Ku Tshembeka Swi Endla Leswaku Swilo Swi Ku Fambela Kahle

“Hambiloko munhu a ri ni swo tala, vutomi byakwe a byi humi eka swilo leswi a nga na swona.”—Luka 12:15.

KU TIRHA leswaku u kuma mali i swa nkoka evuton’wini. Xikwembu xi hi nyike vutihlamuleri byo tikhathalela ni ku khathalela mindyangu ya hina.—1 Timotiya 5:8.

Kambe ku vuriwa yini loko ku kuma mali ni swilo leswi yi nga swi xavaka swi hi koxa swo tala ku tlula ku tihanyisa? Ku vuriwa yini loko se u hanyela swona ntsena? Vanhu lava xikongomelo xa vona ku nga ku kuma rifuwo swa va olovela ku nga tshembeki leswaku va ta ri kuma. Swi nga ha endleka va nga swi xiyi kukondza ku nga tshembeki swi va nghenisa ekhombyeni. Ku engetela kwalaho, hilaha Bibele yi vulaka hakona, ku rhandza mali swi vanga switlhavi swo tala.—1 Timotiya 6:9, 10.

Xiya swikombiso swa mune leswi landzelaka swa vanhu lava tekaka ku humelela swi vula swo tala ku tlula ku va ni rifuwo.

Ku Tixixima

“Eka malembe yo hlayanyana lama nga hundza ndzi burisane ni munhu loyi a a lava ku hakela mali ya ndzindza-khombo leyi endlaka tidolara ta miliyoni leswaku yi ta tirhisiwa loko a fa. Mina a ndzi ta kuma tidolara ta magidi. U ndzi byele leswaku ku va ndzi kuma bindzu rakwe, ndzi fanele ndzi n’wi nyika hafu ya mali leyi ndzi yi kumeke. Leswi a a ndzi kombela swona a swi nga ri enawini naswona ndzi n’wi byerile.

“Ndzi ringete ku bula na yena hi ku n’wi vutisa loko hakunene a nga nyika munhu loyi a nga tshembekiki vuxokoxoko bya yena n’wini ni vuxokoxoko byakwe bya timali. Ndzi n’wi byele ndlela leyi ndzi titwaka ha yona hi mhaka leyi ndzi tlhela ndzi n’wi byela leswaku loko a lava ndzi va muyimeri wakwe a ti hlanganisa na mina. Kambe a nga ha vuyanga.

“Loko a ndzi lo pfumela, a ndzi ta va ndzi nga tshembekanga naswona a ndzi nga ha ta xiximiwa tanihi Mukreste. A ndzi ta va ndzi ve hlonga ra munhu loyi a a lava leswaku ndzi nga tshembeki.”—Don, wa le U.S.A.

Ku Rhula Ka Mianakanyo

Hilaha swi hlamuseriweke hakona eku sunguleni ka swihloko leswi swa nxaxamelo, Danny a a ta fumbarherisiwa loko a vulavula mavunwa malunghana ni vuswikoti bya khampani leyi a yi fanele yi va endlela ntirho. Xana u angurise ku yini?

“Ndzi nkhense mininjhere yoloye hileswi a ndzi rhambeke leswaku hi dya swin’we kutani ndzi n’wi tlherisela mvhilopho leyi a yi ri ni mali. U ndzi sindzisile hi ku vula leswaku loko ndzo pfumela leswaku khampani yakwe yi hi endlela ntirho, u ta ndzi nyika mali leyi engetelekeke. Kambe ndzi arile.

Loko a ndzi lo pfumela ku nyikiwa mali, a ndzi ta tshama ndzi chuhile leswaku ndzi ta kumiwa. Hi ku famba ka nkarhi, muthori wa mina u twe hi ta xiendlakalo xexo. A ndzi tsakile hi ku tiva leswaku ndzi tshembekile. Ndzi tsundzuke marito ya Swivuriso 15:27 leyi nge: ‘Loyi a bindzulaka hi ndlela leyi nga lulamangiki u tisa khombo endlwini yakwe, kambe loyi a vengaka tinyiko [kumbe ku fumbarherisiwa] u ta hambeta a hanya.’”—Danny, wa le Hong Kong.

Ntsako Wa Ndyangu

“Ndza titirha naswona ntirho wa mina i ku aka. Ndzi pfulekeriwa hi tindlela to tala to kanganyisa vanhu lava ndzi va akelaka kumbe ku papalata ku hakela swibalo. Kambe mina ni ndyangu wa mina hi vuyeriwile hileswi ndzi tiyimiseleke ku tshama ndzi tshembekile.

“Ku tshembeka swi katsa vutomi bya munhu hi yexe, a nga tshembeki ntsena loko a ri entirhweni kumbe etimhakeni ta mabindzu. Ku tiva leswaku nkataku a nge yi tluli milawu ya Xikwembu loko ku tiwa emhakeni yo tshembeka swi pfuna ndyangu leswaku wu tshembana. Munghana wa wena wa vukati u titwa a sirhelelekile loko a swi tiva leswaku minkarhi hinkwayo wa tshembeka.

“U nga ha va ni khampani leyikulu emisaveni kambe u tsandzeka ku lulamisa swiphiqo swa ndyangu. Leswi ndzi nga Mbhoni ya Yehovha ndzi xiye leswaku ku hanya hi milawu ya Bibele swi ndzi pfuna leswaku ndzi ringanisela evuton’wini. Sweswo swi endla leswaku ndzi kuma nkarhi wo dzumba ni ndyangu wa mina, ku ri ni ku tshamela ku hlongorisa rifuwo ra misava leyi leri lawuriwaka hi makwanga.”—Durwin, wa le U.S.A.

Ku Va Ni Vuxaka Lebyinene Ni Xikwembu

“Ntirho wa mina wu katsa ku xava swilo swa khampani. Minkarhi yin’wana vanhu lava ndzi xavaka eka vona va ndzi byela leswaku ematshan’weni yo byela khampani leyi ndzi tirhaka eka yona leswaku mali ya swilo leswi ndzi swi xaveke yi hungutiwile, va nga ndzi nyika tiphesente to karhi ta mali yoleyo. Kambe sweswo ku ta va ku ri ku yivela khampani.

“A ndzi holi mali yo tala naswona ndzi nga yi tirhisa mali leyi va ndzi tshembisaka yona. Kambe ku hava nchumu lowu nga ringanisiwaka ni ku va ni ripfalo leri baseke emahlweni ka Yehovha Xikwembu. Xisweswo, eka nchumu wun’wana ni wun’wana lowu ndzi wu xavaka, ndzi landzela nawu wa Bibele lowu nga eka Vaheveru 13:18 leyi nge: ‘Hi [navela] ku tikhoma hi ku tshembeka eka swilo hinkwaswo.’”—Raquel, wa le Philippines.

[Bokisi/Swifaniso leswi nga eka tluka 9]

Milawu Yo Fambisa Bindzu Hi Ku Tshembeka

Milawu yo fambisa bindzu ya hambana hi ku ya hi tindhawu. Kambe munhu u fanele a tirhisa milawu ya Bibele loko a lava ku endla xiboho lexinene. Bindzu leri tshembekaka ri ni timfanelo leti ta tsevu:

Ri Ni Ntiyiso

Nawu wa Bibele: “Mi nga hembelani.”—Vakolosa 3:9.

A Ri Cinca-cinci

Nawu wa Bibele: “Kambe ntsena Ina wa n’wina a a ve Ina, E-e wa n’wina a va E-e.”—Matewu 5:37.

Ra Tshembeka

Nawu wa Bibele: “U nga xi hlavuteli xihundla xa un’wana.”—Swivuriso 25:9.

A Ri Na Vukanganyisi

Nawu wa Bibele: “A wu fanelanga u amukela xifumbarheriso, hikuva xifumbarheriso xi pfala mahlo ya vanhu.”—Eksoda 23:8.

Ri Ni Vululami

Nawu wa Bibele: “Hikokwalaho, swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona.”—Matewu 7:12.

Ri Le Nawini

Nawu wa Bibele: “Nyikani hinkwavo timfanelo ta vona, loyi a lavaka xibalo n’wi nyikeni xibalo.”—Varhoma 13:7.

[Bokisi/Swifaniso leswi nga eka tluka 9]

Ndlela Yo Hlayisa Vutshembeki eBindzwini

● Tiva Leswi Nga Swa Nkoka Eka Wena. Hi xikombiso, xana i swa nkoka ku fikela kwihi eka wena ku kuma rifuwo loko u swi ringanisa ni ku va ni vuxaka lebyinene ni Xikwembu?

● Endla Xiboho Ka Ha Ri eMahlweni. Xiya swiyimo leswi eka swona swi nga ha ku tikelaka ku tshama u tshembekile kutani u hlela ndlela leyi u nga ta hlamula ha yona.

● Vanhu A Va Swi Tive Leswaku U Munhu Wa Muxaka Muni. Loko u sungula bindzu, tirhisa vuxiya-xiya leswaku u byela van’wana hi mahanyelo ya wena.

● Kuma Switsundzuxo Eka Van’wana. Loko u langutane ni ndzingo kumbe mhaka leyi khumbaka rixaka, kuma switsundzuxo eka munhu loyi a nga ni mahanyelo yo fana ni ya wena.

[Xifaniso lexi nga eka tluka 8]

Loko u tshembeka, u ta va ni ku rhula ka mianakanyo