Mali

Xana mali i rimitsu ra vubihi hinkwabyo?

“Ku rhandza mali i rimitsu ra mixaka hinkwayo ya swilo swo biha.”—1 Timotiya 6:10.

LESWI VANHU VAN’WANA VA SWI VULAKA

Mali i rimitsu ra vubihi hinkwabyo.

LESWI BIBELE YI SWI VULAKA

“Ku rhandza mali”—ku nga ri mali hi yoxe—swi vanga “swilo swo biha.” EBibeleni, Hosi Solomoni loyi a a fuwile u hlamusele mixaka yinharhu ya swilo swo biha leswi hakanyingi swi humelelaka vanhu lava rhandzaka mali. Ku vilela: “Swo tala swa loyi a fuweke a swi n’wi pfumeleli leswaku a etlela.” (Eklesiasta 5:12) Ku nga eneriseki: “La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo.” (Eklesiasta 5:10) Ku ringeka leswaku u tlula nawu: “Loyi a hatliselaka ku kuma rifuwo a nge tshami a nga ri na nandzu.”—Swivuriso 28:20.

Hi xihi xikongomelo xa mali?

“Mali [i] xisirhelelo.”—Eklesiasta 7:12.

LESWI VANHU VAN’WANA VA SWI VULAKA

Mali yi endla leswaku u sirheleleka u tlhela u tsaka.

LESWI BIBELE YI SWI VULAKA

Mhaka ya leswaku mali yi xava ntsako ni nsirhelelo i xiphemu xa “matimba ya vuxisi bya rifuwo.” (Marka 4:19) Nilokoswiritano, “mali yi fikelela swilo hinkwaswo.” (Eklesiasta 10:19) Hi xikombiso, mali yi nga xava swilo leswi u swi lavaka leswaku u kota ku hanya—swo tanihi swakudya ni mirhi.—2 Vatesalonika 3:12.

Mali yi tlhela yi ku pfuna ku hlayisa ndyangu wa wena. Phela Bibele yi ri: “Loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, u landzule ripfumelo.”—1 Timotiya 5:8.

U nga yi tirhisa njhani mali hi vutlhari?

‘Rhanga u tshama ehansi u hlayela ntsengo.’—Luka 14:28.

LESWI BIBELE YI SWI VULAKA

Tirhisa mali hi ndlela leyi amukelekaka eka Xikwembu. (Luka 16:9) I vutlhari ku tirhisa mali hi ndlela leyinene ni hi ku tshembeka. (Vaheveru 13:18) Leswaku u papalata ku tivangela ndzhwalo hi ku tirhisa mali yo tlula leyi u nga na yona, “mukhuva wa [wena] wa vutomi a wu pfumale rirhandzu ra mali.”—Vaheveru 13:5.

Hambileswi Bibele yi nga swi soliki ku va ni swikweleti, kambe ya lemuxa: “Mulombi i nandza wa mulombisi.” (Swivuriso 22:7) Papalata ku xava swilo u nga tiyimiselanga hikuva “un’wana ni un’wana la hatlisaka ngopfu, hakunene u ta wela eku pfumaleni.” (Swivuriso 21:5) Ematshan’weni ya sweswo, ‘veka swo karhi etlhelo hi ku ya hilaha u fuweke hakona’ u tlhela u veka mali leswaku u ta xava swilo leswi nga swa nkoka eka wena.—1 Vakorinto 16:2.

Bibele yi hi khutaza ku “[hanya] hi ku nyika.” (Luka 6:38) Vanhu lava lavaka ku tsakisa Xikwembu va ni xivangelo lexi twalaka xo hanana, hikuva “Xikwembu xi rhandza munyiki la tsakeke.” (2 Vakorinto 9:7) Hikwalaho, “mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.”—Vaheveru 13:16.