Leti Humaka Eka Vahlayi
Vantshwa Va Vutisa . . . Ku Vuriwa Yini Loko Makwerhu A Tidlayile? (June 2008) Loko sesi wa mina a nga si fa, se a a ri ni ntlhanu wa malembe a ri ni vuvabyi bya ntshikilelo wa mianakanyo. Leswi ndzi nga vona mbitsi lowu a a ri na wona lowu a wu vangiwa hi vuvabyi lebyi, ndzi te, ‘Makwerhu u xanisekile vutomi byakwe hinkwabyo!’ Hambiswiritano, xihloko xa le ka Xalamuka! xi ringanyete leswaku hi tsundzuka minkarhi yo tsakisa leyi hi veke na yona na yena. Loko ndzi ri karhi ndzi tsundzuka minkarhi yoleyo yo tsakisa, ndzi sungule ku swi xiya leswaku sesi wa mina a nga xanisekanga “vutomi byakwe hinkwabyo” kambe a a hanya vutomi lebyi tsakisaka hikuva u ve ni minkarhi yo tala yo tsakisa ku tlula minkarhi yo nonon’hwa.
S. Y., Japani
Vantshwa Va Vutisa . . . Ha Yini Vatswari Va Mina Va Nga Ndzi Tshembi? (April 2008) Loko ndzi hlaya ni ku tirhisa milawu ya Bibele leyi kumekaka eka Xalamuka!, ndzi kume leswaku ku endla leswaku u tshembiwa ni ku va munhu la wupfeke a swi fani ni ku nghena hi nyangwa wo karhi, kambe swi fana ni ku khandziya switepisi hi xin’we-xin’we. Leswaku ndzi kuma ntshunxeko lowu engetelekeke, a ndzi fanele ndzi komba vatswari va mina leswaku ndza tshembeka. A ndzi fanele ndzi heta ntirho wa le kaya kutani ndzi endla ntirho wa xikolo lowu endliwaka ekaya. Ndza nkhensa hikwalaho ka swihloko swo fana ni lexi.
T. L., United States
Ku Tswariwa U Ri Albino (July 2008) Eku sunguleni a ndzi tsakile loko ndzi vona xihloko lexi, hileswi ndzi tswariweke ndzi ri albino. Hambiswiritano, a swi ndzi tsakisanga ku vona rito leri nge “albino” ri tirhisiwe ko tala exihlokweni lexi. Ri tirhisiwe hi tindlela to poyila, onge i rito leri kombaka leswaku vanhu va muxaka lowu va vengiwa.
A. L., United States
“Xalamuka!” ya hlamula: Hi kombela leswaku vahlayi va hina va hi khomela loko hi va khunguvanyisile. Hi tirhise rito leri ra “albino” hi ku ya hi ndlela leyi va ta vutshunguri va ri tirhisaka ha yona. Hambiswiritano, ha pfumela leswaku vanhu van’wana va tirhise rito leri hi ndlela leyi vavisaka. Hi hala tlhelo vanhu vo tala lava nga ma-albino a ri va khunguvanyisi rito rero naswona a yi va karhati ndlela leyi ri tirhisiwaka ha yona. Entiyisweni a ku nga ri xikongomelo xa hina ku poyila vanhu vo karhi.
Ndza nkhensa ku va mi kandziyise xihloko lexi, hikuva na mina ndzi albino ku fana na John. Ndzi swi tlangerile swinene ku hlaya xihloko lexi vulavulaka hi ma-albino lexi vulaka ntiyiso, lexi kombisaka ntwela-vusiwana xi tlhela xi dyondzisa. Hikwalaho, vanghana va mina va xi twisisa kahle xiyimo xa mina.
T. M., United States
Rirhandzu Leri Nga Ni Matimba Swinene Ku Tlula Xidzedze! (August 2008) Swihloko swo fana ni lexi swi ndzi tsundzuxa leswaku ndzi nga vileli hi vumundzuku kambe ndzi titshega hi ku helela hi Xikwembu. Eka malembe manharhu lama hundzeke ndzi kombiwe rirhandzu hi vamakwerhu endzhaku ka loko ndhambi yi khukhule yindlu ya vatswari va mina lava nga riki Timbhoni. Timbhoni ta Yehovha ta le vandlheni ra kwalaho ti te hi ku hatlisa ti ta phalala. Ndzi nkhensa Yehovha hileswi ndzi nga xiphemu xa nhlengeletano yakwe.
D. W., Poland
Ku Hlamarisa Ka Mavele (August 2008) Ndyangu wa ka hina wu byale mavele emasin’wini ya ka hina, kambe tindzoho ta swifaki leswi tshoveriweke a ti nga ringani. Hi ba mandla hi vuyelela hi xihloko lexi, hikuva se ha swi twisisa leswaku swi vangiwa hi yini. A hi nga koti ku byala mavele yo tala, hikwalaho a ma nga kumi vuluva byo tala ku fana ni loko ku byariwe nsimu leyikulu. N’wexemu hi kote ku endla leswaku vuluva byi hundzela eka rihlanga rin’wana ni rin’wana ra xifaki loko ri sungula ku baleka swiluva naswona hi tshovele swifaki swo tala swo tsokombela swi tlhela swi nandziha ni ku va ni tindzoho leti ringanaka. Ha nkhensa swinene.
R. W., Japani