TA RIVALA

United States

Nkambisiso wun’wana wu kombise leswaku ku yingisela vuyimbeleri, ku vulavula hi tiselfoni ni swin’wana swi endla leswaku kwalomu ka munhu un’we eka vanharhu lava fambaka hi milenge a kavanyeteka loko a tsemakanya switarata leswi ku tshamaka ku ri karhi ku hundza timovha. Nchumu lowu a wu ri ni khombo swinene a ku ri ku rhumela marungula va ri karhi va tsemakanya switarata. Sweswo a swi endla leswaku swi va tekela nkarhi wo lehanyana ku tsemakanya, ku tlula lava a va nga kavanyetiwi hi nchumu naswona a va tala ku tsemakanya nkarhi wu nga si fika etirhobotweni, va tsemakanya etindhawini leti nga fanelangiki kumbe va tsemakanya va nga langutanga ematlhelo.

Nigeria

Vavasati lava tlhakisiweke eNigeria va yisiwa eYuropa va hlambanyisiwile etindhumbheni ta vuloyi leswaku a va nge byeli munhu leswi va nga ta va endla swona. Leswi vavasati volavo a va chava leswaku loko vo tshuka va byela munhu wo karhi va nga xupuriwa exivandleni xa mimoya, swi endle leswaku vatlhakisi volavo va va lawula va tlhela va tiyiseka leswaku vavasati volavo va tirha tanihi mahlonga ya rimbewu.

Spain

Vanhu lava endlaka tiphesente ta kwalomu ka ntlhanu ku ya eka khume lava nga ni nkarhi wo leha va nga tirhi, eka ti-CV ta vona va susa tidigri ni ntokoto lowu va nga na wona hikuva leswi swi endla va vonaka va dyondzeke ngopfu.

Misava

Musi lowu humesiwaka hi switofu swa malahla wu tekiwa tanihi lowu endlaka leswaku ku fa vanhu vo tala ematikweni lama nga le vuswetini, laha hi lembe ku faka vanhu va timiliyoni ta mune va dlayiwa hi mavabyi lama vangiwaka hi musi. Valavisisi va vula leswaku tikhemikhali leti nga ni chefu leti humesiwaka hi switofu swa tihunyi kumbe swa malahla ta dlaya ku fana ni chefu leyi kumekaka eka musi wa fole.