KU LANGUTANA NI KU TLAKUKA KA MINXAVO
Fambisana Ni Swiyimo
Loko hakatsongotsongo minxavo yi tlakuka, swi nga hi tikela ku swi xiya, ngopfungopfu loko miholo ya hina na yona yi engeteleka. Hambiswiritano, loko minxavo yi tlakuka kambe miholo yi nga engeteleki, hi nga ha vilela ni ku karhateka ngopfungopfu loko hi ri ni ndyangu lowu hi wu khathalelaka.
A hi nge swi koti ku lawula ndlela leyi swilo swi durhaka hayona. Kambe, loko hi fambisana ni swiyimo swi nga hi vuyerisa.
HIKWALAHOKAYINI SWI RI SWA NKOKA KU FAMBISANA NI SWIYIMO?
Vanhu lava fambisanaka ni swiyimo swa ku tlakuka ka minxavo swa va olovela ku . . .
tshama va ri lava rhuleke. Loko hi ri lava rhuleke, hi ehleketa kahle ni ku endla swiboho leswinene.
papalata mikhuva leyi nga riki yinene. Hi xikombiso, a swi kahle ku nga hakeli swikweleti kumbe ku tirhisa mali hi vusopfa.
papalata ku holova ni swirho swa ndyangu hi mali.
kumisisa tindlela to fambisana ni swiyimo leti nga ha katsaka ku xava swilo leswi va swi lavaka ni ku nga tirhisi mali yo tala.
LESWI U NGA SWI ENDLAKA
Tiyimisele ku fambisana ni ku cinca. Loko minxavo yi tlakuka, swi ta va swinene ku ringeta ku hunguta ndlela leyi hi tirhisaka mali hayona. Vanhu van’wana va ringeta ku tiphina hi vutomi lebyi nga fambisaniki ni swiyimo swa vona swa timali, sweswo swi fana ni loko va ringeta ku hlambela enambyeni lowu khulukaka hi ku hatlisa. Eku heteleleni va karhala. Loko u ri ni ndyangu u nga ha vilerisiwa hi leswaku u ta wu khathalela njhani. Kambe, tsundzuka leswaku ndyangu wa wena wu lava u wu rhandza ni ku wu nyika nkarhi ku tlula swilo hinkwaswo.
Ku ringeta ku tiphina hi vutomi lebyi nga fambisaniki ni swiyimo swa wena swa timali, swi fana ni loko u ringeta ku hlambela enambyeni lowu khulukaka hi ku hatlisa