Ku Tirhisa Vutlhari Loko Hi Vulavula

‘ONGE ndzi nga tlherisela marito lawa ndzi ma vuleke.’ Xana u tshame u vula marito wolawo? Ina, hinkwerhu swa hi tikela ku lawula ririmi ra hina. Bibele yi vula leswaku hi nga swi kota ku lerhisa swiharhi swihi na swihi, “kambe ririmi, a nga kona ni un’we eka vanhu la nga ri lerhisaka.” (Yakobo 3:7, 8) Kutani, xana hi fanele hi lahla thawula hikwalaho ka sweswo? Doo! Xiya milawu yin’wana ya Bibele leyi nga hi pfunaka ku lawula kahle xirho lexitsongo xa mirhi kambe lexi nga ni matimba.

● “Ku tlula nawu a ku pfumaleki emaritweni yo tala, kambe loyi a tshamaka a kambela milomu yakwe u endla hi vutlhari.” (Swivuriso 10:19) Loko hi vulavula ngopfu, hi va ekhombyeni lerikulu ro vula nchumu wa vuphukuphuku kumbe lowu nga vavisaka van’wana. Entiyisweni, ririmi leri nga lerhisiwangiki ri nga fana ni ndzilo, ri nga hangalasa rihlevo ni ku onha munhu vito. (Yakobo 3:5, 6) Hambiswiritano, loko hi ‘kambela milomu ya hina,’ kumbe hi rhanga hi ku ehleketa hi nga si vulavula, hi ta anakanyisisa hi vuyelo lebyi marito ya hina ma nga ha vaka na byona. Xisweswo, hi ta tiviwa hi ku va ni vutlhari naswona vanhu van’wana va ta hi xixima ni ku hi tshemba.

● “Hatlisa emhakeni yo twa, [u] nonoka emhakeni yo vulavula, [u] nonoka emhakeni ya vukarhi.” (Yakobo 1:19) Vanhu va swi rhandza loko hi rhiya ndleve loko va vulavula, hikuva loko hi endla tano hi kombisa leswaku hi ni mhaka na vona naswona ha va xixima. Kambe, xana hi fanele hi endla yini loko un’wana a vula marito lama tlhavaka kumbe a hi tlhontlha? Hi fanele hi ringeta ku “nonoka emhakeni ya vukarhi” hi ku va hi nga tlheriseli. Swi nga ha endleka leswaku munhu yoloye a a hlundzukile hikwalaho ka swivangelo swin’wana naswona a nga ha kala a kombela ndzivalelo hileswi a vuleke marito lama tlhavaka. Xana swa ku tikela ku “nonoka emhakeni ya vukarhi”? Loko swi ri tano, khongela eka Xikwembu leswaku xi ku pfuna u kota ku tikhoma. A xi nge swi honisi swikhongelo swo tano leswi humaka embilwini.—Luka 11:13.

● “Ririmi ro rhula ri nga tshova rhambu.” (Swivuriso 25:15) Ku hambana ni leswi vanhu vo tala va swi vulaka, ku rhula i mfanelo leyi nga ni matimba. Hi xikombiso, nhlamulo yo rhula yi nga ha hlula nkaneto lowukulu swinene, wo nonon’hwa ku fana ni rhambu, kumbexana lowu hlohloteriwaka hi ku hlundzuka kumbe xihlawuhlawu. Entiyisweni, swi nga nonon’hwa ngopfu ku kombisa ku rhula ngopfu-ngopfu loko vanhu va tshwukiselane mahlo. Kutani ehleketa hi mikateko leyi tisiwaka hi ku endla leswi Bibele yi swi vulaka ni vuyelo byo biha lebyi nga vaka kona loko u nga swi endli sweswo.

Hakunene milawu ya Bibele i “vutlhari lebyi humaka ehenhla.” (Yakobo 3:17) Loko hi tirhisa vutlhari byebyo eku vulavuleni ka hina, marito ya hina ma ta va lama xiximekaka ni lama akaka loko ma vuriwe hi nkarhi wa kona, ku fana ni “maapula ya nsuku exibyeni xa silivhere.”—Swivuriso 25:11.