“Landzela [Yesu] Nkarhi Hinkwawo” Endzhaku Ko Khuvuriwa

1-2. I mikateko yihi leyi munhu a yi kumaka endzhaku ko khuvuriwa?

A HI ku tsakisa ka swona ku khuvuriwa ni ku va xiphemu xa ndyangu wa Yehovha. I nkateko ku va ni vuxaka lebyikulu na Yehovha naswona hi nga pfumelelana na mupisalema Davhida loyi a nga te: ‘Wa tsaka loyi Yehovha a n’wi hlawulaka a n’wi tshineta eka yena leswaku a ta tshama eswivaveni swa yena.’—Ps. 65:4.

² A hi vanhu hinkwavo lava Yehovha a va pfumelelaka leswaku va va ni vuxaka na yena. Hilaha hi dyondzeke hakona eka nhlokomhaka leyi hundzeke, u hlawula ku tshinela eka lava kombisaka leswaku va lava ku va ni vuxaka na yena. (Yak. 4:8) Loko u tinyiketela eka Yehovha ni ku tlhela u khuvuriwa, u tshinela eka yena hi ndlela yo hlawuleka. U nga tiyiseka leswaku endzhaku ko khuvuriwa, u ta ku “chululela mikateko, kukondza ku nga ha pfumaleki nchumu.”—Mal. 3:10; Yer. 17:​7, 8.

3. Vakreste lava tinyiketeleke ni ku khuvuriwa va ni vutihlamuleri byihi bya nkoka? (Eklesiasta 5:​4, 5)

³ I ntiyiso leswaku nkhuvulo ko va masungulo ntsena. Endzhaku ko khuvuriwa, u ta lava ku endla hinkwaswo leswi u nga swi kotaka leswaku u hanya hi xihlambanyo xa wena xa ku tinyiketela, hambiloko u langutana ni miringo. (Hlaya Eklesiasta 5:​4, 5.) Leswi u nga mudyondzisiwa wa Yesu, u ta n’wi tekelela ni ku yingisa swileriso swakwe hilaha u nga kotaka hakona. (Mat. 28:​19, 20; 1 Pet. 2:21) Nhlokomhaka leyi yi ta ku pfuna ku endla tano.

“LANDZELA [YESU] NKARHI HINKWAWO” HAMBILOKO U LANGUTANA NI MIRINGO

4. Vadyondzisiwa va Yesu va rhwala “mhandzi . . . ya nxaniso” hi ndlela yihi? (Luka 9:23)

⁴ Endzhaku ko khuvuriwa vutomi a byi nge khuluki kunene. Entiyisweni, Yesu u vule leswaku vadyondzisiwa vakwe a va ta rhwala “mhandzi ya nxaniso.” A va ta yi rhwala “siku ni siku.” (Hlaya Luka 9:23.) Xana Yesu a a vula leswaku valandzeri vakwe a va ta tshamela ku xaniseka? Doo! A a vula leswaku hambileswi a va ta kuma mikateko kambe a va ta langutana ni swiphiqo. Swin’wana swa swona a swi ta va twisa ku vava swinene.—2 Tim. 3:12.

5. Yesu u tshembisa lava titsonaka swo karhi mikateko yihi?

⁵ Kumbexana se u kanetiwile hi swirho swa ndyangu kumbe u tshike swilo swo karhi leswaku u kota ku rhangisa Mfumo. (Mat. 6:33) Loko swi ri tano, u nga tiyiseka leswaku Yehovha wa yi vona mitirho ya wena yo tshembeka. (Hev. 6:10) Kumbexana u swi vonile leswaku marito ya Yesu lama landzelaka i ntiyiso, “A nga kona loyi a siyeke yindlu kumbe vamakwavo va xinuna kumbe vamakwavo va xisati kumbe manana kumbe tatana kumbe vana kumbe masimu hikwalaho ka mina ni hikwalaho ka mahungu lamanene loyi a nga ta ka a nga kumi leswi phindhiweke ka 100 sweswi, tiyindlu, vamakwavo va xinuna, vamakwavo va xisati, vamanana, vana ni masimu, swin’we ni ku xanisiwa, kutani enkarhini lowu taka a kuma vutomi lebyi nga heriki.” (Mar. 10:​29, 30) Mikateko leyi u yi kumeke i yikulu ku tlula leswi u titsoneke swona.—Ps. 37:4.

6. Hikwalahokayini u fanele u ya emahlweni u lwisana ni “ku navela ka nyama” endzhaku ko khuvuriwa?

⁶ Endzhaku ko khuvuriwa swa ha ta lava u lwisana ni “ku navela ka nyama.” (1 Yoh. 2:16) Phela wa ha ri ntukulu wa Adamu loyi a nga ni xidyoho. Mikarhi yin’wana u nga ha titwa ku fana na muapostola Pawulo. U tsale a ku: “Kunene embilwini ya mina ndza wu tsakela nawu wa Xikwembu, kambe emirini wa mina ndzi vona nawu wun’wana lowu lwaka ni nawu wa mianakanyo ya mina, wu ndzi endla hlonga ra nawu wa xidyoho lowu nga emirini wa mina.” (Rhom. 7:​22, 23) Swidyoho swa wena swi nga ha ku heta matimba. Hambiswiritano, loko u ehleketa hi leswi u swi tshembiseke Yehovha loko u tinyiketela eka yena, swi ta ku pfuna leswaku u tiyimisela ku lwisana ni ndzingo. Loko u langutana ni miringo, xihlambanyo lexi u xi endleke loko u tinyiketela xi ta ku pfuna. Njhani?

7. Ku tinyiketela eka Yehovha swi ta ku pfuna njhani leswaku u tshama u tshembekile?

⁷ Loko u tinyiketela eka Yehovha, a wa ha tihanyeli. Leswi swi vula leswaku loko u ri ni ku navela ko karhi kumbe u lava ku fikelela swo karhi leswi nga n’wi tsakisiki Yehovha, sweswo wa swi papalata. (Mat. 16:24) Kutani loko u ri endzingweni, u ta swi tiva leswi u faneleke u swi endla. U ta va u endle xiboho xa ku tshama u tshembekile eka Yehovha. U ta va u tiyimisele ku tsakisa Yehovha. Hi ndlela yoleyo, u ta fana na Yobo. Hambileswi a langutaneke ni miringo yo tika swinene, hi ku tiyimisela u te: ‘Ndzi ta tshama ndzi tshembekile!’—Yobo 27:5.

8. Ku anakanyisisa hi xikhongelo lexi u xi endleke loko u tinyiketela swi nga ku pfuna njhani u lwisana ni ndzingo?

⁸ Loko u ehleketa hi xikhongelo lexi u xi endleke loko u tinyiketela eka Yehovha, u ta kuma matimba yo lwisana ni ndzingo wun’wana ni wun’wana. Hi xikombiso, xana u nga tlanga hi rirhandzu ni nsati kumbe nuna wa munhu? U nge swi endli sweswo! Hikuva u tshembise Yehovha leswaku a wu nge swi endli. Hikwalaho, a wu nge twisiwi ku vava hileswi u bohekaka ku tshika ku rhandza nsati kumbe nuna wa munhu. U ta ‘tshika,’ “ndlela ya lavo homboloka.”—Swiv. 4:​14, 15.

9. Ku anakanyisisa hi xikhongelo lexi u xi endleke loko u tinyiketela swi nga tlhela swi ku pfuna njhani u rhangisa ku gandzela Yehovha?

⁹ Ku vuriwa yini loko u kuma ntirho lowu nga ta ku endla u pfa u xwa etinhlengeletanweni ta vandlha? U ta swi tiva leswi u faneleke u swi endla. Se i khale u teke xiboho xo ala ntirho wo tano hambiloko u nga si wu kuma. Hikwalaho, a wu nge tixisi hi ku tibyela leswaku u nga cinca xiboho lexi hoxeke xi va lexinene. Loko u anakanyisisa hi ku tiyimisela ka Yesu ku tsakisa Tata wakwe, u ta hatla u papalata nchumu wun’wana ni wun’wana lowu u tivaka leswaku a wu nge xi tsakisi Xikwembu lexi u tinyiketeleke eka xona.—Mat. 4:10; Yoh. 8:29.

10. Yehovha u ta ku pfuna njhani leswaku u “landzela [Yesu] nkarhi hinkwawo” endzhaku ko khuvuriwa?

¹⁰ Entiyisweni miringo yi ku nyika nkarhi wo kombisa leswaku u tiyimiserile ku “landzela [Yesu] nkarhi hinkwawo.” Loko u endla tano, u nga tiyiseka leswaku Yehovha u ta ku pfuna. Bibele yi ri: “Xikwembu xa tshembeka, a xi nge mi tshiki mi ringiwa hi ndzingo lowu mi nga ta tsandzeka ku wu tiyisela, kambe loko mi ringiwa xi ta mi nyika ndlela yo huma leswaku mi kota ku wu tiyisela.”—1 Kor. 10:13.

LESWI U NGA SWI ENDLAKA LESWAKU U NGA TSHIKI KU LANDZELA YESU

11. Hi yihi ndlela leyinene ngopfu leyi nga hi pfunaka leswaku hi nga tshiki ku landzela Yesu? (Nakambe vona xifaniso.)

¹¹ Yesu a a hiseka naswona a khongela mikarhi hinkwayo eka Yehovha. (Luka 6:12) Entiyisweni, ndlela ya kahle yo ya emahlweni u landzela Yesu endzhaku ko khuvuriwa, i ku titoloveta ku endla leswi nga ta ku tshineta ekusuhi na Yehovha. Bibele yi ri: “Eka leswi se hi swi fikeleleke, a hi yeni emahlweni hi endla hi ndlela yoleyo.” (Filp. 3:16) Nkarhi ni nkarhi, u ta twa hi mitokoto ya vamakwerhu lava endleke xiboho xo endla leswi engetelekeke entirhweni wa Yehovha. Kumbexana va ye eXikolweni Xa Vachumayeri Va Mfumo kumbe va rhurhele laha ku nga ni xilaveko lexikulu. Loko u swi kota ku swi fikelela, swi endle. Vanhu va Yehovha va lava tindlela to endla leswi engetelekeke entirhweni wo chumayela. (Mit. 16:9) Ku vuriwa yini loko sweswi u nga koti ku swi endla? U nga ehleketi leswaku leswi van’wana va swi kotaka, i va nkoka ku ku tlula. Leswi nga swa nkoka i ku ya emahlweni u tiyisela. (Mat. 10:22) U nga wu tekeli ehansi nkoka wo tirhela Yehovha hi ku ya hi swiyimo ni vuswikoti bya wena. Yoleyo i ndlela ya nkoka yo ya emahlweni u landzela Yesu endzhaku ka loko u khuvuriwile.—Ps. 26:1.

12-13. U nga endla yini loko u sungula ku nga ha hiseki? (1 Vakorinto 9:​16, 17) (Nakambe vona bokisi leri nge, “U Nga Tshiki Mphikizano.”)

¹² Xana u fanele u endla yini loko u vona onge a wa ha khongeli swi huma embilwini kumbe a wa ha tsakeli nsimu ku fana ni le ku sunguleni? Ku vuriwa yini loko u nga ha vuyeriwi loko u hlaya Bibele ku fana ni le ku sunguleni? Loko u titwa tano endzhaku ko khuvuriwa, u nga tibyeli leswaku a wa ha ri na moya wa Yehovha. U endla swihoxo naswona ndlela leyi u titwaka hayona yi nga cincacinca. Loko u vona onge a wa ha hiseki, ehleketa hi xikombiso xa muapostola Pawulo. Hambileswi a ringeteke ku tekelela Yesu, Pawulo a a swi tiva leswaku mikarhi yin’wana a nga ta swi navela ku endla leswi a faneleke a swi endla. (Hlaya 1 Vakorinto 9:​16, 17.) U te: “Niloko ndzi swi endla ku nga ri hi ku swi rhandza, ndza ha nyikiwe vutihlamuleri.” Hi marito man’wana, Pawulo a a tiyimisele ku endla ntirho wakwe wo chumayela swi nga ri na mhaka leswaku a a titwa njhani hi nkarhi wolowo.

¹³ Hilaha ku fanaka, u nga endli swiboho hi ku ya hi ndlela leyi u titwaka hayona. Tiyimisele ku endla leswi nga swinene hambiloko u titwa u nga lavi ku swi endla. Loko u ya emahlweni u swi endla, ndlela leyi u titwaka hayona yi nga cinca. Loko sweswo swi endleka, titolovete ku va ni dyondzo ya munhu hi yexe, u khongela, u va kona etinhlengeletanweni ta vandlha ni ku chumayela kutani sweswo swi ta ku pfuna u ya emahlweni u landzela Yesu endzhaku ko khuvuriwa. Vamakwerhu va ta khutazeka loko va ku vona u tiyisela entirhweni wa Yehovha.—1 Tes. 5:11.

“TSHAMANI MI RI KARHI MI TIKAMBELA . . . TSHAMANI MI RI KARHI MI TIKOMBISA”

14. I yini leswi u faneleke u swi kambela nkarhi ni nkarhi naswona hikwalahokayini? (2 Vakorinto 13:5)

¹⁴ I swa nkoka leswaku u tshamela ku tikambela endzhaku ko khuvuriwa. (Hlaya 2 Vakorinto 13:5.) Nkarhi ni nkarhi i swinene ku tikambisisa ku vona loko wa ha khongela mikarhi hinkwayo, u hlaya ni ku dyondza Bibele, u ya etinhlengeletanweni ta vandlha ni ku chumayela. Ringeta ku kuma tindlela leti nga ku pfunaka u tsakela ni ku tlhela u vuyeriwa swinene eka tindlela leti to gandzela. Hi xikombiso, tivutise swivutiso swo fana ni leswi: ‘Xana ndza swi kota ku hlamusela van’wana hi tidyondzo ta Bibele ta masungulo? Xana ku ni tindlela tin’wana leti nga ndzi pfunaka ndzi tsakela ntirho wo chumayela? Xana ndzi swi boxa hi ku kongoma swilo leswi ndzi swi khongelelaka naswona swa kombisa leswaku ndzi titshege hi Yehovha hilaha ku heleleke? Xana ndzi va kona etidyondzweni nkarhi ni nkarhi? Xana ndzi nga yi antswisa njhani ndlela leyi ndzi yingiselaka ni ku hlamula hayona etidyondzweni?’

15-16. U dyondza yini hi ku lwisana ni ndzingo eka ntokoto wa makwerhu un’wana?

¹⁵ Nakambe i swa nkoka ku tiva laha u tsandzekaka kona. Makwerhu la vuriwaka Robert u hlamusela ntokoto wakwe lowu yi vekaka erivaleni mhaka leyi, u ri: “Loko ndzi ri ni malembe ya 20, ndzi kume xikoropo. Siku rin’wana loko ndzi chayisile entirhweni, mutirhikulorhi u ndzi rhambe ekaya rakwe. U ndzi byele leswaku hi ta va hi ri vambirhi ntsena naswona ‘hi ta tiphina.’ Eku sunguleni, ndzi ringete ku tumbela hi xintihwana kambe eku heteleleni ndzi arile ivi ndzi n’wi hlamusela xivangelo xa kona.” Robert u hlule ndzingo naswona sweswo swa bumabumeriwa. Hambiswiritano, hi ku famba ka nkarhi loko a ehleketa hi leswi endlekeke wa swi vona leswaku a a ta va a endle swilo hi ndlela leyi hambaneke. U ri: “Ku hambana na Yosefa loyi a hatleke a ala xikombelo xa nsati wa Potifaro, mina ndzi hlwerile ku alela mutirhikulorhi. (Gen. 39:​7-9) Entiyisweni, yi ndzi hlamarisile ndlela leyi swi ndzi tikeleke hayona ku ala. Ndzingo lowu wu ndzi pfune ku vona leswaku a ndzi fanele ndzi tiyisa vuxaka bya mina na Yehovha.”

¹⁶ Swi nga ku vuyerisa ku tikambisisa hilaha Robert a endleke hakona. Hambiloko u wu hlurile ndzingo, tivutise leswi, ‘Xana swi ndzi tekele nkarhi wo tanihi kwihi ku ala?’ Loko u vona swi fanerile ku antswisa, u nga heli matimba. Tsaka hileswi u tivaka laha u siyekaka kona. Khongela eka Yehovha hi mhaka leyi ni ku endla swilo leswi nga ta ku pfuna u swi lava swinene ku n’wi yingisa.—Ps. 139:​23, 24.

17. Vito ra Yehovha ri katseke njhani eka ntokoto wa Robert?

¹⁷ Ku ni swin’wana leswi hi swi dyondzaka eka ntokoto wa Robert. U ya emahlweni a ku: “Endzhaku ko ala xirhambo xa mutirhikulorhi, u ndzi byele leswi, ‘U pasile!’ Ndzi n’wi vutisile leswaku a a vula yini. U ndzi byele leswaku munghana wakwe loyi a a ri Mbhoni u n’wi byele leswaku vantshwa hinkwavo va Timbhoni va hanya vutomi byimbirhi naswona loko vo pfulekeriwa hi nkarhi, va ta tikhoma ku biha. Kutani u byele munghana wakwe leswaku u lava ku vona loko na mina ndzi ta phaseka. Ndzi tsakile hileswi ndzi yimeleke vito ra Yehovha.”

18. U tiyimisele ku endla yini endzhaku ko khuvuriwa? (Nakambe vona bokisi leri nge, “Tinhlokomhaka Timbirhi Leti U Nga Ta Tiphina Hi Tona.”)

¹⁸ Loko u tinyiketela eka Yehovha ni ku khuvuriwa, u kombisa leswaku u lava ku dzunisa vito rakwe hambi ko ba lexi dumaka. U nga tiyiseka leswaku Yehovha u tiva miringo leyi u langutanaka na yona ni leyi u kotaka ku yi hlula. U ta katekisa matshalatshala lawa u ma endlaka leswaku u tshama u tshembekile. U nga tiyiseka leswaku hi ku tirhisa moya wakwe lowo kwetsima, u ta ku nyika matimba yo endla tano. (Luka 11:​11-13) Hi ku pfuniwa hi Yehovha, u ta swi kota ku ya emahlweni u landzela Yesu endzhaku ko khuvuriwa.