Vutshila Lebyi Vonakaka Eka Xisaka Xa Mimpfi

● Mimpfi yi hlamuseriwa tanihi switsotswana leswi nga ni vutshila lebyikulu. Ha yini?

Xiya: Mimpfi yi aka xisaka yi tlhela yi xi hlayisa hi ku tirhisa phepha ro hlawulaka leri yi tiendlelaka rona.a Yi hlengeleta swiluva swa swimilana ni mintsandza leyi nga bola—swimhandzana, timhandzi to biyela, tinsika ta tinqingho ni swilo swo aka ha swona. Endzhaku ka sweswo ti cakunya swilo sweswo, ti swi hlanganisa ni marha ya swona lama namarhelaka naswona ma nga ni phrotheyini yo tala. Loko swi hlanganisiwa, swa oma kutani swi endla phepha ro vevuka kambe leri nga tiya swinene. Ku engetela kwalaho, marha ya kona ma ni swilo swo karhi swo hlawuleka leswi pfunaka phepha leri leswaku ri tswonga ku hisa, xisweswo ri tshama ri ri exiyin’weni lexinene niloko ku nga hisi.

Switsotswana leswi swi aka swisaka swa swona hakatsongo-tsongo. Loko se xisaka xa kona xi herile xi ni matlhelo ya tsevu, xi kota ku sivela mati naswona xi ni xivumbeko xo tiya swinene lexi olovaka. Switsotswana leswi tshamaka etindhawini leti nga ni mati yo tala swi tirhisa marha yo tala hikuva ma sivela mati. Swi aka swisaka swo swona etindhawini leti sirhelelekeke. Swisaka swa swona leswi languteke ehansi swi swi khomisa hi rimhandzi. Kambe lexi tsakisaka hileswaku mimpfi a yi wu onhi mbango ku fana ni tikhampani leti nga kona to endla maphepha, leti thyakisaka moya, mati ni misava!

Swa twisiseka leswi vampfampfarhuti ni valavisisi va nga le ku dyondzeni ka ndlela leyi mimpfi yi xi endlaka ha yona xisaka leswaku va ta endla tipulani ta miako leyikulu yo olova, leyi nga tiya naswona yi nga ta ka yi nga onhi mbango.

U anakanya yini? Xana xitsotswana lexi, lexi nga ni byongo lebyi nga ringanaka ni swiribyana swimbirhi swa sava xi swi kotisa ku yini ku tiendlela xisaka? Xana vutshila lebyi xi nga na byona byi kombisa leswaku xi lo endliwa?

[Nhlamuselo ya le hansi]