungunyiwi; xin’wana ni xin’wana lexi munhu a xi byalaka, ú ta tshovela xona; loyi a byalaka swo tsakisa ntumbuluko wa yena wa nyama, ú ta tshovela leswo bola leswi humaka eka ntumbuluko wa yena wolowo.” (Vagalatiya 6:7, 8) Loko u ringiwa ku pfumelela ku navela, ehleketa hi nchumu lowu nga wukulu—ndlela leyi swi nga ta karhata Yehovha Xikwembu ha yona. (Ringanisa Pisalema 78:41.) Nakambe ehleketa hi ku va kona ka nyimba leyi nga laviwiki kumbe ku ngheniwa hi vuvabyi, byo fana ni AIDS. Anakanya hi ku karhateka ka mintlhaveko ni xindzhuti lexi xi nga ta ku lahlekela. Nakambe ku nga ha va ni vuyelo lebyi tekaka nkarhi wo leha. Wansati un’wana wa Mukreste wa pfumela: “Mina ni nuna wanga hi tshame hi hlangana ni vanhu van’wana hi rimbewu hi nga si kumana. Hambi leswi havambirhi hi nga Vakreste namuntlha, vutomi bya hina bya khale bya rimbewu byi vanga timholovo ni mavondzo evukatini bya hina.” Xin’wana lexi nga fanelangiki ku honisiwa, i ku lahlekeriwa ka wena hi malunghelo ya le tilweni kumbe ku tshuka u hlongoriwa evandlheni ra Vukreste! (1 Vakorinto 5:9-13) Xana ntsako wihi na wihi wa xinkarhana wu ringana ni lunghelo ro tano?
Endla Ndzavisiso
Tiyiseka Leswaku “Rito Ra [Xikwembu] I Ntiyiso”
2Tanihi malandza ya Yehovha, ha tiyiseka leswaku hi yena “Xikwembu xa ntiyiso” naswona mikarhi hinkwayo u hi navelela leswinene. (Ps. 31:5; Esa. 48:17) Ha swi tiva leswaku hi nga tshemba leswi hi swi hlayaka eBibeleni, ku nga leswaku “mongo wa rito ra [Xikwembu] i ntiyiso.” (Hlaya Pisalema 119:160.) Hi pfumelelana ni leswi xidyondzeki xin’wana xa Bibele xi swi tsaleke, xi te: “A ku na leswi nga mavunwa eka leswi Xikwembu xi swi vuleke kumbe swi nga endleki. Vanhu va Xikwembu va nga tshemba leswi xi swi vulaka hikuva va tshemba Xikwembu lexi swi vuleke.”
DECEMBER 30–JANUARY 5
LESWI HI SWI DYONDZAKA EBIBELENI PISALEMA 120-126
Va Byale Va Ri Karhi Va Rila Kambe Va Tshovele Hi Ntsako
Va Katekile Lava Vangamisaka Xikwembu
10 Loko hi amukela joko ra ku va mudyondzisiwa, kahle-kahle hi va hi lwisana na Sathana. Yakobo 4:7 ya hi tshembisa: “Mi kaneta Diyavulosi, kutani u ta mi balekela.” Hambiswiritano, sweswo a hi matlangwana. Ku tirhela Xikwembu swi lava ku tikarhata swinene. (Luka 13:24) Kambe Bibele ya hi tshembisa eka Pisalema 126:5: “Lava va byalaka mbewu hi mihloti va ta tshovela hi ku huwelela ka ku tsaka.” Ina, Xikwembu lexi hi xi gandzelaka xi ni moya wa ku tlangela. I “muhakeri wa lava va xi lavaka hi mbilu hinkwayo,” naswona xi katekisa lava va xi vangamisaka.—Vaheveru 11:6.
Xana Ripfumelo Ra Wena Ri Ta Va Ri Tiye Ku Fikela Kwihi?
17 Xana u ni gome ro feriwa hi loyi u n’wi rhandzaka? Tinyike nkarhi wo tiyisa ripfumelo ra wena ni ntshembo wa ku pfuxiwa ka vafi hi ku hlaya timhaka ta le Bibeleni leti vulavulaka hi vanhu lava pfuxiweke. Xana u ni gome hileswi un’wana ekaya a susiweke evandlheni? Tixavele nkarhi wo dyondza ni ku twisisa leswaku Yehovha u tshinya vanhu hi ndlela leyi va vuyerisaka. Loko u hlangana ni swiphiqo, swi pfumelele swi tiyisa ripfumelo ra wena. Phofulela Yehovha ta le mbilwini ya wena. U nga tihambanisi ni van’wana kambe tshama u ri ekusuhi ni vamakwerhu. (Swiv. 18:1) Hambiloko swiyimo swi tika, yana emahlweni u endla swilo leswi nga ta ku pfuna u kota ku tiyisela. (Ps. 126:5, 6) U nga tshiki ku va kona etinhlengeletanweni ta vandlha, ku va kona ensin’wini ni ku hlaya Bibele. Tshama u ri karhi u anakanyisisa hi mikateko yo tsakisa leyi Yehovha a nga ta ku nyika yona. Loko u vona ndlela leyi Yehovha a ku pfunaka hayona, ripfumelo ra wena ri ta ya ri tiya swinene..
Yana Emahlweni Ni Ntirho Wo Tshovela!
13 Nchumu lowu va chavelelaka swinene vatshoveri va Xikwembu, naswona ngopfu-ngopfu lava xanisiwaka, i marito ya Pisalema 126:5, 6: “Lava va byalaka mbewu hi mihloti va ta tshovela hi ku huwelela ka ku tsaka. Kunene loyi a humaka, a ri karhi a rila, a rhwale nkwama lowu teleke mbewu, kunene u ta nghena hi ku huwelela ka ku tsaka, a rhwale tinyandza takwe.” Marito ya mupisalema ya ku byala ni ku tshovela ma kombisa nkhathalelo wa Yehovha eka masalela lama vuyeke evuhlongeni le Babilona wa khale, swin’we ni nkateko wa yena eka vona. A va tsakile swinene loko va ntshunxiwa, kambe va nga ha va va ririle loko va byala mbewu emisaveni leyi a yi nga ri na vaaki naswona yi nga rimiwangiki ku ringana malembe ya 70 lawa va ma heteke evuhlongeni. Hambiswiritano, lava va yeke emahlweni va byala va tlhela va aka va tiphine hi mihandzu ya kona ni ku eneriseka eka ku tikarhata ka vona.
14 Hi nga ha rila loko hi ri endzingweni kumbe loko hina kumbe vapfumeri-kulorhi va xaniseriwa vululami. (1 Petro 3:14) Entirhweni wa hina wo tshovela, hi nga ha rhanga hi tikeriwa hi leswi hi nga riki na vumbhoni bya leswaku hi ta humelela eka matshalatshala ya hina evutirhelini. Kambe loko hi hambeta hi byala hi tlhela hi cheleta, Xikwembu xi ta endla leswaku swi kula, hakanyingi hi ndlela leyi a hi nga yi langutelanga. (1 Vakorinto 3:6) Leswi swi kombisiwa kahle hi vuyelo bya ku fambisa ka hina Tibibele ni tibuku leti sekeriweke eMatsalweni.
Endla Ndzavisiso
Matimba Ya Ku Sirhelela—‘Xikwembu I Vutumbelo Bya Hina’
15 Xo sungula, ehleketa hi mhaka ya ku sirhelela vutomi bya hina. Leswi hi nga vagandzeri va Yehovha, hi nga rindzela leswaku a hi sirhelela tanihi ntlawa. Loko a swi nga ri tano, Sathana a a ta hi hlasela hi ku olova. Ehleketa hi leswi: Sathana, “mufumi wa misava leyi,” u lava ntsena ku herisa vugandzeri bya ntiyiso. (Yohane 12:31; Nhlavutelo 12:17) Tihulumendhe tin’wana leti nga ni matimba swinene emisaveni ti yirise ntirho wa hina wa ku chumayela naswona ti ringete ku hi herisa. Kambe, vanhu va Yehovha va tshame va tiyile naswona va ye emahlweni handle ko karhala! Ha yini matiko lama nga ni matimba ma tsandzekile ku herisa ntirho wa ntlawa lowu lowutsongo naswona lowu vonakaka wu nga sirhelelekanga wa Vakreste? Hikuva Yehovha u hi sirhelele hi timpapa takwe leta matimba!—Pisalema 17:7, 8.