DYONDZO 46
Hikwalaho Ka Yini U Fanele U Tinyiketela Kutani U Khuvuriwa?
U tinyiketela eka Yehovha hi ku khongela, u n’wi tshembisa leswaku u ta gandzela yena ntsena u tlhela u rhangisa ku rhandza ka yena evuton’wini bya wena. (Pisalema 40:8) Endzhaku ka sweswo, wa khuvuriwa. Loko u endla tano, u kombisa van’wana leswaku u tinyiketerile. Xiboho xa ku tinyiketela eka Yehovha i xa nkoka swinene eka swiboho hinkwaswo leswi hi nga swi endlaka evuton’wini. I yini lexi nga ku susumetelaka ku endla xiboho xo tano xa nkoka lexi nga ta cinca vutomi bya wena?
1. I yini lexi susumetelaka munhu ku tinyiketela?
Hi tinyiketela eka Yehovha hileswi hi susumetiwaka hi rirhandzu. (1 Yohane 4:10, 19) Bibele yi hi khutaza yi ku: “Rhandza Yehovha Xikwembu xa wena hi mbilu ya wena hinkwayo, hi vutomi bya wena hinkwabyo, hi mianakanyo ya wena hinkwayo ni hi matimba ya wena hinkwawo.” (Marka 12:30) Hi kombisa leswaku hi rhandza Xikwembu hi leswi hi swi vulaka ni hi leswi hi swi endlaka. Ku fana ni leswi vanhu vambirhi lava rhandzanaka va tekanaka, swi tano ni hi ndlela leyi hi rhandzaka Yehovha ha yona, yi hi susumetela ku tinyiketela eka yena kutani hi khuvuriwa.
2. Yehovha u ti katekisa njhani Timbhoni takwe leti khuvuriweke?
Loko u khuvuriwa, u ta va xirho xa ndyangu wa Yehovha lowu tsakeke. Yehovha u ta ku komba rirhandzu hi tindlela to tala naswona u ta va ni vuxaka lebyikulu na yena ku tlula sweswi. (Hlaya Malakiya 3:16-18.) Yehovha u ta va Tata wa wena naswona u ta va ni ndyangu wa vamakwavo va xinuna ni va xisati emisaveni hinkwayo lava rhandzaka Yehovha swin’we na wena. (Hlaya Marka 10:29, 30.) Kambe, ku na leswi u faneleke u swi endla loko u nga si khuvuriwa. U fanele u dyondza hi Yehovha, u n’wi rhandza u tlhela u va ni ripfumelo eka N’wana wakwe. Xo hetelela, u fanele u tinyiketela eka Yehovha. Loko u endla swilo leswi kutani u khuvuriwa, swi ta koteka leswaku u hanya hilaha ku nga heriki. Rito ra Xikwembu ri ri: “Ma ponisiwa hi . . . nkhuvulo.”—1 Petro 3:21.
ANAKANYISISA
Kambisisa lexi endlaka swi va swa nkoka leswaku u tinyiketela eka Yehovha kutani u khuvuriwa.
3. Hinkwerhu hi fanele hi hlawula loyi hi nga ta n’wi tirhela
Le Israyele wa khale, vanhu van’wana a va ehleketa leswaku va nga gandzela Yehovha va tlhela va gandzela xikwembu xa mavunwa lexi vuriwaka Bali. Kambe Yehovha u rhume muprofeta wakwe Eliya leswaku a ya lulamisa vonelo ra vona leri hoxeke. Hlaya 1 Tihosi 18:21, ivi mi bula hi xivutiso lexi:
Vaisrayele a va fanele va hlawula ku endla yini?
Ku fana ni Vaisrayele, na hina hi fanele hi hlawula leswaku hi ta tirhela mani. Hlaya Luka 16:13, ivi mi bula hi swivutiso leswi:
Hikwalaho ka yini swi nga koteki leswaku hi gandzela Yehovha ni munhu un’wana kumbe nchumu wun’wana hi nkarhi wun’we?
Hi nga n’wi kombisa njhani Yehovha leswaku hi hlawula ku gandzela yena?
4. Anakanyisisa hi ndlela leyi Yehovha a ku rhandzaka ha yona
Yehovha u hi nyike tinyiko to tala ta risima. Hina hi nga n’wi nyika yini? Tlanga VHIDIYO.
Yehovha u swi kombise hi tindlela tihi leswaku wa ku rhandza? Hlaya Pisalema 104:14, 15 na 1 Yohane 4:9, 10, ivi mi bula hi swivutiso leswi:
Hi tihi tinyiko leti humaka eka Yehovha leti u ti tlangelaka swinene?
Tinyiko toleto ti ku endla u titwa njhani hi yena?
Loko hi nyikiwe nyiko leyi hi yi rhandzaka swinene, hi lava ku kombisa ku khensa eka loyi a hi nyikeke yona. Hlaya Deteronoma 16:17, ivi mi bula hi xivutiso lexi:
Loko u ehleketa hi swilo hinkwaswo leswi Yehovha a ku endleleke swona, u susumeteleka ku n’wi nyika yini?
5. Ku tinyiketela swi tisa mikateko yo tala
Vanhu vo tala va ehleketa leswaku ndhuma, ntirho lowu holelaka swi nyawula kumbe mali swi ta va endla va tsaka. Xana sweswo i ntiyiso? Tlanga VHIDIYO, ivi mi bula hi swivutiso leswi landzelaka.
Hambileswi mutlangi loyi eka vhidiyo a a rhandza ku tlanga bolo, hikwalaho ka yini a yi tshikile?
U endle xiboho xo tinyiketela eka Yehovha ku nga ri eka bolo. U ehleketa leswaku u endle xiboho lexinene? Hikwalaho ka yini u vula tano?
Loko muapostola Pawulo a nga si va Mukreste, swilo a swi n’wi fambela kahle. A a dyondzisiwe nawu wa Xiyuda hi mudyondzisi la dumeke. Kambe u swi tshikile sweswo leswaku a ta va Mukreste. Xana Pawulo u tisorile? Hlaya Vafilipiya 3:8, ivi mi bula hi swivutiso leswi:
Hikwalaho ka yini Pawulo a vule leswaku swilo leswi a swi endleke loko a nga si va Mukreste a ku ri “nhulu ya thyaka”?
Kambe u vuyeriwe hi yini hileswi a tshikeke swilo sweswo?
Xana ku na nchumu wa nkoka swinene evuton’wini ku tlula ku tirhela Yehovha?
Loko Pawulo a va Mukreste, u kume swo tala ku tlula leswi a swi tshikeke
VAN’WANA VA RI: “A swi bohi ku tinyiketela eka Xikwembu, u fanele u tiphina hi vutomi.”
Hikwalaho ka yini u vona swi twala ku tinyiketela eka Yehovha?
NKATSAKANYO
Rirhandzu ri hi susumetela ku tinyiketela eka Yehovha ni ku khuvuriwa.
Mpfuxeto
Hikwalaho ka yini hi fanele hi rhandza Yehovha hi mbilu hinkwayo hi tlhela hi n’wi gandzela?
Yehovha u ti katekisa njhani Timbhoni takwe leti khuvuriweke?
Xana wa swi lava ku tinyiketela eka Yehovha?
KUMA LESWI ENGETELEKEKE
Vona lexi endleke xiyimbeleri ni mutlangi wa bolo va hlawula ku tinyiketela eka Yehovha.
Vantshwa Va Vutisa—Xana Ndzi Ta Endla Yini Hi Vutomi Bya Mina?—Loko Ndzi Languta Endzhaku (6:54)
Twana swivangelo leswi engetelekeke leswi nga ta ku pfuna leswaku u tinyiketela eka Yehovha.
“Ha Yini U Fanele U Tinyiketela Eka Yehovha?” (Xihondzo xo Rindza, January 15, 2010)
Eka vhidiyo leyi ya vuyimbeleri, vona ndlela leyi lava tinyiketeleke eka Yehovha va tsakaka ha yona.
Eka mhaka ya vutomi leyi nge “Ku Ringana Malembe Yo Tala A Ndzi Tivutisa Leswaku, ‘Ha Yini Hi Ri Laha?’” xiya leswi endleke wansati un’wana a kambisisa swilo leswi a a swi rhangisa evuton’wini.
“Bibele Yi Hundzula Vutomi Bya Vanhu” (Xihondzo xo Rindza, November 1, 2012)