Swivutiso Swa Vahlayi

A ku ri vamani Vayuda lava a va ri maphorisa ya le tempeleni? Hi wihi ntirho lowu a va wu endla?

Valevhi van’wana lava a va nga ri vaprista a va tirha mitirho yo tala swinene, wun’wana wa mitirho yoleyo a ku ri vuphorisa. Ntirho lowu a wu languteriwa hi mufambisi wa tempele. Philo, mutsari wa Muyuda u hlamusela mitirho leyi a yi endliwa hi maphorisa wolawo, u ri: “[Valevhi] van’wana a va yima egedeni, van’wana a va yima enyangweni kasi van’wanyana a va yima [endzeni ka tempele] va rindza leswaku ku nga ngheni munhu ni un’we loyi a nga fanelekiki ku nghena evukwetsimelweni. Van’wana a va rhendzeleka ni tempele, va yi rindza vusiku ni nhlikanhi va ri karhi va cincana.”

Maphorisa lawa hi wona lawa a ma pfuna Huvo ya Sanedri loko yi lava ku pfuniwa. Eka Vayuda hi wona ntsena, lawa a ma pfumeleriwa ku khoma matlhari hi mfumo wa Rhoma.

Xidyondzi xa Bibele, Joachim Jeremias, u vula leswaku, “marito lawa Yesu a ma vuleke loko a khomiwa lama nge, siku ni siku a ndzi tshama eTempeleni ndzi dyondzisa kambe a mi ndzi khomanga (Mat. 26.55), ma swi veka erivaleni leswaku maphorisa lawa a ma te eku n’wi khomeni, a ku ri maphorisa ya le Tempeleni.” Xidyondzi lexi, xi kholwa leswaku vanhu lava va tshameke va rhumiwa ku ya khoma Yesu, a ku ri wona maphorisa lawa ya le tempeleni. (Yoh. 7:32, 45, 46) Hi ku famba ka nkarhi, maphorisa lawa ni mufambisi wa tempele, va rhumiwe ku landza vadyondzisiwa va Yesu leswaku va va tisa eka Huvo ya Sanedri. Swi nga endleka leswaku hi wona lama kokeleke muapostola Pawulo ehandle ka tempele.—Mint. 4:1-3; 5:17-27; 21:27-30.