Ku Nga Tshembeki Ku Ya Ku Andza!

Dannya u tirha eka khampani leyikulu eHong Kong. Loko a endzele fektri leyi va tiselaka nhundzu, u sungule ku kanakana loko yi ta swi kota ku va yisela nhundzu leyi va yi lavaka. Endzhakunyana, loko va ye eku dyeni, mininjhere wa fektri yoleyo u nyike Danny mvhilopho. Loko a yi pfula, u kume xifumbarheriso xa mali ya makume ya magidi ya tirhandi, ku nga mali leyi ringanaka ni muholo wakwe wa lembe.

● Mhaka leyi Danny a langutaneke na yona yi tolovelekile. Ku nga tshembeki loku nga kona emisaveni hinkwayo ku tsema nhlana. Hi xikombiso, maphepha ya le hubyeni ma kombisa leswaku exikarhi ka 2001 na 2007, khampani leyikulu ya le Jarimani yi fumbarherise hi mali ya kwalomu ka R9 940 000 000 leswaku yi ta kuma mpfumelelo wo endla swo karhi.

Hambileswi vukambisisi lebya ha ku endliwaka malunghana ni ku nga tshembeki byi kombaka leswaku ku ni ku cinca ko karhi, swi tikomba onge xiyimo lexi xi ya xi nyanya. Nkambisiso wa 2010 lowu endliweke hi Nhlangano lowu Lwisanaka ni Vukanganyisi eMisaveni Hinkwayo, wu xiye leswaku “eka malembe manharhu lama hundzeke vukanganyisi emisaveni hinkwayo byi engetelekile.”

Ha yini ku nga tshembeki ku tinyike matimba? Xana swa koteka ku tshembeka? Loko swi ri tano, xana sweswo swi nga kotekisa ku yini? Xana Bibele yi nga hi pfuna?

[Nhlamuselo ya le hansi]