Vantshwa Va Vutisa

Ha Yini U Ya eMinhlanganweni Ya Vukreste?

Xana wa swi tsakela ku ya eminhlanganweni ya Vukreste?

Ina

Hambeta u endla tano

E-e

I yini leswi u nga swi endlaka?

BIBELE yi lerisa Vakreste ku hlangana swin’we leswaku va gandzela. (Vaheveru 10:25) Kambe ku vuriwa yini loko u nga swi tsakeli ku va eka yona? Ku vuriwa yini loko mianakanyo ya wena yi tsendzeleka, u anakanya hileswi a wu ta va u ri eku swi endleni loko a wu ri kun’wana? Ringeta ku tirhisa swin’wana swa swiringanyeto leswi nga eka matluka lama landzelaka.

1. U NGA XWI

Tsalwa leri nga ku pfunaka: “Vanhu van’wana va tshike mukhuva wo hlengeletana va gandzela, kambe a hi fanelanga hi endla tano.”—Vaheveru 10:25, Contemporary English Version.

Ha yini u fanele u tshamela ku endla nchumu lowu u nga wu tsakeriki? Hi ku komisa, sweswo swi ta ku pfuna leswaku u ya u wu tsakela! Swi teke hi ndlela leyi: Loko u nga tshameli ku tlanga ntlango wo karhi, xana u nga va mutlangi lonene naswona u wu tsakela? Swi tano ni hi minhlangano ya Vukreste. Loko u va kona eka yona nkarhi na nkarhi u ta ya u navela ku va ni vuxaka na Yehovha naswona u navela ku n’wi gandzela. Sweswo swi ta endla leswaku u nga xwi.—Matewu 5:3.

Switsundzuxo: Endzhaku ka minhlangano yin’wana ni yin’wana, byela xivulavuri hambi ko va xin’we ndlela leyi u pfunekeke ha yona eka nkulumo ya xona. Tirhisa dayari ya wena ku tsala yinhla yin’we leyi u vuyeriweke eka yona hi ku va kona eka nhlangano wolowo. Naswona tanihi leswi swo tala leswi dyondziwaka eminhlanganweni yoleyo swi khumbaka ntirho wa hina wo chumayela, tivekele pakani yo antswisa ndlela leyi u vulavulaka ha yona ni van’wana hi ripfumelo ra wena. Leswi swi ta ku pfuna leswaku rungula leri u ri dyondzaka eminhlanganweni ri va ra xiviri eka wena.

“Ndzi dyondzisiwe ndza ha ri xihlangi leswaku eminhlanganweni a ndzi yi ntsena loko ndzi swi lava. Kutani a ndzi nga xwi eka yona. Swa ha ri tano ni sweswi.”—Kelsey.

Yinhla ya nkoka: Lava nga xwiki eminhlanganweni va yi tsakela swinene naswona va vuyeriwa!

2. RHIYA NDLEVE

Tsalwa leri nga ku pfunaka: ‘Nyikela nyingiso eka ndlela leyi u yingisaka ha yona.’—Luka 8:18.

Valavisisi va vula leswaku muyingiseri u va a rivale 60 wa tiphesente ta leswi a swi tweke loko nhlangano lowu a a ri eka wona wu hela. Loko mali ya wena a yi nyamalala hi ku hatlisa hi ndlela yoleyo, xana a wu nga ta endla swo karhi leswaku u yi sirhelela?

Switsundzuxo: Tshama ni vatswari va wena ekusuhi ni xiteji, laha u nga ta ka u nga kavanyeteki hi ku olova. Tsala tinhla. Hambileswi vanhu va nga dyondziki hi tindlela to fana, ku tsala tinhla swi nga ku pfuna leswaku u dzikisa mianakanyo ya wena eka xivulavuri naswona ti nga tlhela ti ku pfuna hi ku famba ka nkarhi.

“A swi ndzi tikela ku rhiya ndleve eminhlanganweni, kambe se ndzi antswisile. Ndzi ringeta ku tsundzuka xivangelo xo va ndzi ri kwalaho. A hi mukhuva, ku fana ni ku ya ekerekeni. Ndzi ya eka yona leswaku ndzi ya gandzela ni ku dyondza swo karhi leswi ndzi nga ta swi tirhisa evuton’wini bya mina.”—Kathleen.

Yinhla ya nkoka: Ku ya eminhlanganweni u nga rhiyi ndleve swi fana ni ku ya enkhubyeni wa swakudya kambe u nga dyi.

3. HOXA XANDLA

Tsalwa leri nga ku pfunaka: “Vanhu va dyondza eka vanhu van’wana, tanihi leswi ni nsimbi yi lotiwaka hi nsimbi.”—Swivuriso 27:17, Good News Translation.

Tanihi muntshwa, ku ni xiphemu xa nkoka lexi u xi hetisisaka eminhlanganweni ya vandlha. U nga byi tekeli ehansi vukona bya wena ni ku hoxa ka wena xandla, ku nga va hi ku hlamula eka bulo ra swivutiso ni tinhlamulo kumbe hi ku va ni xinakulobye ni vapfumeri-kulorhi.

Switsundzuxo: Tivekele pakani ya ku hlamula hambi ku ri kan’we eka bulo ra swivutiso ni tinhlamulo. Loko minhlangano yi nga si sungula, exikarhi ka yona kumbe endzhaku ka yona, u nga pfuneta hi mintirho leyi faneleke yi endliwa kumbe hi ku basisa. Ringeta ku sungula bulo ni munhu loyi u nga taliki ku kuma nkarhi wo vulavula na yena.

“Loko ndza ha ri emalembeni ya kondlo-a-ndzi-dyi, a ndzi pfuneta ku fambisa swikurisa-marito ni ku lunghisa xiteji. Ku va ni vutihlamuleri byebyo swi endle ndzi titwa ndzi ri wa nkoka naswona swi ndzi susumetele ku va kona ni ku fika hi nkarhi. Sweswo swi endle leswaku ndzi wu tsakela swinene ntiyiso wa Bibele ni ku gandzela Xikwembu.”—Miles.

Yinhla ya nkoka: U nga tshami hi mavoko—endla xan’wa-nchumu! Ku hoxa xandla swi ta ku vuyerisa ematshan’weni yo va muhlaleri ntsena.

Swihloko swin’wana leswi nge “Vantshwa Va Vutisa” swi kumeka eka Web site leyi nge www.watchtower.org/ype

[Bokisi/Swifaniso leswi nga eka tluka 21]

WA RHAMBIWA!

Xana u nga swi tsakela

● Ku dyondza ntiyiso malunghana ni Xikwembu?

● Ku antswisa vumunhu bya wena?

● Ku kuma vanghana lavanene?

Minhlangano ya Timbhoni ta Yehovha yi nga ku pfuna ku endla sweswo ni swin’wana swo tala! Timbhoni ta Yehovha ti hlangana kambirhi hi vhiki leswaku ti gandzela eTiholweni ta tona ta Mfumo. A ku humesiwi minhlengo naswona vaendzi va tshama va amukelekile.

U nga kayeli! Tiholo ta Mfumo a ti fani ni tikereke leti u tshameke u ya eka tona. Eminhlanganweni ya Timbhoni ta Yehovha ku kandziyisiwa ngopfu dyondzo ya Bibele naswona u ta dyondza ndlela leyi Rito ra Xikwembu ri nga ku pfunaka ha yona leswaku u va ni vutomi lebyinene!—Deteronoma 31:12; Esaya 48:17.

Sai—Loko ndzi ya eHolweni ya Mfumo ro sungula, ndzi hlamarile loko ndzi nga voni swifaniso, ku nga ri na loyi a ambaleke ku fana ni muprista naswona ku nga ri na loyi a ndzi byelaka leswaku ndzi humesa mali. Hinkwavo va ndzi amukerile naswona ndzi titwe ndzi sirhelelekile. Leswi a ku buriwa ha swona eminhlanganweni a swi olova ku swi twisisa. Lowu a ku ri wona ntiyiso lowu a ndzi wu lava!

Deyanira—A ndzi ri ni malembe ya 14 loko ndzi ya ro sungula eminhlanganweni ya Timbhoni ta Yehovha. Hinkwavo va ndzi amukele hi mandla mambirhi. A swi tikomba leswaku a va tsakela vukona bya mina. Hikwalaho ka ndlela va ndzi khomeke ha yona ro sungula, a swi ndzi tikelanga ku tlhelela!

[Bokisi leri nga eka tluka 22]

Kumisisa leswi nga ta dyondziwa eka minhlangano ya vandlha leyi landzelaka. Hlawula xiphemu xin’we xa nongonoko lexi ku tsakisaka kutani u . . .

TSEMA KUTANI U ENDLA TIKOPI

Tsala laha ku nga riki na nchumu u nga si ya eminhlanganweni.

Nhloko-mhaka ya nkulumo:

․․․․․

Leswi ndzi lavaka ku swi tiva hi yona:

․․․․․

Tsala laha ku nga riki na nchumu endzhaku ka nkulumo yoleyo.

Leswi ndzi swi dyondzeke:

․․․․․

Leswi ndzi nga ta swi byela xivulavuri malunghana ni leswi ndzi swi dyondzeke eka nkulumo ya xona:

․․․․․