TA RIVALA

United States

Xiviko xa Ndzawulo ya Nsirhelelo ya le United States xi vula leswaku emalembeni ya khume lama hundzeke, vatirhi va le rivaleni ra swihaha-mpfhuka lava sechaka mindzhwalo va tekele vanhu swilo leswi yirisiwaka swa kwalomu ka 50 wa timiliyoni. Hi 2011 ntsena, vatirhi volavo va teke swibamu leswi tlulaka 1 200 etibegeni leti a ti fanele ti nghenisiwa eka swihaha-mpfhuka. Vini va swona vo tala va vule leswaku a va rivele leswaku va hoxe swibamu etibegeni ta vona.

Brazil

Vatirhela-mfumo va dyondzo va sungule ku nghenisa ti-chip eka tiyunifomo ta xikolo ku sivela vana leswaku va nga xwi exikolweni handle ka mpfumelelo. Mutswari u rhumeriwa SMS loko michini leyi tirhaka hi ti-chip teto yi kuma leswaku n’wana u fikile exikolweni nakambe loko n’wana a lete hi timinete leti tlulaka 20 mutswari u rhumeriwa SMS.

Norway

Tiko ra Norway a ra ha tirhisani ni Kereke ya Lutere. A ku ri ro sungula ku va Mfumo wa le Norway wu vhotela ku cinciwa ka vumbiwa swin’we ni ku hunguta vuxaka exikarhi ka Kereke ni Mfumo.

Czech Republic

Nkambisiso wun’wana wu boxe leswaku vatirhi lava endlaka 65 wa tiphesente va le tikweni ra Czech va vule leswaku va titwa va boheka ku hlamula tinqingho, ti-e-mail kumbe ti-SMS leti fambisanaka ni ntirho hambiloko va nga ri entirhweni. Vanhu lava tlulaka 30 wa tiphesente va swi teka ku ri nsele loko va nga hlamuli hi ku hatlisa.

India

Hambileswi mpimo wa swakudya leswi tshoveriwaka wu tlakukeke hi tiphesente leti lavaka ku ringana 50 emalembeni ya 20 lama hundzeke naswona ku vekiweke 71 wa timiliyoni ta tithani ta rhayisi ni koroni eswitlatini, tiko ra Indiya swa ha ri tikela ku wundla vaaki va rona. I tiphesente ta kwalomu ka 40 ntsena ta swakudya sweswo leswi vekiweke leswi nyikiwaka vanhu. Vukanganyisi ni ku tlangisa swakudya i swin’wana swa swilo leswi vangaka xiphiqo lexi.