Ku Endzela Tiko Ra El Salvador

KWALOMU ka malembe ya 500 lama hundzeke loko vanhu va le Spain va fika etikweni leri sweswi ri vitaniwaka El Salvador, vanhu lava a va tshama endhawini yoleyo a va vitana ndhawu yoleyo leswaku i Cuscatlán, ku nga vito leri vulaka “Tiko ra Ndzalama.” Namuntlha vanhu vo tala va le El Salvador i vatukulu va vanhu va tinxaka leti a ti tshama kwalaho swin’we ni va vahlapfa lava humaka eYuropa.

Vanhu va le El Salvador va tiviwa hi ku gingiriteka ni ku va ni xinghana. Va ni mahanyelo lamanene naswona va xixima. Va pfuxelana hi xichavo loko va nga si sungula mabulo kumbe loko va lava ku sungula bindzu ni van’wana hi ku vula va ku, “Buenos días” (avuxeni) kumbe “Buenas tardes” (inhlikanhi). Entiyisweni, vanhu va le El Salvador lava tshamaka ematiko-xikaya ni le madorobeni lamatsongo va swi teka ku nga ri mahanyelo lamanene ku hundza munhu u nga n’wi xewetanga.

Swakudya swin’wana leswi vanhu va le El Salvador va swi rhandzaka ngopfu i pupusa, ku nga xinkwa xa xirhendzevutana lexi endliwaka hi mapa ya mavele (kumbe ya rhayisi) lexi endzeni ka xona xi cheriwaka chizi ni tinyawa swin’we ni nyama ya nguluve kumbe swilo swin’wana. Ti-pupusa hakanyingi yi dyiwa ni tamati-soso ni curtido, ku nga khavichi leri pfanganisiweke ni tikherotsi, tinyala ni vhiniga leyi nga ni swinyunyeteri. Hambileswi vanhu van’wana va dyaka pupusa hi mukwana ni foroko kambe hi xintu yi dyiwa hi mavoko.

XANA A WU SWI TIVA? El Salvador ri vitaniwa tiko ra tivholkheno. Ku ni tivholkheno leti tlulaka 20, leti tin’wana ta tona ta ha bulukaka. Boboma ra Los Tercios ri khuluka ehenhla ka maribye yo leha lama veke kona endzhaku ka loko ku buluke vholkheno.

Ku ni Timbhoni ta Yehovha to tlula 38 000 le El Salvador naswona ti hlanganyela emavandlheni ya kwalomu ka 700. Ti dyondzisa vanhu va kwalomu ka 43 000 Bibele hi Xipaniya, Xinghezi ni hi Ririmi ra Mavoko ra le El Salvador.