Xana U Tivekele Tipakani Leti U Nga Ta Ti Fikelela?

● I yini leswi u swi lavaka evuton’wini? Xana u tivekele tipakani leti u nga kotaka ku ti fikelela, kumbe u tshama u ri karhi u anakanya hi swilo leswi u nga ta ka u nga swi koti ku swi fikelela? Wanuna un’wana loyi a rhandzaka ku kambisisa timhaka ta ntumbuluko wa vanhu u nyikele ndzayo leyi ya vutlhari: “Ku vona xilo hi mahlo swi tlula ku xi navela hi mbilu, kambe na swona sweswo, a swi pfuna nchumu, i ku hlongorisa moya ntsena.”—Eklesiasta 6:9, Bibele—Mahungu Lamanene.

Xiga lexi nge “ku vona xilo hi mahlo” ya hina xi kombetela eka swiyimo leswi nga kona namuntlha. Entiyisweni, ku hava lexi hoxeke loko hi ringeta ku antswisa vutomi bya hina. Bibele yi kombisa leswaku munhu wo tlhariha a nge tivekeli tipakani leti a nga ta ka a nga swi koti ku ti fikelela. Ku nga ha va ndhuma, rifuwo, munghana lonene wa vukati kumbe rihanyo lerinene.

Ku tlula kwalaho, lava fikelelaka pakani yo karhi, yo tanihi rifuwo, va nga ha lava leswi engetelekeke. Bibele yi vula hi ku kongoma yi ku: “La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo. Leswi na swona i vuhava.” (Eklesiasta 5:10) Hikokwalaho, lava tlhariheke hi tlhelo ra moya va ringeta ku eneriseka hileswi va nga na swona, ku nga ‘leswi va swi vonaka hi mahlo ya vona.’ Va pfumelelana ni marito lawa: “A hi tanga na nchumu emisaveni, naswona a hi nge fambi na nchumu.”—1 Timotiya 6:7.

Vanhu lava tiphinaka hi lava enerisaka xilaveko xa vona xa moya. (Matewu 5:3) Hi nga swi endlisa ku yini sweswo? Yesu Kreste u te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:4) Marito wolawo ya risima ma kumeka eBibeleni, naswona un’wana ni un’wana a nga ma hlaya.

Man’wana ya marito wolawo ma kumeka eka Pisalema 37:4. Leyi hlayekisaka xileswi: “Kuma ntsako lowu heleleke eka Yehovha, kutani u ta ku nyika leswi komberiwaka hi mbilu ya wena.” Leswi a nga Xikwembu xa Matimba Hinkwawo, Yehovha u ta nyika vagandzeri vakwe vo tshembeka swilo leswi ku nga hava munhu wa nyama la nga va nyikaka swona: rihanyo lerinene, nsirhelelo wa swilo leswi vonakaka ni vutomi lebyi nga heriki eParadeyisini laha misaveni. (Luka 23:43; Nhlavutelo 21:3, 4) I swinene ku tshemba marito wolawo.