Xana U Swi Lunghekerile Ku Tinyiketela Eka Yehovha?

1-2. Munhu u fanele a endla yini loko a nga si khuvuriwa?

EKA malembe ya ntlhanu lama hundzeke, vanhu vo tlula miliyoni va khuvuriwile va va Timbhoni ta Yehovha. Ku fana na Timotiya loyi a a ri mudyondzisiwa hi nkarhi wa vaapostola, vo tala va vanhu lava va dyondze ntiyiso “ku sukela loko [v]a ha ri [t]icece.” (2 Tim. 3:​14, 15) Van’wana va dyondze hi Yehovha loko se va kurile kumbe va dyuharile. Wansati un’wana u dyondze Bibele ni Timbhoni ta Yehovha ivi a khuvuriwa a ri ni malembe ya 97!

² Loko u ri xichudeni xa Bibele kumbe u kurisiwa hi vatswari lava nga Timbhoni, xana u ehleketa hi ku khuvuriwa? Sweswo swi kahle ngopfu! Kambe loko u nga si khuvuriwa, u fanele u rhanga u tinyiketela eka Yehovha. Nhlokomhaka leyi, yi ta hlamusela leswi vulaka swona ku tinyiketela. Yi ta tlhela yi ku pfuna u vona leswaku hikwalahokayini u nga ri na xivangelo xo veketela mhaka ya ku tinyiketela ni ku khuvuriwa loko u swi lunghekerile ku endla tano.

SWI VULA YINI KU TINYIKETELA?

3. Vula swikombiso swa le Bibeleni swa vanhu lava a va tinyiketele eka Yehovha.

³ EBibeleni, munhu la tinyiketeleke eka Yehovha a a hlawuriwe ku endla ntirho wo hlawuleka. Vaisrayele a va ri tiko leri tinyiketeleke eka Yehovha. Kambe a ku ri ni Vaisrayele van’wana lava a va tinyiketele eka Yehovha hi ndlela yo hlawuleka. Hi xikombiso, Aroni a a ambala “mfungho wo kwetsima wa ku tinyiketela,” ku nga xiphepherhele xo hatima xa nsuku lexi a xi ri emahlweni ka duku rakwe ra le nhlokweni. Xiphepherhele xexo xa nsuku a xi kombisa leswaku a a hlawuriwe ku tirhela Yehovha hi ndlela yo hlawuleka tanihi muprista lonkulu wa Vaisrayele. (Lev. 8:9) Vanaziri na vona a va tinyiketele eka Yehovha hi ndlela yo hlawuleka. Rito “Munaziri” leri humaka eka rito ra Xiheveru leri nge, nazirʹ ri vula “Loyi A Hambanisiweke” kumbe “Loyi A Tinyiketeleke.” Vanaziri a va fanele va yingisa swiletelo swo hlawuleka leswi a swi tsariwe eka Nawu wa Muxe.—Tinhl. 6:​2-8.

4. (a) Loko u nyiketela vutomi bya wena eka Yehovha, hi wihi nchumu wo hlawuleka lowu sungulaka ku va wa nkoka eka wena? (b) Swi vula yini ku “titshik[a]”? (Nakambe vona xifaniso.)

⁴ Loko u tinyiketela eka Yehovha, u hlawula ku va mudyondzisiwa wa Yesu Kreste ni ku rhangisa ku endla ku rhandza ka Xikwembu evuton’wini bya wena. Xana sweswo swi katsa yini? Yesu u te: “Loyi a lavaka ku ndzi landzela, a a titshike.” (Mat. 16:24) Xiga xa Xigriki lexi hundzuluxeriweke xi va “a a titshike,” xi nga tlhela xi hundzuluxeriwa xi va “a nga ha tihanyeli.” Tanihi nandza wa Yehovha la tinyiketeleke, swi ta lava u ala swilo hinkwaswo leswi nga tsakisiki Yehovha. (2 Kor. 5:​14, 15) Sweswo swi katsa ku fambela ekule ni “mitirho ya nyama,” yo fana ni ku tikhoma ku biha hi swa masangu. (Gal. 5:​19-21; 1 Kor. 6:18) Xana ku yingisa milawu leyi swi ta ku tikisela vutomi? A swi tano loko u rhandza Yehovha na loko u tiyiseka leswaku swa ku vuyerisa ku yingisa milawu yakwe. (Ps. 119:97; Esa. 48:​17, 18) Makwerhu la vuriwaka Nicholas u swi veka hi ndlela leyi, “U nga ha teka milawu ya Yehovha yi fana ni jele leri ku sivelaka ku endla leswi u swi lavaka kumbe u yi teka yi fana ni tinsimbi leti ku sirhelelaka eka khombo, endhawini leyi tinghala ti pfaleriweke eka yona.”

5. (a) U tinyiketela njhani eka Yehovha? (b) Hi kwihi ku hambana exikarhi ka ku tinyiketela ni ku khuvuriwa? (Nakambe vona xifaniso.)

⁵ Xana u tinyiketela njhani eka Yehovha? Hi ku va u khongela, u n’wi tshembisa leswaku u ta gandzela yena ntsena ni ku rhangisa ku rhandza kakwe evuton’wini bya wena. Hi ndlela yoleyo, u tshembisa Yehovha leswaku u ta tshama u ri karhi u n’wi rhandza “hi mbilu ya wena hinkwayo, hi vutomi bya wena hinkwabyo, hi mianakanyo ya wena hinkwayo ni hi matimba ya wena hinkwawo.” (Mar. 12:30) U tinyiketela eka Yehovha exihundleni naswona mhaka leyi yi khumba wena na yena ntsena. Kambe nkhuvulo i wa le erivaleni; wu komba vanhu leswaku u tinyiketerile eka Xikwembu. Loko u tinyiketela, u endla xihlambanyo xa nkoka swinene naswona u fanele u tiyimisela ku hanya hi xona hikuva Yehovha u langutele leswaku u endla tano.—Ekl. 5:​4, 5.

HIKWALAHOKAYINI U FANELE U TINYIKETELA EKA YEHOVHA?

6. I yini leswi endlaka munhu a lava ku tinyiketela eka Yehovha?

⁶ Xivangelo xa nkoka lexi endlaka u tinyiketela eka Yehovha hileswi u n’wi rhandzaka. Rirhandzu rero a ri titsheganga hi ndlela leyi u titwaka hayona ntsena. Kambe ri titshege hi ndlela leyi u rhandzaka Yehovha hayona hileswi u tiveke “vutivi bya ntiyiso” mayelana na yena ni xikongomelo xakwe. (Kol. 1:9) Loko u ri karhi u dyondza Matsalwa, u tiyisekile leswaku (1) Yehovha i wa xiviri, (2) Bibele i Rito rakwe leri huhuteriweke naswona (3) u tirhisa nhlangano wakwe leswaku a endla ku rhandza kakwe.

7. Hi fanele hi endla yini loko hi nga si tinyiketela eka Xikwembu?

⁷ Lava tinyiketelaka eka Yehovha va fanele va tiva tidyondzo leti kumekaka eRitweni ra Xikwembu naswona va hanya hi milawu yakwe. Va endla hinkwaswo leswi va nga swi kotaka leswaku va byela van’wana leswi va swi dyondzeke. (Mat. 28:​19, 20) Ndlela leyi va rhandzaka Yehovha hayona yi kurile naswona va swi lava hi mbilu hinkwayo ku gandzela yena ntsena. Xana swi tano na hi wena? Loko u ri ni rirhandzu ro tano, a wu nge tinyiketeli ni ku tlhela u khuvuriwa hileswi u lavaka ku tsakisa mudyondzisi wa wena wa Bibele kumbe vatswari va wena naswona a wu nge khuvuriwi hileswi u lavaka ku fana ni vanghana va wena.

8. Ku khensa leswi Yehovha a ku endleleke swona swi ku pfuna njhani leswaku u endla xiboho xa ku tinyiketela eka Yehovha? (Pisalema 116:​12-14)

⁸ Loko u ehleketa hi swilo hinkwaswo leswi Yehovha a ku endleleke swona, u ta titwa u lava ku n’wi khensa ni ku tinyiketela eka yena. (Hlaya Pisalema 116:​12-14.) Bibele yi vula leswaku Yehovha i Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Yak. 1:17) Nyiko leyikulu eka tinyiko toleto hinkwato i gandzelo ra N’wana wakwe Yesu. Ehleketa hi ndlela leyi nyiko yoleyo yi nga ya nkoka hayona! Nkutsulo wu endle swi koteka leswaku u va ni vuxaka lebyikulu na Yehovha. Naswona u ku nyike ntshembo wa ku hanya hilaha ku nga heriki. (1 Yoh. 4:​9, 10, 19) Loko u tinyiketela eka Yehovha u kombisa ndlela leyi u ri tlangelaka hayona rirhandzu lerikulu leri a ku kombeke rona, ku katsa ni mikateko leyin’wana hinkwayo leyi Yehovha a ku nyikeke yona. (Det. 16:17; 2 Kor. 5:15) Eka dyondzo 46, yinhla ya vumune ya buku leyi nge, Tiphine Hi Vutomi Hilaha Ku Nga Heriki!, yi hlamusela ndlela leyi u nga ku kombisaka hayona ku tlangela ka wena naswona eka dyondzo yoleyo ku ni vhidiyo ya timinete tinharhu leyi nge, Nyikani Xikwembu Tinyiko Ta N’wina.

XANA U SWI LUNGHEKERILE KU TINYIKETELA NI KU KHUVURIWA?

9. Hikwalahokayini munhu a nga fanelanga a sindzisiwa ku tinyiketela?

⁹ U nga ha vona onge a wu swi lunghekelanga ku tinyiketela ni ku khuvuriwa. Kumbexana wa ha lava nkarhi wo cinca mahanyelo ya wena leswaku u kota ku hanya hi milawu ya Yehovha kumbe u lava nkarhi wo tiyisa ripfumelo ra wena. (Kol. 2:​6, 7) Swichudeni swa Bibele a swi endli nhluvuko hi nkarhi lowu fanaka ni vantshwa a va lunghekeli ku tinyiketela ni ku khuvuriwa eka malembe lama fanaka. Ringeta ku kambela ndlela leyi u endlaka nhluvuko hayona loko swi ta eka vuxaka bya wena na Yehovha hi ku ya hi leswi u kotaka ku swi endla naswona u nga tiringanisi ni van’wana.—Gal. 6:​4, 5.

10. U nga endla yini loko u vona onge a wu swi lunghekelanga ku tinyiketela ni ku khuvuriwa? (Nakambe vona bokisi leri nge, “Eka Lava Kuriseriwaka Entiyisweni.”)

¹⁰ Loko u xiya leswaku a wu si lunghekela ku tinyiketela eka Yehovha, tikarhatele ku swi fikelela. Kombela Yehovha a ku pfuna u cinca leswi faneleke evuton’wini bya wena. (Filp. 2:13; 3:16) U nga tiyiseka leswaku u ta yingisela xikhongelo xa wena ni ku tlhela a xi hlamula.—1 Yoh. 5:14.

HIKWALAHOKAYINI VAN’WANA VA VEKETELA MHAKA YA KU KHUVURIWA?

11. Yehovha u ta hi pfuna njhani leswaku hi tshama hi tshembekile eka yena?

¹¹ Vanhu van’wana lava lunghekeleke ku tinyiketela ni ku khuvuriwa, va ha veketela. Va nga ha chava leswaku endzhaku ka loko va khuvuriwile va nga ha endla xidyoho lexikulu ivi va susiwa evandlheni. Loko u chava sweswo, tiyiseka leswaku Yehovha u ta ku nyika swilo hinkwaswo leswi lavekaka “leswaku [u] famba hi mukhuva lowu fanelaka eka [yena], [u] n’wi tsakisa hilaha ku heleleke.” (Kol. 1:10) U ta tlhela a ku nyika ni matimba ya ku endla leswinene. Se u pfune vo tala va kota ku endla tano. (1 Kor. 10:13) Hi yona mhaka ku susiwaka vanhu vatsongo evandlheni ra Vukreste. Yehovha u pfuna vanhu vakwe leswaku va tshama va tshembekile.

12. Hi nga swi papalata njhani ku endla xidyoho lexikulu?

¹² Vanhu lava velekiweke ni xidyoho va ringeka ku endla swo biha. (Yak. 1:14) Hambiswiritano, u fanele u hlawula leswi u nga ta swi endla loko u ringiwa. Ntiyiso wa mhaka hileswaku hi wena u tihlawulelaka ndlela leyi u lavaka ku hanya hayona. Hambileswi van’wana va vulaka leswi hambaneke, u nga swi kota ku dyondza ku lawula ku navela ka wena loku hoxeke. Hambiloko u ringiwa, u nga swi kota ku papalata ku endla swilo swo biha. Hikwalaho, khongela masiku hinkwawo. Tiwundle hi ku hlaya Rito ra Xikwembu mikarhi hinkwayo. Vana kona etinhlengeletanweni ta vandlha. Byela van’wana leswi u pfumelaka eka swona. Loko nkarhi ni nkarhi u endla swilo leswi, swi ta ku pfuna leswaku u tshama u tshembekile eka Yehovha. Nakambe tsundzuka leswaku Yehovha u ta ku pfuna ku endla tano.—Gal. 5:16.

13. Yosefa u hi vekele xikombiso xihi lexinene?

¹³ Swi ta ku olovela ku tshama u tshembekile eka Yehovha loko u tilunghiselela ka ha ri emahlweni leswi u nga ta swi endla loko u ringiwa. Bibele yi vulavula hi vanhu vo hlayanyana lava swi vonakaka va endle tano hambileswi na vona a vo va vanhu lava endlaka swihoxo ku fana na hina. Hi xikombiso, hi ku phindhaphindha nsati wa Potifaro u ringete ku yenga Yosefa leswaku a etlela na yena. Kambe Yosefa a a swi tiva leswi a a ta swi endla. Bibele yi hi byela leswaku ‘u arile’ ivi a ku: “Xana ndzi nga yi endlisa ku yini mhaka yo bihisa xisweswo ndzi dyohela Xikwembu?” (Gen. 39:​8-10) A swi kanakanisi leswaku Yosefa a a swi tiva ka ha ri emahlweni leswi a a fanele a swi endla a nga si ringiwa. Sweswo swi n’wi oloverile loko se a langutane ni ndzingo hi woxe.

14. I yini leswi nga hi pfunaka ku dyondza ku papalata miringo?

¹⁴ U nga swi kombisa njhani leswaku u tiyimiserile ku tshama u tshembekile eka Yehovha ku fana na Yosefa? U nga endla xiboho sweswi xa leswi u nga ta swi endla loko u ri endzingweni. Tidyondzise ku papalata ku endla ni ku ehleketa hi swilo leswi Yehovha a swi vengaka. (Ps. 97:10; 119:165) Loko u endla tano, a wu nge dyohi loko u ringiwa. U ta va u swi tiva leswi u nga ta swi endla hikuva se u ta va u endle xiboho.

15. Munhu a nga swi kombisa njhani leswaku u ‘lava Yehovha hi mbilu hinkwayo’? (Vaheveru 11:6)

¹⁵ Eka xiyimo xa wena, kumbexana wa swi tiva leswaku u kume ntiyiso nileswaku u lava ku tirhela Yehovha hi mbilu ya wena hinkwayo kambe ka ha ri ni leswi ku khomelelaka leswaku u nga tinyiketeli ni ku khuvuriwa. U nga endla leswi Hosi Davhida a swi endleke. U nga kombela Yehovha u ku: “Ndzi lavisise, Xikwembu xanga, u tiva mbilu ya mina. Ndzi kambisise, u tiva miehleketo ya mina leyi karhatekeke. Xiya loko ku ri ni ndlela yo homboloka eka mina, u ndzi fambisa endleleni leyi nga riki na makumu.” (Ps. 139:​23, 24) Yehovha u katekisa “lava [n’wi] lavaka hi mbilu hinkwayo.” Leswi u tirhaka hi matimba leswaku u tinyiketela ni ku fanelekela ku khuvuriwa, u komba Yehovha leswaku u swi lava hi mbilu hinkwayo ku endla tano.—Hlaya Vaheveru 11:6.

YANA EMAHLWENI U TSHINELA EKA YEHOVHA

16-17. Yehovha a nga va koka njhani lava kuriseriwaka entiyisweni? (Yohane 6:44)

¹⁶ Yesu u vule leswaku vadyondzisiwa vakwe va kokiwa hi Yehovha. (Hlaya Yohane 6:44.) Ehleketa hi ndlela leyi marito wolawo ma nga ya nkoka hayona ni ndlela leyi ma ku khumbaka hayona. Yehovha u languta leswinene eka munhu un’wana ni un’wana loyi a n’wi kokelaka eka yena. U languta un’wana ni un’wana wa hina a ri “nhundzu yakwe yo hlawuleka.” (Det. 7:6) Swi tano ni le ka wena.

¹⁷ Kumbexana u muntshwa loyi vatswari va wena va nga Timbhoni ta Yehovha. U nga vona onge u kokakokiwa hi vatswari va wena ku nga ri hi Yehovha. Hambiswiritano, Bibele yi ri: “Tshinelani eka Xikwembu, kutani xi ta tshinela eka n’wina.” (Yak. 4:8; 1 Tikr. 28:9) Loko u va wo sungula ku tshinela eka Yehovha, na yena wa tshinela eka wena. Eka Yehovha a swo helela eka ku va u ri xiphemu xa ntlawa. U koka munhu ha un’we ku katsa ni lava kurisiwaka entiyisweni. Loko munhu yoloye a va wo sungula ku tshinela eka Yehovha, na Yena wa tshinela eka munhu yoloye hilaha hi swi voneke hakona eka Yakobo 4:8.—Ringanisa 2 Vatesalonika 2:13.

18. Hi ta bula hi yini eka nhlokomhaka leyi landzelaka? (Pisalema 40:8)

¹⁸ Loko u tinyiketela eka Yehovha ni ku khuvuriwa, u kombisa leswaku u tekelela Yesu. U tinyiketele eka Tata wakwe hi ku swi rhandza leswaku a endla hinkwaswo leswi a a lava leswaku a swi endla. (Hlaya Pisalema 40:8; Hev. 10:7) Eka nhlokomhaka leyi landzelaka, hi ta bula hi leswi nga ku pfunaka u ya emahlweni u tirhela Yehovha hi ku tshembeka endzhaku ka loko u khuvuriwile.